Bahebrayo 4:12​—“Jwi lya Leza Lilaabuumi Alimwi Lilaanguzu”

“Nkaambo jwi lya Leza lilaabuumi alimwi lilaanguzu alimwi lilabosya kwiinda panga lili lyoonse likwengedwe koonse-koonse alimwi lilayasa mane kukwaandaanya buumi amuuya, akukwaandaanya manungo aazifwuwa kumooma, alimwi lilakonzya kuzyiba mizeezo amakanze aamumoyo.”​—Bahebrayo 4:12, Bbaibbele lya Busanduluzi Bwanyika Mpya.

“Nkaambo ijwi lya-Leza lili abuumi, lili anguzu, lilabosya kwiinda iceba ilijisi mabemba obile, lilayasa mane kukwaanzaanya buumi amuuya, aalo maswaanganino aazifuwa amooma, alimwi lilabeteka kuyeeya akuyanda kwamoyo.”​—Bahebrayo 4:12, The Bible in Tonga Lyamu 1963.

Bupanduluzi bwa Bahebrayo 4:12

Mulumbe wa Leza kubantu, kweelana ambokulembedwe mu Bbaibbele, ulijisi nguzu zyakuyubununa mizeezo yesu alimwi amakanze. Kuyungizya waawo, mulumbe ooyu ulakonzya kucinca bantu kutegwa babe abuumi bubotu.

“Jwi lya Leza lilaabuumi.” Mabala aakuti “jwi lya Leza” aamba zintu nzyaakasyomezya Leza, naa makanze aakwe, kweelana ambokulembedwe mu Bbaibbele.a Cibeela cipati camakanze aayo ncakuti bantu bamvwida bakapone kukabe kutamani munyika muli luumuno alukamantano.​—Matalikilo 1:28; Intembauzyo 37:29; Ciyubunuzyo 21:3, 4.

Mbuti jwi lya Leza, naa makanze aakwe mbwaajisi “buumi”? Kaambo kamwi nkakuti, lilijisi nguzu zyakubasika aamoyo aabo balizumina, kubapa bulangizi alimwi abuumi bujisi mpindu. (Deuteronomo 30:14; 32:47) Alimwi zintu nzyaakasyomezya Leza zili ‘abuumi’ mukuti Leza uupona uli mukubeleka kutegwa azuzikizye zisyomezyo zyakwe cakumaninina. (Johane 5:17) Mukwiimpana abantu, Leza tasyomezyi cintu akulubako naa kubona kuti tajisi nguzu zyakucizuzikizya. (Myeelwe 23:19) Ijwi lyakwe “talikapiluki cinkwamaanza [kulinguwe].”​—Isaya 55:10, 11.

“Jwi lya Leza . . . lilaanguzu.” Mabala aakuti “lilaanguzu” alimwi alakonzya kwaambwa kuti “kuzuzikizya kufwumbwa [jwi eelyo] ncoliyanda kuzuzikizya.” Aboobo, kufwumbwa cintu Jehovab Leza ncaamba naa kusyomezya ceelede kuzuzikizyigwa. (Intembauzyo 135:6; Isaya 46:10) Alimwi buya, Leza ulakonzya kuzuzikizya makanze aakwe munzila njotwatali kuyeeyela.​—Baefeso 3:20.c

Ijwi lya Leza alimwi “lilaanguzu” mukuti lilabagwasya babombe myoyo kucinca buumi bwabo. Injiisyo zya Leza zilaba cibeela cabuumi bwabo, kucinca mbobayeeya, bukkale bwabo, alimwi ambaakani zyabo. (Baroma 12:2; Baefeso 4:24) Munzila eeyi, ‘jwi lya Leza . . . alimwi lilabeleka’ mulibaabo balizumina.​—1 Batesalonika 2:13.

“Jwi lya Leza . . . lilabosya kwiinda panga lili lyoonse likwengedwe koonse-koonse.” Munzila yamaambilambila, ijwi lya Leza lilabosya kwiinda panga lili lyoonse lyakapangwa amuntu. Cili boobo, akaambo kakuti mulumbe wa Leza ulakonzya kubasika amoyo​—buntu bwamukati​—munzila yakuti kunyina lwiiyo lwamuntu lukonzya kusika mpousika walo. Eeci cilasalazyigwa mubupanduluzi butobela buli kulugwalo lwa Bahebrayo 4:12.

“Jwi lya Leza . . . lilayasa mane kukwaandaanya buumi amuuya, akukwaandaanya manungo aazifwuwa kumooma.” Mu Bbaibbele, “buumi” bulakonzya kwaamba muntu mbwalibonya, mpoonya “muuya” lilakonzya kwaamba muntu mbwabede mukati mwini. (Bagalatiya 6:18) Munzila yamaambilambali, “ijwi lya Leza” lilakonzya kuyasa kusikila “kumooma,” nkokuti bwini mbotulimvwa alimwi amizeezo. Kwiinda mukuyubununa bwini mbotubede mukati, mwalo muntu mwatakonzyi kubona, zintu nzyatuyiisya Jehova zilakonzya kutugwasya kucinca bweelede. Eeci cileta lukkomano ku Mulengi wesu alimwi akulindiswe.

“Jwi lya Leza . . . lilakonzya kuzyiba mizeezo amakanze aamumoyo.” Muntu mbwalitambula jwi lya Leza kulakonzya kutondezya mizeezo iini njajisi, alimwi amakanze aakwe eeni, calo cipa kuti acince bukkale. Mucikozyanyo, ikuti muntu watondezya luyandisisyo kujwi lya Leza kwiinda mukupanga kucinca kumwi kuyandika mubuumi bwakwe, utondezya kuti ulalicesya alimwi ulasyomeka. Muntu ooyo uyanda kukkomanisya Mulengi wakwe. Kulubazu lumwi, ikuti kasola kulijanina bubi jwi lya Leza, uyubununa bube butali kabotu, mbuli kulisumpula akuliyanda. Ambweni akusola kupa zilitamizyo zyakucita zintu zitamukkomanisyi Leza.​—Jeremiya 17:9; Baroma 1:24-27.

Lifalensi imwi yakaamba kuti, ijwi lya Leza “lilakonzya kusika mwini mukati kamuntu.” Kunyina cibeela camukati kamuntu Leza ncatakonzyi kubona alimwi jwi lyakwe ncolitakonzyi kuyubununa. “Zintu zyoonse zili atuba alimwi zilivwumbwidwe kumeso aayooyo ngotweelede kulyaambilila,” mbolwaamba lugwalo lwa Bahebrayo 4:13.

Makani aayengelede lugwalo lwa Bahebrayo 4:12

Bbuku lyamu Bbaibbele lya Bahebrayo lyakalembwa amwaapostolo Paulo cakuma 61 C.E. Lyakasololelwa aa Leza alimwi lyakalembelwa Banakristo ba Juda ibakali kukkala ku Jerusalemu aku Judaya.

Muzyaandaano 3 a 4, Paulo wakatondezya cikozyanyo cabana Israyeli basinku mbocili ncenjezyo ku Banakristo. (Bahebrayo 3:8-12; 4:11) Jehova wakasyomezya kubavwuna bana Israyeli kuzwa mubuzike akubabikka munyika mwalo mobakali ‘kuyookkala cakuliiba.’ (Deuteronomo 12:9, 10) Nokuba boobo, bana Israyeli ibakazwa ku Egepita cakwiinduluka-induluka tiibakazisyoma zisyomezyo zya Leza alimwi tiibakaitobela milawo yakwe. Akaambo kaceeci, tiibakanjila ‘mukulyookezya kwa Leza,’ alimwi tiibakaba acilongwe cibotu anguwe. Muciindi caboobo, bakafwa munkanda. Nobaba bana babo ibakakona Nyika Yakasyomezyedwe, abalo bakatalika kutamumvwida Jehova. Mukuya kwaciindi, eeci cakapa kuti kube mapenzi manji mucisi.​—Nehemiya 9:29, 30; Intembauzyo 95:9-11; Luka 13:34, 35.

Paulo wakapandulula kuti Banakristo beelede kwiiya kuzwa kucikozyanyo cibi cabana Israyeli. Mukwiimpana ambabo, tulakonzya kunjila mukulyookezya kwa Leza kwiinda mukuswiilila jwi lyakwe alimwi akuba alusyomo luyumu muzisyomezyo zyakwe.​—Bahebrayo 4:1-3, 11.

Amweebelele kavidiyo aaka kutegwa mubone twaambo tupati-pati ituli mubbuku lya Bahebrayo.