Ibwini Mbobutunununa
1 Ciindi cimwi, Jesu wakaambila bama Juda ibakasyoma kuti: “Muyooziba bwini, abwalo bwini buyoomunununa.” (Joh. 8:32) Wakali kwaamba lwaanguluko lwiinda akwaangululwa buyo kumilawo, alimwi lwaanguluko luya kuba kubantu boonse—bavwubi naa bacete, bayiide antela batayiide. Jesu wakayiisya bwini buyootwaangulula kucinyonyoono akulufwu. Kweelana ambwaakapandulula Jesu, “Muntu woonse uucita cibi ngomuzike wacibi.” (Joh. 8:34) Elo kaka tulalombozya iciindi bantu boonse bamvwa ‘nobaya kulubulwa kubuzike bwabubozi, akuyootambula bulemu alwaangunuko mbuli bana ba Leza’!—Rom. 8:21.
2 Ibwini bwaamba zya Jesu alimwi alubazu ndwajisi mukuzuzikizyigwa kwamakanze aa Leza, bulapa lwaanguluko luli boobo. Alimwi bulabikkilizya aluzibo lwacipaizyo cacinunuzyo eeco ncaakatupa kuti tufwutulwe. (Rom. 3:24) Noliba lino, ikuzumina alimwi akutobela bwini bwamu Bbaibbele kutupa kuti tube alwaanguluko lulimbolubede kuzwa kukuyoowa, kutyompwa akuzintu zibyaabi zisiyene-siyene.
3 Lwaanguluko Kukuyoowa Akukutyompokelwa: Zintu zili mukucitika munyika tazyeelede kututyompya akaambo kakuti tulizyi ncokuli bubi alimwi tulizyi kuti ino-ino buyoogwisigwa munyika. (Int. 37:10, 11; 2 Tim. 3:1; Ciy. 12:12) Kuyungizya waawo, ibwini bulatwaangulula kunjiisyo zyakubeja kujatikizya ciimo cabantu bafwide. Tulizyi kuti bafwide tabakonzyi kutucisa pe, tabali mukupenzyegwa kukabe kutamani alimwi Leza tajayi bantu kutegwa bakabe anguwe mubusena bwamyuuya.—Muk. 9:5; Inc. 24:15.
4 Bwini oobo bwakabayumya bazyali ciindi mwanaabo naakafwa muntenda. Banyina bakaamba boobu: “Kuli cibulilide mubuumi bwesu ciyoojanika twaakubona mwaneesu aakubusyigwa.” Bakayaambele akwaamba kuti: “Pele tulizyi kuti buumba mbotujisi mbwakaindi buyo kasyoonto.”
5 Lwaanguluko Kumicito Mibyaabi: Bwini bujanika mu Bbaibbele bulakonzya kumucinca muntu mbwayeeya alimwi abube bwakwe, calo icikonzya kuleta lwaanguluko kumapenzi aayo aakonzya kutantamukwa. (Ef. 4:20-24) Ikuba muntu uusyomeka alimwi munkutwe kulakonzya kubumana bucete. (Tus. 13:4) Ikuba aluyando lwakulyaaba kutola ambele cilongwe cibotu abantu. (Kol. 3:13, 14) Ikutobela busilutwe bwa Bunakristo kulacesya mapenzi mumukwasyi. (Ef. 5:33–6:1) Ikuleka kukolwa bukoko, kutalilemeka, kufweba tombwe alimwi amisamu iikola kupa kuti tube abuumi bubotu.—Tus. 7:21-23; 23:29, 30; 2 Kor. 7:1.
6 Imukubusi umwi cakamwaalila kuleka kubelesya misamu iikola kwamyaka iili fwuka. Bumwi buzuba wakaswaanganya sikumwaya mucizyi iwakali kukambauka mumugwagwa. Aboobo wakatambula mabbuku alimwi bubambe bwakacitwa bwakupilukila kulinguwe kuŋanda. Ciiyo ca Bbaibbele cakatalisyigwa. Nokwakainda buyo myezi yobile, mukubusi ooyu wakaleka kubelesya misamu iikola alimwi kwiinde buyo myezi iili lusele kuzwa naakatalika kwiiya, wakabbapatizyigwa. Mupati wakwe mukubusi ooyu musankwa alimwi amukaintu wakwe nobakabona kuti waleka kubelesya misamu iikola, cakabakulwaizya kuti abalo batalike kwiiya Bbaibbele.
7 Amubagwasye Bantu Kuba Alwaanguluko: Aabo ibali mubuzike kunjiisyo zyakubeja kwaciindi cilamfwu, cilakonzya kubayumina kumvwisya lwaanguluko lujanika mu Jwi lya Leza. Aboobo mwiiyi weelede kuti kali musungu akulibambila kabotu kutegwa bantu bali boobu makani akonzye kubanjila mumoyo. (2 Tim. 4:2, 5) Ecino tacili ciindi cakulengaana mumulimo wesu ‘wakwaambilizya lwaanguluko kubaange.’ (Is. 61:1) Lwaanguluko lwa Bunakristo lulayandika kapati. Kujana lwaanguluko oolu caamba kuba abuumi butamani.—1 Tim. 4:16.