November

Kuti naa muli bazyali, amubagwasye bana banu kulibambila bwiinguzi butakatazyi kweelana aciimo cabo. Zimwi ziindi, kulaba ziiyo zijatikizya makani mapati, mbuli mapenzi aamucikwati naa makani aakulilemeka, pele inga kulaba muncali omwe naa yobilo iijisi twaambo ntobakonzya kwiingula bana. Alimwi amubagwasye bana banu, ikuzyiba kaambo ncobatakonzyi kupegwa coolwe cakwiingula kufwumbwa leelyo nobatambika. Kucita boobo kulakonzya kubagwasya kutanyema ciindi bamwi nobapegwa coolwe cakwiingula muciindi cambabo. (1Tim. 6:18) Toonse tulakonzya kulibambila bwiinguzi bukulwaizya, ibupa kuti Jehova alemekwe alimwi akukulwaizya Banakristoma. (Tus. 25:11) Nokuba kuti zimwi ziindi tulakonzya kwaamba zyakatucitikila, tatweelede kuba acilengwa cakwaamba buyo makani aajatikizya ndiswe. (Tus. 27:2; 2Kor. 10:18) Muciindi caboobo, tweelede kubikkila maano kwaamba makani aajatikizya Jehova, Ijwi lyakwe alimwi abantu bakwe.—Ciy. 4:11. w23.04 24-25 ¶17-18

Luyando lulayandika kutegwa tuzumanane kupakamana alimwi akubatama. (Mt. 22:37-39) Luyando ndotujisi kuli Leza lulatugwasya kuzumanana kukambauka nociba ciindi notwajana buyumuyumu. (2Tim. 1:7, 8) Akaambo kakuti tulabayanda nobaba bantu batabelekeli Jehova, tulazumanana kukambauka, nokuba kubelesya fooni naa magwalo. Kunyina notutyompwa nkaambo tulizyi kuti bumwi buzuba, bantu bayoocinca akutalika kucita zintu ziluleme. (Ezk. 18:27, 28) Kuyanda basimukoboma kulabikkilizya abakwesu abacizyi. Tulalutondezya luyando luli boobo kwiinda ‘mukukulwaizyanya akuyakana umwi amweenzinyina.’ (1Tes. 5:11) Mbubwenya mbuli basikalumamba babelekela antoomwe munkondo, tulakulwaizyanya umwi amweenzinyina. Mbubwenya buyo, tatuyandi kubacisa bakwesu abacizyi acaali naa kubapilusizya cibi. (1Tes. 5:13, 15) Alimwi tulatondezya luyando kwiinda mukubalemeka bakwesu basololela mumbungano.—1Tes. 5:12. w23.06 10 ¶6; 11 ¶10-11

Inzila imwi mbotukonzya kuyumya lusyomo lwesu nkwiinda mukuzinzibala kuyeeya kujatikizya cinunuzyo. Cinunuzyo, ncecitupa kusyoma kuti zisyomezyo zya Leza zyoonse ziyoozuzikizyigwa ncobeni. Ciindi notuzinzibala kuyeeya kaambo cinunuzyo ncocakapedwa alimwi azyakajatikizyidwe, tulaba alusyomo luyumu lwakuti cisyomezyo ca Leza cabuumi butamani ciyoozuzikizyigwa ncobeni. Nkaambo nzi ncotwaambila boobo? Ncinzi cakajatikizyidwe mukupa cinunuzyo? Jehova wakatuma Mwanaakwe simuzyalwaalikke walo iwakali mulongwe wakwe mwini-mwini, kuzwa kujulu akuboola aano anyika kuti azoozyalwe kali muntu uulondokede. Naakali waano anyika, Jesu wakaliyumya kumapenzi aayindene-indene. Wakapenga citaambiki akufwa lufwu lucisa kapati. Eelo kaka ooku kwakali kulyaaba nkwaakacita Jehova! Leza wesu siluyando naatakamuzumizya Mwanaakwe kupenga akufwa kuti naakali kuyanda kuti tupone buumi bubotu, pele kwaciindi cisyoonto buyo. (Joh. 3:16; 1Pet. 1:18, 19) Mbwaanga Jehova wakaaba Mwanaakwe ngwayandisya kapati akaambo kandiswe, tuli masimpe kuti uyoocizuzikizya cisyomezyo cakwe cakuti tukapone kukabe kutamani munyika mpya. w23.04 27 ¶8-9

Sena Jehova uliyandide kuyoobabusya bafwide? Eeco tacidoonekwi buya. Wakasololela balembi ba Bbaibbele bali mbobabede kulemba cisyomezyo cakwe cijatikizya bubuke bwakumbele. (Is. 26:19; Hos. 13:14; Ciy. 20:11-13) Alimwi kuti Jehova wasyomezya cintu, lyoonse ulacizuzikizya. (Jos. 23:14) Alimwi buya ulijisi luyandisisyo lwakubusya bantu bakafwa. Amuyeeye majwi ngaakaamba Jobu. Wakalisinizyide kuti nokuba kuti wafwa, Jehova wakali kuyoomubusya. (Job. 14:14, 15) Mbubwenya buyo, eeci Jehova ncayanda kuyoocitila bakombi bakwe boonse bakafwa. Uliyandide kuyoobabusya kutegwa bakapone buumi buli kabotu alimwi kabakkomene. Ino mbuti kujatikizya mabbiliyoni aabantu bakafwa kabatajisi coolwe cakwiiya kujatikizya Jehova? Leza wesu siluyando uyoobabusya abalo. (Mil. 24:15) Uyanda kuti abalo bakabe acoolwe cakuba balongwe bakwe akupona kukabe kutamani anyika.—Joh. 3:16. w23.04 9 ¶5-6

Mbuti mbomukonzya kuyumya bulangizi bwanu? Mucikozyanyo, ikuti kamujisi bulangizi bwakuyoopona anyika mane kukabe kutamani, amubale ncolyaamba Bbaibbele kujatikizya mboinoobede Paradaiso akuzinzibala kuyeeya kujatikizya njiyo. (Is. 25:8; 32:16-18) Amuyeeye kujatikizya mbobunoobede buumi munyika mpya. Amweezeezye kuti muli mulinjiyo. Ikuti lyoonse katuyeeya kujatikizya bulangizi bwanyika mpya, mapenzi eesu ayooba ‘akaindi buyo kaniini alimwi mauba-uba.’ (2Kor. 4:17) Bulangizi Jehova mbwaamupa buyoomugwasya kuliyumya kumapenzi. Wakatupa kale cintu ncotuyandika kutegwa atugwasye kuliyumya. Aboobo ciindi nomuyanda lugwasyo lwakuzuzikizya mulimo wanu, kuliyumya kumasunko, naa kuzumanana kukkomana, amupaile kuli Jehova cakuzwa ansi amoyo akulomba busolozi bwakwe ciindi nomucita ciiyo canu nobeni. Amuluzumine luumbulizyo luzwa kubakwesu abacizyi. Amuzumanane kweezeezya kujatikizya bulangizi bwanu bwakumbele. Ikuti mwacita oobo, ‘muyooyumizyigwa anguzu [zya Leza] zyoonse kweelana abulemu bwanguzu zyakwe ikutegwa muliyumye cakumaninina kumwi kamukkazikide moyo alimwi akukondwa.’—Kol. 1:11. w23.10 17 ¶19-20

Kuli twaambo tunji tweelede kutupa kumulumba Jehova mumupailo. Tulakonzya kumulumba akaambo kacintu cibotu cili coonse ncotujisi, nkaambo cipego cibotu cili coonse cizwa kulinguwe. (Jak. 1:17) Mucikozyanyo, tulakonzya kumulumba akaambo kakweebeka kwanyika alimwi azintu zibotu nzyaakalenga. Tulakonzya kumulumba akaambo kabuumi bwesu, mukwasyi wesu, balongwe besu alimwi abulangizi mbotujisi. Kunze lyaboobo, tweelede kumulumba Jehova akaambo kakutupa coolwe cakuba acilongwe anguwe. Zimwi ziindi, inga twayandika kusolekesya kuyeeya twaambo tweelede kutupa kumulumba Jehova swebo lwesu kutugama. Bantu banji mazuba aano tabalumbi. Kanji-kanji babikkila buyo maano kuzintu nzyobayanda ikutali mbobakonzya kutondezya kulumba akaambo kazintu nzyobajisi. Ikuti naa twaba abube buli boobu, mipailo yesu lyoonse inooli buyo yakulomba. Pele kutegwa eeci citacitiki, tweelede kuzumanana kutondezya kulumba akaambo kazintu zyoonse nzyatucitila Jehova.—Lk. 6:45. w23.05 4 ¶8-9

Mbwali Taateesu siluyando, Jehova kunyina nakkomana kutubona katupenga. (Is. 63:9) Pele, kunyina nalesya mapenzi kutucitikila alo aali mbuli milonga alimwi amabangabanga aamulilo. (Is. 43:2.) Nokuba boobo, usyomezya kutugwasya kutegwa tucikonzye ‘kwiinda’ mulingawo. Alimwi kunyina nayoozumizya mapenzi eesu kuti anyonganye cilongwe cesu anguwe. Jehova alimwi ulatupa muuya wakwe uusalala ulaanguzu kutegwa atugwasye kuliyumya. (Lk. 11:13; Flp. 4:13) Akaambo kaceeci, tulakonzya kuba alusyomo lwakuti lyoonse unootupa nzyotuyandika kutegwa tucikonzye kuliyumya alimwi akuzumanana kusyomeka kulinguwe. Jehova uyanda kuti katumusyoma. (Heb. 11:6) Zimwi ziindi, mapenzi ngotujisi alakonzya kulibonya kukomena cakuti tulakonzya kulimvwa kuti tatukonzyi kuliyumya. Andiza buya tulakonzya kutalika kudooneka naa Jehova ulatugwasya. Pele Bbaibbele litusyomezya kuti kwiinda mukugwasyigwa anguzu zya Leza, tulakonzya “kutanta bwaanda.” (Int. 18:29) Aboobo muciindi cakutalika kudooneka, tweelede kupaila katujisi lusyomo luyumu lwakuti Jehova uyooyiingula mipailo yesu.—Jak. 1:6, 7. w23.11 22 ¶8-9

Eelo kaka oobu mbupanduluzi bubotu bwaluyando lwini-lwini! Majwi aaya alakulwaizya kapati kuli banabukwetene: Mulakonzya kuba aluyando lutamani kuli umwi amweenzinyina. Kutegwa banabukwetene bazumanane kuyandana, beelede kubeleka canguzu. Mucikozyanyo, mulilo ulakonzya kuzumanana kuyaka lilikke buyo kuti kakuli muntu uuzumanana kusosela. Ikuti naa kunyina uusosela, mulilo ulakonzya kuzima mukuya kwaciindi. Mbubwenya buyo, mulumi amukaintu balakonzya kuzumanana kuyandana lilikke buyo kuti bazumanana kuluyumya luyando lwabo. Pele zimwi ziindi, banabukwetene balakonzya kulimvwa kuti luyando lwabo luyaabuceya kwaambisya kuti naa kabajisi penzi lyamali, penzi lyakuciswa naa buyumuyumu bwakukomezya bana. Aboobo kutegwa “mabangabanga aa Ja” azumanane kuyaka, mulumi amukaintu beelede kubeleka canguzu kuba acilongwe ciyumu a Jehova. w23.05 20-21 ¶1-3

Kutegwa tube basicamba, ncinzi ncotweelede kucita? Bazyali besu balakonzya kutukulwaizya kuba basicamba, pele tatukonzyi kuba basicamba akaambo buyo kakuti balo mbaasicamba. Kuba sicamba kuli mbuli kwiiya mulimo mupya. Nzila imwi motukonzya kwiiya mulimo ooyo, nkwiinda mukulangilila cakubikkila maano kuzintu mwiiyi nzyacita mpoonya akwiiya cikozyanyo cakwe. Mbubwenya buyo, andiswe tulaiya kuba basicamba kwiinda mukulangilila cakubikkila maano ciindi bamwi nobatondezya bube oobu mpoonya akwiiya cikozyanyo cabo. Mbuli Daniele, tweelede kulizyiba kabotu-kabotu Jwi lya Leza. Tweelede kuba acilongwe ciyumu a Jehova kwiinda mukubandika anguwe alimwi akumwaambila mbotulimvwa. Alimwi tweelede kumusyoma Jehova cakumaninina, ikuti twacita oobo uyootugwasya. Kumane lusyomo lwesu lwaakusunkwa, tuyoocikonzya kuba basicamba. Bantu basicamba balalemekwa abantu bamwi. Balakonzya kukwelelezya babombe myoyo kuli Jehova. Masimpe, tulijisi twaambo tubotu itweelede kutupa kuba basicamba. w23.08 2 ¶2; 4 ¶8-9

Ibbala lya Chigiriki ilyakasandululwa kuti “amusinizye,” lyakabelesyegwa kupandulula bantu mbobakali kusola lubulo mbuli ngolida naa nsiliva kutegwa basinizye kuti njancobeni. Aboobo andiswe tweelede kusaanguna kwaasinizya majwi ngotumvwa naa ngotubala kutegwa tubone naa ngamasimpe. Eeci ciyooyandika kapati akulindiswe mapenzi mapati mbwaayaabuswena afwaafwi. Muciindi cakwiile kuzumina buyo zintu zyoonse nzyobaamba bantu, swebo tweelede kubelesya maano kweezyanisya nzyobaamba ancolyaamba Bbaibbele alimwi ambunga ya Jehova. Kuti twacita oobo, tatukeenwi amajwi aakubeja aamadaimona. (Tus. 14:15; 1Tim. 4:1) Lyamapenzi mapati, babelesi ba Leza bayoofwutuka kabali nkamu. Pele umwi aumwi wesu ulizyi kuti kabuca uleta tunji, nkaambo tatuzyi mbobunoobede buumi bwesu bwajuunza. (Jak. 4:14) Nokuba boobo, kufwumbwa naa twaakufwutuka lyamapenzi mapati naa twafwa kaatanasika, tuyoopegwa buumi butamani kuti twazumanana kusyomeka. Toonse buyo atube amakanze aakubikkila maano kubulangizi butaliboteli mbotujisi akuzumanana kulibambila kusika kwabuzuba bwa Jehova. w23.06 13 ¶15-16

Tatuzyi Businsimi bumwi bwamu Bbaibbele mbobuyoozuzikizyigwa. (Dan. 12:8, 9) Pele ikutazyiba bwini mbobuyoozuzikizyigwa businsimi bumwi tacaambi kuti tabukazuzikizyigwi pe. Cakutadooneka, tulakonzya kuba alusyomo lwakuti Jehova uyootuyubunwida nzyotweelede kuzyiba aciindi ceelede, mbubwenya mbwaakacita musyule. Kuyooba kwaambilizya kwakuti “luumuno akuliiba”. (1Tes. 5:3) Mpoonya beendelezi bamunyika bayoobukila bukombi bwakubeja akubunyonyoona. (Ciy. 17:16, 17) Kumane bayoolwana bantu ba Leza. (Ezk. 38:18, 19) Zintu eezyi ziyoosololela kunkondo ya Amagedoni. (Ciy. 16:14, 16) Tulijisi lusyomo lwakuti lino-lino zintu eezyi ziyoocitika. Notucilindila ciindi eeco, atuzumanane kutondezya kulumba kwesu kuli Taatesu wakujulu kwiinda mukubikkila maano kubusinsimi bwamu Bbaibbele akugwasya bamwi kucita mbubwenya oobo. w23.08 13 ¶19-20

Ciindi mwaapostolo Paulo naakali kwaamba zyalusyomo, bulangizi alimwi aluyando, wakamanizya kwiinda mukwaamba kuti “icipati kwiinda zyoonse, nduyando.” (1Kor. 13:13) Nkaambo nzi ncaakaambila boobu? Nkaambo kumbele tatucinooyandiki kuba alusyomo muzisyomezyo zya Leza kujatikizya nyika mpya, naa kuba abulangizi bwakuti zisyomezyo eezyo ziyoozuzikizyigwa, nkaambo zinooli zyazuzikizyigwa kale. Pele tuyooyandika kuzumanana kumuyanda Jehova abantuma. Alimwi buya, luyando ndotujisi kulimbabo luyoozumanana kukomena mane kukabe kutamani. Kuyungizya waawo, luyando ndolutuzyibya kuti tuli Banakristo bakasimpe. Jesu wakaambila baapostolo bakwe kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Joh. 13:35) Kuyungizya waawo, kuyandana kupa kuti tuzumanane kukamantana. Paulo wakaamba kuti luyando “ncecaanzyo calukamantano cilondokede.” (Kol. 3:14) Mwaapostolo Johane wakalembela basyominyina kuti: “Kufwumbwa ooyo uuyanda Leza weelede kumuyanda awalo munyina.” (1Joh. 4:21) Ciindi notutondezya luyando kuli umwi amweenzinyina, tutondezya kuti tulamuyanda Leza. w23.11 8 ¶1, 3

Bbaibbele likozyanisya buumi bwesu bwa Bunakristo kumuzundano wakubalika. Basikubalika ibacikonzya kuzwidilila akusika kumamanino bayootambula bulumbu bwabuumi butamani. (2Tim. 4:7, 8) Tweelede kucita cili coonse ncotukonzya kutegwa tuzumanane kubalika akaambo kakuti tuli kumamanino kwini kwamuzundano wesu. Mwaapostolo Paulo, wakaamba zintu zimwi zikonzya kutugwasya kutegwa andiswe tuzwidilile. Utulailila kuti ‘tuzisowe zyoonse zitulemena akubalika cakuliyumya mukusiyana nkotubikkilidwe kumbele.’ Sena wakali kupandulula kuti kunyina mukuli uuli woonse Munakristo ngwayelede kunyamuna? Peepe. Pele wakali kupandulula kuti tweelede kusowa cintu cili coonse citayandiki calo cikonzya kutulemena. Cintu eeco cilakonzya kutulemena cakuti inga twacileka buya akubalika. Kutegwa tukacikonzye kuzwidilila, tweelede kuzizyiba zintu zikonzya kutulemena alimwi akuzisowa cakufwambaana. Nokuba boobo, aciindi ncomunya, tatweelede kwiiyumbila ambali mikuli njotweelede kunyamuna nkaambo buyo-buyo tulakonzya kubonwa kuti twaalilwa kubalika mumuzundano.—2Tim. 2:5. w23.08 26 ¶1-2

Kunyoneka kulatugwasya kulemeka mizeezo yabamwi. Mucikozyanyo, bacizyi bamwi balakukkomanina kulipenta-penta, pele bamwi tabakukkomanini. Banakristo bamwi balanywa bukoko cansaizi, pele bamwi basala kutasolela limwi. Banakristo boonse balayanda kuba abuumi buli kabotu, pele balaindana caboola kukusala busilisi mbobayanda. Ikuti katulimvwa kuti nzyotusala swebo lyoonse nzeziluzi akutalika kukulwaizya bakwesu abacizyi kuti abalo basale mbuli ndiswe, tulakonzya kubatyompya bamwi akunyonganya lukamantano mumbungano. (1Kor. 8:9; 10:23, 24) Mucikozyanyo, Jehova kunyina natwaambila zisani nzyotweelede kusama, muciindi caboobo wakatupa njiisyo zyotweelede kutobela. Tweelede kusama kabotu munzila iitondezya kuti tuli babelesi ba Leza, ikutondezya kunyoneka, bulemu alimwi ‘akulibatamika.’ (1Tim. 2:9, 10) Aboobo, tatweelede kusama munzila iipa kuti bantu kabayeeya buyo kujatikizya nsamino yesu. Njiisyo zyamu Bbaibbele alimwi zilakonzya kugwasya baalu kutabikkila bamwi milawo iijatikizya nsamino alimwi akubamba masusu. w23.07 23-24 ¶13-14

Jehova watondezya mbotukonzya kuyoojana lukkomano kumbele. Aabo bazumina kutamba ‘kwamukaintu mufwubafwuba’ balasola kujana lukkomano kwiinda mukucita bwaamu. Nzyobacita zibasololela “kunsi kwini kwa Cuumbwe.” (Tus. 9:13, 17, 18) Eelo kaka eeci ciliindene aciyoocitikila baabo bazumina kutamba kwamukaintu wiiminina “busongo bwini-bwini!” (Tus. 9:1) Aboobo tweelede kwiiya kuyanda zintu nzyayanda Jehova akusulaika zeezyo zyasulaika. (Int. 97:10) Alimwi tulikkomene akaambo kakuti tulakonzya kutamba bamwi kuti abalo bagwasyigwe ‘abusongo bwini-bwini.’ Tuli mbuli babelesi ‘baunka atala aamasena aasumpukide aamunzi akwiita bantu kuti: ‘Kufwumbwa uutakwe luzyibo, aaboole okuno.’’ Zilongezyo nzyotujana antoomwe abaabo batuswiilila tazili buyo zyakaindi kasyoonto. Pele zyalo tazikamani, alimwi ziyoopa kuti ‘tukapone’ mane kukabe kutamani ciindi ‘notuzumanana kweenda munzila yamaano.’—Tus. 9:3, 4, 6. w23.06 24 ¶17-18

Ino mulimvwa buti ciindi mubelesinyoko naa sicikolonyoko naamubuzya kujatikizya nzyomusyoma? Sena inga mulalibilika? Tobanabunji mbotulimvwa oobo. Pele mubuzyo uuli boobo inga watugwasya kuzyiba muntu nzyayeeya naa nzyasyoma, calo cikonzya kutupa coolwe cakumwaambila makani mabotu. Nokuba boobo, zimwi ziindi muntu inga wabuzya mubuzyo munzila iinyemya. Eeci taceelede kutugambya pe. Kayi, bamwi bakacengwa kujatikizya nzyotusyoma. (Mil. 28:22) Kuyungizya waawo, tupona “kumazuba aamamanino,” ciindi bantu banji ‘nobatanyoneki’ alimwi anobali “bakali.” (2Tim. 3:1, 3) Mulakonzya kulibuzya kuti, ‘Mbuti mbondikonzya kukkazika moyo alimwi akuba mupampu ciindi muntu nayanda kukazya makani ngondisyoma?’ Ncinzi cikonzya kumugwasya? Kubomba moyo kulakonzya kumugwasya. Kayi muntu mubombe moyo tafwambaani kukalala, pele ulakonzya kulijata ciindi naanyemezyegwa naa eelyo natazyi cakwiingula. w23.09 14 ¶1-2

Zimwi ziindi, tulatambula lulayo lutukwabilila kujatikizya kuyandisya zintu zyakumubili alimwi azintu zikonzya kupa kuti tusotoke milawo ya Leza. Tulagwasyigwa kwiinda mukutobela busolozi bwa Jehova mumakani aaya. (Is. 48:17, 18; 1Tim. 6:9, 10) Tacidoonekwi buya kuti, Jehova uyoozumanana kubelesya bantu kupa busolozi ciindi camapenzi mapati mane kusikila mu Bulelo bwa Myaka Iili 1,000. Sena tuyoozumanana kutobela malailile ngobanootupa? Eeci ciyeeme ambotucita mazuba aano kujatikizya busolozi mbwatupa Jehova. Aboobo, aabe makanze eesu lyoonse kutobela busolozi bwa Jehova, kubikkilizya abusolozi mbwatupa kwiinda mukubelesya bamaalumi ibasalidwe kuti kabatusololela. (Is. 32:1, 2; Heb. 13:17) Atuzumanane kutobela Musololi wesu Jehova, akumusyoma cakumaninina nkaambo ulatukwabilila kuntenda iili yoonse iikonzya kunyonganya cilongwe cesu anguwe akutusololela kubuumi butamani munyika mpya. w24.02 25 ¶17-18

Mwaapostolo Paulo wakalikkomene kubelekela Jehova, pele zimwi ziindi wakali kujana buyumuyumu. Kanji-kanji wakali kweenda misinzo milamfwu, alimwi mazuba aayo cakali kukatazya kweenda. Naakali mulweendo, Paulo zimwi ziindi wakali kuba “muntenda zyamumilonga” alimwi “amuntenda kuzigwebenga.” Mpoonya zimwi ziindi basinkondonyina bakali kumuuma buya. (2Kor. 11:23-27) Kunze lyaboobo, abalo Banakristonyina talili lyoonse nobakali kutondezya kulumba kuzintu nzyaakali kubacitila. (2Kor. 10:10; Flp. 4:15) Ncinzi cakamugwasya Paulo kuzumanana kumubelekela Jehova? Paulo wakabuzyiba kabotu bube bwa Jehova kwiinda mukwiiya Magwalo alimwi azintu zyakamucitikila. Wakali masimpe kuti wakali kuyandwa kapati a Jehova Leza. (Rom. 8:38, 39; Ef. 2:4, 5) Eeci cakapa kuti awalo amuyande kapati Jehova. Paulo wakatondezya kuti wakali kumuyanda Jehova “kwiinda mukubabelekela alimwi akuzumanana kubabelekela basalali.”—Heb. 6:10. w23.07 9 ¶5-6

Bantu banji balazumina kuti tweelede kuba amfwulumende alimwi akuti tweelede kwiitobela milawo imwi iibikkwa ‘abeendelezi’ aaba. Pele mbabonya bantu aaba inga balawayawaya kutobela milawo njobatayandi alimwi ayeeyo njobabona kuti ilabafwaankanya. Bbaibbele lilazuminizya kuti mfwulumende zyabantu zyalo izyeendelezyegwa a Saatani nzyezitalisya mapenzi alimwi lino-lino buyo ziyoonyonyoonwa. (Int. 110:5, 6; Muk. 8:9; Lk. 4:5, 6) Alimwi litwaambila kuti: “Kufwumbwa uukazya bweendelezi ukazya bubambe bwa Leza.” Kwalino, tulazimvwida mfwulumende eezyi nkaambo Jehova nguutwaambila kucita boobo. Aboobo, tweelede ‘kubapa boonse zibeelede,’ nkokuti mitelo, bulemu alimwi akubamvwida. (Rom. 13:1-7) Ambweni inga katubona mulawo umwi kuti ulakatazya kutobela alimwi tauli kabotu. Pele tulazimvwida mfwulumende eezyi akaambo kakuti Jehova mbwaatwaambila kucita oobo, kufwumbwa buyo kuti kazitatwaambili kucita zintu ziteendelani amilawo yakwe.—Mil. 5:29. w23.10 8 ¶9-10

Naakazyalwa Samusoni, bana Israyeli bakali kweendelezyegwa aba Filisiti balo ibakali kubadyaaminina. (Bab. 13:1) Bana Israyeli bakapenga citaambiki akaambo kalunya lwaba Filisiti. Jehova wakasala Samusoni kuti abe “kumbele mukuvwuna bana Israyeli kuzwa kumaanza aaba Filisiti.” (Bab. 13:5) Kutegwa auzuzikizye mukuli ooyu wakali mulemu, Samusoni wakeelede kusyoma Jehova. Aciindi cimwi, basikalumamba ba Filisiti bakaboola mu Juda, ku Lehi kutegwa bamujate Samusoni. Baalumi ba Juda bakayoowa, aboobo bakamwaaba Samusoni mumaanza aabasinkondonyina. Bantu bamumunzi mwaakali kukkala Samusoni bakamwaanga antambo zyobilo zipya akumuleta kuba Filisiti. (Bab. 15:9-13) Nokuba boobo, “muuya wa Jehova wakamupa nguzu” Samusoni zyakucikonzya kulivwuna kuntambo nzyobakamwaangide. Kumane “wakajana mweebo wambongolo uutanayuma,” wakaubweza akuubelesya kujaya baalumi ba Filisiti bali 1,000!—Bab. 15:14-16. w23.09 2 ¶3-4

Cikkomanisya ncakuti, asyoonto-syoonto Jehova wali kwaayubununa ‘makanze aakwe aatamani’ kwiinda mukubelesya Bbaibbele. Jehova ulakonzya kusala kubelesya nzila zimbi kuzuzikizya makanze aakwe alimwi “wakabamba zintu zyoonse kuti azuzikizye makanze aakwe.” (Tus. 16:4) Aboobo zintu nzyacita Jehova zinooliko lyoonse mane kukabe kutamani. Pele ino Jehova ujisi makanze nzi, alimwi nkucinca nzi nkwaakacita kutegwa aazuzikizye? Leza wakabaambila bantu bakusaanguna makanze ngaakajisi kujatikizya mbabo. Wakabaambila kuti “amuzyalane muvwule, muzuzye nyika akuyeendelezya, alimwi amweendelezye . . . zilenge zyoonse” zyeenda anyika. (Matl. 1:28) Ciindi Adamu a Eva nobakazanga akubaletela cibi bantu, Jehova tanaakaaleka makanze aakwe. Muciindi caboobo, wakacinca buyo nzila yakubelesya kutegwa aazuzikizye. Aboobo mpoonya-mpoonya wakasala kupanga Bwami kujulu, ibwakali kuyoozuzikizya makanze aakwe aakusaanguna aajatikizya nyika abantu.—Mt. 25:34. w23.10 20 ¶6-7

Jehova ulakonzya kutugwasya kuti tutatyompwi. Talili lyoonse nocili cuuba-uba, kwaambisya ikuti twali kukatazyigwa apenzi lyomwe kwaciindi cili mbocibede. Zimwi ziindi, mapenzi eesu inga kaalibonya mbuli kuti alakatazya kwiinda yaayo ngaakajana mwaapostolo Petro. Pele Jehova ulakonzya kutupa nguzu zyakuti tutatyompwi. (Int. 94:18, 19) Mucikozyanyo, mukwesu umwi katanaiya kasimpe wakali koonana abaaluminyina kwamyaka minji. Buumi bwakwe bwakacinca cakumanina akutalika kupona kweelana azyeelelo zyamu Bbaibbele. Nokuba boobo, zimwi ziindi wakacili kupenga akulombozya kutali kabotu. Ncinzi cakapa kuti atatyompwi? Wakaamba kuti: “Jehova wakandiyumya.” Wakayungizya kuti: “Kwiinda mumuuya wa Jehova . . . , ndakaiya kuti cilakonzyeka kuzumanana kupona kweelana a Jehova mbwayanda kuti katupona . . . Jehova ulandibelesya, alimwi nokuba kuti tandilondokede wazumanana kundiyumya.” w23.09 23 ¶12

Nobakwesu bacili bana-bana, tamukonzyi kuba Banakristo basimide ikuti kamukkede buyo taandabale. Mweelede kwiiya zikozyanyo zibotu, kuba abube bwakuyeeya kabotu, kusyomeka, kwiiya zintu ziyoomugwasya mubuumi alimwi akulibambila mikuli yakumbele. Zimwi ziindi, mulakonzya kulibilika mwayeeya zintu nzyomulangila kumbele. Pele mulakonzya kuzwidilila. Kamuyeeya kuti Jehova uliyandide kumugwasya. (Is. 41:10, 13) Abalo bakwesu abacizyi mumbungano bayoomugwasya. Ikuti mwazwidilila akuba Munakristo uusimide, buumi bwanu bunookkomanisya kapati. Nobakwesu bacili bana-bana, tulamuyanda kapati! Jehova aamulongezye ciindi nomubeleka canguzu kutegwa mube Banakristo basimide. w23.12 29 ¶19-20

Amweezeezye kuti muli kupobwe antoomwe abakwesu abacizyi. Alimwi mulikkomene kapati, mpoonya mwakkopa fwoto antoomwe. Mane buya, mwakkopa aambi obilo kutegwa ambweni yakusaanguna tiiyazwa kabotu. Lino mwaba amafwoto otatwe. Pele mufwoto imwi, mwabona kuti mukwesu umwi ulibonya kusyulungana ameso, kunyina naamweta-mweta. Aboobo mwaidilita nkaambo mujisi kale mafwoto obilo aalibonya kabotu, mwalo boonse mobamweta-mweta kubikkilizya amukwesu ooyo. Kanji-kanji inga tulaziyeeya ziindi zikkomanisya nzyotwakayanzana abakwesu abacizyi. Pele amweezeezye kuti ciindi nomuyanzana, mukwesu naa mucizyi waamba naa kucita cintu cimwi citali kabotu. Ncinzi ncotweelede kucita kujatikizya cintu eeco? Tweelede kusolekesya kucidilita naa kuciluba buyo mbubwenya mbotukonzya kudilita fwoto iitaboneki kabotu. (Ef. 4:32) Inga twacikonzya nkaambo kuli zintu zinji zibotu nzyotuyeeya kujatikizya nguwe. Eezyo nzezintu nzyotuyanda kuzumanana kunooyeeya alimwi akubikkila maano. w23.11 12-13 ¶16-17

Mabala aamu Chigiriki ngaakabelesya atondezya kuti lyoonse mukaintu weelede kusama cabulemu alimwi akuti weelede kwaalemeka manjezyeezya aabamwi kujatikizya nzyasama. Eelo kaka tulamulumba kapati nobacizyi bayandwa akaambo kakwaatobela malailile aaya! Bupampu mbube abumwi buyandika mbobeelede kutondezya bacizyi Banakristo boonse kutegwa basime. Ino bupampu ninzi? Nkucikonzya kuzyiba ciluzi acitaluzi mpoonya akusala kucita ciluzi. Amubone cikozyanyo ca Abigayeli. Mulumaakwe tanaakasala cabusongo calo icakali kukonzya kuleta mapenzi aataambiki kuli bamuŋanda yakwe boonse. Mpoonya Abigayeli wakabweza ntaamu cakufwambaana. Akaambo kabupampu, wakafwutula bamuŋanda yakwe. (1Sam. 25:14-23, 32-35) Bupampu alimwi bulatugwasya kuzyiba ciindi notweelede kwaambaula anotweelede kuumuna. Alimwi bulatugwasya kubabikkila maano bamwi pele kutali cakuciindizya.—1Tes. 4:11. w23.12 20 ¶8-9

Mwaapostolo Paulo wakalembela mbungano yaku Roma majwi aaya. Bakwesu abacizyi bamumbungano eeyi bakaiya kujatikizya Jehova alimwi a Jesu, bakatondezya lusyomo, mpoonya bakaba Banakristo. Aboobo Leza ‘wakabaamba kuti mbalulami akaambo kalusyomo,’ akubananika amuuya uusalala. (Rom. 5:1) Akaambo kaceeci, bakaba abulangizi bubotu kapati. Kumbele Paulo wakalembela Banakristo bananike baku Efeso kujatikizya bulangizi Leza mbwaakabapa. Bulangizi oobo bwakali kubikkilizya ‘alukono ndobakali kuyoopegwa basalali.’ (Ef. 1:18) Alimwi Paulo wakabaambila bana Kolose nkobakali kuyootambwida bulumbu bwabo. Wakaamba kuti ‘bulangizi mbomubambilidwe kujulu.’ (Kol. 1:4, 5) Aboobo, Banakristo bananike bajisi bulangizi bwakubusyigwa akupona buumi butamani kujulu kwalo nkobayoolela a Kristo.—1Tes. 4:13-17; Ciy. 20:6. w23.12 9 ¶4-5

Ibbala lyakasandululwa kuti ‘kukwabilila’ lyakali kwaamba basikalumamba ibakali kukwabilila munzi kuli basinkondonyina. Bantu ibakali kukkala mumunzi ooyu bakali koona caluumuno akaambo kakuzyiba kuti basikalumamba bakali kubakwabilila. Mbubwenya buyo, ciindi luumuno lwa Leza nolukwabilila myoyo yesu alimwi amizeezo yesu, tulimvwa kukkalwa moyo, nkaambo tulizyi kuti tulikwabilidwe. (Int. 4:8) Mbubwenya mbuli Hana, nokuba kuti bukkale bwesu tabukonzyi kucinca mpoonya-mpoonya, tulakonzya kuba aluumuno. (1Sam. 1:16-18) Alimwi ciindi notulimvwa kukkalwa moyo, kanji-kanji ncuuba-uba kuyeeya kabotu akusala cabusongo . Ciindi nomwalijana mumapenzi, amumulombe Jehova kuti amugwasye. Mbuti mbomukonzya kucita oobo? Amupaile kusikila mwaba aluumuno lwa Leza. (Lk. 11:9; 1Tes. 5:17) Ikuti kamuli mubukkale bukatazya, amupaile cakutaleka, eelyo muyoobona luumuno lwa Jehova mboluyookwabilila moyo wanu amizeezo yanu.—Rom. 12:12. w24.01 21 ¶5-6

Kutegwa asalazye zina lya Bausyi, Jesu wakaliyumya kukupenzyegwa kuli koonse. Wakalizyi kuti wakali kubamvwida Bausyi muzintu zyoonse, aboobo kunyina cakeelede kumupa kuusa. (Heb. 12:2) Alimwi wakalizyi kuti Saatani nguwakali kumulwana aciindi eeci cikatazya. (Lk. 22:2-4; 23:33, 34) Saatani wakali kuyanda kupa kuti Jesu aleke kusyomeka, pele wakaalilwa. Cakutainda mumbali, Jesu wakatondezya kuti Saatani mubeji akuti Jehova ulijisi babelesi basyomeka, balo ibazumanana kusyomeka kulinguwe nomuba muziindi zikatazya kapati. Sena mulayanda kumukkomanisya Mwami wanu uulela? Ikuti kacili boobo, amuzumanane kutembaula zina lya Jehova akugwasya bamwi kuzyiba bube bubotu mbwajisi. Kwiinda mukucita boobo, mutobela mikondo ya Jesu. (1Pet. 2:21) Mbubwenya mbuli Jesu, mupa kuti Jehova akkomane akutondezya kuti Saatani mubeji. w24.02 11-12 ¶11-13

Mumyaka iili 5 yainda, bantu bainda ku 1 miliyoni bakabbapatizyigwa akuba Bakamboni ba Jehova. Ciindi nomulyaaba kuli Jehova, musala kuba sikwiiya wa Jesu Kristo akubikka kuyanda kwa Leza mubusena bwakusaanguna mubuumi bwanu. Ino eeci cibikkilizya nzi? Jesu wakaamba kuti: “Ikuti umwi kayanda kunditobela, aliimye.” (Mt. 16:24) Majwi aa Chigiriki aakasandululwa kuti “aliimye” alimwi alakonzya kwaamba kuti “weelede kulikasya kuzintu zimwi.” Mbuli mubelesi wa Jehova uulyaabide, mweelede kukaka kucita cintu cili coonse citeendelani akuyanda kwakwe. (2Kor. 5:14, 15) Eeci caamba kuti tweelede kwiikaka “milimo yanyama,” mbuli bwaamu. (Gal. 5:19-21; 1Kor. 6:18) Pele sena kutobela malailile aaya inga kwapa kuti buumi bumuyumine? Peepe. Ikuti naa mulamuyanda ncobeni Jehova alimwi mulisinizyide kuti kumvwida milawo yakwe kugwasya ndinywe, tacikamuyumini pe.—Int. 119:97; Is. 48:17, 18. w24.03 2 ¶1; 3 ¶4

Jehova ulabapa muuya uusalala aabo mbakkomanina. (Mt. 12:18) Aboobo tulakonzya kulibuzya kuti, ‘Sena ndilatondezya bube bumwi bwamucelo wamuuya mubuumi bwangu?’ Mucikozyanyo, sena mulabakkazikila moyo bamwi mazuba aano kwiinda leelyo nomwatakalina kumuzyiba Jehova? Mbomunooyaabuba abube oobu bubotu buboola akaambo kamuuya uusalala, muyooba masimpe kuti Jehova ulamukkomanina. Jehova ulacibelesya cinunuzyo kuli baabo mbakkomanina. (1Tim. 2:5, 6) Pele ino mbuti kuti katucilimvwa kuti Jehova tatukkomanini, nokuba kuti tulijisi lusyomo mucinunuzyo alimwi twakabbapatizyigwa kale? Tweelede kuyeeya kuti, talili lyoonse notukonzya kusyoma mbotuyeeya, pele tulakonzya kumusyoma Jehova. Kayi aabo bajisi lusyomo mucinunuzyo ubabona kuti mbalulami alimwi usyomezya kuti uyoobalongezya.—Int. 5:12; Rom. 3:26. w24.03 30 ¶15; 31 ¶17