December

Sena Jehova ulijisi nguzu zyakubusya bafwide? Inzya! Kayi ngu “Singuzuzyoonse.” (Ciy. 1:8) Aboobo ulijisi nguzu zyakuzunda sinkondo uli woonse, noluba lufwu. (1Kor. 15:26) Kaambo kambi katupa kusyoma kuti Leza ulakonzya kubabusya aabo bakafwa nkakuti walo talubi. Mucikozyanyo, ulayiita nyenyeezi imwi aimwi kweelana azina lyanjiyo. (Is. 40:26) Aboobo, ulibayeeyede aabo bakafwa. (Job. 14:13; Lk. 20: 38) Ulaziyeeya zintu zyoonse zijatikizya baabo mbayoobusya, kubikkilizya ambobakali kulibonya alimwi abube bwabo.Cakutadooneka, tulacisyoma cisyomezyo ca Jehova cabubuke nkaambo tulizyi kuti uliyandide alimwi ulijisi nguzu zyakucizuzikizya. Nkaaka kaambo kambi katupa kucisyoma cisyomezyo eeci: Jehova wakabusya kale bantu bafwide. Kaindi, wakapa baalumi basyomeka basyoonto buyo nguzu, kubikkilizya a Jesu, zyakubusya bafwide. w23.04 9-10 ¶7-9

Kuti katwaambaula cabupampu alimwi acabubombe, bantu inga kabalibambilide kutuswiilila alimwi akuzumanana amubandi. Mubwini, kuti muntu kayanda buyo kukazyanya, tatweelede kuzumanana amubandi. (Tus. 26:4) Pele bantu bamwi inga tabusyi mbobabede oobo. Mubwini, banabunji inga balayanda kwiiya. Masimpe, tulagwasyigwa kapati ciindi notwiiya kutondezya kubomba moyo. Amupaile kuli Jehova kutegwa amupe nguzu zyakuzumanana kubomba moyo ciindi nomwiingula mibuzyo yamuntu uukazya naa uusampaula. Kamuyeeya kuti, kwiingula cabubombe kulakonzya kupa kuti mibandi mibotu itabi yakukazyanya buya. Amana buya, kwiingula cabubombe, alimwi acabulemu kulakonzya kupa bantu bamwi kucinca mbobatubona alimwi ambobakabona kasimpe. Kamulibambilide lyoonse kuliiminina kumuntu uuli woonse uukonzya kumubuzya kaambo kajatikizya” nzyomusyoma, “amucite boobo amoyo mubombe alimwi abulemu kapati.” (1Pet. 3:15) Inzya, amube amakanze aakutondezya kubomba moyo! w23.09 19 ¶18-19

Atulange-lange nzila zyone motukonzya kukkazika moyo. Yakusaanguna, muntu uukkazika moyo tafwambaani kukalala. Ulasola kubatama alimwi akulikasya kupilusya cibi ciindi bamwi nobamunyemya naa natyompedwe. (Kul. 34:6) Yabili, muntu uukkazika moyo ulakonzya kulindila cakubatama. Ikuti cintu cimwi camuka kwiinda mbwaali kuciyeeyela, muntu uukkazika moyo ulasolekesya kulijata naa kutanyema. (Mt. 18:26, 27) Yatatu, muntu uukkazika moyo tafwambaani kucita zintu kakunyina kusaanguna kuyeeya. Ciindi muntu uukkazika moyo nayanda kucita mulimo umwi, ulasolekesya kutaubinzyaanya mulimo ooyo naa kuyanda buyo kuti umane. Muciindi caboobo, ulabikkila maano kubona kuti ulijisi ciindi cinji cakuzyiba ncayelede kucita. Mpoonya ulaubeleka mulimo ooyo kweelana aciindi ncoweelede. Yane, muntu uukkazika moyo ulasolekesya kuliyumya mumasunko kakunyina kutongooka. Muntu uukkazika moyo uyoobeleka canguzu kutegwa azumanane kuliyumya kumwi kazilanga munzila yeelede zintu. (Kol. 1:11) Mbotuli Banakristo, tweelede kuzitondezya nzila zyoonse eezyi zyakukkazika moyo. w23.08 20-21 ¶3-6

Kaambo kapati ncotweelede kuukwabilila moyo wesu wacikozyanyo nkakuti, Jehova ulaulingula. Eeci caamba kuti ulabona zintu zili mukati kamoyo wesu nzyobatakonzyi kubona bantu alimwi ulizyi bwini mbotubede. Aboobo ulakonzya kutuyanda kapati ikuti katuyeeya kujatikizya lulayo lwakwe, lwalo lukonzya kutupa kuti tukapone mane kukabe kutamani. (Joh. 4:14) Kwiinda mukucita boobo, tatukayungwi abubeji bwa Saatani anyika yakwe, alimwi tatukatobeli bukkale bwabantu babyaabi. (1Joh. 5:18, 19) Ikuti twaba acilongwe ciyumu a Jehova, ciyoopa kuti tumuyande alimwi akumulemeka kapati. Akaambo kakuti tatuyandi kumunyemya Taateesu, tuyookusulaika nokuba kuyeeya buyo zyakubisya. Ba Marta, imucizyi waku Croatia, ibakasunkwa kucita bwaamu bakaamba kuti: “Cakandikatazya kuleka kuyeeya zintu zitali kabotu akuleka kulombozya kucita cibi. Pele kuyoowa Jehova kwakandikwabilila kapati.” Ino kwakabakwabilila buti? Ba Marta bakaamba kuti bakazinzibala kuyeeya zintu zibi zyakali kukonzya kucitika akaambo kakucita bwaamu. Andiswe tulakonzya kucita mbubwenya oobo. w23.06 20-21 ¶3-4

Jesu wakalizyi kuti makanze aa Jehova ngakusalazya zina lyakwe, nkokuti kulisalazya kuzintu zyoonse zyakubeja izyakaambwa kujatikizya nguwe. Nkakaambo kaako wakayiisya basikumutobela kupaila kuti: “Taateesu ooli kujulu, alisalazyigwe zina lyako.” (Mt. 6:9) Jesu wakalizyi kuti aaya ngamakani aayandika kapati kuzilenge zyoonse. Jesu ngowakainda kulisalazya zina lya Jehova kwiinda cilenge cimbi cili coonse. Pele ciindi naakaangwa, ino mulandu nzi ngobakamutamikizya basinkondonyina? Nkusampaula Leza. Tacidoonekwi buya kuti Jesu wakali kulimvwa kuti, kusampaula zina lya Bausyi lisalala, ncecakali cibi ciinda kukomena. Aboobo cakamucisa kapati akaambo kakutamikizigwa mulandu uuli boobu. Ambweni aaka nkakaambo ikakapa kuti ‘apenge kapati mumoyo’ kakusyeede mawoola masyoonto kuti ajatwe.—Lk. 22:​41-44. w24.02 11 ¶11

Mumuzundano wesu ooyu wakubuumi, tweelede kuyanda kapati Jehova a Jesu kwiinda mbotubayanda banamukwasyi. (Mt. 10:37) Nokuba boobo, eeci tacaambi kuti tweelede kucileka kwiilanganya mikuli yamumukwasyi mbuli kuti kucita boobo ncecikonzya kupa kuti Leza a Kristo kabatukkomanina. Muciindi caboobo, kutegwa tukkomaninwe a Leza alimwi a Kristo, tweelede kuuzuzikizya mukuli ngotujisi mumukwasyi wesu. (1Tim. 5:4, 8) Ikuti twacita oobo, tunookkomene kapati. Jehova ulizyi kuti mukwasyi ulakonzya kukkomana ikuti mwaalumi amukaintu kabeendelezyanya caluyando abulemu, ciindi bazyali nobabayanda akubayiisya bana babo alimwi abana nobabamvwida bazyali babo. (Ef. 5:33; 6:1, 4) Kufwumbwa naa muli mulumi, mukaintu naa mwana, amubelesye lulayo lwabusongo ilujanika mu Bbaibbele. Mutanikuciti zintu kweelana ambomulimvwa, zintu mbozicitwa kubusena nkomukkala naa kweelana anzyobaamba basyaabusongo. Amwaabelesye kabotu mabbuku eesu aamba zyamu Bbaibbele. Alijisi mizeezo mibotu iikonzya kumugwasya kubona mbomukonzya kuzyibelesya njiisyo zyamu Bbaibbele. w23.08 28 ¶6-7

Mukaintu Munakristo weelede kwiiya zintu zikonzya kumugwasya. Zintu nzyakonzya kwiiya musimbi nacili mwana zilakonzya kumugwasya mubuumi bwakwe boonse. Mucikozyanyo, amwiiye kubala akulemba kabotu. Mumasena amwi, kubala akulemba tabakuboni kuba cintu ciyandika kapati kuli bamakaintu. Pele kucizyiba kubala akulemba kabotu kulayandika kapati ku Banakristo boonse. (1Tim. 4:13) Aboobo mutazumizyi cintu cili coonse kumulesya kwiiya kubala akucizyiba kulemba. Ino muyoogwasyigwa buti? Luzyibo luli boobu luyoomugwasya kujana mulimo. Alimwi muyooba basikwiiya abamayi ba Jwi lya Leza bacibwene. Kwiinda zyoonse, muyooba acilongwe ciyumu a Jehova ciindi nomubala Jwi lyakwe akuzinzibala kuyeeya nzyomubala.—1Tim. 4:15. w23.12 20 ¶10-11

Amumulombe Jehova kuti amugwasye kulwana masunko. Mbotuli bantu batalondokede, lyoonse tweelede kulwana sunko lyakucita cintu citaluzi. Saatani uluujisi kucita kufwumbwa ncakonzya kutegwa citukatazye kucita ciluzi. Nzila imwi njabelesya kutegwa atunyonganye nkwiinda muzintu zyakulikondelezya zitali kabotu. Zyakulikondezya zili boobu zilakonzya kutupa kuba amizeezo iitali kabotu iikonzya kutusofwaazya mumeso aa Jehova alimwi akutupa kucita cibi cipati. (Mk. 7:21-23; Jak. 1:14, 15) Kutegwa tucikonzye kuzunda sunko lyakulombozya kucita cintu citaluzi, tuyandika kugwasyigwa a Jehova. Jesu wakakubikkilizya kulomba ooku mumupailo wacikozyanyo naakati: “Utatunjizyi mumasunko, pele utuvwune kumubi.” (Mt. 6:13) Jehova ulayanda kutugwasya, pele tweelede kumulomba. Alimwi tweelede kucita zintu kweelana amipailo yesu. w23.05 6-7 ¶15-17

Ikuti banabukwetene kabacibikkila maano kapati cilongwe cabo a Usyi wakujulu, tabanoowayi-wayi kutobela lulayo lwakwe. Aboobo eeci cilakonzya kubagwasya kuzunda mapenzi alo aakonzya kupa kuti luyando lwabo luceye alimwi akwaayeleba. Alimwi bantu bajisi cilongwe ciyumu a Jehova balasolekesya kumwiiya alimwi akutondezya bube bwakwe mbuli luzyalo, kukkazika moyo alimwi akulekelela. (Ef. 4:32–5:1) Ikuti banabukwetene kabajisi bube buli boobu, cilakonzya kupa kuti luyando lwabo luzumanane kuyuma. Mucizyi Lena, iwakkala mucikwati kwamyaka yiinda ku 25, wakaamba kuti: “Ncuubauba kumuyanda akumulemeka muntu uusimide kumuuya.” Amubone cikozyanyo eeci camu Bbaibbele. Ciindi Jehova naakali kuyanda kusala banabukwetene ibakali kuyooba bazyali ba Mesiya, wakasala Josefa a Mariya akati kabantu banji balunyungu lwa Davida. Nkaambo nzi? Nkaambo boonse bobilo bakajisi cilongwe ciyumu a Jehova, alimwi Jehova wakalizyi kuti bakali kuyoomubikka mubusena bwakusaanguna mucikwati cabo. w23.05 21 ¶3-4

Nokuba kuti Jesu musololi wesu ulilondokede, aabo mbabelesya kutusololela anyika tabalondokede. Aboobo cilakonzya kutukatazya kubamvwida ikwaambisya kuti naa batwaambila kucita cintu ncotutayandi. Aciindi cimwi, mwaapostolo Petro taanakali kuyanda kutobela malailile aamwi. Mucikozyanyo, ciindi mungelo naakamulailila kuti atalike kulya banyama ibakali kubonwa kuti balisofweede kweelana a Mulawo wa Musa, Petro wakakaka, ikutali ciindi comwe pele ziindi zyotatwe. (Mil. 10:9-16) Nkaambo nzi? Nkaambo malailile aaya mapya walo wakaabona kuti taagwasyi. Kulubazu lumwi, mwaapostolo Paulo wakamvwida ciindi baalu baku Jerusalemu nobakamulailila kuti abweze baalumi bone akuunka kutempele kuyoolisalazya kweelana a Mulawo kutegwa atondezya kuti wakali kuutobela. Paulo wakalizyi kuti Banakristo tiibakacili kweendelezyegwa a Mulawo alimwi akuti kunyina cibi cili coonse ncaakacitide. Nokuba boobo, Paulo “wakabatola baalumi aabo buzuba bwakatobela akulisalazya antoomwe ambabo kweelana amulawo.” (Mil. 21:23, 24, 26) Kumvwida kwa Paulo kwakapa kuti lukamantano luzumanane.—Rom. 14:19, 21. w23.10 10 ¶15-16

Tamukonzyi kwaamba kuti kuyoowa mbobube buyandika kapati kutegwa cilongwe ciyume. Nokuba boobo, aabo ibayanda kuba acilongwe cini-cini a Jehova beelede ‘kumuyoowa.’ Tacikwe makani abulamfwu bwaciindi ncotwamubelekela Jehova, toonse tweelede kuzumanana kumuyoowa. Pele ino caamba nzi kuyoowa Leza? Muntu uumuyoowa kapati Leza ulamuyanda alimwi kunyina nacita cintu cili coonse cikonzya kunyonganya cilongwe cakwe anguwe. Oobo mbombubo mbwaakacita Jesu, ‘wakali kumuyoowa Leza.’ (Heb. 5:7) Wakatondezya kuti wakali kumulemeka kapati Jehova. (Is. 11:2, 3) Alimwi wakali kumuyanda kapati alimwi akuyanda kumumvwida. (Joh. 14:21, 31) Mbubwenya mbuli Jesu, tulamulemeka kapati Jehova nkaambo ngusiluyando, musongo, mululami alimwi ulaanguzu kapati. Tulizyi kuti Jehova ulatuyanda alimwi ulabikkila maano kujatikizya mbotubutambula busolozi bwakwe. Zintu nzyotucita zilakonzya kumunyemya Jehova naa kumukkomanisya.—Int. 78:41; Tus. 27:11. w23.06 14 ¶1-2; 15 ¶5

Ciindi Mwami Uziya naakaba anguzu, wakaluba kuti Jehova nguwakali kasensa kanguzu zyakwe alimwi akuzwidilila kuli koonse nkwaakacita. Twiiya nzi? Lyoonse tweelede kunooyeeya kuti Jehova nguutupa zintu zyoonse zibotu nzyotukkomanina mubuumi alimwi amumulimo wakwe. Muciindi cakulisumpula akaambo kakuzwidilila kwesu, tweelede kupa bulemu boonse kuli Jehova walo uutugwasya kuzuzikizya zintu zyoonse. (1Kor. 4:7) Cakulicesya tweelede kuzumina kuti tatulondokede akuti tuyandika kululamikwa. Mukwesu umwi uuli amyaka yakuma 60 wakalemba boobu, wakati: “Ndakaiya kutanyema naa kutyompwa ciindi bamwi nobabona mumbazu mondilezya. Ciindi nindapegwa lulayo akaambo kakucita cintu cimwi cabufwubafwuba, ndilasolekesya kubambulula alimwi akuzumanana kubelekela Jehova kusikila mpondigolela.” Masimpe ngakuti, kuti twazumanana kuyoowa Jehova alimwi akulibona munzila yeelede, buumi bwesu buyoobota.—Tus. 22:4. w23.09 10 ¶10-11

Banakristo bakusaanguna bakali kuyandika kuliyumya. Kunze lyakulwana mapenzi ngobakajisi bantu boonse, kuli amapenzi aambi balo ngobakeelede kulwana. Bunji bwabo bakali kupenzyegwa ikutali buyo abasololi bacikombelo caba Juda abeendelezi bana Roma, pele alimwi abanamukwasyi. (Mt. 10:21) Mpoonya amwalo mumbungano, zimwi ziindi bakali kulwana kuyungwa anjiisyo zyabasiluleyo izyakali kukonzya kuleta lwaandaano. (Mil. 20:29, 30) Nokuba boobo, Banakristo aaba bakacikonzya kuliyumya. (Ciy. 2:3) Ino ncinzi cakabagwasya? Bakali kuzinzibala kuyeeya zikozyanyo zyamu Magwalo zyabantu ibakaliyumya, mbuli cikozyanyo ca Jobu. (Jak. 5:10, 11) Bakali kupaila kulomba nguzu. (Mil. 4:29-31) Alimwi bakali kubikkila buyo maano kububotu mbobakali kuyoojana akaambo kakuliyumya. (Mil. 5:41) Andiswe tulakonzya kuliyumya kuti lyoonse katubala kujatikizya bantu ibakaliyumya aabo baambidwe mu Jwi lya Leza amumabbuku eesu, alimwi akuzinzibala kuyeeya kujatikizya mbabo. w23.07 3 ¶5-6

Jehova alimwi a Jesu kunyina nobayootulekelezya pe. Kuzwa ciindi mwaapostolo Petro naakamukaka Jesu, wakeelede kusala. Sena wakeelede kuleka, naa kuzumanana kuba sikwiiya wa Kristo? Jesu wakakombelezya Jehova kuti lusyomo lwa Petro lutamani. Aboobo wakamwaambila kujatikizya mupailo ooyo alimwi wakatondezya kuti wakali kumusyoma Petro akuti kumbele wakali kuyoobayumya-yumya ibanyina. (Lk. 22:31, 32) Kweelede kuti Petro wakayumizyigwa amajwi aa Jesu! Ciindi notuyandika kusala mubuumi, Jehova ulakonzya kubelesya beembezi bakonzya kutuumbulizya kutegwa tuzumanane kusyomeka. (Ef. 4:8, 11) Mbubonya Jehova mbwaakamupa zintu nzyaakali kuyandika Petro alimwi abaapostolo bamwi, andiswe uyootupa nzyotuyandika ikuti twasaanguna kuyandaula Bwami mubuumi bwesu. w23.09 24-25 ¶14-15

Jehova ulazibona zintu zibotu zyoonse nzyotucitila bamwi, noziceya buti. Ubona kuti nkulyaaba kupati alimwi uyootulumbula. Ikuti kaindi mwakali mukutausi naa mwaalu, Jehova ulaiyeeya milimo njomwakamubelekela kaindi alimwi aluyando ilwakamukulwaizya kwiibeleka. (1Kor. 15:58) Alimwi ulalubona luyando ndomuzumanana kutondezya. Jehova uyanda kuti toonse tukomezye luyando ndotujisi kulinguwe alimwi akuli bamwi. Tulakonzya kuyumya luyando ndotujisi kuli Jehova kwiinda mukubala Jwi lyakwe, kuzinzibala kuyeeya nzyotubala alimwi akupaila kulinguwe lyoonse. Tulakonzya kuyumya luyando ndotujisi kubakwesu abacizyi kwiinda mukubapa nzyobayandika. Aboobo mboluyaabukomena luyando lwesu, tuyoozumanana kuba acilongwe ciyumu a Jehova alimwi abakwesu abacizyi. Alimwi zilongwe eezyi ziyoozumanana mane kukabe kutamani! w23.07 10 ¶11; 11 ¶13; 13 ¶18

Munakristo umwi aumwi weelede kulisalila kujatikizya busilisi mbwayanda. Ciindi Banakristo nobasala busilisi, beelede kutobela milawo yamu Bbaibbele iijatikizya kutantamuka bulowa alimwi amizimo. (Mil. 15:20; Gal. 5:19, 20) Pele bunji bwamakani aambi aajatikizya busilisi, beelede kulisalila. Tacikwe makani ambotulimvwa kujatikizya busilisi bumwi, tweelede kukulemeka kusala kwabakwesu abacizyi kujatikizya makani abusilisi mbobayanda. Mubukkale oobu tweelede kunooyeeya twaambo ootu tutobela: (1) Bulikke Bwami bwa Leza mbobuyooponya bantu cakumaninina. (Is. 33:24) (2) Munakristo umwi aumwi weelede “kusinizya cakumaninina” kujatikizya cintu ciyandika kapati kulinguwe. (Rom. 14:5) (3) Tatweelede kubabeteka bamwi naa kucita cintu cikonzya kubalebya. (Rom. 14:13) (4) Banakristo balatondezya luyando alimwi balizyi kuti lukamantano lwambungano lulayandika kapati kwiinda mbobayeeya.—Rom. 14:15, 19, 20. w23.07 24 ¶15

Sena mulamuyanda kapati Jehova? Eeco tacidoonekwi buya. Kuzwa kaindi, bantu banji bali kulimvwa mbubonya mbomulimvwa andinywe. (Int. 104:33, 34) Mane buya, banji baliimya zintu zimwi kutegwa kabakomba Jehova. Eeci ncobakacita ba Naziri mu Israyeli yansiku, naa aabo bakalyaabide. Ba Naziri, bakali bana Israyeli basungu ibakaliimya zintu zimwi kutegwa babelekele Jehova munzila yaalubazu. Mulawo wa Musa wakali kuzumizya mwaalumi naa mukaintu kupanga cikonke caalubazu kuli Jehova kwiinda mukusala kukkala kali mu Naziri kwaciindi cili mbocibede. (My. 6:1, 2) Cikonke eeci naa cisyomezyo, cakali kubikkilizya kutobela malailile amwi aatakali kutobelwa abana Israyeli boonse. Pele nkaambo nzi muna Israyeli ncaakali kunga wasala kupanga cikonke cakuba mu Naziri? Kweelede kuti wakali kukulwaizyigwa kucita boobo akaambo kaluyando luyumu ndwaakajisi kuli Jehova, alimwi akulumba akaambo kakulongezyegwa anguwe.—Dt. 6:5; 16:17. w24.02 14 ¶1-2

Kanji-kanji Bbaibbele lyaamba kujatikizya “kusyomeka,” naa “luyando lutamani” oolo Leza ndwatondezya kubalongwe bakwe. Ibbala eeli alimwi lilakonzya kubelesyegwa kupandulula luyando ndobatondezyanya babelesi ba Leza. (2Sam. 9:6, 7) Lusyomo lwesu lulakonzya kuyuma mukuya kwaciindi. Atubone eeci mbocakamucitikila Daniele. Kusyomeka kwa Daniele kuli Jehova kwakasunkwa mubuumi bwakwe boonse. Pele sunko lipati lyakamusikila ciindi naakali aamyaka yakuma 90. Balupati-pati ba Mwami Dariyo tiibakali kumuyanda Daniele alimwi tiibakali kumulemeka Leza wakwe. Aboobo bakakanza kuti Daniele ajaigwe. Bakasungilizya mwami kuti abikke mulawo iwakali kuyoosunka Daniele kubona naa wakali kuyoosyomeka kuli Leza wakwe naa kumwami Dariyo. Ncakeelede buyo kucita Daniele kutegwa asyomeke kumwami Dariyo, nkucileka kupaila kuli Jehova kwamazuba aali 30. Pele Daniele wakasala kusyomeka kuli Jehova.—Dan. 6:12-15, 20-22. w23.08 5 ¶10-12

Jehova uyanda kuti tuzumanane kutondezya luyando kubakwesu abacizyi. Ciindi mukwesu naa mucizyi naatatweendelezya kabotu, tatweelede kuyeeya kuti wacitila caali, pele nkuti buyo talondokede alimwi buya ulayanda kutobela njiisyo zyamu Bbaibbele. (Tus. 12:18) Leza ulabayanda babelesi bakwe basyomeka nokuba kuti balalubizya. Amana buya ulazumanana kuba mulongwe wesu alimwi kunyina natubikkilila. (Int. 103:9) Eelo kaka cilayandika kapati kwiiya bube bwa Taateesu bwakulekelela! (Ef. 4:32–5:1) Kamuyeeyede kuti, mamanino mbwaayaabuswena afwaafwi, tuyandika kuzumanana kumvwana abakwesu abacizyi. Nkaambo tulalangilwa kupenzyegwa citaambiki. Mane buya tulakonzya kwaangwa akaambo kalusyomo lwesu. Ikuti naa eeci cacitika, tuyooyandika lugwasyo lwabakwesu abacizyi.—Tus. 17:17. w24.03 15-16 ¶6-7

Mu Magwalo kuli zibalo zinji zyabakubusi ibakaba acilongwe ciyumu a Jehova, ibakakkomaninwa anguwe alimwi ibakazwidilila kapati. Davida ngumwi wabakubusi aaba. Ciindi naakali mukubusi, Davida wakasala kubelekela Leza, mpoonya kumbele wakazooba mwami. (1Bam. 3:6; 9:4, 5; 14:8) Kuti mwaiya kujatikizya Davida, cikozyanyo cakwe ciyoomukulwaizya kubelekela Jehova alimwi akuzumanana kusyomeka. Naa mulakonzya kulibikkila mbaakani yakulanga-langa cikozyanyo ca Marko naa Timoteyo. Muyoobona kuti bakatalika kubelekela Jehova nobakali bana, amana bakazumanana kumubelekela cakusyomeka. Zintu nzyomusala kucita mubuumi bwanu lino, zilakonzya kubujatikizya buumi bwanu bwakumbele. Kuti mwamusyoma Jehova, kutali maano aanu, uyoomugwasya kusala camaano. Mulakonzya kuba abuumi bukkomanisya lino alimwi ibulaampindu. Kamuyeeya kuti, Jehova ulalumba milimo iili yoonse njomumubelekela. Kunyina nzila iinda kubota njomukonzya kubelesya buumi bwanu, kwiinda kubelekela Taateesu wakujulu, Jehova. w23.09 13 ¶18-19

Mwaapostolo Paulo wakalizyi kuti Banakristonyina bakali bantu batalondokede. Mucikozyanyo, ciindi naakatalika kuyanzana ambungano, bamwi bakali kumuyoowa nkaambo tiibakasyoma kuti wakali sikwiiya awalo. (Mil. 9:26) Kumane bamwi, bakatalika kumwaamba zintu zitali kabotu kutegwa babisye mpuwo yakwe. (2Kor. 10:10) Kunze lyaboobo, Paulo wakabona mwaalu umwi kacita cintu citali kabotu icakali kukonzya kutyompya bamwi. (Gal. 2:11, 12) Mpoonya Marko, mweenzinyina ngobakali kumvwana limwi wakamutyompya kapati. (Mil. 15:37, 38) Paulo wakali kukonzya kuleka kuyanzana abantu ibakacita zintu izyatakamukkomanisya. Nokuba boobo, walo wakazumanana kubayanda bakwesu abacizyi aaba akuzumanana kumubelekela Jehova cakusyomeka. Ncinzi cakamugwasya Paulo kuzumanana? Paulo wakali kubayanda kapati basyominyina. Luyando ndwaakajisi kulimbabo lwakamugwasya kubikkila maano kubube bubotu mbobakajisi, ikutali kukulubizya kwabo. Alimwi luyando lwakamugwasya kucita caambidwe mulugwalo lwabuzuba bwasunu. w24.03 15 ¶4-5

Zibalo zyamu Bbaibbele zinji zitondezya kuti kubomba moyo mbube buyandika kapati. Mucikozyanyo, ciindi Izaka naakali kukkala mu Gerari, nyika yaba Filisti, basimukobonyina basimunyono bakavwikkila migoti yamaanzi njobakasyide babelesi babausyi. Aboobo muciindi cakulwana ambabo, Izaka wakalonzya mukwasyi wakwe alimwi akusya migoti iimbi. (Matl. 26:12-18) Pele ayalo migoti yamaanzi iyakali mubusena oobo, ba Filisiti bakaitaminina kuti yakali yabo. Nokuba boobo, Izaka wakacita zintu caluumuno. (Matl. 26:19-25) Ncinzi cakamugwasya kuzumanana kubomba moyo noliba leelyo bamwi nobakakanzide kumunyemya? Tacidoonekwi buya kuti wakaiya cikozyanyo cabazyali bakwe, wakabona mbwaakali kucita zintu caluumuno Abrahamu, ‘kukkazika moyo alimwi akubomba’ kwa Sara.—1Pet. 3:4-6; Matl. 21:22-34. w23.09 15 ¶4

Mpoonya aciindi cakwe ceelede, caluyando Jehova wakatuma Mwanaakwe mutaanzi anyika kuti azikuyiisye bantu kujatikizya Bwami, akwaaba buumi bwakwe kuti atununune kucibi alufwu. Kumane Jesu wakabusyigwa akujokela kujulu kuyoolela kali Mwami wa Bwami bwa Leza. Mutwe wamakani aamu Bbaibbele uuyandika kapati ngwakuti, zina lya Jehova liyoosalazigwa aakuzuzikizya makanze aakwe kujatikizya nyika kwiinda mukubelesya Bwami bwakwe bweendelezyegwa a Kristo. Aboobo makanze aa Jehova taakonzyi kucincwa pe. Wakasyomezya kuti uyakwaazuzikizya ncobeni. (Is. 46:10, bupanduluzi buyungizyidwe; Heb. 6:17, 18) Mukuya kwaciindi, nyika iyoosanduka akuba paradaiso mwalo mobayookkala bana ba Adamu a Eva balondokede alimwi balulami “mane kukabe kutamani.” (Int. 22:26) Pele kuli azimbi nzyayanda kuyoocita Jehova. Uyanda kuyookamantanya babelesi bakwe boonse bakujulu alimwi aayika. Mpoonya boonse banoolibombya kulinguwe kali Mweendelezi wabo. (Ef. 1:8-11) Sena tamugambwi kubona Jehova mbwali mukuzuzikizya makanze aakwe munzila mbotu kapati? w23.10 20 ¶7-8

Ciindi ba Juda ibakali kukkala ku Babuloni nobakasika ku Jerusalemu, bakatalika kuba abuyumuyumu bwakujana nzyoiyandika mikwasyi yabo. Alimwi kwakali manyongwe mu Bulelo bwa Persia, kubikkilizya akukazyigwa amasi aakabazingulukide. Akaambo kaceeci, ibamwi cakabakatazya kubikkila maano kumulimo wakuyakulula tempele lya Jehova. Aboobo, Jehova wakatuma basinsimi bobilo, Hagai a Zekariya kuti bakakulwaizye bantu aaba calo cakagwasya kapati. (Hag. 1:1; Zek. 1:1) Pele nokwakainda myaka iitandila ku 50, ba Juda aaba bakatyompwa alimwi. Mpoonya Ezara sikukkopolola Mulawo uucibwene, wakaunka ku Jerusalemu kuzwa ku Babuloni kuyookulwaizya bantu ba Leza kubikkila maano kubukombi bwakasimpe. (Ezr. 7:1, 6) Mbubwenya mbuli musinsimi Hagai a Zekariya mbobakagwasya bantu ba Leza kuzumanana kusyoma Jehova ciindi nobakali kukazyigwa, andiswe mazuba aano tulijisi lusyomo lwakuti Jehova ulakonzya kutugwasya mumapenzi aali woonse ngotujisi mubuumi.—Tus. 22:19. w23.11 14-15 ¶2-3

Ino inga twalutondezya buti luyando ndotujisi kubasyomima? Nzila imwi nkwiinda mukubaumbulizya. Alimwi inga twacikonzya ‘kuzumanana kuumbulizyanya’ ikuti naa katuli basilweetelelo. (1Tes. 4:18) Mbuti mbotukonzya kuzumanana kuba aluyando luyumu akati kesu? Tulakonzya kucita oobo, kwiinda mukusolekesya kubalekelela bakwesu noliba leelyo nocikatazya. Nkaambo nzi ncociyandika kapati mazuba aano kutondezyanya luyando? Amubone kaambo aaka nkaakaamba Petro: “Mamanino aazintu zyoonse aswena afwaafwi. Aboobo . . . amuyandane kapati.” (1Pet. 4:7, 8) Mbwaayabuswena afwaafwi mamanino aabweende bwanyika eeyi mbyaabi, ncinzi ncotukonzya kulangila? Kaamba kujatikizya basikumutobela, Jesu wakaambila limwi kuti: “Muyoosulwa amasi oonse akaambo kazina lyangu.” (Mt. 24:9) Aboobo, kutegwa tucikonzye kuzumanana kusyomeka kuli Jehova nokuba kuti tulasulwa, tweelede kuzumanana kukamantana. Ikuti twacita oobo, Saatani uyakwaalilwa kutwaandaanya nkaambo luyando ndolutupa kuti katukamantene.—Flp. 2:1, 2. w23.11 13 ¶18-19

Kasimpe kali mu Jwi lya Leza kalaanguzu kapati. Kwiinda mukuyiisya bantu kujatikizya Jehova alimwi abwini mbwabede, tulabubona bubotu buzwa mpawo. Bantu balaleka koofwaazyigwa abubeji bwa Saatani akutalika kubona bube bubotu mbwajisi Taateesu. Balagambwa kubona nguzu zyakwe zinji kapati. (Is. 40:26) Balatalika kumusyoma akaambo kabululami bwakwe. (Dt. 32:4) Balaiya zinji kujatikizya busongo bwakwe bunji kapati. (Is. 55:9; Rom. 11:33) Alimwi balaumbulizyigwa kuzyiba kuti ngusiluyando. (1Joh. 4:8) Mbobayaabuba acilongwe a Jehova, bulangizi bwabo bwakupona kukabe kutamani kabali bana bakwe bulayuma. Eelo kaka ncoolwe cilibedelede kugwasya bantu kuba acilongwe a Usyi wabo! Ciindi notucita boobo, Jehova utubona kuti tuli “basimilimonyina.”—1Kor. 3:5. w24.02 12 ¶15

Ikuti kamuli sikwiiya Bbaibbele naa bazyali banu kabali Bakamboni, sena kuli nomuyeeya zyakubbapatizyigwa? Ikuti kacili boobo, eeyo nimbaakani mbotu kapati. Pele kamutanabbapatizyigwa, mweelede kusaanguna kulyaaba kuli Jehova. Mbuti mbomukonzya kulyaaba kuli Jehova? Mulakonzya kucita oobo kwiinda mukupaila kulinguwe kumusyomezya kuti munookomba buyo nguwe alikke alimwi akubikka kuyanda kwakwe mubusena bwakusaanguna mubuumi bwanu. Mubwini, inga musyomezya Jehova kuti muyoozumanana kumuyanda ‘amoyo wanu woonse, abuumi bwanu boonse, amizeezo yanu yoonse alimwi anguzu zyanu zyoonse.’ (Mk. 12:30) Aboobo, mulalyaaba kuli Jehova kamuli buyo nyolikke. Pele lubbapatizyo lucitilwa kubuleya bantu kabalangilila ikutondezya kuti mwakalyaaba. Kulyaaba kwanu ncikonke ciyandika kapati. Aboobo mweelede kuba ambaakani yakucizuzikizya cikonke canu alimwi buya awalo Jehova eeco ncayanda kuti mucite.—Muk. 5:4. w24.03 2 ¶2; 3 ¶5

Muzikwati zyoonse muli mapenzi. Cakutainda mumbali, Bbaibbele lyaamba kuti banabukwetene “banoojisi mapenzi mumibili yabo.” (1Kor. 7:28) Nkaambo nzi? Nkaambo mulumi amukaintu boonse tabalondokede, bajisi bube bwiindene alimwi inga kabakkomanina zintu ziindene. Kayi banabukwetene balakonzya kuti kabazwa mubukkale bwiindene-indene naa muzilengwa ziindene-indene. Alimwi zimwi ziindi balakonzya kutalika kutondezya bube ibwatakali kulibonya kabatanakwatana. Zintu zili boobu zilakonzya kuleta mapenzi mucikwati. Mucikozyanyo, muciindi cakubona kuti boonse kuli mpobalubizya akusola kubelekela antoomwe kulwana penzi limwi, banabukwetene balakonzya kutalika kutamikizyanya. Mane buya, balakonzya kutalika kuyeeya kuti inga cagwasya kwaandaana naa kulekana buya. Pele sena kucita boobu inga kwagwasya? Peepe. Jehova ulailila kuti banabukwetene beelede kucilemeka cikwati nokuba kuti ngobakwetene limwi kasyupa. w24.03 16 ¶8; 17 ¶11

Nomwakamana kubbapatizyigwa, bulangizi bwanu bwakupona muparadaiso anyika mane kukabe kutamani kwakazumanana kuyuma nomwakali kwiiya zinji kujatikizya Jehova calo cakapa kuti mumuyande kapati. (Heb. 5:13–6:1) Kweelede kuti mwakalibonena mbwaali aamasimpe majwi aali ku Baroma 5:2-4. Mwakasunkwa munzila ziindene-indene, pele mwakaliyumya calo cakapa kuti mukkomaninwe a Leza. Mbwaanga mulizyi kuti ulamuyanda akumukkomanina, lino mulijisi kaambo kamvwika kamupa kuyanda kutambula zintu nzyaakasyomezya. Kweelede kuti bulangizi bwanu mulabukkomanina kapati kwiinda kaindi. Tabucili bwakuyeeyela buyo. Ncintu cini-cini kulindinywe. Amana buya, bulangizi oobu bulakonzya kubujatikizya buumi bwanu boonse, nzyomusala, mbomubeendelezya banamukwasyi alimwi ambomucibelesya ciindi. Mwaapostolo Paulo ulaamba akambi kaambo kayandika kapati kujatikizya bulangizi bwanu nomwamana kukkomaninwa a Leza. Umusyomezya kuti bulangizi bwanu, buyoozuzikizyigwa ncobeni.—Rom. 15:13. w23.12 12-13 ¶16-19

Ciindi notwalijana mumapenzi, inga tulaleka kuyeeya kabotu naa kucita zintu mbuli mbotwali kucita lyoonse. Tulakonzya kulimvwa mbuli kuti tutontwa buya kuzwa kupenzi limwi kuya kupenzi limbi. Aboobo, ino Jehova utugwasya buti ciindi notwatyompwa kapati? Utusyomezya kuti uyakutwiimika nji. Mucikozyanyo, ikuti kakuli guwo pati, bwato bulakonzya kuzungaana canguzu. Pele kutegwa bukkalikile, inga bulijisi tuntu tumwi kumabazu oonse obilo nkobuli kunsi. Tuntu ootu tulakonzya kupa kuti bwato kabutazungaani kapati, calo cikonzya kupa kuti basilweendo bakwabililwe. Nokuba boobo, tuntu ootu tulabeleka kabotu lilikke buyo ikuti bwato kabweenda kuya kumbele. Mbubwenya buyo, Jehova uyootwiimika nji ciindi notuzumanana kumubelekela cakusyomeka muziindi zikatazya. w24.01 22 ¶7-8

Ciindi nomwayoowa, amulibuzye kuti, ‘Nzintu nzi Jehova nzyaakacita kale?’ Amuzinzibale kuyeeya zintu nzyaakalenga. Mucikozyanyo, “amulangisye” Jehova mbwalanganya bayuni amaluba-luba nokuba kuti tanaakalengwa mucinkozya cakwe alimwi taakonzyi kumukomba. Kuzinzibala kuyeeya zintu eezyi kulakonzya kutugwasya kuba masimpe kuti ulakonzya kutulanganya andiswe alimwi akumusyoma cakumaninina. (Mt. 6:25-32) Kunze lyaboobo, amuzinzibale kuyeeya zintu Jehova nzyaakabacitila bakombi bakwe. Mulakonzya kwiiya muntu uumwi uulembedwe mu Bbaibbele iwakatondezya lusyomo luyumu, naa kubala cakuluula camubelesi umwi wa Jehova wamazuba aano. Kuyungizya waawo, amuzinzibale kuyeeya Jehova mbwamulanganya nywebo lwanu kumugama. Ino wakamugwasya buti kutegwa mukaiye kasimpe? (Joh. 6:44) Ino wakayiingula buti mipailo yanu? (1Joh. 5:14) Mbuti mbomugwasyigwa buzuba abuzuba akaambo kacipaizyo ca Mwanaakwe?—Ef. 1:7; Heb. 4:14-16. w24.01 4 ¶6; 7 ¶17