Kamubandika zya Jehova Mazuba Oonse
1 Ibantu balayanda kubandika cintu ncobayandisya kapati mumoyo, nkaambo mulomo waamba zintu zili mumoyo. (Lk. 6:45b) Ncintu nzi ncotuyandisya kapati? Sintembauzyo wakalemba kuti: “Lino lulimi lwangu lunooamba bululami bwako, lunookutembaula buzuba boonse.” (Int. 35:28) Wakali kumuyanda kapati Jehova, aboobo cakamubeda coolwe cipati kubandika makani aa Leza akumutembaula lyoonse. Mbwaanga bakali kumvwana kapati a Jehova, nzinji zintu sintembauzyo nzyaakali kunga wakkomanina. (Int. 35:9) Mbuti mbotunga twatobela cikozyanyo cakwe cibotu?
2 Amubandike zya Jehova Muŋanda Yanu: Misalo yanu mumukwasyi yabuzuba abuzuba yeelede kaijatikizya Jehova. Ibazyali bamuyandisya Jehova banoobandika zyanguwe mumilimo yabo yoonse. (Dt. 6:5-7) Banoocita boobo, ibana balabona kuti bawisi abanyina balalutobela lusyomo lwabo alimwi balauyandisya mulawo wa Leza. Aboobo ciiyo ca Bbaibbele camukwasyi bana balacibona kuti ncitondezyo cini-cini cakuti bazyali babo bapona bukkale bwabunaleza.—2 Pet. 3:11.
3 Amubandike zya Jehova Abakwesu: Notuli kumiswaangano yansondo ansondo, tulakonzya kusanina mizeezo alimwi amyoyo yesu cakulya cakumuuya. Tatubuli zintu zyakubandika. (Lk. 6:45a) Sena kuli kaambo kakamunjila nomwakali kubala cibalo cimwi naa cibalo ca Bbaibbele cansondo ansondo? Amukabandike abanyoko, mubagwasye kuyaambele muluyando lwabo lwa Jehova.—Int. 35:18; Heb. 10:24.
4 Amubandike zya Jehova Kubeenzinyoko: Notuyanzana abantu buzuba abuzuba—kumilimo, kucikolo, alimwi notuli abanamukwasyi ibatasyomi—tweelede katulibonya kuti tubikkila kapati maanu kukupa bukamboni kumakani aa Jehova. Iŋambilo yesu itabi mbuli yakunyika iisesemya, aibe yakusumpula Leza. Lyoonse katukananina bantu makani mabotu ngaakatutuma kukambauka.—Inc. 5:42; Kol. 4:6.
5 Mbotuli bakombi ba Jehova ibakasimpe, katujana ciindi buzuba abuzuba cakukanana zya Leza wesu Jehova uutakwe bweezyanisye.—Int. 106:47.