Mibuzyo Yabasikubala
“Ngazi Yamulindizi” ya November 1, 1995 mu Cingisi naa ya Chichewa yakali kubandika makani aa Jesu aajatikizya “izyalani elino” mbuli mbotubala kuli Matayo 24:34. Sena eci cipandulula kuti kuli kudooneka kuti Bwami bwa Leza bwakakkazikwa kujulu mu 1914?
Oyo mubandi wamu Ngazi Yamulindizi taakwe noowakaicinca njiisyo yesu mpati iijatikizya 1914. Jesu wakapa cikozyanyo cakutondezya kuti nkwali uleendelezya mu Bwami. Tulijisi bukamboni buzwide butondezya kuti cikozyanyo eci cakatalika kuzuzikizigwa kuzwa mu 1914. Ikucitika kwazintu zili mbuli nzala, malwazi, mizuzumo yanyika, alimwi azimwi zitondezyo zilasinizya kuti kuzwa mu 1914, Jesu uleendelezya, Mwami mu Bwami bwa Leza. Eci citondezya kuti kuzwa leelyo tuli mumazubaa mamanino aabweende buno bwazintu.
Ino ncinzi kayi ncoyali kusalazya Ngazi Yamulindizi? Icintu cinga catugwasya kuteelela nkulanga muzeezo Jesu ngwaakajisi naakabelesya majwi aakuti “izyalani” kuli Matayo 24:34. Eci cibalo cibalwa kuti: “Ncobeni ndamwaambila kuti izyalani elino talikooyoomana mane zintu ezi zyoonse zizoobe.” Ino ncinzi ncaakali kwaamba Jesu naakabelesya bbala lyakuti “izyalani,” mumazuba akwe alimwi ayesu?
Magwalo manji atondezya kuti Jesu tanaakali kwaamba kabunga naa nkamu ini-ini ya basololi bama Juda naa balikke basikwiiya bakwe basyomeka ciindi naakaamba “zyalani.” Pele wakabelesya bbala eli lya “zyalani” ikusinganya bama Juda banabuleya ibakamukaka. Pele bamwi mucoolwe bakali kukonzya kweempwa ‘akulifwutula kuzyalani elyo’ nobakamvwa majwi aamwaapostolo Petro mubuzuba bwa Pentekoste.—Incito 2:40.
Mumajwi aaya, Petro taakali kwaamba bantu baciimo cimwi, kulampa kwaciindi nokuba kuswaanganya “izyalani” kudeti ili yoonse. Taakaamba kuti bantu beelede kulifwutula kuzyalani lyakazyalwa mumwaka ngwaakazyalwa Jesu naa izyalani lyakazyalwa mu 29 C.E. Petro wakali kwaamba bama Juda batasyomi baciindi eco—bamwi ambweni ibakacili bana baniini, bamwi ibakali bapati—ibakamvwa kuyiisya kwa Jesu, ibakabona maleele akwe naa kwaamvwa alimwi ibatakamuzumina kuti ngo Mesiya.
Oobo mbwaakamuteelela Petro, Jesu naakabelesya bbala lya “izyalani” ciindi walo abamaapostolo bambi botatwe nobakali anguwe aa Mulundu wa Elaioni. Kweelana amajwi aa Jesu aabusinsimi, bama Juda baciindi eco—aabo bakali kupona mumazubaa Jesu—bakali kuzoocitikilwa naa kumvwa nkondo, mizuzumo, inzala, alimwi azimwi zintu zitondezya kuti mamanino aabwende bwama Juda aswena. Atwaambe kuti, izyalani elyo taakwe nolyakainda mane kusikila mamanino naakaboola mu 70 C.E.—Matayo 24:3-14, 34.
Kuleelede kuzuminwa kuti kuli notwatali kwaayeeyela munzila eyi majwi aa Jesu. Bantu batalondokede bajisi cilengwa cakuyanda kuziba buzuba bwini-bwini mamanino naayakuboola. Kamuyeeya kuti nobaba baapostolo bakali kuyandaula kuti bazibe ciindi cini nobakabuzya kuti: “Omwami, sena ulabweedezya bwami ku-Israyeli kuliceecino ciindi?”—Incito 1:6.
Babelesi ba Leza abalo sunu basola amoyo omwe kuti bazibe ciindi cini-cini cakucitika kwazintu kuzwa mu 1914 kwiinda kuli ncaakaamba Jesu kujatikizya “izyalani.” Mucikozyanyo, umwi muzeezo wali wakuti izyalani lilakonzya kupona myaka ili 70 naa 80, ikuti bantu balyo bakeelede kuti kabali bakomena kusika aciimo cakuteelela bupanduluzi bwankondo yanyika yakusaanguna alimwi azintu zimwi zyakali kucitika ciindi eco; aboobo tulakonzya kubalila akuziba ciindi cacaala kuti mamanino aboole.
Nokabota buti kaambo kakapa kuyeeya oku, sena kwakeendelana alulayo ndwaakapa Jesu? Jesu wakaamba kuti: “Taakwe muntu naba umwi uuzi buzuba obo nanka ciindi, nibaba baangelo bakujulu naba Mwana, pele Taata luzutu nguuzi. . . . Nkaambo kaako amulangile, nkaambo tamuzi buzuba mbwazoosika mwami wanu.”—Matayo 24:36-42.
Aboobo oku kuyeeya kupya mu Ngazi Yamulindizi ikujatikizya “izyalani” teekwakacinca muzeezo ngotujisi kumakani aacakacitika mu 1914. Pele kwakatugwasya kuteelela kabotu ncaakali kwaamba Jesu naakabelesya ibbala lya “izyalani,” elyo twakabona kuti nzila njaakalibelesya bbala elyo tayeelede kutupa kaambo kakutalika kubalila—kubalila kuzwa mu 1914—kuti tubone ciindi cacaala kuti mamanino aboole.