Kukwabilila Bantu mu Maanda aa Bwami lya COVID-19

“Bamu Kabunga Keendelezya basala kuti, kuswaangana antoomwe ku Maanda aa Bwami kukatalike alimwi mumvwiki ya April 1, ccita kuti kakuli zisinkilizyo zyamfwulumende kubusena nkomubede.” Kwaambilizya ooku ikwakabikkwa a jw.org kumatalikilo aa March 2022, kwakabakkomanisya kapati Bakamboni ba Jehova nyika yoonse. Pele bulwazi bwa COVID-19 tiibwakaningamana pe.a Ino nkucinca kuli buti, alimwi nzintu nzi izyakali kuyandika kutegwa zikwabilile baabo bajanika kumiswaangano kubulwazi oobu? Kwakaindide myaka yobilo katutaswaangani antoomwe, aboobo sena Maanda eesu aa Bwami akali kuyoojanika kuti acili kabotu?

Mubwini, bakwesu bakatalikide kale kulibambila kwamyezi minji kutalika kuswaanganina ku Maanda aa Bwami.

Zintu Zyakali Kuyandika Ziindene-indene

Mbokwakaindila buyo mwezi omwe kuzwa ciindi notwakaleka kuswaangana antoomwe mu 2020, ba Worldwide Design/Construction Department (WDC), ku Warwick, New York, bakatalika kuyeeya bulwazi bwa COVID-19 mbobwakali kuyoojatikizya kubelesyegwa kwa Maanda aa Bwami alimwi azintu zyakali kuyandika kutegwa masena eesu aakukombela kaakwabilidwe.

Zintu izyakali kuyandika kubusena bumwi zyakaliindene azyakali kuyandika kubusena kumbi. Ba Matthew De Sanctis, ibabelekela mu WDC, bakaamba kuti: “Mumasena aamwi, kwakali buyumuyumu bwakujana zibelesyo zyakusambila kumaanza. Ikuti a Ŋanda ya Bwami kakutakwe pompi, maanzi ayandika kuula naa kuyootekwa kumulonga naa kumugoti. Mumasi aamwi, mfwulumende zimwi zyakacinca izyakali kuyandika kujatikizya mincini yakukasaazya naa kutontozya muwo alimwi azikwankwani kutegwa bantu kabakwabilidwe alimwi kakuli bulondo.”

Ino ncinzi bakwesu ncobakacita kutegwa babulanganye buyumuyumu oobu? Ba Matthew bakaamba kuti: ‘Ku Maanda aa Bwami manji kubelesya nzila nguba-uba alimwi iitaduli kwakagwasya kapati.’ Mucikozyanyo ku Papua New Guinea, bakababikkila zigumbuli zima 20 lita zijisi tupompi. Aboobo kubelesya buyo mali aasika ku $40 (U.S.), bakwesu bakacikonzya kuula zyakali kuyandika kutegwa bakwesu bamuminzi kabasamba kumaanza a Ŋanda ya Bwami. Kujatikizya Maanda aa Bwami aamu Africa, zyakusambila kumaanza ziinda ku 6,000 zyakaulwa kuzwa ku Asia.

Kucinca kumwi kwakaba kwakali kubikkilizya kubikka mafani naa kwaacinca buya alimwi akubikka mincini iikasaazya naa kutontozya muwo, akuba masimpe kuti muwo ulainda mu Ŋanda ya Bwami. Mbungano zinji zyakaula tunsimbi twakweenzyela zyaambawido kutegwa basimbungano kabatajati mumaanza. Bakwesu bakabeleka canguzu kusalazya mumasena bantu mobajata-jata kapati, mbuli milyango alimwi amapompi, mwalo mukonzya kujanika tuzunda. Mumbungano zimbi, bakabikka mapompi aabelesya ma sensor muzimbuzi zyabo. Ku Chile, kutegwa babambulule imwakali kuyandika, bakabelesya mali aasika ku $1,400 (U.S.) ku Ŋanda ya Bwami imwi aimwi.

Nokuba kuti bakabikkila maano kubona masimpe kuti basimbungano balikwabilidwe, bakwesu bakasolekesya kwaabelesya kabotu mali aasangwa. Mucikozyanyo mumasena aamwi, bakalekela mfwulumende kuti ibbadelele zibelesyo zyakusambila kumaanza alimwi atunsimbi twakubelesya kuzyaambawido. Bakumitabi bakabelekela antoomwe mukwaabelesya kabotu mali kwiinda mukuula zintu zinji aciindi comwe. Kanji-kanji bakumitabi alimwi aba Global Purchasing Department, bakali kuula zintu kulibasikupanga cacigaminina, calo cakapa kuti baule amuulo musyoonto alimwi cakagwasya kuti zintu zitolwe cakufwambaana.

“Zyoonse eezyi zyakapa kuti ndilimvwe kukwabililwa”

Bubambe bwakuti Maanda aa Bwami kaakwabilidwe bwagwasya kapati alimwi akubapa bulangizi aabo batalika alimwi kuswaangana cakaanzambwene. Ba Dulcine, mucizyi ku Peru, bakaamba kuti “bakaliyoowede aasyoonto” ciindi nobakamvwa kuti tulapiluka alimwi ku Maanda aa Bwami. Bakaamba kuti “ndakaciswa bulwazi bwa COVID-19 mbobwakatalikila buyo bulwazi oobu. Aboobo ndakalimvwa kutaanguluka kuunka ku Ŋanda ya Bwami, kandiyeeya kuti inga bwandiyambukila alimwi. Pele nondakasika ku Ŋanda ya Bwami, ndakabona kuti baalu bacita zintu zinji kutegwa babe masimpe kuti tulikwabilidwe, kubikka kwakusambila kumaanza alimwi atunsimbi twakweenzyela zyaambawido, kubikkilizya abubambe bwakusalazya Ŋanda ya Bwami kaitanatalika miswaangano alimwi anoyamana. Zyoonse eezyi zyakapa kuti ndilimvwe kukwabililwa.”b

Ba Sara, mucizyi uukala mucisi ca Zambia, bajisi buyumuyumu bwiindene. Bakaamba kuti: “Myezi yainda, balumi bangu bakafwa abulwazi bwa COVID-19. Ndakalibilika kujatikizya mbondakali kuyoolimvwa kuswaangana ciindi cakusaanguna kabatako balumi bangu.” Ino balimvwa buti lino kujatikizya kuunka ku Ŋanda ya Bwami? Baamba kuti: “Kuswaangana antoomwe alimwi kwandipa kusinizya kuti Jehova uli aandiswe mumazuba aaya aakumamanino. Lino kwiinda kaindi, ndilimvwa kukulwaizyigwa, kuyandwa abaalu alimwi abakwesu abacizyi mumbungano.”

Bakombima munyika yoonse balilumbide akaambo kacoolwe cakutalika kuswaangana antoomwe alimwi ku Maanda aa Bwami. Twamulumba kapati akaambo kazyakusanga zyanu, zyalo zyakacitwa kwiinda mukubelesya donate.jw.org. zyakusanga eezyi zyakatugwasya kubona masimpe kuti masena eesu aakukombela kaali kabotu alimwi kaakwabilidwe lyamiswaangano.