Ino Bazyali Inga Babayiisya Buti Banu Babo Makani Aajatikizya Koonana?

Bwiinguzi bwamu Bbaibbele

Ino mbaani beelede kuyiisya bana makani aajatikizya koonana? Ibbaibbele lyaamba kuti bazyali mbabajisi mukuli ooyu, alimwi bazyali banji bajana kuti ilabagwasya mizeezo iitobela:

• Mutanoofwi nsoni. Ibbaibbele taliindi mumbali kwaamba makani aajatikizya koonana alimwi azinswe, alimwi Leza wakaambila cisi cabana Israyeli kuti “bana” beelede kuyiisyigwa makani aaya. (Deuteronomo 31:12; Levitiko 15:2, 16-19) Mulakonzya kubelesya majwi aabulemu aatapi muzeezo wakuti koonana naa zinswe zyintu zyuusisya nsoni.

• Amuzumanane kubayiisya. Muciindi cakuba amubandi omwe buyo mulamfwu uujatikizya makani aakoonana ciindi mwanaanu nayanda kukubuka, mweelede kumwaambila asyoonto-syoonto twaambo twakonzya kumvwa.​—1 Bakolinto 13:11.

• Amubayiisye zyeelelo zyakulilemeka. Kucikolo, bana balakonzya kuyiisyigwa twaambo tumwi tujatikizya makani aakoonana. Nokuba boobo, Bbaibbele likulwaizya bazyali kuyiisya bana babo kutali buyo makani aajatikizya mboupangidwe mubili wabo, pele alimwi ambobeelede kwaabona munzila iiluzi makani aajatikizya koonana.​—Tusimpi 5:1-23.

• Amumuswiilile mwanaanu. Mutanoonyemi naa kufwambaana kumuyeeyela bumbi mwanaanu ikuti naa wabuzya mubuzyo uujatikizya koonana. Muciindi caboobo, mweelede “kufwambaana kuswiilila, kumuka kwaambaula.”​—Jakobo 1:19.

Mbomukonzya kukwabilila mwanaanu kubantu bajata bana

• Amuliyiisye nobeni. Amuzyibe mbobacita basikujata bana.​—Tusimpi 18:15; amubone cibalo 32 mubbuku lyakuti Questions Young People Ask​—Answers That Work, Volume 1.

• Amuzyibe zicitika mubuumi bwamwanaanu. Mutapi buyo muntu uumbi kuti kamulanganya kakunyina kumuzyiba muntu ooyo naa ulasyomeka, alimwi ‘mutanoomulekelezyi buyo’ mwanaanu.​—Tusimpi 29:15.

• Amumuyiisye kuba abupampu mumakani aakumvwida. Bana beelede kumvwida bazyali babo. (Bakolose 3:20) Pele, ikuti mwamuyiisya mwanaanu kuti lyoonse weelede kumvwida muntu mupati uuli woonse, mulakonzya kumubikka muntenda. Bazyali Banakristo balakonzya kwaambila mwanaabo kuti, “Ikuti muntu umwi wakwaambila kucita cintu cimwi Leza ncaamba kuti taciluzi, toelede kucicita.”​—Milimo 5:29.

• Amucite zitondezyo zitondezya nzila zyuuba-uba zyakulikwabilila. Amumugwasye mwanaanu kuzyiba ncakonzya kucita ikuti umwi muntu wasola kumujata ciindi nomutako. Kucita zitondezyo zifwaafwi kulakonzya kupa mwanaanu kwaamba cakusinizya kuti: “Ndileke! Ndilakwaamba!” alimwi akuccija cakufwambaana. Inga mwayandika kunoomuyiisya mwanaanu cakwiinduluka-induluka, kutegwa atalubi.​—Deuteronomo 6:7.