Toonse Tulayandika Kutegwa Mulimo Uyaambele
1 Sikwiiya wa Jesu Kristo woonse weelede kuzyiba kuti kusoleka nkwasoleka kugwasilizya akutola lubazu mumulimo wakukambauka Bwami kulayandika kapati. Jesu wakalizyi kuti basikwiiya bakwe bakali kuyootebula micelo ya Bwami mumyeelwe iisiyene-siyene. (Mt. 13:23) Nokuba kuti imulimo mupati wakukambauka uli mukucitwa abapainiya banji babeleka canguzu, boonse cabusungu ibazumanana kutembaula Leza kwiinda mukutebula micelo mpobagolela beelede kulumbaizyigwa.—Joh. 15:8.
2 Ikubelekelaamwi Kugwasya Kuti Mulimo Mupati Ucitwe: Jesu wakasinsima kuti ikubelekelaamwi kwabasikwiiya bakwe boonse kwakali kuyoopa kuti bacite milimo iyiinda aali njaakacita walo. (Joh. 14:12) Naa bukkale bwesu tabutuzumizyi kucita mulimo mupati naa bulatuzumizya kucita boobo kwaciindi cilamfwu mumulimo wakukambauka Bwami, toonse tulayandika kutegwa mulimo uye ambele. Cili mbubwena Paulo mbwaakaamba kuti: “Mubili woonse mbuulungene akujatana mungo zyoonse nzyuubambilidwe, kubeleka kweelede kwacizo cimwi acimwi kulagwasya mubili kuti ukule.”—Ef. 4:16.
3 Bamwi balakonzya kulimvwa kuti mulimo wabo ngobacita musyoonto kapati. Pele, kuli Jehova icintu cipati ncakuti mulimo wesu weelede kucitwa camoyo woonse. Kufwumbwa ncotumucitila ncintu cipati alimwi cilalumbwa.—Amweezyanisye Luka 21:1-4.
4 Amuzumanane Kuugwasilizya Mulimo: Toonse tulaa coolwe cakusanga munzila yakumubili kumulimo wanyika yoonse mbwiizulwa. Bamwi alimwi balakonzya kugwasya kwiinda mukubeleka milimo iiyandika kugwasilizya mulimo wa Bwami. Umwi aumwi ulakonzya kukanza kwiingula kabotu kumibuzyo iibuzyigwa lyamiswaangano alimwi akutola lubazu mu Cikolo Camulimo Wateokrasi. Kwiinda mukusola kukulwaizya bamwi kufwumbwa nokwajanika ciindi, tulatola lubazu lupati mukucitya kuti mbungano iyaambele munzila yakumuuya, alimwi eci cicitya kuti iyaambele mukumanizya mulimo ngoyakapegwa.
5 Toonse tulayandika kutegwa mulimo uyaambele. Kwiina weelede kulimvwa kuti tayandiki mukucita boobo. Ikubelekelaamwi kwesu muzintu zipati alimwi azisyoonto, mukubelekela Jehova kulatwaandaanya akutuzyibya kuti ndiswe tolikke notukomba Leza cakasimpe. (Malk. 3:18) Umwi aumwi wandiswe ulakonzya kubaa lubazu lubotu mukulemeka Jehova alimwi amukugwasya bamwi kumuzyiba akumubelekela.