Mujibelo, September 27
Leza wazuzya luyando lwakwe mumyoyo yesu kwiinda mumuuya uusalala ngotwakapegwa.—Rom. 5:5.
Atubone ncolyaamba bbala lyakuti ‘kuzuzya.’ Bbuku limwi lyaamba kuti “luyando lwakwe kubananike lulaanguzu kapati mbuli mulonga, lwalo luzuzya myoyo yabo.” Masimpe majwi aaya atondezya Jehova mbwabayanda kapati bananike. Bananike balizyi kuti ‘balayandwa a Leza.’ (Jud. 1) Mwaapostolo Johane wakatondezya mbobalimvwa ciindi naakalemba kuti: “Amubone mboluli lupati luyando ndwaatutondezya Taata, mukutupa coolwe cakwiitwa kuti bana ba Leza!” (1Joh. 3:1) Sena Jehova uyanda buyo bananike balikke? Peepe, Jehova wakatondezya kuti ulatuyanda toonse. Ncintu nzi cipati citondezya kuti Jehova ulatuyanda? Ncinunuzyo. Kwiinda mukupa cinunuzyo, Jehova wakatondezya luyando lupati lutanatondezyedwe amuntu uuli woonse!—Joh. 3:16; Rom. 5:8. w24.01 28 ¶9-10
Nsondo, September 28
Basinkondoma bayootija mubuzuba mbondiyookwiita kuti undigwasye. Ndili masimpe kuti: Leza uli kulubazu lwangu.—Int. 56:9.
Lugwalo oolu luli atala luyubununa cintu cakagwasya Davida ciindi naakayoowede. Nokuba kuti buumi bwakwe bwakacili muntenda, wakali kuzinzibala kuyeeya zintu Jehova nzyaakali kuyoomucitila kumbele. Davida wakalizyi kuti Jehova wakali kuyoomuvwuna aciindi ceelede. Mane buya, Jehova wakaambide kuti Davida wakali kuyooba mwami wa Israyeli. (1Sam. 16:1, 13) Kuli Davida, kufwumbwa cintu Jehova ncaakamusyomezyede cakali mbuli kuti cazuzikizyigwa kale. Ino Jehova wakamusyomezya kumucitila nzi? Tatulangili kuti unootukwabilila kumapenzi oonse. Nokuba boobo, kufwumbwa mapenzi ngotukonzya kujana mubweende bwazintu oobu, Jehova uyakwaamanizya munyika mpya. (Is. 25:7-9) Kayi Mulengi wesu ulaanguzu kapati cakuti ulakonzya kubusya bafwide, kutuponya alimwi akunyonyoona basikutukazya boonse.—1Joh. 4:4. w24.01 6 ¶12-13
Muhulo, September 29
Ulikkomene ooyo wajatilwa mulandu wakwe, uulaacibi icavwumbwa.—Int. 32:1.
Amuzinzibale kuyeeya kaambo ncomwakalyaaba alimwi akubbapatizyigwa. Mwakabweza ntaamu eezyi aakaambo kakuti mwakali kuyanda kuba kulubazu lwa Jehova. Amuyeeye icakamugwasya kusyoma kuti mwakajana kasimpe. Mwakaiya akumuzyiba Jehova, mpoonya mwakatalika kumulemeka akumuyanda kapati mbwali Uso wakujulu. Kumane mwakaba alusyomo lwalo ilwakamukulwaizya kweempwa. Moyo wanu wakamukulwaizya kuleka zilengwa zitali kabotu akutalika kupona kweelana akuyanda kwa Leza. Kweelede kuti mwakakkomana kapati ciindi nomwakazyiba kuti Leza wamulekelela. (Int. 32:2) Mwakatalika kujanika kumiswaangano ya Bunakristo akutalika kwaambila bamwi zintu zibotu nzyomwakali kwiiya. Mbomuli Munakristo iwakalyaaba akubbapatizyigwa, lino mweendela munzila iitola kubuumi alimwi mulikanzide kuzumanana kweenda mulinjiyo. (Mt. 7:13, 14) Amwiime nji, mukakatile kukomba Jehova alimwi akutazungaana mukumvwida milawo yakwe. w23.07 17 ¶14; 19 ¶19