Kulwanina Lwaanguluko Lwakukomba ku Latin America

Akati kamamiliyoni aabantu bakkala ku Latin America, ibanji bajisi mwaambo wabo azilengwa. Ibunji bwabantu aaba, mbakwesu abacizyi bakumuuya, alimwi balazikkomanina zilengwa zyabo. Kutegwa bagwasye bantu kumuuya, balasandulula akwaabila zyakumwaya zya Bakamboni ba Jehova mumyaambo yiinda ku 130 yaku Latin America.a Pele, ibamwi balakazyigwa akaambo kakusala kubelekela Jehova, alimwi akukaka kutola lubazu muzilengwa zitali zyamu magwalo izidumide kubusena nkobabede. Ino zyakusanga zyanu zyabagwasya buti?

Bakagwasyigwa Kupiluka Kuminzi Yabo

Ku Mexico, bakwesu abacizyi baambaula mwaambo waci Huichol, alimwi ibakkala mumalundu aaku Jalisco State, bakakaka kutola lubazu muzilengwa zyabukombi izyakali kukazyanya amanjezyeezya aabo.b Pele eeci cakabanyemya bamwi mucilawo. Mu December 4, 2017, kabunga kabantu basilunya kakalwana Bakamboni bamwi antoomwe ambobakali limwi. Kabunga aaka kakabatanda mucilawo, kubanyonyweeda zintu, akubakonga kuti balabajaya aabo ibatiisole kupiluka kuminzi yabo.

Bakamboni ibakali kukkala mumasena aakali munsi-munsi bakabalanganya bakwesu abacizyi aaba. Pele ino ncinzi cakeelede kucitwa kutegwa bapiluke kuminzi yabo? Mukwesu wazina lya Agustín wakapandulula kuti: “Tiitwakajisi mali aakubbadela loya, alimwi tiitwakazyi kwakuunka kuyoolomba lugwasyo kujatikizya makani aamilawo.”

Mbwaanga lwaanguluko lwabakwesu lwakukomba lwakali muntenda, bakumutabi waku Central America bakabweza ntaamu cakufwambaana. Cakusaanguna, bakalomba beendelezi bakubusena ooko kwaavwuntauzya makani. Kumane, bakazumizyigwa abamu Kkomiti Yabeendelezi ya Kabunga Keendelezya ka Bakamboni ba Jehova kubelekela antoomwe aba Dipatimenti Yamilawo iili kumaofesi mapati kutola makani aaya kunkuta. Makani aaya akasika kunkuta mpati yaku Mexico yiitwa kuti Supreme Court of Justice of the Nation.

Kabunga kamaloya bazwa muzisi ziindene-indene bakapanduluda nkuta kuti mbubwenya buyo bamwi mbobeelede kulemeka zilengwa zyabantu mucilawo, abalo bantu beelede kulemeka akukwabilila lwaanguluko lwabantu babo. Bantu boonse kuli lwaanguluko ndobajisi, tacikwe makani abusena nkobakkala.

Mu July 8, 2020, Nkuta Mpati yakakosola makani aaya akuba kulubazu lwa Bakamboni ba Jehova. Yakalailila kuti boonse ibakatandidwe kuminzi yabo beelede kupiluka. Ba Agustín, ibaambidwe kale, bakaamba mbobakalimvwa balo abamwi: “Tulikkomene kapati akulumba kuliceeci ncobatucitila bakwesu. Kakunyina lugwasyo lwabo, kunyina ncotwali kukonzya kucita.”

“Kucitila Bantu Basyoonto Zintu Zipati”

Abalo bakwesu baku San Juan de Ilumán, imunzi uuli ku Ecuador, kwalo bantu banji kapati nkobaambaula ci Otavalo Valley, bakapenzyegwa munzila iikozyenye. Mu 2014, nobakamana kubweza mapepa aayandika, bakatalika kuyaka Ŋanda ya Bwami. Nokuba boobo, mupaizi umwi wakasololela nkamu yabantu bainda ku 100 kuyakwiimika mayake. Mpoonya bantu aaba bakalailila Bakamboni ba Jehova kuti baleke kuswaangana antoomwe kukomba.

Bamudipatimenti yamilawo bakumutabi waku Ecuador akumaofesi mapati bakabelekela antoomwe kwiiminina lwaanguluko lwakukomba lwambungano eeyi. Bakwesu bakaatola kunkuta makani aaya. Eeci cakapa bantu mucilawo kuleka kubakazya bakwesu akubazumizya kuti batalike alimwi kuswaangana antoomwe akumanizya kuyaka Ŋanda yabo ya Bwami. Pele kutegwa bakwesu kabanookwabilidwe lyoonse, baiminizi besu bakalomba bankuta mpati kwiingula mubuzyo ooyu: Sena bantu bamucilawo baleelede kulemeka lwaanguluko lwabantu nyika yoonse?

Mu July 16, 2020, nkuta iitegwa Constitutional Court yaku Ecuador, nkuta mpati mucisi, yakaamvwa makani aaya. Bakwesu bamaloya baku Ecuador bakayiiminina mbungano. Kuyungizya waawo, bakwesu bone ibabelekela mumasi aamwi ibacibwene mumakani aamilawo bakabandika ankuta. Akaambo kabulwazi bwa COVID-19, bakacita videoconference, naa kukwabanina muluwo. Eeci cakali ciindi cakusaanguna basinkuta kuzumizya maloya ibaiminina Bakamboni ba Jehova kubandika ankuta kubelesya nzila eeyi.c Baiminizi aaba bakaambila basimilawo kubona kuti lwaanguluko lwabantu taludyaamininwi akaambo buyo kakuti bazulilwa kucilawo cimwi.

Bakwesu baku Otavalo Valley balimukulangila caluyandisisyo nkuta mboiyakwaakosola makani. Calino, balikkomene alugwasyo ndobakatambula. Ba César, mwaalu mumbungano ya Ilumán Quichua, bakaamba kuti: “Alikke Jehova, kwiinda mumbunga yakwe nguukonzya kucitila bantu basyoonto zintu zipati.”

Bamaloya boonse bakagwasyilizya Mbaakamboni ba Jehova, alimwi bakacita oobo kakunyina kubbadelesya. Nokuba boobo, kutola makani aali boobu kunkuta, kulibambila kuyakuliiminina, alimwi akwaambaula munkuta citola ciindi amali. Bamaloya besu alimwi abakwesu bamwi bakabelesya mawoola aali 380 kulibambila kuyooliiminina alimwi amawoola aambi aali 240 kusandulula zyakali kuyandika kuyoobelesyegwa ku Mexico. Bamaloya batandila ku 40 kuzwa munyika yoonse bakabelesya mawoola manji mumakani aaku Ecuador. Ino mbuti mbotwakacikonzya kubbadelela zyoonse zyakali kuyandika kutegwa tubaiminine bakwesu? Nkwiinda mukubelesya zyakusanga nzyomwakasanga kubelesya nzila ziindene-indene izili a donate.jw.org. Tulamulumba kapati akaambo kabwaabi bwanu.