Kaambo Ncociyandika Kapati Kuzyiba naa Kuli Mulengi
Nkaambo nzi ncociyandika kapati kuzyiba kuti kuli Mulengi? Ikuti naa bumboni bwamupa kusinizya kuti Leza singuzuzyoonse nkwali, nkokuti mulakonzya kuyanda kulanga-langa bumboni butondezya kuti Bbaibbele lyakazwa kulinguwe. Alimwi ikuti kamuzisyoma nzyolyaamba Bbaibbele, nkokuti muyoogwasyigwa munzila eezyi zitobela.
Kubukkomanina kapati buumi
BBAIBBELE LYAAMBA KUTI: “[Leza] wakacita zibotu, wakamupa mvwula kuzwa kujulu aziindi eelyo nokuba micelo minji, alimwi wakamukkutya azilyo akuzuzya myoyo yanu akubotelwa.”—Milimo 14:17.
NCOCAAMBA: Zintu zyoonse nzyomukkomanina munyika eeyi ncipego kuzwa ku Mulengi. Muyootondezya kulumba kapati kujatikizya zipego eezyi mwaakuzyiba mbwamubikkila maano kapati Sikuzipa.
Kujana lulayo lubotu ilukonzya kumugwasya lino
BBAIBBELE LYAAMBA KUTI: “Uyoomvwisya cintu ciluleme, ciluzi alimwi cibotu, nkokuti bukkale boonse bubotu.”—Tusimpi 2:9.
NCOCAAMBA: Mbwali Mulengi wanu, Leza ulizyi nzyomuyandika kutegwa kamukkomene. Kwiinda mukubala Bbaibbele, mulakonzya kwiiya zintu zinji izikonzya kumugwasya mubuumi.
Kujana bwiinguzi kumibuzyo yanu
BBAIBBELE LYAAMBA KUTI: “Ulajana luzyibo lwa Leza.”—Tusimpi 2:5.
NCOCAAMBA: Kuzyiba kuti kuli Mulengi kulakonzya kumugwasya kujana bwiinguzi kumibuzyo iiyandika kapati mbuli wakuti: Ino buumi bujisi mpindu nzi? Nkaambo nzi ncokuli kupenga kapati? Ino ncinzi cicitika twafwa? Mulakonzya kujana bwiinguzi bugwasya mu Bbaibbele.
Kuba abulangizi bwakumbele
BBAIBBELE LYAAMBA KUTI: “‘Nkaambo ndiliizyi kabotu mizeezo njendiyeeya kujatikizya ndinywe,’ mbwaamba Jehova, ‘mizeezo yakumuletela luumuno, kutali mapenzi pe, kumupa buumi bwakumbele bubotu alimwi abulangizi.’”—Jeremiya 29:11.
NCOCAAMBA: Leza usyomezya kuti kumbele uyoobumana bubi, kupenga alimwi alufwu. Ciindi nomuzisyoma zisyomezyo zya Leza, bulangizi bwanu buyoomugwasya kwaalwana cabusicamba mapenzi ngomujana buzuba abuzuba.