Mutazumizyi Cintu Cili Coonse Kumwaandaanya A Jehova

“Amulisalile buzuba obuno ngumuyanda kubelekela.”—JOS. 24:15.

AMUSOLE KWIINGULA

Mbuti mbomukonzya kuulanga munzila yeelede mulimo wakumubili?

Mbuti mbomukonzya kutondezya kuti tamuciindizyi muzyintu zyakulikondelezya?

Kuti wamumukwasyi wacileka kubelekela Jehova, mbuti mbomukonzya kuliyumya mukuusa kwanu?

1-3. (a) Nkaambo nzi Joshua ncali cikozyanyo cibotu kulindiswe? (b) Ncinzi ncotweelede kuyeeya ciindi notusala zyakucita?

ZYINTU nzyotusala zilayandika kapati. Zilatugwasya kweendelezya buumi bwesu. Eeci cilikozyenye amuntu weenda munzila, kumane nzila zyaba zyobilo. Weelede kusala nzila njayelede kubelesya. Ulalangilwa kusala nzila iyakumusisya nkwaya muciindi cakusala nzila iyakumutola kulamfwu ankwaya.

² Mu Bbaibbele muli zikozyanyo zinji zyabantu ibakali mubukkale bukozyenye aboobu. Mucikozyanyo, Kaini wakeelede kusala kucita cabukali naa kweendelezya bukali bwakwe. (Matl. 4:6, 7) Joshua wakeelede kusala akati kakubelekela Leza wakasimpe naa kukomba baleza bakubeja. (Jos. 24:15) Joshua wakali ambaakani yakuzumanana kumvwana a Jehova, aboobo wakasala nzila yakali kuyakumugwasya kucita boobo. Kaini taakwe naakajisi mbaakani iili boobu, aboobo wakasala nzila iyakamwaandaanya a Jehova.

³ Zimwi ziindi andiswe tweelede kusala zyintu ziyandika kapati kutegwa tuzumanane kweenda munzila iiluzi. Tweelede kuzyiba kuti kusala nkotucita kulakonzya kupa kuti Jehova alemekwe alimwi akutugwasya kumvwana anguwe naa kutwaandaanya anguwe. (Amubale Bahebulayo 3:12.) Mucibalo eeci alimwi acitobela, tulalanga-langa mbazu zili ciloba zyabuumi motuteelede kuzumizya cintu cili coonse kutwaandaanya a Jehova.

MULIMO WAKUMUBILI

4. Nkaambo nzi ncociyandika kubeleka?

⁴ Banakristo beelede kubeleka kutegwa balijanine ziyandika alimwi amikwasyi yabo. Bbaibbele lyaamba kuti ikuti muntu katayandi kubamba kabotu bamukwasyi wakwe, mubi kapati kwiinda muntu uunyina lusyomo. (2 Te. 3:10; 1 Ti. 5:8) Cakutadooneka, mulimo wakumubili ulayandika kapati mubuumi, pele kuti naa tiimwacenjela, ulakonzya kumwaandaanya a Jehova. Munzila nzi?

5. Ntwaambo nzi ntotweelede kuyeeya katutanazumina mulimo?

⁵ Ambweni muyandaula mulimo. Kuti mulimo kaukataazya kujana mucisi nkomukkala, mulakonzya kusunkwa kuzumina kufwumbwa mulimo wakusaanguna ngomwapegwa. Mbuti kuti mulimo ooyo kauteendelani anjiisyo zyamu Bbaibbele? Mbuti kuti mulimo ooyo kaunyonganya milimo ya Bunakristo naa kumwaandaanya amukwasyi? Sena mweelede kuuzumina mulimo ooyo kamuyeeya kuti kubeleka kuli kabotu nokuba kuti mulimo tauli kabotu kwiinda kubula mulimo? Kamuyeeya kuti kusala nzila iitali kabotu kulakonzya kumwaandaanya a Jehova. (Heb. 2:1) Kufwumbwa naa muyandaula mulimo naa muyanda kucinca mulimo, mbuti mbomukonzya kusala kabotu?

6, 7. (a) Ino ntwaambo nzi tobilo tukonzya kupa muntu kuzumina mulimo? (b) Nimbaakani nzi iikonzya kumupa kuswena kuli Jehova, alimwi nkaambo nzi?

⁶ Mbubwenya mbucaambwa kale, mweelede kuyeeya nkomuya. Amulibuzye kuti, ‘Ino ndiyanda kuti mulimo undigwasye kucita nzi?’ Ikuti makanze aanu ngakuti mulimo umugwasye kujana nzyomuyandika alimwi azyamukwasyi wanu kutegwa muzumanane kubelekela Jehova—Jehova uyakumulongezya. (Mt. 6:33) Jehova ulizyi mbwakonzya kumugwasya kuti mulimo wamana cakutayeeyelwa naa ciindi makwebo aacisi naateendi kabotu. (Is. 59:1) Bbaibbele lyaamba kuti: “Ulizyi ikuvwuna bantu bamubelekela cakulyaaba kuzwa kumasukusyo.”—2 Pe. 2:9.

⁷ Kulubazu lumwi, mbuti kuti makanze aanu ngakuyanda buyo kuvwuba? Ambweni inga mwazwidilila. Nokuba boobo, kuli ntenda kubelekela buyo kuti muvwube. (Amubale 1 Timoteyo 6:9, 10.) Kubikkila kapati maano kukuvwuba alimwi amulimo wakumubili kulakonzya kumwaandaanya a Jehova.

8, 9. Ncinzi bazyali ncobeelede kulanga-langa kujatikizya mbobaubona mulimo wakumubili? Amupandulule.

⁸ Kuti kamuli muzyali, amuyeeye cikozyanyo canu mbocikonzya kubajatikizya bana banu. Ncinzi ncobabona kuti ncomubikkila kapati maano—mulimo wakumubili naa cilongwe canu a Jehova? Kuti kababona kuti mpuwo alimwi alubono zijisi busena bwakusaanguna mubuumi bwanu, sena balakonzya kumutobela mukubelesya nzila mbyaabi boobo? Sena inga baleka kumulemeka mbuli muzyali? Munakristo umwi uucili mwana-mwana wakaamba kuti: “Kuzwa kaindi, bataata bali kubikkila kapati maano kumulimo wabo. Kumatalikilo, cakali kulibonya mbuli kuti bakali kubeleka canguzu nkaambo bakali kuyanda kuti mukwasyi wesu kaujisi zyoonse ziyandika. Bakali kuyanda kutulanganya kabotu. Pele mumyaka misyoonto yainda, zyintu zyacinca. Balabeleka lyoonse alimwi balaletelezya kuŋanda zyintu zidula zyakulikondelezya muciindi cazyintu ziyandika. Akaambo kaceeco, mbuli mukwasyi tuzyibidwe kuti tujisi mali kapati muciindi cakuzyibwa kuti tuli mukwasyi uukulwaizya bamwi kubelekela Jehova. Inga ndakkomana kuti bataata kababeleka canguzu kugwasya mukwasyi wesu kubelekela Jehova muciindi cakubeleka canguzu kujana mali manji.”

⁹ Nobazyali mutalyaandaanyi a Jehova kwiinda mukubikkila kapati maano kumulimo wakumubili. Kwiinda mucikozyanyo canu, amubatondezye bana banu kuti musyoma kuti buvwubi bwini-bwini mbotukonzya kuba ambubo mbwakumuuya kutali bwakumubili.—Mt. 5:3.

10. Nzyintu nzi mukubusi nzyeelede kulanga-langa katanasala lwiiyo naa mulimo ngwayanda kuyakucita?

¹⁰ Ikuti kamuli mukubusi uuyanda kusala mulimo ngomuyakubeleka, mbuti mbomukonzya kusala nzila mbotu? Mbubwenya mbokwabandikwa kale, mweelede kuzyiba buumi bwanu mbobuyakuba kumbele. Sena oolo lwiiyo amulimo ngomuyanda kuyakucita uyakumugwasya kucita ziyandika zya Bwami kwiinda mbomwakali kucita kaindi naa uyakumwaandaanya a Jehova? (2 Ti. 4:10) Sena mujisi mbaakani yakwiiya buumi bwabaabo ibakkomana buyo ikuti kabajisi mali? Sena muyakwiiya cikozyanyo calusyomo ca Davida iwakalemba kuti: “Ndakali mulombe, sunu ndakomena, pele nsina bona uululeme uusiidwe, nanka lunyungu lwakwe lukumbila insima”? (Int. 37:25) Mutalubi kuti, nzila imwi iyakumutantamuna kuli Jehova, mpoonya imbi iyakumusololela kubuumi bubotu kwiinda. (Amubale Tusimpi 10:22; Malaki 3:10.) Ino muyakusala nzila iili?a

ZYAKULIKONDELEZYA

11. Ino Bbaibbele lyaamba nzi kujatikizya zyakulikondelezya, pele ncinzi ncotweelede kuyeeya?

¹¹ Bbaibbele talikasyi kusobana, alimwi talitondezyi kuti zyakulikondelezya zisowa buyo ciindi. Paulo wakalembela Timoteo kuti: “Kunyanyaasya mubili kugwasya buyo asyoonto.” (1 Ti. 4:8) Bbaibbele alimwi lyaamba kuti kuli “ciindi cakuseka” alimwi “aciindi cakuzyana,” alimwi likulwaizya kulyookezya. (Muk. 3:4; 4:6) Nokuba boobo, ikuti mwatabikkila maano, zyakulikondelezya zilakonzya kupa kuti mwaandaane a Jehova. Mubuti? Bubi buliko bujatikizya zyintu zyobilo—musyobo wazyakulikondelezya ngomusala kucita alimwi aciindi ncomubelesya.

12. Ino nzyintu nzi nzyomweelede kulanga-langa kujatikizya cakulikondelezya ncomuyanda kusala?

¹² Cakusaanguna, amulange-lange musyobo. Amuzyibe kuti mulakonzya kujana zyakulikondelezya zibotu alimwi zigwasya. Cuusisya ncakuti, bunji bwazyakulikondelezya iziliko munyika zikulwaizya micito njatayandi Leza, micito mbuli nkondo, mizimo, alimwi akutalilemeka mukoonana. Aboobo, mweelede kuulanga-langa musyobo wazyakulikondelezya ngomuyanda kusala. Ino uyakumujatikizya buti? Sena umukulwaizya kuba amuuya wakuyandisya nkondo, wakuzundana, naa wakuyandisya cisi? (Tus. 3:31) Sena umumanina mali? Sena ulakonzya kubafwumpuzya bamwi? (Lom. 14:21) Ino cakulikondelezya canu cimupa kuyanzana abantu bali buti? (Tus. 13:20) Sena cimupa kuyanda kucita zyintu zitaluzi?—Jak. 1:14, 15.

13, 14. Ncinzi ncomweelede kulanga-langa kujatikizya ciindi ncomweelede kubelesya mukulikondelezya?

¹³ Amuyeeye alimwi kujatikizya ciindi ncomusowa mukulikondelezya. Amulibuzye kuti, ‘Sena ndibelesya ciindi cilamfwu mukulikondelezya cakuti tandijisi ciindi cinji kucita zyintu zyakumuuya?’ Ikuti kamusowa ciindi cinji kulikondelezya, tamukakkomani mbuli mbomuyanda. Masimpe ngakuti, aabo babikka kulikondelezya mubusena bweelede, balakkomana kapati. Nkaambo nzi? Akaambo kakuti basaanguna kucita “zyintu ziyandika kapati,” aboobo tabalipi mulandu ciindi nobalikondelezya.—Amubale Bafilipi 1:10, 11.

¹⁴ Nokuba kuti kusowa ciindi cilamfwu inga caboneka mbuli kuti cili kabotu, pele kubweza nzila eeyo kulakonzya kumwaandaanya a Jehova. Mucizyi Kim uujisi myaka iili 20 yakuzyalwa cakamucitikila eeci. Waamba kuti: “Ndakali kujanika kumapobwe woonse. Lyoonse kumamanino aansondo ndakali kujanika kumapobwe muli Bwasanu, mu Mujibelo alimwi amu Nsondo. Pele lino ndibona kuti kuli zyintu zinji ziyandika kapati zyakucita. Mucikozyanyo, mbuli painiya, ndilabuka 06:00 mafwumofwumo kulibambila kuya mumuunda, aboobo tandikonzyi kunoolikondelezya kusikila kuma 01:00 naa 02:00 mafwumofwumo. Ndilizyi kuti kulikondelezya koonse takulubide pe, pele kulakonzya kunyonganya kapati. Mbubwenya mbuli zyintu zimwi, kulikondelezya kweelede kubikkwa mubusena bweelede.”

15. Mbuti bazyali mbobakonzya kugwasya bana babo kukkomana akulikondelezya kukatalusya?

¹⁵ Bazyali balijisi mukuli wakujana nzyobayandika alimwi azyabana babo kumubili, kumuuya alimwi amumizeezo. Eeco cilabikkilizya akujana ciindi cakukatalukwa. Kuti kamuli bazyali, tamweelede kubona kulikondelezya koonse kuti nkubi. Kulubazu lumwi, mweelede kukazya kulikondelezya kutali kabotu. (1 Ko. 5:6) Kwiinda mukulibambila kabotu, mulakonzya kujanina mukwasyi wanu zyakulikondelezya izikatalusya ncobeni.b Munzila eeyo, nywebo abana banu muyakucikonzya kusala nzila iiyakumugwasya kuswena kuli Jehova.

MUMUKWASYI

16, 17. Ino mbukkale nzi buusisya ibwakatazya bazyali banji, alimwi tuzyi buti kuti Jehova ulamvwisya mbocibacisa mumoyo?

¹⁶ Cilongwe ciliko akati kamuzyali amwana nciyumu kapati cakuti Jehova wakabelesya cilongwe eeco kutondezya luyando lwakwe kubantu bakwe. (Is. 49:15) Cili buyo kabotu kuusa ikuti umwi wamumukwasyi waleka kubelekela Jehova. Naakagwisyigwa mumbungano mwanaakwe musimbi, mucizyi umwi wakaamba kuti: “Ndakausa kapati. Ndakalibuzya kuti, ‘Nkaambo nzi ncaamusiya Jehova?’ Ndakalipa mulandu, alimwi akulitongooka.”

¹⁷ Jehova ulamvwisya mbocimucisa mumoyo. ‘Wakausa’ ciindi bantu bamukwasyi wakwe bakusaanguna anyika nobakazanga, mpoonya alimwi aciindi bantu banji ibakali kupona Zambangulwe kalitanacitika nobakazanga. (Matl. 6:5, 6) Aabo ibatana kucitikilwa cintu cili boobu, balakonzya kukatazyigwa kumvwisya mbocicisa ikuti muntu wamumukwasyi waleka kubelekela Jehova. Nokuba boobo, inga tiicaba cabusongo kuti andinywe mwaleka kubelekela Jehova akaambo kakuti muntu umwi wamumukwasyi walyaandaanya a Jehova. Aboobo, ino mbuti mbomukonzya kuliyumya ikuti wamumukwasyi waleka kubelekela Jehova?

18. Nkaambo nzi bazyali ncobateelede kulipa mulandu kuti mwana wacileka kubelekela Jehova?

¹⁸ Mutalipi mulandu pe. Jehova wapa coolwe kumuntu aumwi kuti alisalile, wamumukwasyi umwi aumwi uulyaabide akubbapatizyigwa weelede “kunyamuna mukuli wakwe uumugeme. (Gal. 6:5) Jehova upa sizibi mulandu akaambo kazyintu nzyaalisalila kucita kutali ndinywe pe. (Ezk. 18:20) Mutapi bantu bambi mulandu. Amulemeke nzila Jehova njabelesya kupa lulayo kubantu bakwe. Amulwane Diabolosi—kutali baalu ibabweza ntaamu kuti bakwabilile mbungano.—1 Pe. 5:8, 9.

19, 20. (a) Ncinzi bazyali bajisi bana bagwisyidwe mumbungano ncobakonzya kucita kutegwa baliyumye mukuusa kwabo? (b) Mbulangizi nzi bazyali bali boobo mbobajisi?

¹⁹ Kulubazu lumwi, ikuti mwasala kutongooka Jehova muyakulyaandaanya anguwe. Mubwini, ooyo wamumukwasyi wanu ncayandika nkubona makanze aanu aakusumpula Jehova muzyintu zyoonse—kubikkilizya abulongwe buli mumukwasyi. Aboobo, kutegwa muliyumye mubukkale buli boobo, amuzumanane kuyumya cilongwe canu a Jehova. Mutalipambukanyi pe kubakwesu abacizyi Banakristo basyomeka. (Tus. 18:1) Amumwaambile mbomulimvwa Jehova mumupailo. (Int. 62:7, 8) Mutataliki kulangaula twaambo twakulitamizya kutegwa kamuyanzana awamumukwasyi iwakagwisyigwa mumbungano, mucikozyanyo, kwiinda mukutuminana tugwalo a Intaneti aafooni. (1 Ko. 5:11) Kamuujisi kucita milimo yakumuuya. (1 Ko. 15:58) Imucizyi iwaambwa kale wakaamba kuti: “Ndilizyi kuti ndeelede kujata bubi mumulimo wa Jehova akuzumanana kuyuma kumuuya kutegwa mwanaangu aakupiluka kuli Jehova, ndikacikonzye kumugwasya.”

²⁰ Bbaibbele lyaamba kuti luyando “lulalangila zyintu zyoonse.” (1 Ko. 13:4, 7) Tacilubide kuba abulangizi bwakuti muyandwa wanu uyakupiluka. Mwaka amwaka, basizibi banji baleempwa akupiluka kumbunga ya Jehova. Jehova tabijilwi akaambo kakweempwa kwabo. Muciindi caboobo, “ulafwamba kujatila.”—Int. 86:5.

AMUSALE CAMAANO

21, 22. Makanze nzi ngomujisi kujatikizya kubelesya nguzu zyanu zyakulisalila?

²¹ Jehova wakalenga bantu bakwe kabajisi nguzu zyakulisalila. (Amubale Deuteronomo 30:19, 20.) Pele kuli mukuli uuliko akaambo kalwaanguluko oolo. Munakristo umwi aumwi weelede kulibuzya kuti: ‘Ino ndili munzila iili? Sena ndazumizya mulimo, zyakulikondelezya naa cilongwe camumukwasyi kuti zindaandaanye a Jehova?’

²² Luyando ndwajisi Jehova kubantu bakwe taluzungaani. Nzila ilikke iikonzya kutupa kwaandaana a Jehova nciindi notusala kutola nzila iitali kabotu. (Lom. 8:38, 39) Pele eeco taceelede kucitika. Mutazumizyi cintu cili coonse kumwaandaanya a Jehova. Mucibalo citobela tuyoolanga-langa mbazu zyone zimbi momukonzya kutondezya makanze aayo.

[Bupanduluzi buyungizidwe]

[Cifwanikiso icili apeeji 14]

Kulikondelezya kuluzi alimwi ikucitwa bweelede kulakatalusya

[Cifwanikiso icili apeeji 16]

Tacilubide kuba abulangizi bwakuti muyandwa wanu uyakupiluka kuli Jehova

Amuzumanane Kuswena Kuli Jehova

“Amuswene kuli Leza, eelyo awalo uyooswena kulindinywe.”—JAK. 4:8.

SENA INGA MWAPANDULULA

Mbuti mbotukonzya kwaalanga kabotu makkompyuta alimwi amincini iimwi kubikkilizya abuponi?

Mbuti mbotukonzya kuzumanana kwaalanga kabotu mali alimwi akulikankaizya?

Mbuti mbotukonzya kukakatila kuli Jehova?

1, 2. (a) Ino “bucenjezu” bwa Saatani ninzi? (b) Ncinzi iciyakutugwasya kuswena kuli Leza?

JEHOVA LEZA wakalenga bantu kutegwa kababa aluyandisisyo lwakuba acilongwe anguwe. Pele Saatani uyanda kuti katuyeeya mbuli mbwayeeya—uyanda kuti katuyeeya kuti Jehova tajisi mulimo. Ooko nkubeja kwa Saatani nkwaali kusumpula kuzwa ciindi Eva naakacengwa mumuunda wa Edeni. (Matl. 3:4-6) Bantu banji bali kumumvwida Saatani mbubwenya mbwaakacita Eva.

² Cikkomanisya ncakuti, tulakonzya kutweeleba tukole twa Saatani, mbwaanga “tulizizyi nzila zyakwe zyabucenjezu.” (2 Ko. 2:11) Saatani ulasola kutwaandaanya a Jehova kwiinda mukutupa kuti tusale zyintu zitali kabotu. Kweelana ambocatondezya cibalo cainda, inga twacikonzya kusala kabotu caboola kumakani aamulimo, zyakulikondelezya, alimwi akumvwana mumukwasyi. Cibalo eeci cilatugwasya kubona mbotukonzya kubelesya kabotu zyintu mbuli makkompyuta amincini iimbi, buponi, mali, alimwi akulikankaizya kutegwa zitugwasye ‘kuswena kuli Leza.’—Jak. 4:8.

MAKKOMPYUTA AMINCINI IIMBI

3. Amupandulule bubotu abubi bwamakkompyuta amincini iimbi.

³ Mazuba aano mincini yavwula kapati. Ikuti yabelesyegwa kabotu mincini eeyi ilakonzya kugwasya kapati. Ikuti yatabelesyegwa kabotu, ilakonzya kunjila akati kesu a Taatesu wakujulu. Mucikozyanyo, amubone makkompyuta. Eeyi magazini njomubala yakalembwa alimwi akusimbwa kwiinda mukubelesya makkompyuta. Kkompyuta ilakonzya kuba cibelesyo cigwasya kapati mukuvwuntauzya alimwi amukubandika alimwi zimwi ziindi inga yagwasya mukujana zyakulikondelezya zikatalusya. Nokuba boobo, kkompyuta alimwi ilakonzya kutunyonganya. Cabucenjezu basimakwebo batondezya kuti bantu beelede kuti kabajisi zyintu zipya. Mukubusi umwi iwakajisi luyandisisyo lwakuba akkompyuta yamumaanza, cakusisikizya wakasambala insa yakwe kutegwa aule kkompyuta eeyi. Ooku nkokulyaaba ikutagwasyi pe!

4. Ino mukubusi umwi Munakristo wakacita buti kutegwa amane ciyanza cakuciindizya kubelesya kkompyuta?

⁴ Kuli ntenda mpati iikonzya kuboola ikuti mwasulaika cilongwe canu a Jehova akubikkila maano kumakkompyuta amincini. Ba Jon, mukubusi Munakristo ibajisi myaka iitandila ku 30 bakaamba kuti: “Ndilizyi kuti Bbaibbele lyaamba kuti tweelede ‘kubelesya kabotu ciindi’ kutegwa tucite zyintu zyakumuuya. Pele caboola kukubelesya makkompyuta ndilijisi penzi lipati.” Ba Jon ziindi zinji bakali kumuka koona akaambo kakubelesya Intaneti.a Bakaamba kuti: “Ikuti ndakatala, cakali kundikatazya kuti ndicileke kuyanzana naa kweebelela tumavidiyo alimwi buya bunji bwatumavidiyo ootu tiitwakali kabotu pe.” Kutegwa bacileke ciyanza eeci, ba Jon bakasetiŋa kkompyuta yabo kutegwa kailizima ilikke ikuti ciindi cakoona cakkwana.—Amubale Baefeso 5:15, 16.

5, 6. (a) Mukuli nzi bazyali ngobajisi caboola kumakani aajatikizya bana babo? (b) Ncinzi bazyali ncobakonzya kucita kutegwa bagwasye bana babo kujana balongwe bali kabotu?

⁵ Nobazyali, tamweelede kunoobasalila lyoonse zyakucita bana banu, pele mweelede kubagwasya caboola kukubelesya kkompyuta. Tamweelede kubalekelezya kuzyintu zijanika aa Intaneti izitondezya kutalilemeka, zisobano zyankondo, mizimo, alimwi abalongwe babi kutegwa bacileke kumucubila. Ikuti mwacita oobo, bayakutalika kuyeeya kuti, ‘Mbwaanga baama abataata tababikkili maano, nkokuti cili buyo kabotu.’ Mbomuli bazyali, mulimo wanu kukwabilila bana banu—kubikkilizya abakubusi—kuzyintu zili zyoonse izikonzya kubaandaanya a Jehova. Nobaba banyama balabakwabilila bana babo kuntenda. Mucikozyanyo, amuyeeye cibbeya cizyazi mbocikonzya kucita ikuti muntu umwi wasola kunyonganya twana twaco.—Amweezyanisye a Hosiya 13:8.

⁶ Amubagwasye bana banu kujana zilongwe zibotu a Banakristonyina, bacili bana-bana abapati. Alimwi kamuyeeya kuti bana banu bayanda kuti nywebo kamujana ciindi cakuba ambabo. Aboobo, antoomwe kamujana ciindi cakuseka, cakusobana, cakubeleka, alimwi ‘acakuswena kuli Leza.’b

BUPONI

7. Nkaambo nzi toonse ncotuyanda kupona kabotu?

⁷ “Ino mulimvwide buti?” Akaambo kakuti bazyali besu bakusaanguna bakazumizya Saatani kuti abaandaanye a Jehova, toonse tulaciswa. Kuciswa kuzuzikizya makanze aa Saatani, nkaambo kuti twaciswa, nciyumu kumubelekela Jehova. Alimwi kuti twafwa, tatukonzyi kumubelekela Jehova. (Int. 115:17) Aboobo, lyoonse tuyanda kucita kufwumbwa ncotukonzya kutegwa katupona kabotu.c Alimwi tweelede kubikkila maano kujatikizya buponi bwabakwesu.

8, 9. (a) Mbuti mbotukonzya kutantamuka kuciindizya mumakani aabuponi? (b) Nimpindu nzi ziliko mukuyandaula lukkomano?

⁸ Nokuba boobo, takuyandiki kuciindizya. Bamwi balabikkila kapati maano kuzyakulya zimwi, busilisi naa zyintu zimwi—kwiinda makani mabotu aa Bwami bwa Leza. Balakonzya kusyoma kuti balimukugwasya bamwi. Nokuba boobo, tatweelede kusambala naa kwaambilizya misamu naa zyintu zimwi zijatikizyidwe, miswaangano kaitanatalika naa ciindi noyamana ku Ŋanda ya Bwami naa kumuswaangano waalubazu, wabbazu, naa wacooko. Nkaambo nzi?

⁹ Tulaswaangana antoomwe kubandika makani aakumuuya akuyungizya lukkomano lwesu, imucelo wamuuya uusalala wa Leza. (Gal. 5:22) Kuziindi zili boobo, kulailila bamwi makani aabuponi kumiswaangano nokuba kuti batulomba naa tiibatulomba, kulakonzya kutunyonganya kumakanze eesu aakumuuya alimwi inga kwapa kuti bamwi babule lukkomano. (Lom. 14:17) Muntu mbwaalanganya makani aabuponi weelede kulisalila. Kuyungizya waawo, kunyina uujisi musamu uukonzya kuponya malwazi oonse. Nobaba bamadokota bacibwene balacembaala akuciswa, mpoonya balafwa. Alimwi kuciindizya kulibilika akaambo kabuponi bwesu takukonzyi kupa kuti tupone kwaciindi cilamfwu. (Lk. 12:25) Kulubazu lumwi, “moyo uukondwa musamu mubotu.”—Tus. 17:22.

10. (a) Mbube nzi Jehova mbwabona kuti mbubotu? (b) Mbuti mbotukonzya kukkomana abuponi bubotu?

¹⁰ Mbubwenya buyo, cili kabotu kubikkila maano mbotuboneka. Pele tatweelede kuciindizya mukusoleka kugwisya zitondezyo zyoonse zyakucembaala. Zitondezyo eezyo inga bwaba bumboni bwakusima, bulemu alimwi abubotu bwamukati. Mucikozyanyo, Bbaibbele lyaamba kuti: “Mutwe uuli amvwi munsini wabulemu, Ulajanwa munzila yabululami.” (Tus. 16:31) Mbombubo Jehova mbwatubona, alimwi tweelede kusoleka kulibona mbwatubona. (Amubale 1 Petulo 3:3, 4.) Aboobo, sena ncamaano kulibikka muntenda kwiinda mukuunka kucibbadela akwaandulwa naa kubelesya mafwuta naa misamu kutegwa katuboneka kabotu? “Lukondo lwa-Jehova” mbobubotu bwakasimpe ibumweka kuzwa mukati, taciko makani amyaka muntu njajisi naa buponi. (Neh. 8:10) Muunyika mpya buyo mulikke motuyakuba abuponi bubotu alimwi akuboneka kabotu mbuli mwana. (Job. 33:25; Is. 33:24) Notulindila ciindi eeco, kutondezya busongo bugwasya alimwi alusyomo ciyakutugwasya kukakatila kuli Jehova kumwi katububelesya kabotu bukkale mbotujisi lino.—1 Ti. 4:8.

MALI

11. Mbuti mali mbwaakonzya kuba kakole?

¹¹ Mali taali mabi pe, alimwi tacilubide kucita makwebo cakusyomeka. (Muk. 7:12; Lk. 19:12, 13) Nokuba boobo, kuba amakanze “[aa]kuyandisya mali” kulakonzya kutwaandaanya a Jehova. (1 Ti. 6:9, 10) “Kulibilika kwamubweende bwazyintu oobu,” kulibilika kapati kujatikizya kujana zyintu ziyandika zyamubuumi, kulakonzya kutusyaanikizya kumuuya. Mbubwenya buyo, akwalo “kweena kwabuvwubi” kulakonzya kupa kuti muntu asyome kuti buvwubi bulakonzya kuleta lukkomano lutamani abukwabilizi. (Mt. 13:22) Jesu wakacisalazya kuti “taakwe” uukonzya kuzwidilila kubelekela Leza alimwi alubono.—Mt. 6:24.

12. Ntukole nzi tujatikizya mali ituliko mazuba aano, alimwi mbuti mbotukonzya kututantamuka?

¹² Kwaalanga munzila iitali kabotu mali kulakonzya kusololela kumicito mibyaabi. (Tus. 28:20) Zisyomezyo zyakuvwuba cakufwambaana alimwi munzila nguba-uba zyapa kuti bamwi cakusisikizya batalike kuuma njuka. Bamwi bakwesu balacita makwebo alo aakonzya kubapa kujana mali cakufwambaana, alimwi balakulwaizya abamwi mumbungano kuti balakonzya kujana mali manji. Bamwi bakweleta mali aakutalisya makwebo akusyomezya kuti bayakupilusya cinyona mucila. Tamweelede kulekela bulyato kuti bumupe kubbidwa. Amubelesye maano. Cisyomezyo inga kaciboneka kuba camasimpe.

13. Ino mbwaabona mali Jehova kwiindene buti anyika mboyaabona?

¹³ Ciindi notusaanguna kuyandaula “Bwami abululami bwakwe,” Jehova ulakulongezya kusoleka kwesu kuti tujane ziyandika mubuumi. (Mt. 6:33; Ef. 4:28) Tayandi kuti katuuzyila ciindi camiswaangano akaambo kakubeleka kapati naa kukkala mu Ŋanda ya Bwami katulibilika kujatikizya mali. Pele banji munyika basyoma kuti kubeleka canguzu kujana mali kulakonzya kubapa kuti bakakkale kabotu kumbele. Bakulwaizya bana babo kuba ambaakani zyakuba alubono. Jesu wakatondezya kuti kuyeeya kuli boobo nkutayeeya kabotu. (Amubale Luka 12:15-21.) Muzeezo uuli boobo utuyeezya Gehazi, walo iwakali kuyeeya kuti ulakonzya kucita zyintu cabulyato kumwi kazumanana kuba acilongwe a Jehova.—2 Bam. 5:20-27.

14, 15. Nkaambo nzi ncotuteelede kulangila lukwabililo kuzwa kubweende bwamali? Amupe cikozyanyo.

¹⁴ Kuluulwa kuti, basikwaze bamwi bafwida mumeenda akaambo kakusoleka kunyamuna nswi mpati njobatakonzyi kunyamuna kuzwa mumeenda. Sena cintu cikozyenye aceeco cilakonzya kucitika ku Munakristo? Mwaalu umwi uujisi zyina lyakuti Alex wakaamba kuti: “Ndilabikkila kapati maano mbondibelesya mali aangu. Kuti naa shampoo munji wazwa mubbodela ndilaupilusya alimwi.” Nokuba boobo, ba Alex bakacegwa mumakwebo aakujana mali manji kwiinda mukwaayobola kubbanga kabayeeya kuti balaleka mulimo wabo akutalika mulimo wabupainiya. Bakabikkila kapati maano kubweende bwamakwebo aaindene-indene alimwi amalipooti aajatikizya makwebo. Bakakweleta mali kutegwa baule ma stocks manji alo aakali kulangilwa kuti inga abapa mpindu mpati. Muciindi caboobo, muulo wangawo wakapiluka aansi. Ba Alex bakaluula kuti: “Ndakali kulangila kuti mali aangu alapiluka. Ndakali kuyeeya kuti naa ndalindila kwaciindi muulo wama stocks ulakkwela alimwi.”

¹⁵ Kwamyezi minji, ba Alex bakali kuyeeya buyo ma stocks. Cakabayumina kubikkila maano kuzyintu zyakumuuya alimwi tiibakali koona. Pele ma stocks taakwe naakakkwela muulo. Ba Alex bakasweekelwa mali aabo oonse mpoonya bakasambala ŋanda yabo. Baamba kuti: “Ndakapa kuti mukwasyi wangu uuse kapati.” Pele bakaiya ciiyo ciyandika. Bakayungizya kuti: “Ndilizyi kuti kufwumbwa muntu uusyoma bweende bwa Saatani uyakutyompwa kapati.” (Tus. 11:28) Masimpe, kusyoma lubono lwesu, naa nzila zyakujanina mali mubweende bwazyintu oobu, ncimwi buyo akusyoma “leza wabweende bwazyintu oobu,” Saatani. (2 Ko. 4:4; 1 Ti. 6:17) Ba Alex bakaubya-ubya buumi bwabo “akaambo kamakani mabotu.” Kucita boobo kwabagwasya amukwasyi wabo kukkomana alimwi akuswena kuli Jehova.—Amubale Maako 10:29, 30.

KULIKANKAIZYA NAA KULISUMPULA

16. Ino kulikankaizya kuli kabotu kwiindene buti akulikankaizya kutali kabotu?

¹⁶ Cili kabotu kulikankaizya muzyintu zili kabotu. Mucikozyanyo, tweelede kulikankaizya akaambo kakuba Bakamboni ba Jehova. (Jer. 9:24) Nkakaambo kaako tulasoleka kusala kabotu alimwi akupona kweelana azyeelelo zya Leza. Pele tatweelede kulikankaizya cakunga twatalika kuyeeya kuti tulamwiinda Jehova, nkaambo kucita boobo kulakonzya kutwaandaanya anguwe.—Int. 138:6; Lom. 12:3.

17, 18. (a) Amupe zikozyanyo zyamu Bbaibbele zyabantu bakali kulicesya alimwi abaabo bakali kulisumpula. (b) Ncinzi mukwesu umwi ncaakacita kutegwa kulisumpula kutamwaandaanyi a Jehova?

¹⁷ Mu Bbaibbele mulajanika zikozyanyo zyabantu bakali kulisumpula alimwi abaabo bakali kulicesya. Mwami Davida cakulicesya wakalangila kubusolozi bwa Jehova, alimwi Jehova wakamulongezya. (Int. 131:1-3) Pele Jehova wakasubula Mwami Nebukadinezara alimwi a Belisazara akaambo kakulisumpula. (Dan. 4:30-37; 5:22-30) Mbubwenya buyo, aano mazuba tulakonzya kulijana mubukkale bukonzya kutusunka mumakani aakulicesya. Ba Ryan, mbakutausi bajisi myaka yakuzyalwa iili 32, ibakalongela kumbungano iimbi. Baamba kuti: “Ndakali kuyeeya kuti ndilasalwa kuba mwaalu kakutanainda ciindi, pele kwakainda mwaka kacitanacitika eeco.” Sena ba Ryan bakalisumpula akubanyemena baalu akaambo kakuti taakwe nobakasalwa kuba mwaalu? Sena bakaleka kujanika kumiswaangano, akulekela kulisumpula kubaandaanya a Jehova alimwi ambungano? Kuti nomwakali ndinywe, ino nomwakacita buti?

¹⁸ Ba Ryan bakaamba kuti: “Ndakabala makani aaliwoonse ngondakali kukonzya kujana mumabbuku eesu aajatikizya bulangizi busumpizyigwa.” (Tus. 13:12) Baamba kuti: “Ndakabona kuti ndeelede kwiiya kukkazyika moyo alimwi akulicesya. Ndakeelede kulekela Jehova kuti andiyiisye.” Ba Ryan bakaleka kulibikkila kapati maano lwabo beni akutalika kubikkila maano kukugwasya bamwi mumbungano alimwi amumulimo wamumuunda. Kwakainda buyo ciindi cisyoonto bakatalika kweendelezya ziiyo zya Bbaibbele zili mbozibede. Baamba kuti: “Ciindi nindakasalwa kuba mwaalu kakwiindide mwaka acisela, taakwe nondakali kuyeeyela. Cakalilekede kundilibilisya nkaambo mulimo wamumuunda wakali kundikkomanisya kapati.”—Amubale Intembauzyo 37:3, 4.

AMUKAKATILE KULI JEHOVA

19, 20. (a) Ncinzi ncotukonzya kucita kutegwa zyintu nzyotucita abuzuba zitatwaandaanyi a Jehova? (b) Nzikozyanyo nzi zyabantu bakakakatila kuli Jehova nzyotukonzya kwiiya?

¹⁹ Makani woonse aabandikwa mucibalo eeci alimwi acibalo cainda alagwasya. Tulalikankaizya akaambo kakuba babelesi ba Jehova. Jehova watupa cipego cabuumi buli kabotu alimwi alukkomano lwamumukwasyi. Tulizyi kuti mulimo wakumubili alimwi amali alakonzya kutugwasya kujana ziyandika. Tulizyi kuti kulikondelezya kulakonzya kutukatalusya alimwi makkompyuta amincini imwi ilakonzya kutugwasya. Pele kucita zyintu eezyi aciindi citeelede, kuciindizya naa kuzicita munzila iinyonganya bukombi bwesu kulakonzya kutwaandaanya a Jehova.

²⁰ Cakutadooneka, Saatani uyanda kuti cimucitikile eeco. Nokuba boobo, mulakonzya kwiitantamuka ntenda iili boobo nywebo alimwi amukwasyi wanu. (Tus. 22:3) Amuswene kuli Jehova alimwi amukakatile kulinguwe. Tulijisi zikozyanyo zinji zyamu Bbaibbele zyabantu bakacita oobo. Enock alimwi a Nowa ‘bakeenda a Leza.’ (Matl. 5:22; 6:9) Musa “wakazumanana kuzyandamana mbuli kuti wakali mubwene Ooyo uutalibonyi.” (Heb. 11:27) Lyoonse Jehova wakali kumugwasyilizya Jesu nkaambo wakali kukkomanisya Bausyi bakujulu. (Joh. 8:29) Amwiiye kuzikozyanyo zili boobu. “Amukondwe lyoonse. Amupaile cakutaleka. Amulumbe kujatikizya zyintu zyoonse.” (1 Te. 5:16-18) Alimwi mutazumizyi cintu cili coonse kumwaandaanya a Jehova.

[Bupanduluzi buyungizidwe]

[Cifwanikiso icili apeeji 18]

Nobazyali amubagwasye bana banu kwaabelesya camaano makkompyuta alimwi amincini iimwi

[Majwi aakwelelezya sikubala aali apeeji 21]

Mutazumizyi cintu cili coonse kumwaandaanya a Jehova

[Cifwanikiso icili apeeji 21]

Muciindi cakuyanda buyo mikuli mumbungano, amukkomane amulimo wanu wamumuunda