Amubone Bube Bubotu Mbobajisi Bamwi
Penzi
Kulisumpula kulakonzya kupa muntu kuba alusalululo. Muntu uulisumpula ulibona kuti ulayandika kapati kwiinda bamwi. Ulibona kuti ulabainda bamwi alimwi akubona baabo mbaindene limwi kuti mbaansi kapati. Toonse buyo tulakonzya kucegwa mukakole kakuyeeya boobu. Bbuku litegwa Encyclopædia Britannica lyakaamba kuti: “Bunji bwabantu [bazilengwa zimwi] balimvwa kuti mbobapona, zilyo zyabo, nsamino, zilengwa, nzyobasyoma, mbobalilemeka alimwi azimwi, nzibotu kapati kwiinda zyabantu batubunga tumwi.” Mbuti mbotukonzya kweeleba kuyeeya kutaluzi kuli boobu?
Njiisyo Yamu Bbaibbele
“Amucite zintu zyoonse cakulicesya akubona bamwi kuti balamwiinda.”—BAFILIPI 2:3.
Ino eeci caamba nzi? Kutegwa tutaciindizyi kulisumpula, tweelede kwiiya kulicesya. Ikuti katulicesya, tuyoocikonzya kubona kuti bamwi balatwiinda mumbazu zimwi zyabuumi. Kunyina bantu ibajisi bube boonse bubotu.
Amubone cikozyanyo caba Stefan. Bakakomenena mucisi ca Kkomyunizimu, pele bakacikonzya kuleka kusalulula bantu ibatakali kuzwa muzisi zya Kkomyunizimu. Bakaamba kuti: “Ndiyeeya kuti kubona bamwi kuti balakwiinda, cilagwasya kapati mukuzunda muuya wakusalulula. Tandizizyi zintu zyoonse, aboobo ndilakonzya kwiiya kuzwa kumuntu uuli woonse.”
Ncomukonzya Kucita
Amusole kulibona munzila yeelede alimwi akuzyiba kuti andinywe kuli mpomulezya. Kamuyeeya kuti bamwi bacita kabotu muzintu zimwi nywebo nzyomutakonzyi kucita kabotu. Tamweelede kuyeeya kuti bantu boonse ibazwa mukabunga kamwi bajisi bube bukozyenye.
Muciindi cakubayeeyela zintu zitali kabotu bantu ibazwa mukabunga kamwi kabantu, amulibuzye kuti:
Kamuyeeya kuti bamwi bacita kabotu muzintu zimwi nywebo nzyomutakonzyi kucita kabotu
‘Sena bube mbonditayandi mbwajisi muntu ooyu mbubi ncobeni, naa bwiindene buyo abwangu?’
‘Sena muntu ooyu awalo inga wabona bube butali kabotu mulindime?’
‘Ino muumbazu nzi muntu ooyu mwacita kabotu kwiinda ndime?’
Ikuti mibuzyo eeyi mwayiingula cakusyomeka, mulakonzya kucikonzya kuzunda kusalulula kuli koonse alimwi akubona bube bumwi bubotu mbwajisi muntu ooyo?