Penzi Lyamali Alimwi Azikwelete​—Sena Bbaibbele Lilakonzya Kugwasya?

Bwiinguzi bwamu Bbaibbele

Inzya. Njiisyo eezyi zyamu Bbaibbele zyone zilakonzya kumugwasya kulanganya penzi lyamali alimwi azikwelete.

1. Kamubalila mali. “Makanze aabasungu alaleta zilyo zinji, pele uufwanzya makani ulajana bucete buyo.” (Tusimpi 21:5) Mutafwambaani kuula cintu akaambo buyo kakuti muulo wajolwa aansi. Amubalile mali​—amulembelelimwi zyintu nzyomuyanda kuula—​akubona kuti mwautobela mulongo ngomwalemba.

2. Mutanoobwezi zikwelete zitayandiki. “Sizikoloto ngumuzike wasikukolotya.” (Tusimpi 22:7) Ikuti kamujisi zikwelete alimwi mwaalilwa kubbadela, amubandike asikumukweletesya kutegwa mumvwane anguwe akubona mbomukonzya kubbadela. Amumukombelezye. Amutondezye muuya uuli mbuli wamuntu uulembedwe mulugwalo lwa Tusimpi 6:1-5: “Koya, ukalibombye, ukalikombelezye kumweenzinyoko. Utazumizyi meso aako koona, ankoye zyako zitavululati.” Nokuba kuti kulomba kwanu kwakusaanguna tiikwazwidilila, amuzumanane kulomba.

3. Amwaabone munzila yeelede mali. “Syacivulamwangu ulafwamba kujana imbono, pele tezi kuti kubula kulamusikila.” (Tusimpi 28:22) Kunyomenena abulyato tazipi buyo bucete, pele alimwi zilanyonganya kumuuya.

4. Amukkutile. “Twanoojisi cakulya azyakulivwumba, tunookkutila azyintu eezyi.” (1 Timoteyo 6:8) Mali taakonzyi kuula lukkomano naa kutupa kukkutila. Bantu bamwi bakkomene kapati munyika tabajisi mali manji. Ncobajisi nduyando lwamumukwasyi alwabalongwe, alimwi acilongwe a Leza.​—Tusimpi 15:17; 1 Petulo 5:6, 7.