Mukambausi 3:11​—“Zintu Zyoonse Wazipanga Kuti Kazili Zibotu Muciindi Canzizyo”

“Zintu zyoonse wazipanga kuti kazili zibotu muciindi canzizyo. Wabikka abuumi butamani mumyoyo yabo; nokuba boobo bantu kunyina nobayakwiimvwisya milimo eeyo Leza mwini-mwini njaacita kuzwa kumatalikilo kusikila kumamanino.”​—Mukambausi 3:11, Bbaibbele lya Busanduluzi Bwanyika Mpya.

“Wacita kuti zintu zyoonse zibote kuziindi zyazyo zyeelede. Wabika bulangizi bwabuumi buteeli mumyoyo yabo, nekubaboobo muntu takonzyi kumvwisya milimo yoonse Leza njaakacita kuzwa kumatalikilo kusikila kumamanino.”​—Mukambausi 3:11, The Bible in Tonga Lyamu 1963.

Bupanduluzi bwa Mukambausi 3:11

“Zintu Zyoonse Wazipanga Kuti Kazili Zibotu Muciindi Canzizyo.” Bbala lya Chihebrayo lyakasandululwa kuti “kazili zibotu” talyaambi buyo cintu cimwi cilibonya kabotu. Alimwi lilakonzya kusandululwa kuti ‘zibambidwe kabotu,’ naa ‘zipangidwe bweelede.’ (Mukambausi 3:11, bupanduluzi buyungizyidwe) Milimo ya Leza mibotu taibikkilizyi buyo zintu zyoonse nzyaakalenga pele alimwi azintu nzyacita kutegwa azuzikizye kuyanda kwakwe.​—Daniele 2:21; 2 Petro 3:8; Ciyubunuzyo 4:11.

“Wabikka abuumi butamani mumyoyo yabo.” Leza wakapanga bantu kuti kabapona lyoonse mane kukabe kutamani. (Intembauzyo 37:29) Alimwi buya, wakabapa luyandisisyo lwakupona lyoonse. Nokuba boobo, banabukwetene bakusaanguna nkokuti ba Adamu a Eva tiibakamumvwida Leza. Akaambo kaceeci, balo abana babo bakali kuyoofwa. (Matalikilo 3:17-19; Baroma 5:12) Pele Leza wakasyomezya “kukkutya cilenge coonse cipona kwiinda mukucipa ncociyanda,” kubikkilizya aluyandisisyo lwakupona lyoonse mane kukabe kutamani. (Intembauzyo 145:16) Bbaibbele lilapandulula Jehova mbwayoopa kuti cikonzyeke kubantu kuba abulangizi alimwi bwakuyoopona kukabe kutamani.​—Baroma 6:23.

“Bantu kunyina nobayakwiimvwisya milimo eeyo Leza mwini-mwini njaacita kuzwa kumatalikilo kusikila kumamanino.” Busongo bwa Leza tabweeli cakuti Bbaibbele lyaamba kuti ‘kunyina uunga wabuteelela.’ (Baroma 11:33) Nokuba boobo, Leza uliyandide kuyubununa makanze aakwe kuli baabo bayanda kumukkomanisya.​—Amosi 3:7.

Majwi aayengelede lugwalo lwa Mukambausi 3:11

Bbuku lya Mukambausi lyakalembwa a Mwami Solomoni wamu Israyeli yansinku, mwaalumi wakazyibidwe kuti musongo kapati. Lilijisi lulayo lugwasya mubuumi kujatikizya zintu zilaampindu ncobeni azinyina. (Mukambausi 1:2, 3; 2:1, 17; 7:1; 12:1, 13) Mucaandaano 3, Solomoni wakapandulula zintu zilaakucitika mubuumi. Wakaamba zintu zinji ziindene-indene zicitika. (Mukambausi 3:1-8, 10) Leza wakapa bantu lwaanguluko lwakusala zintu nzyobayanda kucita alimwi anobeelede kuzicita. (Deuteronomo 30:19, 20; Joshua 24:15) Solomoni wakapandulula kuti lilikke buyo bantu nobacita zintu kweendelana amakanze aa Leza alimwi akulemeka ‘ciindi ncabikkide,’ ndendilyo nobakonzya kujana mpindu akukukkomanina kubeleka kwabo canguzu. Eeci Solomoni wakacaamba kuti “ncipego ca Leza.”​—Mukambausi 3:1, 12, 13.

Amweebelele kavidiyo aaka kutegwa mubone twaambo tupati-pati ituli mubbuku lya Mukambausi.