October

Sena zimwi ziindi cilamukatazya kumvwida? Mwami Davida mbwaakali kulimvwa oobo awalo, nkakaambo kaako wakapaila kuti: “Kondigwasya kuba amoyo uulisungwide kukumvwida.” (Int. 51:12) Davida wakali kumuyanda Jehova. Nokuba boobo, zimwi ziindi Davida cakali kumukatazya kumvwida, andiswe oobo mbotulimvwa. Nkaambo nzi? Kaambo kakusaanguna nkakuti, toonse twakakona cilengwa cakutamvwida. Kabili, Saatani lyoonse ulasolekesya kutuyunga kuzangila Jehova mbuli mbwaakacita walo. (2Kor. 11:3) Katatu, tukkede munyika eeyi iizwide muuya wabuzangi, “nkokuti imuuya ooyo lino uubeleka mubana batamvwi.” (Ef. 2:2) Kunze buyo lyakubeleka canguzu kuti tutanoobisyi, tweelede kusolekesya kukaka kuyunga kwa Saatani alimwi akulwana muuya wamunyika eeyi wakuyanda kuzanga. Tweelede kubeleka canguzu ikumvwida Jehova alimwi abaabo mbapede nguzu zyakweendelezya. w23.10 6 ¶1

Ncinzi ncotukonzya kwiiya kumaleele ngaakacita Jesu aakusandula maanzi kuba waini? Twiiya bube bwakulicesya. Jesu tanaakalilumbaizya kujatikizya maleele ngaakacita; alimwi buya kunyina naakalilumbaizya kujatikizya cintu cili coonse ncaakacita. Muciindi caboobo, cakulicesya alimwi cakwiinduluka-induluka, wakapa bulemu boonse kuli Bausyi. (Joh. 5:19, 30; 8:28) Ikuti twamwiiya Jesu kwiinda mukuba bantu balicesya, kunyina notuyakulilumbaizya akaambo kakuzwidilila mucintu cili coonse ncotwacita. Tatweelede kulidunda tobeni akaambo kancico, pele tweelede kulidunda akaambo kakuba acoolwe cakubelekela Leza mubotu kapati. (Jer. 9:23, 24) Tweelede kulumba nguwe akaambo kakuzwidilila kwesu. Alimwi buya, kunyina cintu cili coonse cibotu ncotukonzya kucita kakunyina kugwasyigwa a Jehova? (1Kor. 1:26-31) Ikuti katulicesya, tatukayandi kupegwa bulemu akaambo kazintu zibotu nzyotucitila bamwi. Tuyookutila kuzyiba kuti Jehova ulazibona alimwi akuzikkomanina zintu nzyotucita. (Mt. 6:2-4; Heb. 13:16) Kwaamba masimpe, tulamukkomanisya Jehova ciindi notwiiya kulicesya kwa Jesu.—1Pet. 5:6. w23.04 4 ¶9; 5 ¶11-12

Kasololelwa amuuya, mwaapostolo Paulo wakakulwaizya Banakristo kubikkila maano kuzintu nzyobayandika bamwi. Mbuti mbotukonzya kulubelesya lulayo oolu lyamiswaangano? Nkwiinda mukuyeeya kuti abamwi balayanda kwiingula mbubonya mbuli ndiswe. Amusole kuciyeeyela munzila eeyi: Ikuti naa mulabandika abeenzinyoko, sena inga mwayanda kuti kamubandika buyo ndinywe nyolikke? Peepe! Inga mwayanda kuti abalo kababandika. Mbubwenya buyo, tuyanda kuti banji kabatola lubazu lyamiswaangano. Alimwi buya, nzila yiinda kubota mbotukonzya kubakulwaizya bakwesu abacizyi, nkwiinda mukubapa coolwe cakuti abalo baingule. (1Kor. 10:24) Aboobo amupe bwiinguzi bufwaafwi, calo cikonzya kupa kuti banji batole lubazu. Pele noliba leelyo nomupa bwiinguzi bufwaafwi, tamweelede kwaamba twaambo toonse tuli mumuncali. Ikuti naa mwatwaamba twaambo toonse tuli mumuncali, nkokuti bamwi balabula cakwaamba. w23.04 22-23 ¶11-13

Tweelede kuyeeya mbociyandika kapati kuzumanana kugwasya bamwi, kwaambisya kwiinda mukutola lubazu mumulimo wakukambauka. Mumulimo wesu wakukambauka, tuyandika kuba bantu balibambilide kucinca. Bantu mbotukambaukila bajisi mizeezo yiindene-indene kujatikizya Leza, bazwa mumasena aasiyene-siyene azilengwa. Mwaapostolo Paulo wakali kucinca-cinca, alimwi tulakonzya kwiiya cikozyanyo cakwe. Jesu wakasala Paulo kuba “mwaapostolo kuli bamasi.” (Rom. 11:13) Aboobo Paulo wakali kukambauka kuba Juda, ba Giriki, bantu bayiide, bantu bakkala kumunzi, beendelezi bamfwulumende alimwi abami. Pele kutegwa abasike amoyo bantu boonse aaba ibakali kuzwa mubukkale bwiindene-indene, Paulo wakaba “zintu zyoonse kubantu bamisyobo yoonse.” (1Kor. 9:19-22) Wakali kuzibikkila maano zilengwa zyabo, mbobakakomezyegwa alimwi azintu nzyobakali kusyoma baswiilizi bakwe ,mpoonya akucinca kweelana abukkale. Andiswe tulakonzya kuyaambele mumulimo wesu ikuti katucinca kweelana abukkale alimwi akusolekesya kujana nzila mbotu yakumusika amoyo muntu umwi aumwi. w23.07 23 ¶11-12

Kubomba moyo, takuli kubula nguzu pe. Kuyandika nguzu kutegwa muntu acikonzye kubatama ciindi nali muyumuyumu. Kubomba moyo “mucelo wamuuya.” (Gal. 5:22, 23) Bbala lya Chigiriki ilyakabelesyegwa kupandulula “kubomba moyo” zimwi ziindi lyakali kubelesyegwa kupandulula bbiza lyamusyokwe eelyo lyakatambisyigwa naa kuyiisyigwa. Amweezyeezye bbiza lyamusyokwe ilyakayiisyigwa kubomba. Nokuba kuti bbiza eelyo lyakabomba, pele licili liyumu. Mbotuli bantu, mbuti mbotukonzya kwiiya kubomba moyo kumwi katuli bayumu? Tatukonzyi kucita oobu munguzu zyesu tobeni. Pele tweelede kupaila, kulomba Leza kutegwa atugwasye kuba abube oobu bubotu. Kuli zikozyanyo zyabantu banji ibakaiya kubomba moyo. Mucikozyanyo, bakwesu abacizyi banji balatondezya kubomba moyo ciindi nobakazyigwa. Eeci cagwasya kuti bamwi babazyibe kabotu Bakamboni ba Jehova.—2Tim. 2:24, 25. w23.09 15 ¶3

Mucilengaano ciyoosya kapati, mwaapostolo Johane wakabona baalu bali 24 kujulu kabakomba Jehova. Bakali kutembaula Leza akwaamba kuti uleelela kutambula “bulemu alulemeko alimwi anguzu.” (Ciy. 4:10, 11) Abalo bangelo basyomeka balijisi twaambo tunji tubapa kumutembaula Jehova. Mbwaanga bakkala awalo kujulu, balimuzyi kabotu-kabotu. Balabona bube mbwajisi kwiinda muzintu nzyacita. Aboobo ciindi nobabona Jehova mbwacita zintu, cibapa kuti bamutembaule. (Job. 38:4-7) Andiswe tweelede kumutembaula Jehova mumipailo yesu. Tulakonzya kucita oobo kwiinda mukumwaambila zintu nzyotukkomanina kujatikizya nguwe alimwi akaambo ncotumuyanda. Ciindi nomubala akwiiya Bbaibbele, amusole kubona bube bwa Jehova mbomukkomanina kapati. (Job. 37:23; Rom. 11:33) Mpoonya amumwaambile mbomulimvwa kujatikizya bube oobo. Alimwi tulakonzya kumutembaula Jehova akaambo kalugwasyo ndwatupa swebo akugwasya bakwesu abacizyi boonse.—1Sam. 2:1, 2. w23.05 3-4 ¶6-7

Mu 1919, Babuloni Mupati wakaalilwa kuzumanana kubeendelezya bantu ba Leza. Mumwaka ooyu, “muzike uusyomeka alimwi uucenjede” wakatalika kubeleka ikugwasya bantu babombemyoyo kutalika kweenda ‘Munzila ya Busalali.’ (Mt. 24:45-47; Is. 35:8) Mulimo ngobakabeleka bamwi kaindi wakubamba nzila, wakabagwasya bantu ibakatalika kweenda munzila eeyi kwiiya zinji kujatikizya Jehova alimwi amakanze aakwe. (Tus. 4:18) Alimwi wakapa kuti batalike kupona kweelana azyeelelo zya Jehova. Cikkomanisya ncakuti, Jehova kunyina naakali kulangila kuti bantu bakwe balakonzya kucinca bukkale bwabo mukulaba kwaliso. Muciindi caboobo, wali kubagwasya kucinca aasyoonto-syoonto. Eelo kaka tuyookkomana kapati ciindi twaakutalika kucita zintu zimukkomanisya Leza ciindi coonse! Mugwagwa uuli woonse uyandika kubambululwa kutegwa uzumanane kuba kabotu. Aboobo kuzwa mu 1919, mulimo wakubamba “Nzila ya Busalali” wazumanana kutegwa bantu banji bacikonzye kuboola mulinjiyo akuzwa muli Babuloni Mupati. w23.05 17 ¶15; 19 ¶16

Bamu Kabunga Keendelezya cacigaminina balabayiisya milimo basikubagwasyilizya mumakkomiti aayindene-indene aa Kabunga Keendelezya. Lino basikubagwasyilizya aaba bajisi mikuli minji kapati njobazuzikizya cakusyomeka. Amana buya, balilibambilide kuzumanana kuunyamuna mukuli wakulanganya mbelele zya Kristo bananike baakuunka kujulu. Ciindi munanike wamamanino aakutolwa kujulu kumamanino aamapenzi mapati, bantu ba Jehova bayoozumanana kumukomba Leza cakusyomeka. Akaambo kakuti Jesu Kristo nguusololela, bakombi ba Leza bayoozumanana kumukomba. Tulizyi kuti aciindi eeco, nkamu yazisi iitegwa Gogo waku Magogo iyoobalwana bantu ba Leza. (Ezk. 38:18-20) Nokuba boobo, kulwanwa ooko takukazwidilili pe; kunyina nokuyoolesya bantu ba Leza kukomba Jehova, nkaambo uyoobakwabilila. Mucilengaano, mwaapostolo Johane wakabona “nkamu mpati” yambelele zimbi zya Kristo. Johane wakaambilwa kuti “nkamu mpati” yabantu eeyo yakazwa “mumapenzi mapati.” (Ciy. 7:9, 14) Aboobo tuli masimpe kuti Jehova uyoobafwutula. w24.02 5-6 ¶13-14

Ncinzi ncotweelede kucita kutegwa tutambule muuya uusalala? Tweelede kuupailila, kwiiya Jwi lya Leza lyakasololelwa amuuya alimwi akuyanzana ambunga yakwe. Kucita boobo kuyootugwasya kuba ‘amucelo wamuuya. (Gal. 5:22, 23) Balikke Leza mbapa muuya wakwe, mbaabo bazumanana kusalala mumizeezo alimwi akulilemeka kabotu. Takonzyi kuzumanana kutupa muuya wakwe kuti ciindi coonse katuyeeya zintu zitali kabotu alimwi akuzicita. (1Tes. 4:7, 8) Alimwi kutegwa tuzumanane kutambula muuya uusalala, ‘tatweelede kusampaula majwi aabusinsimi.’ (1Tes. 5:20) “Businsimi” bwaambwa aawa milumbe njatwaambila Jehova kwiinda mumuuya wakwe, kubikkilizya ayeeyo iijatikizya buzuba bwa Jehova amamanino aaciindi ncotupona. Tatweelede kuluba kujatikizya buzuba oobu, akutalika kuyeeya kuti Amagedoni taikasiki katucipona. Muciindi caboobo, tweelede kutondezya kuti tulizyi kuti ilasika ino-ino kwiinda mukuzumanana kulilemeka kabotu akujata bubi ‘mumilimo yakubelekela Leza cakulyaaba’—2Pet. 3:11, 12. w23.06 12 ¶13-14

Mbotuli Banakristo, ncinzi ncotweelede kucita kuti cakutayeeyela twabona cifwanikiso ciletela muzeezo wakoonana? Tweelede kuleka kucilanga cakufwambaana. Inga tiicatukatazya kucita boobo ikuti katuyeeya kuti cilongwe cesu a Jehova ncecintu ciyandika kapati. Alimwi buya, noziba zifwanikiso zilibonya mbuli kuti tazikonzyi kuletela muzeezo wakoonana, zilakonzya kutupa kuba amizeezo yakutalilemeka. Aboobo nkaambo nzi ncotweelede kuzitantamuka? Nkaambo tatuyandi kucita cintu cili coonse cikonzya kutupa kucita bumambe mumoyo wesu. (Mt. 5:28, 29) Mwaalu umwi waku Thailand uutegwa David wakaamba kuti: “Inga ndilalibuzya kuti: ‘Nokuba kuti zifwanikiso eezyi tazileteli muzeezo wakoonana, sena Jehova ulakkomana kuti ndazumanana kuzilangilila?’ Kuyeeya kuli boobu kulandigwasya kucita zintu cabusongo.” Kuyoowa kucita cintu cili coonse cikonzya kumunyemya Jehova, kulakonzya kutugwasya kucita zintu cabusongo. Bbaibbele lyaamba kuti kuyoowa Leza “ngamatalikilo aabusongo.” w23.06 23 ¶12-13

‘Maanda aamukati’ alakonzya kwaamba mbungano zyesu. Ciindi camapenzi mapati, Jehova usyomezya kuti uyootukwabilila ikuti naa twazumanana kumubelekela antoomwe abakwesu abacizyi. Aboobo, tweelede kubeleka canguzu lino kutegwa katubayanda kapati bakwesu abacizyi. Lufwutuko lwesu luyeeme akucita boobo! “Buzuba bupati bwa Jehova” cinooli ciindi cikatazya kapati kubantu. (Zef. 1:14, 15) Kayi abalo bantu ba Jehova bayoopenga. Pele kuti naa twalibambila lino, tuyoocikonzya kuzumanana kukkazika moyo alimwi akugwasya bamwi. Tuyoocikonzya kuliyumya kumapenzi aali woonse ngotuyoojana. Ciindi basyomima baakupenga, tuyoosolekesya kubagwasya kwiinda mukubatondezya lubomba alimwi akubapa ziyandika. Alimwi kuti twaiya kubayanda bakwesu abacizyi lino, tuyoocikonzya kuzumanana kutondezya luyando ndotujisi kulimbabo. Aboobo Jehova uyootulumbula kwiinda mukutupa buumi butamani munyika mwalo munoonyina ntenda amapenzi.—Is. 65:17. w23.07 7 ¶16-17

Jwi lya Leza kanji-kanji lyaamba bantu basyomeka kuti bakali bayumu. Pele balo tiibakali kulimvwa boobo lyoonse pe. Mucikozyanyo, aciindi cimwi Mwami Davida wakalimvwa kuti wakali ‘muyumu mbuli cilundu,’ nokuba boobo, zimwi ziindi wakali ‘kuyoowa kapati.’ (Int. 30:7) Muuya wa Leza wakapa Samusoni nguzu zinji kapati. Pele Samusoni wakalizyi kuti kakunyina kugwasyigwa a Leza ‘nguzu zyakwe zyakali kukonzya kumana alimwi akuba mbuli bantu boonse.’ (Bab. 14:5, 6; 16:17) Baalumi aaba basyomeka bakali bayumu akaambo kakuti Jehova wakabapa nguzu. Mwaapostolo Paulo awalo wakalizyi kuti uyandika nguzu kuzwa kuli Jehova. (2Kor. 12:9, 10) Paulo wakali aapenzi lyakuciswa. (Gal. 4:13, 14) Zimwi ziindi, cakali kumuyumina buya akucita ciluzi. (Rom. 7:18, 19) Kumane alimwi wakali kulibilika akuyoowa kujatikizya cikonzya kumucitikila. (2Kor. 1:8, 9) Nokuba boobo, ciindi naatakajisi nguzu ndendilyo naakajisi nguzu kapati. Munzila nzi? Jehova wakamupa nguzu Paulo nzyaakali kuyandika kutegwa acikonzye kuliyumya kumapenzi ngaakajisi. w23.10 12 ¶1-2

Ikuti zimwi ziindi katulimvwa kubula mpindu, tweelede kuyeeya kuti Jehova lwakwe nguwakatukwela kulinguwe. (Joh. 6:44) Kuli bube bubotu mbwabona mulindiswe bwalo mbotutakonzyi kubona swebo, alimwi ulizizyi zili mumoyo wesu. (2Mak. 6:30) Aboobo tulakonzya kumusyoma ciindi naamba kuti tulayandika kapati. (1Joh. 3:19, 20) Katutanaiya kasimpe, ambweni tobamwi twakacita zintu zicitupa kulimvwa kuba amulandu. (1Pet. 4:3) Nobaba Banakristo basyomeka balakonzya kuti kabacilwana kulombozya zintu zitali kabotu. Ino mbuti kujatikizya ndinywe? Sena zimwi ziindi mulimvwa kuti Jehova takonzyi kumulekelela? Ikuti kacili boobo, mulakonzya kuumbulizyigwa kuzyiba kuti babelesi ba Jehova basyomeka bamwi abalo mbobakali kulimvwa oobo. Mucikozyanyo, mwaapostolo Paulo wakali kulimvwa bubi kapati naakali kuyeeya kulubizya kwakwe. (Rom. 7:24) Masimpe kuti Paulo wakeempwa zibi zyakwe mane buya akubbapatizyigwa. Pele wakalyaamba kuti nguwakali “muniini akati kabaapostolo boonse” alimwi akuti ‘nguwakaindide’ kuba sizibi.—1Kor. 15:9; 1Tim. 1:15. w24.03 27 ¶5-6

Ciiyo cimwi ncotukonzya kwiiya kuzwa kukusala kutali kabotu nkwaakacita Mwami Jehoasi ncakuti, tweelede kusala balongwe ibamuyanda Jehova alimwi ibayanda kumukkomanisya. Tulakonzya kusala balongwe bapati naa bana kulindiswe. Kamuyeeya kuti, Jehoasi wakali musyoonto kapati kumulongwe wakwe Jehoyada. Kujatikizya balongwe mbomusala, amulibuzye kuti: ‘Sena balandigwasya kuyumya cilongwe cangu a Jehova? Sena balandikulwaizya kupona kweelana azyeelelo zya Leza? Sena balabandika kujatikizya Jehova alimwi akasimpe? Sena balazilemeka zyeelelo zya Leza? Sena inga bandaambila buyo nzyondiyanda kumvwa naa balijisi busicamba bwakundilulamika ikuti naa ndaleya?’ (Tus. 27:5, 6, 17) Kwaamba masimpe, kuti naa balongwe banu kabatamuyandi Jehova, tamweelede kumvwana ambabo. Pele kuti kamujisi balongwe ibamuyanda Jehova, amukakatile kubalongwe aabo, nkaambo bayoomugwasya.—Tus. 13:20. w23.09 9-10 ¶6-7

Alefa ndibbala lili kumatalikilo mualufabbeti ya Chigiriki mpoonya Omega lili kumamanino. Kwiinda mukulyaamba kuti ndime “Alefa a Omega,” Jehova utugwasya kubona kuti, ikuti watalika cintu cimwi, ulacimana kucicita. Ciindi Jehova naakamana kulenga Adamu a Eva, wakabaambila kuti: ‘Amuzyalane muvwule, muzuzye nyika akuyeendelezya.’ (Matl. 1:28) Ciindi Jehova naakaamba makanze aakwe ciindi cakusaanguna, cakali mbuli kuti wakaamba kuti “Alefa.” Cakusalazya, wakaatondezya makanze aakwe aakuti: Ciindi cakali kuyoosika cakuti bana ba Adamu a Eva balondokede bazuzye nyika akwiicinca kuba paradaiso. Aboobo makanze aakwe aakuzuzikizyigwa, cinooli mbuli kuti waamba kuti “Omega.” Jehova naakamana kulenga “julu anyika azili mumo zyoonse,” wakaamba cintu cimwi ikutondezya kuti makanze aakwe akali kuyoozuzikizyigwa ncobeni. Makanze aakwe kujatikizya nyika abantu, akali kuyoozuzikizyigwa cakumaninina kumamanino aabuzuba bwaciloba.—Matl. 2:1-3. w23.11 5 ¶13-14

Lweendo lwakuzwa ku Babuloni kuya ku Israyeli lwakali kukonzya kutola myezi yone, pele Jehova wakasyomezya kuti wakali kuyoozigwisya zisinkilizyo zili zyoonse izyakali kukonzya kubapa kwaalilwa kupiluka kwabo. Ba Juda basyomeka bakalizyi kuti zilongezyo nzyobakali kuyoojana akaambo kakujokela ku Israyeli, zyakali zinji kapati kwiinda zintu zili zyoonse nzyobakali kunoosiya. Cilongezyo cipati kwiinda, cakali kujatikizya bukombi bwabo. Kwakanyina tempele lya Jehova mu Babuloni. Mwakanyina cipaililo bana Israyeli mpobakali kukonzya kutuulila zipaizyo izyakali kuyandika kweelana a Mulawo wa Musa, alimwi kwakanyina bubambe bwabapaizi ibakali kukonzya kutuula zipaizyo eezyo. Kuyungizya waawo, kwakali bantu banji mumunzi ooyu ibakali kukomba baleza bakubeja kwiinda baabo ibakali kulemeka zyeelelo zya Jehova. Aboobo, ba Juda banji ibakali kumuyanda kapati Jehova, bakaliyandide kujokela kwabo kwalo nkobakali kukonzya kubukulusya bukombi busalala. w23.05 14-15 ¶3-4

Tweelede kulomba lugwasyo lwamuuya uusalala wa Leza kutegwa tucikonzye kuzumanana kweenda katuli “bana bamumuni.” Nkaambo nzi? Nkaambo tacili cuuba-uba kuzumanana kusalala munyika eeyi iisofweede. (1Tes. 4:3-5, 7, 8) Aboobo muuya uusalala ulakonzya kutugwasya kulwana mizeezo yabantu bamunyika eeyi balo bataboni zintu mbuli mbwazibona Jehova. Kuyungizya waawo, muuya uusalala ulakonzya kutugwasya kuba ‘amisyobo yoonse yabubotu abululami.’ (Ef. 5:9) Nzila imwi mbotukonzya kutambula muuya uusalala nkwiinda mukuulomba mumupailo. Jesu wakaamba kuti Jehova ‘uyoobapa muuya uusalala aabo ibamulomba.’ (Lk. 11:13) Alimwi tulakonzya kutambula muuya uusalala ciindi notumutembaula Jehova antoomwe kumiswaangano ya Bunakristo. (Ef. 5:19, 20) Aboobo muuya uusalala wa Leza ulakonzya kutugwasya kupona munzila njakkomanina. w24.03 23-24 ¶13-15

Sena muyandika kukkazika moyo? Kuti kacili boobo, amupailile kuti kamukkazika moyo kapati. Kukkazika moyo mucelo wamuuya uusalala. (Gal. 5:22, 23) Aboobo tulakonzya kupailila muuya uusalala akulomba Jehova kuti atugwasye kuzyala mucelo ooyu wamuuya. Kuti twalijana mubukkale busunka kukkazika moyo kwesu, ‘tulazumanana kulomba’ muuya uusalala kutegwa utugwasye. (Lk. 11:13) Kunze lyaboobo, tulakonzya kumulomba Jehova kuti atugwasye kubona zintu kweelana ambwazibona. Twamana kupaila, tweelede kusolekesya kukkazika moyo buzuba bumwi abumwi. Ciindi notuzumanana kupaila kuti katukkazika moyo alimwi akusolekesya kubutondezya, bube oobu buyookomena mumyoyo yesu mane limwi buyooba cibeela cabube bwesu. Alimwi kulagwasya kuzinzibala kuyeeya zikozyanyo zyamu Bbaibbele. Mu Bbaibbele kuli zikozyanyo zinji zyabantu ibakali kukkazika moyo. Kwiinda mukuzinzibala kuyeeya zikozyanyo zili boobu, tulakonzya kwiiya nzila motukonzya kukutondezya kukkazika moyo. w23.08 22 ¶10-11

Jesu wakasyomezya mwaapostolo Petro kuti Jehova wakali kuyoomulanganya. Jesu iwakabusyigwa wakacitila Petro alimwi abaapostolo bakwe maleele aakujaya nswi. (Joh. 21:4-6) Cakutadooneka maleele aaya akamupa kusyoma kuti Jehova wakali kuyoomupa zintu nzyaakali kuyandika kumubili. Kweelede kuti mwaapostolo wakaayeeya majwi aa Jesu aakuti Jehova wakali kuyoobalanganya aabo bazumanana “kusaanguna kuyandaula Bwami.” (Mt. 6:33) Zyoonse eezyi zyakagwasya Petro kubikka mulimo wakukambauka mubusena bwakusaanguna kutali mulimo wakuzela nswi. Wakakambauka cabusicamba mubuzuba bwa Pentekoste 33 C.E., kugwasya bantu banji kutambula makani mabotu. (Mil. 2:14, 37-41) Mukuya kwaciindi wakagwasya ba Samariya alimwi abamasi kuzumina Kristo. (Mil. 8:14-17; 10:​44-48) Cakutadooneka Jehova wakamubelesya kapati Petro mukuleta bantu bamisyobo yoonse mumbungano. w23.09 20 ¶1; 23 ¶11

Nokwakainda myaka iibalilwa kuli yobilo kuzwa bana Babuloni nobakamana kunyonyoona Jerusalemu, Mwami Nebukadinezara wa Babuloni wakalota ciloto ciyoosya cacibumbwa cipati kapati. Wakalailila kuti baalumi basongo boonse kubikkilizya a Daniele bamwaambile ncocakali kupandulula ciloto, buyo-buyo bakali kuyoojaigwa kuti baalilwa kucita oobo. (Dan. 2:3-5) Daniele wakeelede kubweza ntaamu cakufwambaana, buyo-buyo bantu banji bakali kuyoojaigwa. “Daniele wakaunka kumwami akumulomba kuti amupe ciindi cakuti amupandulwide ciloto cakwe.” (Dan. 2:16) Eelo kaka eeci cakali kuyandika busicamba alusyomo! Bbaibbele kunyina mpolyaamba kuti Daniele kuli naakapandulude kale ciloto. Wakalomba beezinyina “kuti bapaile kuli Leza wakujulu kuti abafwide luse akubagwasya kujatikizya maseseke aaya.” (Dan. 2:18) Jehova wakayiingula mipailo yabo. Kwiinda mukugwasyigwa a Leza, Daniele wakacikonzya kucipandulula ciloto ca Nebukadinezara. Aboobo Daniele alimwi abeenzinyina tiibakajaigwa pe. w23.08 3 ¶4

Amulange-lange bubotu bwakukkazika moyo. Ciindi notukkazika moyo, tulakkomana alimwi akubatama. Aboobo kukkazika moyo kulakonzya kutugwasya mumizeezo alimwi akutupa kuba abuumi bubotu. Ciindi notubakkazikila moyo bamwi, tulaba azilongwe zibotu ambabo. Mbungano ilakamantana. Kuti umwi watunyemya, kumuka kukalala kulakonzya kupa kuti bukkale butaindili kubija. (Int. 37:8; Tus. 14:29) Pele kwiinda zyoonse, twiiya Taateesu wakujulu alimwi tulaba acilongwe ciyumu anguwe. Eelo kaka kukkazika moyo mbube bubotu alimwi bugwasya ncobeni! Nokuba kuti inga kacitali cuuba-uba kukkazika moyo, pele kwiinda mukugwasyigwa a Jehova, tulakonzya kuzumanana kubutondezya bube oobu. Alimwi notulindila nyika mpya cakukkazika moyo, tweelede kusyoma kuti “liso lya Jehova lilangide baabo bamuyoowa, aabo ibalangila luyando lwakwe lutamani.” (Int. 33:18) Aboobo atuzumanane toonse kulisamika bube bwakukkazika moyo. w23.08 22 ¶7; 25 ¶16-17

Jakobo wakaamba kuti muntu ulakonzya kulitamizya kuba alusyomo, pele milimo yakwe itondezya kuti unyina lusyomo. (Jak. 2:1-5, 9) Alimwi Jakobo wakaamba muntu umwi iwakabona ‘Munakristonyina katajisi zyakusama azyakulya’ pele kunyina naakamugwasya. Nokuba kuti muntu ooyu wakali kulyaamba kuti ulijisi lusyomo, milimo yakwe yakatondezya kuti tanaakajisi lusyomo. (Jak. 2:14-16) Jakobo wakaamba Rahabu kuti ncikozyanyo cibotu camuntu iwakalutondezya lusyomo kwiinda mumilimo. (Jak. 2:25, 26) Rahabu wakamvwa kujatikizya Jehova alimwi akuzyiba kuti wakali kubagwasyilizya bana Israyeli. (Jos. 2:9-11) Wakalutondezya lusyomo kwiinda mumilimo. Mucikozyanyo, wakabakwabilila basikutwela bana Israyeli bobilo ciindi buumi bwabo nobwakali muntenda. Akaambo kaceeci, mukaintu ooyu iwatakalondokede alimwi iwatakali muna Israyeli, wakaambwa kuti mululami mbubonya mbuli Abrahamu. Aboobo kuli Rahabu, twiiya kuti cilayandika kapati kulutondezya lusyomo kwiinda mumilimo yesu. w23.12 5-6 ¶12-13

Mbotuli Banakristo, tatweelede kugolela buyo akuzyiba njiisyo zyantalisyo zyamu Bbaibbele. Pele kwiinda mukugwasyigwa amuuya uusalala wa Leza, tweelede kusolekesya kuzyiba “noziba zintu zisisidwe zya Leza.” (1Kor. 2:9, 10) Aboobo, mbuti kuti mwalibikkila bubambe bwakwiiya zintu zimwi cakulomya izikonzya kumupa kuba acilongwe ciyumu a Jehova? Mucikozyanyo, mulakonzya kusola kuvwuntauzya kutegwa mubone Jehova mbwaakatondezya luyando kubabelesi bakwe bakaindi, mpoonya akubona makani aayo mbwaasinizya kuti andinywe ulamuyanda. Mulakonzya kulanga-langa makani aajatikizya Jehova mbwaakali kuyanda kuti bana Israyeli kabamukomba, mpoonya akweezyanisya mbwayanda kuti katumukomba mazuba aano. Naa ambweni mulakonzya kubwiiya cakulomya businsimi mbwaakazuzikizya Jesu ciindi naakali kupona aano anyika akucita mulimo wakwe. Mulakonzya kukukkomanina kapati kwiiya makani aali boobu kwiinda mukubelesya Watch Tower Publications Index naa Bbuku Ligwasya kuvwuntauzya lya Bakamboni ba Jehova. Kwiiya makani aamu Bbaibbele aali boobu kulakonzya kuyumya lusyomo lwanu alimwi akumugwasya ‘kujana luzyibo lwa Leza.’—Tus. 2:4, 5. w23.10 18-19 ¶3-5

Ibbala ndyaakabelesya mwaapostolo Petro ilyakasandululwa kuti “kapati” mu Chigiriki lyaamba “kutandabula.” Mpoonya cibeela cabili mukapango aaka citondezya cintu cikonzya kucitika akaambo kakuyandana kapati. Kulakonzya kutugwasya kuvwumba zibi zyabakwesu abacizyi. Mucikozyanyo, amweezeezye kuti mujisi tebulu likwalaukide-kwalaukide atala. Aboobo mulakonzya kubweza kasani akukayala atebulu kutegwa muvwumbe zikwalu-kwalu eezyo, ikutali buyo comwe pele zyoonse. Mbubwenya buyo, ikuti katubayanda kapati bakwesu abacizyi, tulakonzya kuvwumba naa kubalekelela, ikutali buyo cibi comwe naa zyobilo, pele “zibi zinji kapati.” Luyando ndotujisi kuli bamwi lweelede kuti kaluli luyumu kapati cakuti katucikonzya kubalekelela ciindi nobatulubizyila, nokuba kuti tacili cuuba-uba. (Kol. 3:13) Ciindi notubalekelela bamwi, tutondezya kuti tujisi luyando luyumu alimwi tuyanda kumukkomanisya Jehova. w23.11 11-12 ¶13-15

Ciindi naali amyaka iili 26, Mwami Josiya wakatalika kubambulula tempele. Nowakali kucitwa mulimo ooyu, “bbuku lya Mulawo wa Jehova lyakapegwa kwiinda muli Musa” lyakajanwa. Mwami mbwaakamvwida buyo ncolyaamba, mpoonya-mpoonya wakabweza ntaamu akutobela cakalembedwe mumo. (2Mak. 34:14, 19-21) Sena inga mwayanda kubala Bbaibbele abuzuba? Ambweni mwakatalika kale kucita oobo, sena mulakukkomanina? Sena inga mulatubona tupango tukonzya kumugwasya cacigaminina? Ciindi Josiya naakali amyaka yakuma 39, wakalubizya calo cakasololela kulufwu lwakwe. Wakalisyoma muciindi cakusyoma Jehova. (2Mak. 35:20-25) Aawa mpaali ciiyo. Tacikwe makani amyaka njotujisi naa bulamfwu bwaciindi ncotwali kwiiya Bbaibbele, tweelede kuzumanana kuyandaula Jehova. Eeci cibikkilizya kupaila lyoonse kulomba busolozi bwakwe, kwiiya Jwi lyakwe, alimwi akugwasyigwa alulayo luzwa ku Banakristo basimide. Kuti twacita oobo, tuyakweeleba penzi lyakwaalilwa kusala camaano alimwi tulalangilwa kuyookkomana kapati.—Jak. 1:25. w23.09 12 ¶15-16

Bbaibbele lilaamba bamakaintu banji ibakali kumuyanda Jehova alimwi akumubelekela. Bamakaintu aaba tiibakali ‘kuciindizya muzilengwa’ alimwi bakali ‘kusyomeka muzintu zyoonse.’ (1Tim. 3:11) Kuyungizya waawo, bacizyi bakubusi balakonzya kwiiya zikozyanyo zyabamakaintu Banakristo basimide mumbungano zyabo. Nobacizyi bana-bana, amuyeeye kujatikizya bacizyi mbomuzyi ibajisi cikozyanyo cibotu ncomukonzya kwiiya. Amububikkile maano bube bubotu mbobajisi; mpoonya amubone mbomukonzya kubwiiya. Kulicesya mbube buyandika kapati ku Banakristo. Ikuti mukaintu kalicesya, ulakonzya kuba mulongwe wa Jehova alimwi abamwi. Mucikozyanyo, mukaintu uumuyanda Jehova, cakulicesya ulabulemeka bubambe bwabusilutwe oobo mbwaakatalisya Usyi wakujulu. (1Kor. 11:3) Bubambe oobu bulabeleka munzila yacigaminina mumbungano alimwi amumukwasyi. w23.12 18-19 ¶3-5

Jehova ulangila mulumi kuti kamuyanda mukaintu wakwe alimwi akumupa nzyayandika kumubili, kuba mulongwe wakwe mubotu alimwi akumugwasya kuba acilongwe ciyumu a Jehova. Kwiiya kuba abube mbuli bwakuyeeya kabotu, kubalemeka bamakaintu alimwi akusyomeka, kuyoomugwasya kuba mulumi uuli kabotu. Mwaakukwata, mulakonzya kuyooba abana. Ino ncinzi ncomukonzya kwiiya kuli Jehova kujatikizya kuba usyi mubotu? (Ef. 6:4) Caantangalala, Jehova wakaambila Mwanakwe Jesu kuti wakali kumuyanda alimwi akumukkomanina. (Mt. 3:17) Ikuti naa mwaakuba abana, amukabe masimpe kuti lyoonse mulabaambila kuti mulabayanda. Mweelede kunoobalumbaizya ciindi aciindi akaambo kazintu zibotu nzyobacita. Bamausyi ibaiya cikozyanyo ca Jehova balabagwasya bana babo kuba bamaalumi abamakaintu Banakristo basimide. Aboobo, mulakonzya kulibambila lino kuyooba usyi mubotu kwiinda mukubayanda akubalanganya banamukwasyi alimwi abakwesu abacizyi mumbungano. Amwiiye kubaambila kuti mulabayanda akubalumbaizya.—Joh. 15:9. w23.12 28-29 ¶17-18

Nokuba kuti tuli babelesi ba Jehova basyomeka, tulajana mapenzi alimwi akuciswa mbubonya mbuli bantu boonse. Kuyungizya waawo, tuyandika kuliyumya kukukazyigwa alimwi akupenzyegwa kuzwa kuli baabo batabayandi bantu ba Leza. Nokuba kuti Jehova kunyina naalesya mapenzi aali boobu kutucitikila, utusyomezya kutugwasya. (Is. 41:10) Kwiinda mukugwasyigwa anguwe, tulakonzya kuzumanana kukkomana, kusala kabotu alimwi akuzumanana kusyomeka kulinguwe nomuba mubukkale bukatazya kapati. Jehova utusyomezya kutupa ceeco Bbaibbele ncoliita kuti “luumuno lwa Leza.” (Flp. 4:6, 7) Luumuno oolu lwaamba ikuliiba kuboola akaambo kakuba acilongwe cibotu anguwe. Oolu nduumuno “lwiinda maano oonse”; ndubotu kapati kwiinda mbotuyeeyela. Mucikozyanyo, sena kuli ciindi nomwakapaila camoyo woonse kuli Jehova mpoonya akulimvwa kukkalwa moyo kapati nomwakamana kucita boobo? Oolo lwakali “luumuno lwa Leza.” w24.01 20 ¶2; 21 ¶4

Aabo bamuyanda Jehova balayanda kulitembaula zina lyakwe camoyo woonse. Mwami Davida wakalizyi kuti, kutembaula zina lya Jehova ncimwi buyo akutembaula Jehova lwakwe. Zina lya Jehova libikkilizya mpuwo yakwe, aboobo lituyeezya bube bwakwe boonse bubotu alimwi azintu zitaliboteli nzyacita. Davida wakali kuyanda kulitembaula zina lya Bausyi alimwi akutondezya kuti lilasalala. Wakali kuyanda kucita oobo ‘azyoonse zili mukati kakwe,’ nkokuti camoyo woonse. Mbubwenya buyo, ba Levi bakali kumutembaula Jehova. Cakulicesya, bakazumina kuti majwi aabo tanaakali kukonzya kulitembaula zina lya Jehova lisetekene kweelana ambolyakeelede. (Neh. 9:5) Cakutadooneka, kutembaula ooku ikwakali kuzwa ansi aamoyo kwakali kumukkomanisya kapati Jehova. w24.02 9 ¶6

Jehova takonzyi kumubona kuti mwaalilwa akaambo kakutazuzikizya mbaakani eeyo iitakonzyeki kulindinywe. (2Kor. 8:12) Amubone buyumuyumu kuti bupa coolwe cakwiiya. Kamuziyeeya mbaakani nzyomwakazuzikizya kale. Bbaibbele lyaamba kuti “Leza tali Leza uutaluleme pe uunga waluba milimo yanu.” (Heb. 6:10) Aboobo andinywe tamweelede kuluba pe. Amuzinzibale kuyeeya kujatikizya mbaakani nzyomwakazuzikizya kale, ambweni nimbaakani yakuba acilongwe a Jehova, kwaambila bamwi kujatikizya nguwe naa yakubbapatizyigwa. Mbubwenya mbomwakazumanana kuyaambele akuzuzikizya mbaakani zyakumuuya kaindi, amuzumanane kuyaambele akuzuzikizya mbaakani nzyomujisi lino. Kwiinda mukugwasyigwa a Jehova, mulakonzya kwiizuzikizya mbaakani yanu. Nomucita boobo, amulukkomanine lweendo kwiinda mukuzinzibala kuyeeya mbwamugwasya Jehova. Kucita boobo kuyoopa kuti muzumanane kukkomana nomubeleka canguzu kuzuzikizya mbaakani zyanu. (2Kor. 4:7) Ikuti naa tiimwatyompwa, muyoojana zilongezyo zitaambiki.—Gal. 6:9. w23.05 31 ¶16-18

Jehova ulajana nzila yakutondezya babelesi bakwe kuti ulabayanda alimwi akubakkomanina. Mucikozyanyo, Magwalo alaamba ziindi zyobilo naakaambila Jesu kuti Mwanaakwe ngwaakali kuyandisya akukkomanina. (Mt. 3:17; 17:5) Sena andinywe inga mwayanda kumvwa Jehova kamwaambila kuti ulamukkomanina? Mazuba aano, Jehova tabandiki andiswe kuzwa kujulu, pele ulacita oobo kwiinda mu Jwi lyakwe, Bbaibbele. Tulakonzya “kulimvwa” jwi lya Jehova ilyaamba kuti ulatukkomanina ciindi notubala majwi aa Jesu aali mu Mabbuku aa Makani Mabotu. Kayi Jesu wakabwiiya bube bwa Bausyi cakumaninina. Aboobo, ciindi notubala kuti Jesu wakatondezya kuti ulabakkomanina basikumutobela basyomeka nokuba kuti tiibakalondokede, tulakonzya kweezeezya kuti ngu Jehova uutwaambila majwi aayo. (Joh. 15:9, 15) Ikuti masunko atucitikila tacaambi kuti Leza waleka kutukkomanina. Muciindi caboobo, mapenzi atupa coolwe cakutondezya mbotumuyanda kapati Jehova alimwi akumusyoma.—Jak. 1:12. w24.03 28 ¶10-11