September

Leza wakapa Jesu nguzu zyakugwisya mapenzi woonse aabacitikila bantu. Kwiinda mukucita maleele, Jesu wakatondezya kuti ulakonzya kwaamana mapenzi woonse ngotutakonzyi kumana swebo lwesu. Mucikozyanyo, ulijisi nguzu zyakutwaangununa kucibi ncotwakakona amapenzi aaboola akaambo kancico, mbuli kuciswa alimwi akufwa. (Mt. 9:1-6; Rom. 5:12, 18, 19) Maleele ngaakacita akatondezya kuti ulakonzya kuponya “malwazi woonse” alimwi buya akubusya bafwide. (Mt. 4:23; Joh. 11:43, 44) Kuyungizya waawo, ulijisi nguzu zyakuumuzya maguwo akugwisya bantu madaimona. (Mk. 4:37-39; Lk. 8:2) Eelo kaka cilakulwaizya kuzyiba kuti Jehova wakapa Mwanaakwe nguzu zili boobu! Tulakonzya kuba masimpe kuti zilongezyo nzyotulangila kumbele mu Bwami bwa Leza ziyoocitika ncobeni. Maleele ngaakacita Jesu naakali waano anyika, atuyiisya zintu nzyayoocita munyika yoonse kali Mwami wa Bwami bwa Leza kujulu. w23.04 3 ¶5-7

Kuti naa mbungano yanu kaili mpati calo cikonzya kupa kuti nywebo mutapegwi coolwe cakwiingula, ambweni mulakonzya kuyeeya buyo kuti mucileke kutambika. Pele tamweelede kucileka. Amulibambile bwiinguzi buli mbobubede kumuswaangano umwi aumwi. Mpoonya kuti naa tiimwapegwa coolwe cakwiingula kumatalikilo, nkokuti mulakonzya kuba azyoolwe zimbi zyakwiingula. Ciindi nomulibambila Ciiyo ca Ngazi Yamulindizi, amubone muncali umwi aumwi mboweendelana amutwe wacibalo. Kuti mwacita oobo, tacidoonekwi buya kuti munoojisi bwiinguzi bunji mbomukonzya kupa lyaciiyo. Kuyungizya waawo, mulakonzya kulibambila kupa bwiinguzi mumincali iijisi njiisyo zyamu Bbaibbele zikatazya kupandulula. Nkaambo nzi? Nkaambo kakuti ambweni inga kwatambika buyo basyoonto mumincali eeyo. Pele mbuti kuti mwabona kuti tamupegwi coolwe cakwiingula? Amumwaambile sikusololela kautanatalika muswaangano mubuzyo uugaminide ngomuyanda kwiingula. w23.04 21-22 ¶9-10

Josefa wakali kwaatobela malailile aa Jehova, alimwi eeci cakapa kuti abe mulumi uuli kabotu. Ziindi zyotatwe, wakatambula malailile kuzwa kuli Leza aakali kujatikizya mukwasyi wakwe. Aciindi cimwi acimwi, wakaatobela kakunyina kuwayawaya noliba leelyo nocakali kukatazya kucita boobo. (Mt. 1:20; 2:13-15, 19-21) Kwiinda mukutobela malailile aa Leza, Josefa wakamukwabilila Mariya, wakamugwasyilizya alimwi akumulanganya kabotu. Amuyeeye buyo Mariya mbwaakatalika kumuyanda kapati Josefa akumulemeka akaambo kambwaakali kucita zintu! Nobamalumi, mulakonzya kumwiiya Josefa kwiinda mukuyandaula lulayo lwamu Bbaibbele kujatikizya mbomweelede kulanganya mukwasyi wanu. Ikuti naa mwalutobela lulayo oolu, nokuba kuti caamba kupanga kucinca kupati, mutondezya kuti mulamuyanda mukaintu wanu alimwi mupa kuti cikwati canu ciyume. Mucizyi umwi waku Vanuatu, iwakkala mucikwati kwamyaka yiinda ku 20 wakaamba kuti: “Ciindi balumi bangu nobayandaula malailile aazwa kuli Jehova mpoonya akwaatobela, cipa kuti ndibalemeke kapati. Ndilimvwa kukwabililwa akuba alusyomo muzintu nzyobasala.” w23.05 21 ¶5

Ba Juda ibakapiluka bakeelede kuba “bantu basalala” kuli Leza wabo. (Dt. 7:6) Pele eeci tiicakali kwaamba kuti tiibakeelede kucinca kutegwa bamukkomanisye Jehova. Bunji bwaba Juda bakazyalilwa mu Babuloni, alimwi kulangilwa kuti banji bakalizizyibide kale zilengwa zyabana Babuloni. Nokwakainda myaka iili 69 kuzwa ciindi ba Juda bakusaanguna nobakapiluka ku Israyeli, Mweendelezi Nehemiya wakagambwa kapati kujana kuti bana ibakazyalilwa ku Israyeli tiibakalina kuuzyiba mwaambo waba Juda. (Dt. 6:6, 7; Neh. 13:23, 24) Aboobo bana aaba tiibakali kukonzya kwiiya kumuyanda Jehova abukombi bwakwe mbwaanga tiibakali kukonzya kumvwa Chihebrayo, mwaambo iwakabelesyedwe kulemba Jwi lya Leza. (Ezr. 10:3, 44) Aboobo ba Juda aaba bakali kuyandika kucinca kapati, pele tiicakali kukonzya kubakatazya kucinca mbwaanga bakali kukkala mu Israyeli, mwalo bukombi busalala mobwakatalikide kubukulusyigwa.—Neh. 8:8, 9. w23.05 15 ¶6-7

Cuusisya ncakuti, zimwi ziindi tulakonzya kujana buyumuyumu, nokuba kuti inga katujisi luyandisisyo alimwi akusolekesya kusikila mpotugolela. Mucikozyanyo, tulakonzya kucitikilwa “zintu zitalangilwi” zyalo izikonzya kutumanina ciindi ncotweelede kubelesya kuzuzikizya mbaakani yesu. (Muk. 9:11) Tulakonzya kujana penzi limwi likonzya kutupa kutyompwa kapati akutumanina nguzu. (Tus. 24:10) Akaambo kakutalondoka, tulakonzya kulubizya calo cikonzya kupa kuti cikatazye kapati kuzuzikizya mbaakani yesu. (Rom. 7:23) Zimwi ziindi tulakonzya kulimvwa kukatala buyo. (Mt. 26:43) Aboobo, ncinzi cikonzya kutugwasya kulwana buyumuyumu buli boobu naa zintu zyacibukila mbuta? Kamuyeeya kuti kuba abuyumuyumu, tacaambi kuti mwaalilwa kuzuzikizya mbaakani yanu. Bbaibbele lyaamba kuti tulakonzya kujana mapenzi naa buyumuyumu cakwiinduluka-induluka. Pele alimwi lyaamba kuti tulakonzya kusola alimwi kwiizuzikizya mbaakani yesu. Aboobo, kwiinda mukuzumanana kuzuzikizya mbaakani yesu nokuba kuti kuli buyumuyumu, ncitondezyo cakuti tuyanda kumukkomanisya Jehova. Eelo kaka Jehova ulakkomana kapati kumubona kamuzumanana kusola kuzuzikizya mbaakani yanu! w23.05 30 ¶14-15

Kubeleka mulimo wabupainiya, kulakonzya kugwasya mukwesu mukubusi kubeleka kabotu abantu baindene-indene. Alimwi kulakonzya kumugwasya kwaabelesya kabotu mali. (Flp. 4:11-13) Nzila mbotu yakutalika mulimo waciindi coonse, nkucita bupainiya bwakugwasyilizya, calo icibagwasya kutalika bupainiya bwaciindi coonse. Kucita bupainiya kulakonzya kujalula zyoolwe zyakubeleka mumbazu zimwi zyamulimo waciindi coonse, mbuli kubeleka mumulimo wamayake naa ku Beteli. Bakwesu boonse beelede kuba ambaakani yakweelela kubelekela Banakristonyina kabali baalu mumbungano. Bbaibbele lyaamba kuti bamaalumi ibauyanda mukuli ooyu ‘bayanda mulimo mubotu.’ (1Tim. 3:1) Cakusaanguna, mukwesu weelede kweelela kuba mukutausi. Bakutausi balabagwasyilizya baalu mumbazu zinji. Cakulicesya, baalu abakutausi balababelekela bakwesu abacizyi alimwi balatola lubazu cabusungu mumulimo wakukambauka. w23.12 28 ¶14-16

Mwami Josiya wakali amyaka iili 16 naakatalika kuyandaula Jehova. Wakali kuyanda kwiiya kujatikizya Jehova alimwi akucita kuyanda kwakwe. Nokuba boobo, buumi tiibwakali buuba-uba kumwami musyoonto ooyu. Wakakatila kubukombi bwakasimpe ciindi bukombi bwakubeja nobwakadumide kapati. Amana buya wakacita oobo cabusicamba! Kataningakkwanya myaka iili 20, Josiya wakatalika kugwisya bukombi bwakubeja mucisi. (2Mak. 34:1, 2) Nokuba kuti muli bana, mulakonzya kumwiiya Josiya kwiinda mukwiiya zinji kujatikizya Jehova alimwi abube bwakwe bubotu. Kuti mwacita oobu, muyooyanda kulyaaba kulinguwe. Ino kulyaaba kulinguwe kuyoobujatikizya buti buumi bwanu? Mukwesu Luke, iwakabbapatizyigwa naakali amyaka iili 14 wakaamba kuti, “Kuzwa lino ndilikanzide kubikka bukombi bwa Jehova mubusena bwakusaanguna mubuumi bwangu alimwi akusolekesya kumukkomanisya.” (Mk. 12:30) Eelo kaka muyoolongezyegwa kapati kuti andinywe mwakanza kucita mbubwenya oobu! w23.09 11 ¶12-13

Ciindi mwaapostolo Paulo naakalemba lugwalo oolu, tiiwakalinakkwana mwaka kuzwa ciindi mbungano yaku Tesalonika noyakatalisyigwa. Kweelede kuti baalumi bakasalidwe mumbungano eeyi tiibakajisi luzyibo alimwi bakali kulubizya. Nokuba boobo, bakeelede kulemekwa. Mapenzi mapati mbwaayaabuswena afwaafwi, tuyooyandika kusyoma busolozi bwabaalu bamumbungano motuzulilwa kwiinda kaindi. Ambweni tatucinoocikonzyi kutambula busolozi kuzwa kumaofesi mapati alimwi akuofesi yamutabi; aboobo cilayandika kapati kwiiya kubayanda alimwi akubalemeka baalu lino. Kufwumbwa bukkale mbobukonzya kuba, atuzumanane kupakamana, kutabikkila maano kukutalondoka kwabo, pele kubikkila maano kukaambo kakuti Jehova nguusololela bamaalumi aaba basyomeka kwiinda muli Kristo. Mbubwenya cimpoompo mbocakali kukwabilila mutwe wasikalumamba, bulangizi bwesu bwalufwutuko bulaikwabilila mizeezo yesu akutugwasya kuyeeya kabotu. Tulizyi kuti zintu nzyoipa nyika eeyi zinyina mpindu. (Flp. 3:8) Bulangizi mbotujisi butupa kuba bantu bakkazika moyo alimwi bapakamene. w23.06 11-12 ¶11-12

Aabo bamvwa majwi ‘aamukaintu mufwubafwuba’ beelede kusala kuzumina kutamba kwakwe naa kukaka. Kuli twaambo tubotu ncotweelede kutantamuka bukkale bwakutalilemeka. “Mukaintu mufwubafwuba” upandululwa kuti uluujisi kwaamba kuti: “Maanzi aakubba alalweela.” (Tus. 9:17) Ino “maanzi aakubba” ninzi? Bbaibbele likozyanisya koonana kwamulumi amukaintu kumaanzi aakatalusya. (Tus. 5:15-18) Mwaalumi amukaintu ibakwetene mumulawo, balizumizyidwe kulikkomanisya kwiinda mukoonana. Pele eeci ciliindene ‘amaanzi aakubba,’ alo aakonzya kwaamba bwaamu. Bantu bacita bwaamu kanji-kanji balayuba kutegwa bamwi batababoni, mbubwenya mbuli kabwalala uuyanda kubba zintu. “Maanzi aakubba” alakonzya kulimvwisya kulweela kuti aabo bajatikizyidwe kabayeeya kuti kunyina uuyoozyiba kuti bakacita cibi. Eelo kaka ooku nkulyeena! Nkaambo Jehova ulabona zyoonse. Kuleka kukkomaninwa a Jehova ncecintu ciinda kubija naa kulula cikonzya kutucitikila, alimwi ‘tacilweeli’ naaceya naa kukkomanisya.—1Kor. 6:9, 10. w23.06 22 ¶7-9

Ncinzi ncomweelede kucita ikuti kamulimvwa kuti tamucipaili kuzwa ansi aamoyo, naa kuti mulimo wakukambauka tamucuukkomanini mbuli kaindi? Tamweelede kuyeeya kuti tamucijisi muuya wa Jehova. Mbwaanga tatulondokede, tulakonzya kucinca-cinca mbotulimvwa. Kayi bakati mazuba ngunamasandu. Ikuti busungu bwanu bwatalika kuceya, amuzinzibale kuyeeya cikozyanyo camwaapostolo Paulo. Nokuba kuti wakali kusolekesya kumwiiya Jesu, wakalizyi kuti zimwi ziindi luyandisisyo lwakucita zintu nzyaakali kuyanda, lwakali kukonzya kuceya. Paulo wakali kupandulula kuti wakalikanzide kuzuzikizya mulimo wakwe tacikwe makani ambwaakali kulimvwa aciindi eeco. Mbubwenya buyo, tamweelede kwiile kucita zintu kweelana ambomulimvwa. Muciindi caboobo, amube amakanze aakucita ciluzi noliba leelyo nomutajisi luyandisisyo lwakucicita. Nkaambo kuti mwazumanana kucita boobo, mukuya kwaciindi muyooba aluyandisisyo lwakunoocita ciluzi.—1Kor. 9:16. w24.03 11-12 ¶12-13

Tulakonzya kutondezya luyando kubakwesu abacizyi kwiinda mukuba balongwe babo alimwi akujana ciindi cakuba ambabo. (2Kor. 6:11-13) Bunji bwesu tuzulilwa mumbungano zijisi bakwesu abacizyi bazwa mubukkale bwiindene-indene alimwi ibajisi bube busiyene-siyene. Tulakonzya kuyumya luyando lwesu kuli mbabo kwiinda mukubikkila maano kubube bubotu mbobajisi. Kuti katubona bamwi mbuli mbwababona Jehova, tutondezya kuti tulabayanda. Luyando mbube buyooyandika kapati lyamapenzi mapati. Ciindi mapenzi aaya aakutalika, nkookuli nkotuyoojana lukwabililo? Amubone Jehova ncaakaambila bantu bakwe kuti bacite ciindi Babuloni wansiku naakalwanwa. Wakaamba kuti: “Kamuya nobantu bangu, amunjile mumaanda aanu aamukati, mulijalile. Amuyube kwakaindi kaniini buyo kusikila mane bukali bwiinde.” (Is. 26:20) Ambweni andiswe tuyooyandika kutobela malailile ngoona aaya lyamapenzi mapati. w23.07 6-7 ¶14-16

Amube aampuwo yakuba muntu uunyoneka. Amulibuzye kuti: ‘Sena bantu bandizyi kuti ndili muntu uunyoneka alimwi silubomba? Naa bandizyi kuti ndili muntu uukatazya, uunyina lubomba alimwi uutanyoneki? Naa sena ndilabaswiilila bamwi akutobela nzyobaamba ikuti kaceelela?’ Ikuti katuli bantu banyoneka, citondezya kuti tulamwiiya Jehova alimwi a Jesu. Tuyandika kuba bantu banyoneka ciindi bukkale nobwacinca. Kucinca kwabukkale kulakonzya kuleta buyumuyumu mbotwatali kuyeeyela. Mucikozyanyo, tulakonzya kuciswa bulwazi bumwi cakutayeeyela. Naa kucinca kwabweende bwamali amakwebo, naa kucinca kwamfwulumende kubusena nkotukkala zilakonzya kunyonganya buumi bwesu cakutayeeyela. (Muk. 9:11) Alimwi cilakonzya kutukatazya kuti naa mbunga yatupa mulimo uumbi naa kutwaambila kuyoobelekela kubusena bumbi. Inga twacikonzya kucinca kweelana abukkale ikuti naa twatobela nzila eezyi zyone: (1) kuzumina kuti zintu zyacinca, (2) kubikkila maano kuzintu zyakumbele, (3) kubikkila maano kuzintu zibotu, mpoonya (4) akugwasya bamwi. w23.07 21-22 ¶7-8

Musinsimi Daniele wakali mukubusi ciindi bana Babuloni nobakamubweza kuba mwaange akumutola kubusena kulamfwu amunzi ookwabo. Pele nokuba kuti wakacili mwana, balupati-pati bana Babuloni bakamukkomanina Daniele. Bakabona “zilibonya ameso” kuti Daniele ‘tanaakajisi kampenda nokaba komwe, wakali aciwa cibotu’ akuti wakali kuzwa mumukwasyi uulemekwa. (1Sam. 16:7) Aboobo, bana Babuloni bakamuyiisya kutegwa kabelekela muŋanda yamwami. (Dan. 1:3, 4, 6) Jehova wakali kumuyanda Daniele akaambo kabube ooyu mukubusi mbwaakasala kuba ambubo. Mubwini, ambweni Daniele wakajisi myaka yakuma 20 ciindi Jehova naakamwaamba kuti wakali mbuli Nowa a Jobu. Aboobo Jehova wakali kubona mukubusi ooyu kuti wakali kusyomeka mbubwenya mbuli Nowa a Jobu ibaalumi ibakamubelekela Leza cakusyomeka kwamyaka minji. (Matl. 5:32; 6:9, 10; Job. 42:16, 17; Ezk. 14:14) Alimwi Jehova wakazumanana kumuyanda Daniele mubuumi bwakwe boonse alimwi ibukkomanisya.—Dan. 10:11, 19. w23.08 2 ¶1-2

Ikuti kamuyanda kuula ŋanda, inga mwayandika kububona bumpiyompiyo boonse bwaŋanda eeyo. Tulakonzya kucita mbubwenya oobu ciindi notubala akwiiya Bbaibbele. Ikuti katulibala cakubinda, inga twaile kuzyiba buyo makani aantalisyo, nkokuti “injiisyo zyantalisyo zijatikizya makani aasetekene aa Leza.” (Heb. 5:12) Pele muciindi cakucita boobo, amunjile buya “mukati” kutegwa mubone bumpiyompiyo boonse mbubonya mbomukonzya kucita kuŋanda njomuyanda kuula. Nzila yiinda kubota njomukonzya kubelesya kwiiya Bbaibbele, nkubona zibeela ziindene-indene zyamulumbe uuli mumo mbozyeendelana. Amusolekesye kuzimvwisya zintu nzyomusyoma alimwi akumvwisya twaambo tumupa kuti kamuzisyoma. Kutegwa tulimvwisye kabotu Jwi lya Leza, kuli twaambo tumwi ntotweelede kumvwisya kapati. Mwaapostolo Paulo wakakulwaizya Banakristonyina kwiiya Jwi lya Leza cabusungu kutegwa ‘babuzyibe cakumaninina bwamba, bulamfwu, bulamfwu bwakuya mujulu alimwi abulamfwu bwakuyaansi’ bwakasimpe. Kwiinda mukucita boobu, bakali kukonzya ‘kusimpa miyanda akuzyata’ mulusyomo. (Ef. 3:14-19) Andiswe oobo mbotweelede kucita. w23.10 18 ¶1-3

Bbaibbele lijisi zikozyanyo izinji zyabantu ibakali kukkazika moyo. Inga cabota kuti mwaabala makani aajatikizya bantu bali boobu. Mucikozyanyo, nokuba kuti Davida wakananikwa kuyooba mwami wa Israyeli kacili mwana, wakeelede kulindila kwamyaka minji kutegwa apegwe bwami. Simeoni alimwi a Ana bakali kumubelekela Jehova cakusyomeka kumwi kabalindila Mesiya iwakasyomezyedwe. (Lk. 2:25, 36-38) Ciindi nomubala zibalo zyabantu bali boobu, amujane bwiinguzi kumibuzyo iitobela: Ncinzi cakapa kuti muntu ooyu atondezye bube bwakukkazika moyo? Ino wakagwasyigwa buti akaambo kakukkazika moyo? Mbuti mbondikonzya kumwiiya? Alimwi mulakonzya kugwasyigwa kwiinda mukwiiya baabo ibakaalilwa kukkazika moyo. (1Sam. 13:8-14) Inga mwalibuzya kuti: ‘Ncinzi cakapa kuti cibaalile kukkazika moyo? Mapenzi nzi ngobakajana?’ w23.08 25 ¶15

Mwaapostolo Petro wakali kusyomeka; tanaakalekela cintu cili coonse kumutyompya cakumaninina. Wakatondezya kuti ulasyomeka aciindi cimwi Jesu naakaamba cintu cimwi ncobatakamvwisya basikwiiya bakwe. (Joh. 6:68) Kakunyina kulindila bupanduluzi, banji bakacileka kutobela Jesu. Pele kutali Petro. Wakali kusyomeka alimwi wakaamba kuti Jesu alikke ngowakajisi “majwi aapa buumi butamani.” Jesu wakalizyi kuti Petro alimwi abaapostolo bamwi bakali kuyoomutija. Nokuba boobo, Jesu wakali aalusyomo lwakuti Petro wakali kuyoopiluka akuzumanana kusyomeka. (Lk. 22:31, 32) Jesu wakalizyi kuti “moyo . . . ulapya, pele mubili unyina nguzu.” (Mk. 14:38) Nokuba kuti Petro wakamukaka kuti tamuzyi, Jesu kunyina naakacileka kumukkomanina mwaapostolo ooyu. Ciindi Jesu naakabusyigwa wakalibonya kuli Petro, kweelede kuti aciindi eeci Petro wakali alikke. (Mk. 16:7; Lk. 24:34; 1Kor. 15:5) Amuciyeeyele buyo eeci mbocakamuyumya Petro iwakauside akaambo kancaakacita! w23.09 22 ¶9-10

Leza ulabalekelela zibi aabo bamusyoma. Ulabajatila cakumaninina alimwi kunyina nabikkilila zibi zyabo. (Int. 32:1, 2) Ubabona kuti tabakwe kampenda alimwi akuti mbalulami akaambo kalusyomo lwabo. Nokuba kuti Abrahamu, Davida alimwi abakombi ba Leza bambi basyomeka bakaambwa kuti mbalulami, tiibakalondokede. Aboobo akaambo kalusyomo lwabo, Leza wakababona kuti bakanyina kampenda kwaambisya kuti beezyanisyigwa abaabo ibatakajisi lusyomo mulinguwe. (Ef. 2:12) Mulugwalo ndwaakalembela bana Roma, Mwaapostolo Paulo wakapandulula kuti tweelede kuba alusyomo kutegwa tube balongwe ba Leza. Eeci ncaakacita Abrahamu a Davida, alimwi andiswe ncotweelede kucita. w23.12 3 ¶6-7

Mazuba aano, Banakristo boonse balijisi coolwe cakupa zituuzyo kuli Jehova kwiinda mukubelesya ciindi, nguzu alimwi amali aabo ikutola ambele ziyandika zya Bwami. Tulakonzya kutondezya kuti tulalumba kucoolwe ncotujisi cakukomba Jehova kwiinda mukumupa zituuzyo ziinda kubota. Mwaapostolo Paulo wakaamba zintu nzyotweelede kunoocita lyoonse ciindi notukomba Jehova. (Heb. 10:​22-25) Eezyi zibikkilizya kupaila kuli Jehova, kukambaukila bamwi, kuswaangana alimwi akukulwaizyanya ‘ikapati mbotubwene kuti buzuba bwa Jehova bwaswena afwaafwi.’ Kumamanino abbuku lya Ciyubunuzyo, mungelo wa Jehova kasola kukankaizya wakaamba kwaziindi zyobilo majwi aakuti “Komba Leza.” (Ciy. 19:10; 22:9) Aboobo, atuzumanane kukayeeya kasimpe aaka ikajatikizya tempele lya Jehova lipati lyakumuuya alimwi acoolwe ncotujisi cakukomba Leza wesu mupati! w23.10 29 ¶17-18

Makanze eesu toonse ‘ngakuzumanana kuyandana.’ Pele, cilayandika kapati kuyeeya kuti Jesu wakacenjezya kuti ‘luyando lwabantu banji lwakali kuyoomana.’ (Mt. 24:12) Aawa Jesu tanaakali kwaamba kuti bunji bwabasikwiiya bakwe bakali kuyooleka kutondezya luyando kuli umwi amweenzinyina. Nokuba boobo, tweelede kucenjela kutegwa tutayungwi amuuya wakubula luyando ngobajisi bantu munyika. Pele ino inga twazyiba buti kuti tulijisi luyando luyumu kubakwesu abacizyi? Nzila imwi mbotukonzya kuzyiba mboluli luyumu luyando ndotujisi, nkulanga mbotucita zintu mubukkale bumwi. (2Kor. 8:8) Bukkale bumwi mboobu mbwaakaamba mwaapostolo Petro naakati: “Ikwaambisya, amuyandane kapati, nkaambo luyando lulavwumba zibi zinji kapati.” (1Pet. 4:8) Aboobo zintu nzyotucita ciindi bakwesu abacizyi nobalubizya naa nobacita zintu zitunyemya, ziyootugwasya kuzyiba mboluli luyumu luyando ndotujisi kulimbabo. w23.11 10-11 ¶12-13

Tatukonzyi kutondezya kuti tulamvwida kumulawo wa Jesu uujatikizya luyando ikuti katutondezya buyo luyando kuli bamwi mumbungano mpoonya bamwi katutababikkili maano. Masimpe kuti inga katumvwana kapati abamwi mbuli mbwaakali kucita Jesu. (Joh. 13:23; 20:2) Pele Mwaapostolo Petro utuyeezya kuti tweelede kubayanda boonse bakwesu abacizyi nkaambo ncibeela camukwasyi wesu. (1Pet. 2:17) Petro wakatukulwaizya kuti ‘katuyandana kapati kuzwa ansi aamoyo.’ (1Pet. 1:22) Mukapango aaka, kuyandana “kapati” caamba kuyanda muntu umwi nokuba kuti inga kacili ciyumu kucita boobo. Mucikozyanyo, ino mbuti kuti mukwesu watulubizyila naa kutunyemya? Cintu cakusaanguna ncotukonzya kuyeeya kucita akaambo kakutalondoka nkupilusizya cibi muciindi cakumulekelela. Pele Petro wakaiya kuli Jesu kuti kupilusya cibi takumukkomanisyi Leza. (Joh. 18:10, 11) Wakalemba kuti: “Mutapilusyi cibi kucibi naa matusi kumatusi. Muciindi caboobo, amuleleke.” (1Pet. 3:9) Ikuti kamubayanda kapati bakwesu abacizyi, muyoocikonzya kutondezya luzyalo. w23.09 28-29 ¶9-11

Tulagambwa kubona mwana mbwafwambaana kukomena. Inga cilibonya mbuli kuti ulakomena kakunyina kubeleka canguzu. Nokuba boobo, kuba Munakristo uusimide kuyandika kubeleka canguzu. (1Kor. 13:11; Heb. 6:1) Kutegwa eeci cikonzyeke, tuyandika kuba acilongwe ciyumu a Jehova. Kunze lyaboobo, tuyandika muuya wakwe uusalala kutegwa utugwasye kuba abube bumukkomanisya, kwiiya milimo imwi iikonzya kutugwasya, alimwi akulibambila mikuli yakumbele. (Tus. 1:5) Jehova wakalenga mwaalumi amukaintu. (Matl. 1:27) Mubwini, bamaalumi abamakaintu baliindene munzila zinji. Mucikozyanyo, Jehova wakalenga bamaalumi abamakaintu munzila yakuti kabacikonzya kuzuzikizya mikuli imwi iigaminide, aboobo beelede kuba abube bumwi alimwi akwiiya milimo imwi iikonzya kubagwasya kucita boobo.—Matl. 2:18. w23.12 18 ¶1-2

Sena Jesu wakali kuyanda kuti abamwi kabalibelesya zina lya Bausyi? Inzya. Basololi bazikombelo bamwi bakali kusyoma kuti nkubula bulemu kubelesya zina lya Leza. Pele Jesu kunyina naakalekela tunsiyansiya ootu tutali twamumagwalo kumulesya kulemeka zina lya Bausyi. Mucikozyanyo, amuyeeye ciindi naakaponya muntu iwakanjidwe madaimona mucooko ca Gerasa. Bantu bakayoowa kapati akutalika kukombelezya Jesu kuti azwe mucooko cabo. (Mk. 5:16, 17) Nokuba boobo, Jesu wakali kuyanda kuti bantu bakubusena oobo balizyibe zina lya Jehova. Aboobo wakaambila muntu ngwaakaponya kuti akaambile bantu zintu nzyaakamucitila Jehova, ikutali Jesu. (Mk. 5:19) Eeci ncayanda kuti andiswe katucita mazuba aano, ikuzyibya zina lya Bausyi munyika yoonse. (Mt. 24:14; 28:20) Ikuti twacita oobo, tulamukkomanisya Mwami wesu, Jesu. w24.02 10 ¶10

Eelo kaka tulilelekedwe kuba mumbunga ya Jehova mumazuba aano aakatazya kapati aamamanino! Nokuba kuti buumi buyaabwiindila buya kukatazya munyika eeyi, Jehova watupa bakwesu abacizyi kutegwa batugwasye. (Int. 133:1) Ulatugwasya kuti katukkomene mumukwasyi. (Ef. 5:33–6:1) Kunze lyaboobo, ulatupa busongo mbotuyandika kutegwa tuliyumye notulibilika alimwi akuba alukkomano lwini-lwini. Tweelede kubeleka canguzu kutegwa tuzumanane kubelekela Jehova cakusyomeka. Nkaambo nzi? Akaambo kakuti zimwi ziindi bamwi balakonzya kutunyemya akaambo kazintu nzyobaamba akucita. Kunze lyaboobo, tulakonzya kutyompwa akaambo kakulezya kwesu, kwaambisya kuti katwiile kulubizya cakwiinduluka-induluka. Aboobo tweelede kuliyumya notubelekela Jehova ciindi (1) mukwesu naa mucizyi naatunyemya, (2) ngotukwetene limwi naatutyompya, alimwi (3) ciindi notwatyompwa akaambo kakulezya kwesu. w24.03 14 ¶1-2

Ciindi aciindi, munoomvwa zyakuluula zyabakwesu abacizyi ibayungizya mulimo wabo kuli Jehova. Ambweni bakanjila Cikolo Cabakambausi ba Bwami naa kuunka kuyoobelekela kubusena kubulide. Aboobo ikuti bukkale bwanu kabumuzumizya, eeyi nimbaakani mbotu njomukonzya kulibikkila. Nkaambo bantu ba Jehova balajana nzila yakuyungizya mulimo wabo. (Mil. 16:9) Pele, ino mbuti kuti bukkale bwanu lino kabutamuzumizyi kucita boobo? Mutatyompwi pe akulimvwa kuti tamuyandiki kapati kwiinda baabo ibacikonzya. Ciyandika kapati nkuzumanana buyo kuliyumya. (Mt. 10:22) Kunze lyaboobo, mutalubi kuti mulamukkomanisya kapati Jehova ciindi nomuzumanana kumubelekela kusikila mpomugolela kweelana abukkale bwanu. Alimwi eeyi, nenzila iiyandika kapati iikonzya kumugwasya kuzumanana kutobela Jesu mwamana kubbapatizyigwa.—Int. 26:1. w24.03 10 ¶11

Taateesu wakujulu usyomezya kuti uyootulekelela ikuti naa tweempwa. (Int. 86:5) Aboobo, ikuti naa twakeempwa ncobeni kuzibi nzyotwakacita, tulakonzya kuba alusyomo lwakuti Jehova wakatulekelela. Ncotweelede kuyeeya ncakuti, Jehova ngu Leza uumvwisya. Kunyina nalangila kuti tucite zintu nzyotutakonzyi kucita. Pele ulalumba kapati akaambo kazintu zyoonse nzyotumucitila kufwumbwa buyo kuti twasolekesya kusikila mpotugolela. Kunze lyaboobo, tweelede kuzinzibala kuyeeya zikozyanyo zyamu Bbaibbele zyabantu ibakamubelekela Jehova camoyo woonse. Mucikozyanyo, amuyeeye kujatikizya mwaapostolo Paulo. Wakalitakata kubeleka kwamyaka minji, keenda misinzo milamfwu akutalisya mbungano zinji. Pele ciindi zintu nozyakacinca mubuumi bwakwe akutalika kwaalilwa kukambauka mbuli mbwaakali kucita kaindi, sena eeci cakali kwaamba kuti Jehova tanaakacili kumukkomanina? Peepe. Paulo wakazumanana kucita nzyaakali kukonzya, alimwi Jehova wakamulongezya kapati. (Mil. 28:30, 31) Mbubwenya buyo, nzyotukonzya kupa Jehova zilakonzya kucinca kweelana abukkale. Pele ciyandika kapati kulinguwe, makanze ngotujisi ciindi notumubelekela. w24.03 27 ¶7, 9

Kwiinda mumipailo njaakali kupaila kuli Jehova, Jesu wakasiya cikozyanyo cibotu ncobeelede kutobela basikwiiya bakwe. Naakali kucita mulimo wakwe woonse waanyika, Jesu wakali kupaila lyoonse. Wakali kujana ciindi cakupaila nokuba kuti kanji-kanji wakali kujata bubi akaambo kabantu banji ibakali kuboola kulinguwe. (Mk. 6:31, 45, 46) Mucikozyanyo, wakabuka mafwumofwumo kakucisiya ansi kutegwa abe aciindi cakupaila alikke. Aciindi cimwi, wakapaila busiku boonse katanapanga cakusala ciyandika kapati. (Lk. 6:12, 13) Alimwi busiku katanafwa, Jesu wakapaila cakwiinduluka-induluka nkaambo wakabikkilide maano kukumanizya mulimo wakwe waanyika, iwakali kukatazya kapati. (Mt. 26:39, 42, 44) Cikozyanyo ca Jesu cituyiisya kuti, nokuba kuti tujisi bubi buti, tweelede kujana ciindi cakupaila. Mbubwenya mbuli Jesu, ambweni inga twayandika kufwuma buya kubuka naa kumuka koona kutegwa tujane ciindi cakupaila. Twacita boobo, tutondezya Jehova kuti tulalumba kapati akaambo kacipego eeci caalubazu. w23.05 3 ¶4-5

Atubone ncolyaamba bbala lyakuti ‘kuzuzya.’ Bbuku limwi lyaamba kuti “luyando lwakwe kubananike lulaanguzu kapati mbuli mulonga, lwalo luzuzya myoyo yabo.” Masimpe majwi aaya atondezya Jehova mbwabayanda kapati bananike. Bananike balizyi kuti ‘balayandwa a Leza.’ (Jud. 1) Mwaapostolo Johane wakatondezya mbobalimvwa ciindi naakalemba kuti: “Amubone mboluli lupati luyando ndwaatutondezya Taata, mukutupa coolwe cakwiitwa kuti bana ba Leza!” (1Joh. 3:1) Sena Jehova uyanda buyo bananike balikke? Peepe, Jehova wakatondezya kuti ulatuyanda toonse. Ncintu nzi cipati citondezya kuti Jehova ulatuyanda? Ncinunuzyo. Kwiinda mukupa cinunuzyo, Jehova wakatondezya luyando lupati lutanatondezyedwe amuntu uuli woonse!—Joh. 3:16; Rom. 5:8. w24.01 28 ¶9-10

Lugwalo oolu luli atala luyubununa cintu cakagwasya Davida ciindi naakayoowede. Nokuba kuti buumi bwakwe bwakacili muntenda, wakali kuzinzibala kuyeeya zintu Jehova nzyaakali kuyoomucitila kumbele. Davida wakalizyi kuti Jehova wakali kuyoomuvwuna aciindi ceelede. Mane buya, Jehova wakaambide kuti Davida wakali kuyooba mwami wa Israyeli. (1Sam. 16:1, 13) Kuli Davida, kufwumbwa cintu Jehova ncaakamusyomezyede cakali mbuli kuti cazuzikizyigwa kale. Ino Jehova wakamusyomezya kumucitila nzi? Tatulangili kuti unootukwabilila kumapenzi oonse. Nokuba boobo, kufwumbwa mapenzi ngotukonzya kujana mubweende bwazintu oobu, Jehova uyakwaamanizya munyika mpya. (Is. 25:7-9) Kayi Mulengi wesu ulaanguzu kapati cakuti ulakonzya kubusya bafwide, kutuponya alimwi akunyonyoona basikutukazya boonse.—1Joh. 4:4. w24.01 6 ¶12-13

Amuzinzibale kuyeeya kaambo ncomwakalyaaba alimwi akubbapatizyigwa. Mwakabweza ntaamu eezyi aakaambo kakuti mwakali kuyanda kuba kulubazu lwa Jehova. Amuyeeye icakamugwasya kusyoma kuti mwakajana kasimpe. Mwakaiya akumuzyiba Jehova, mpoonya mwakatalika kumulemeka akumuyanda kapati mbwali Uso wakujulu. Kumane mwakaba alusyomo lwalo ilwakamukulwaizya kweempwa. Moyo wanu wakamukulwaizya kuleka zilengwa zitali kabotu akutalika kupona kweelana akuyanda kwa Leza. Kweelede kuti mwakakkomana kapati ciindi nomwakazyiba kuti Leza wamulekelela. (Int. 32:2) Mwakatalika kujanika kumiswaangano ya Bunakristo akutalika kwaambila bamwi zintu zibotu nzyomwakali kwiiya. Mbomuli Munakristo iwakalyaaba akubbapatizyigwa, lino mweendela munzila iitola kubuumi alimwi mulikanzide kuzumanana kweenda mulinjiyo. (Mt. 7:13, 14) Amwiime nji, mukakatile kukomba Jehova alimwi akutazungaana mukumvwida milawo yakwe. w23.07 17 ¶14; 19 ¶19

Kwiinda mukuzinzibala kuyeeya mupailo wanu wakulyaaba kuli Jehova, muyoocikonzya kuzunda sunko lili lyoonse. Mucikozyanyo, sena inga mwatalika kulitondezya mbuli kuti mulamuyanda mulumi naa mukaintu wamweenzinyoko? Peepe. Kayi mwakamusyomezya kale Jehova kuti kunyina nomuyoocita cintu cili boobo. Ikuti naa mizeezo iitali kabotu tiimwailekela kuti ikomene, nkokuti kumbele tamukabi apenzi lyakulwana mizeezo eeyo. Aboobo, ‘muyakwiileya nzila yababi.’ (Tus. 4:14, 15) Kuzinzibala kuyeeya cikozyanyo ca Jesu kulakonzya kumugwasya. Kayi walo wakalikanzide kukkomanisya Bausyi. Mbubwenya mbuli Jesu, andinywe amube amakanze aakukaka kucita cintu cili coonse citamukkomanisyi Leza. (Mt. 4:10; Joh. 8:29) Mapenzi alimwi amasunko amupa coolwe cakutondezya kuti mulayanda kuzumanana kutobela Jesu. Alimwi mulakonzya kuba masimpe kuti Jehova uyoomugwasya. w24.03 9-10 ¶8-10