CIBALO 8
Amukwabilile Mukwasyi Wanu Kuzintu Zinga Zyaunyonyoona
1-3. (a) Ino zintu zilangilwa kunyonyoona mukwasyi zizwa kuli? (b) Ninzila nzi njobayandika kutobela bazyali kutegwa bakwabilile mukwasyi wabo?
MUYANDA kuti mwana wanu aunke kucikolo, pele mvula ilawa kapati aanze. Ino mulacita buti? Sena mulamulekela kuti azwe buyo kayabuya katasamide acikkoti cakumukwabilila? Naa mulamuvwumpaika zisani zinji zyakumukwabilila cakuti waakwaalilwa buya akweenda? Aino tamukoocita cintu cili mbuli zeezi pe. Mulamusamika buyo zisani ziyandika kuti atateti.
2 Abalo bazyali mbweena, beelede kujana nzila yeelede yakukwabilila mukwasyi wabo kumvwula yazintu zikonzya kubanyonyoona kuzwa—kumilimo yazisobano, kuŋanda yasikapepele, kubeenzinyina, alimwi cimwi ciindi akuzikolo. Bamwi bazyali basola buyo aniini kukwabilila bana naa kutasolela limwi. Bamwi akaambo kakuyeeya kuti zyoonse zintu zyanyika nzibi, balasinkilila cakuti bana inga balimvwa kufwundilizigwa. Sena nzila yeelede ilakonzya kujanika?
3 Ee inga yajanika. Kwiindilizya takugwasyi pe, alimwi kulakonzya kuleta mapenzi. (Mukambausi 7:16, 17) Ino bazyali Banakristo inga baijana buti nzila iluzi yakukwabilila bana? Amulange zintu zyotatwe: lwiiyo, kuyanzana, alimwi akusobana.
NGUNI UUTIYIISYE BANA BANU?
4. Ino bazyali Banakristo beelede kululanga buti lwiiyo?
4 Bazyali Banakristo balalulemeka kapati lwiiyo. Balizi kuti lwiiyo lugwasya bana kuziba kubala, kulemba, alimwi akuziba kubandika kubikkilizya akumana mapenzi. Alimwi lweelede kubayiisya mbokuyiigwa. Izintu nzyobayiya bana mucikolo zilakonzya kubagwasya kuzwidilila nokuba kuti zintu zyayuma munyika sunu. Kunze lyaboobo lwiiyo lubotu inga lwabagwasya kucita mulimo uusumpukide.—Tusimpi 22:29.
5, 6. Muunzila nzi bana kucikolo njobanga baiya zintu zitondwa kumakani aakoonana?
5 Nokuba boobo cikolo cipa kuti bana baswaangane abana bambi—banji ibalaa mizeezo iinyongene. Mucikozyanyo amuyeeye mizeezo njobajisi kumakani aabukkale alimwi akoonana. Kucikolo cakusekondali ku Nigeria, kuli musimbi mwaamu wakali kulaya basicikolonyina kumakani aazyakoonana. Bakali kuyanda kapati kumuswiilila nokuba kuti mizeezo yakwe yalikujatikizya malabali ngaakali kubala mumabbuku aabwaamu. Bamwi basimbi bakasola kutobela lulayo lwakwe. Aboobo umwi musimbi wakamita katana kwatwa alimwi wakafwa naakali kusola kugwisya da.
6 Cuusisya nsoni kubona kuti luzibo olu lunji lutondwa ilujanwa kucikolo, taluzwi kubana pe, pele kulibamayi. Bazyali banji balagambwa kubona kuti zikolo ziyiisya bana makani aakoonana kakunyina akubayiisya bukkale bweelede alimwi amikuli iiboola. Mboobu mbubakaamba banyina musimbi wamyaka 12 yakuzyalwa: “Tukkala mumunzi wabulemu alimwi uukomba, pele mweena mucikolo cesu cipati, bapa bana makkondomu!” Mukaintu oyu amulumaakwe bakatalika kulibilika nobakamvwa kuti mwana wabo musimbi basankwa baciimo cakwe bakali kumwaambauzya zyakoonana. Ino mbuti bazyali mbobanga bakwabilila mukwasyi wabo kuzintu ezi zitaluzi?
7. Ino inga mwalulwana munzila nzi iigwasya kapati luzibo lutondwa lujatikizya koonana?
7 Sena cilainda kugwasya ikusinkila mwana kuti atabi namvwa kufwumbwa makani aakoonana? Peepe. Cintu cinga cagwasya nkubayiisya nywebo lwenu bana banu makani aajatikizya zyakoonana. (Tusimpi 5:1) Masimpe, mumasena manji aaku Europe aku North America, bazyali banji balakaka kubandika makani aya. Amwalo muzisi zyamu Africa bazyali kanjikanji tababandiki abana babo makani aajatikizya koonana. “Tauli mulawo kubantu bamu Africa kucita boobo,” mbwaakaamba umwi wisi bana waku Sierra Leone. Bamwi bazyali bayeeya kuti kuyiisya bana makani aakoonana nkubapa mizeezo iitibape kucita cintu citondwa! Pele, ino walo Leza waalanga buti makani aya?
LEZA MBWAALANGA MAKANI AAKOONANA
8, 9. Ino Bbaibbele lijisi luzibo nzi lubotu kumakani aakoonana?
8 Ibbaibbele lilatondezya kabotu-kabotu kuti tacitondwi kubandika makani aakoonana munzila yeelede. Mu Israyeli, bantu ba Leza bakaambilwa kuti babungane antoomwe, kubikkilizya “abana,” kutegwa baswiilile Mulawo wa Musa nowakali kubalwa cakupozya. (Deuteronomo 31:10-12 Joshua 8:35) Mulawo oyu wakali kwaamba cakutasisa zintu zinji izijatikizya koonana, kuya kumwezi, kusuba kwabwaalumi, bwaamu, bumambe, koonana kwabaalumi balikke-likke, koonana kwamubusazinyina alimwi akoonana kwamuntu amunyama. (Levitiko 15:16, 19; 18:6, 22, 23; Deuteronomo 22:22) Cakutadooneka bazyali bakalijisi zinji zyakupandulula kubana babo bakali kunga babuzya ciindi nozyamana kubalwa zyoonse ezyo.
9 Kuli tupango muzyaandaano zya Tusimpi mbuli casanu, cacisambomwi alimwi acaciloba itupa lulayo lwaluyando lwabuzyali kumakani aabubi bwabwaamu. Tupango otu tutondezya kuti bwaamu bulakonzya koongelezya zimwi ziindi. (Tusimpi 5:3; 6:24, 25; 7:14-21) Pele tuyiisya kuti bwaamu mbubi alimwi buleta mapenzi alimwi tulapa malailile kugwasya bana kuti batantamuke nzila ezi. (Tusimpi 5:1-14, 21-23; 6:27-35; 7:22-27) Kunze lyaboobo bwaamu bulaandaanizigwa alukkomano luboolaa koonana kuluzi kwamulukwatano. (Tusimpi 5:15-20) Cabota cikozyanyo eci cakuyiisya, bazyali ncobeelede kutobela!
10. Nkaambo nzi kuyiisya bana luzibo lwa Leza lujatikizya makani aakoonana ncokutakonzyi kubapa kucita cintu citondwa?
10 Sena kuyiisya kuliboobu kulapa kuti bana bacite zitondwa? Peepe, Bbaibbele lyaamba kuti: “Baluleme balavunwa kuluzibo lwabo.” (Tusimpi 11:9) Sena tamuyandi kuvwuna bana banu kumuuya wanyika eyi? Umwi wisi bana wakati: “Kuzwa ciindi bana nobakacili baniini, twasola kutasisa kulimbabo makani aakoonana. Munzila eyo tababikkili maanu ciindi nobamvwa bana bamwi kabakanana zyakoonana. Taakwe maseseke mapati pe.”
11. Muunzila nzi bana njobanga bayiisigwa buce-buce makani aajatikizya koonana?
11 Mbweena mbuli mbokwaambwa kale muzibalo zyainda, lwiiyo lujatikizya koonana lweelede kutalisya kufwambaana. Ciindi nomuyiisya bana baniini kwaamba mazinaa zizyo zyamubili, mutazisotoki zinswe mbuli kuti zilatondwa. Amubayiisye mazina eni-eni aazintu ezi. Mukwiinda kwaciindi inga kwayandika kubayiisya kuti tazyeelede kusiya atuba alimwi mubaambile ceelede kucitwa aciteelede. Inga cabota kuti boonse bobile bazyali bayiisya bana kuti zizyo ezi zyamubili nzyaalubazu, tazyeelede kujatwa naa kubonwa abamwi, alimwi tazyeelede kubandikwa munzila iitayelede pe. Kuti naa bana bakomena-komena, beelede kwaambilwa mbuli mbobaswaangana, mukaintu amwaalumi kutegwa bazyale mwana. Mibili yabo noiyanda kutalika kukubuka, beelede kabazi kale zintu zilangilwa kucitika. Mbuli mbokwakabandikwa Mucibalo 5, olu lwiiyo lulakonzya alimwi kukwabilila bana kulibaabo boona bana.—Tusimpi 2:10-14.
KULIBAMBILA KWABAZYALI
12. Mizeezo nzi iinyongene iiyisigwa muzikolo kanjikanji?
12 Bazyali beelede kabalibambilide kulwana mizeezo imbi yakubeja iilangilwa kuyiisigwa kucikolo—busongo bwanyika mbuli lwiiyo lwakusanduka kwazintu, muuya wakusumpula cisi, naa muzeezo wakuti taakwe masimpe eni-eni. (1 Ba-Korinto 3:19; Amukozyanisye a Matalikilo 1:27; Levitiko 26:1; Johane 4:24; 17:17.) Bamayi banji ibasyomeka balaindilizya kulemeka lwiiyo lwaambele. Nokuba kuti lwiiyo lwaambele ncintu muntu ncanga walisalila mwini, bamwi bamayi basyoma kuti njenzila ilikke muntu njakonzya kuzwidilila.a—Intembauzyo 146:3-6.
13. Ino bana baunka kucikolo inga bakwabililwa buti kumizeezo italuzi?
13 Kutegwa bazyali bakonzye kulwana njiisyo zyakubeja naa zinyongene, beelede bazibe nzyobayiya bana. Aboobo nobazyali kamuyeeya kuti mweelede kulibambila anywebo! Amutondezye kuti mulabikkila maanu mulwiiyo lwabana banu. Amubandike ambabo ciindi nobazwa kucikolo. Amubabuzye zintu nzyobalimukwiiya, zintu nzyobayanda kapati, azintu zibakatazya kapati. Amulange milimo njobapegwa kuti bakacite kuŋanda, nzyobalemba, alimwi nzyobajana mumisunko. Amusole kuziba bamayi babo. Amubazibye bamayi kuti mulikkomene amulimo wabo alimwi mulayanda kubagwasya munzila ili yoonse njomunga mwakonzya.
BALONGWE BABANA BANU
14. Ino nkaambo nzi bana banaleza ncobayandika kapati kusala balongwe babotu?
14 “Maawe! wakaziiya kuli zintu ezyo?” Mbangaye bazyali babuzya mubuzyo oyo, akaambo kakuti cabayoosya ncobamvwa naa ncaacita mwanaabo ncobatali kuyeeyela? Kanjikanji sena bana tabainguli kuti mweenzinyina mupya wakabaambila kucikolo naa mweenzinyina simukobonyoko? Ee, balongwe balatujatikizya kapati, netuba bana naa bapati. Mwaapostolo Paulo wakacenjezya kuti: “Mutalyeeni. Mweenda abamineme, anywebo mulaminama.” (1 Ba-Korinto 15:33; Tusimpi 13:20) Ikapati bana balakonzya bayungwa abamiselanyina. Kanjikanji balalidooneka alimwi cimwi ciindi balakonzya kuzundwa amuuya wakuyanda kukkomaninsya beenzinyina. Aboobo ncintu ciyandika kapati kuti basale beenzinyina bali kabotu!
15. Muunzila nzi bazyali njobanga bagwasya bana kusala balongwe?
15 Woonse muzyali ulizi kuti bana kanjikanji cilabaalila kusala kabotu; bayandika kugwasya. Tacaambi kuti mweelede kubasalila beenzinyina. Pele mbobayabukomenena, amubayiisye bupampu alimwi amubagwasye kubona ciimo ciyandika mubalongwe. Ciimo cipati nduyando lwa Jehova alimwi akuyanda kucita ziluleme mumeso aakwe. (Marko 12:28-30) Amubayiisye kubaa luyando alimwi abulemu kubantu basyomeka, basiluse, baabi, babeleka canguzu. Ciindi nomucita ciiyo camukwasyi, amubagwasye kubona ciimo camusyobo oyo mubantu bamu Bbaibbele alimwi akubona bantu bajisi ciimo ncoona eco mumbungano. Amupe citondezyo mukubelesya nzila njoona eyo nomusala beenzinyoko.
16. Mbuti bazyali mbobanga babona naa bana babo basala beenzinyina bali buti?
16 Sena mulibazi balongwe babana banu? Sena inga tamukonzyi kulomba kuti baletwe abana banu kuŋanda kutegwa mubazibe? Mulakonzya alimwi kubuzya kubana banu mbobalangwa beenzinyina abana bambi. Sena bazizilwe kuti balasyomeka naa mbaasikuupaupa ameso? Kuti naa mbaasikuupaupa ameso, amubagwasye bana banu babone kuti kuyanzana abantu baliboobu inga kulabanyonganya. (Intembauzyo 26:4, 5, 9-12) Kuti naa mwabona kuti mwana wanu watalika kubaa tumpenda tubi, mukusama, mukuyeeya, naa mukwaambaula, inga mwayandika kubandika anguwe kumakani aabeenzinyina mbasobana limwi. Mwana wanu ulakonzya usobana aamweenzinyina uuli mukumunyonyoona.—Amukozyanisye a Matalikilo 34:1, 2.
17, 18. kunze lyakucenjezya bana kumakani aakuyanzana aabantu babi, nintaamu nzi bazyali njobanga babweza kubagwasya?
17 Nokuba boobo takuzulili kulikke kuyiisya bana banu kutayanzana abantu babi. Amubagwasye kujana balongwe babotu. Umwi wisi bana wakati: “Coonse ciindi twalikujana nzila imbi. Aboobo ciindi mwana wesu naakali kuyandika kuba munkamu yacikolo iisobana bbola, mebo amukaintu wangu twakakkala aansi anguwe akumwaambila kaambo ncoutali kabotu muzeezo oyo—akaambo kabeenzinyina bapya mbanga wajana. Pele tumane twakaleta muzeezo wakuti tubweze bana bamwi mumbungano tuunke ambabo kucilawo cakusobanina, tukasobane bbola. Elyo zintu zyakeenda kabotu.”
18 Bazyali basongo balabagwasya bana babo kujana balongwe babotu alimwi balacita zisobano zibotu ambabo. Nokuba boobo makani aakusobana alabakatazya bazyali banji.
IZISOBANO ZYAMUSYOBO NZI?
19. Nzikozyanyo nzi zyamu Bbaibbele izitondezya kuti tacili cinyonyoono kumukwasyi kusobana?
19 Sena Bbaibbele lilakasya kusobana? Peepe talikasyi pe! Ibbaibbele lyaamba kuti kuli “ciindi cakuseka . . . aciindi cakuzyana.”b (Mukambausi 3:4) Bantu ba Leza mu Israyeli yansiku bakali kubotelwa kwiimba akuzyana, kusobana zisobano alimwi akulabikana. Jesu Kristo wakainka kupobwe lyamucado alimwi “[aku]pobwe” ndyaakamucitila muŋanda yakwe Matayo Levi. (Luka 5:29; Johane 2:1, 2) Cakutadooneka Jesu taakali muntu uutayandi kusekelela. Kusekelela akusobana citabi cinyonyoono muŋanda yanu!
20. Ino ncinzi bazyali ncobeelede kuyeeya nobayandaula zisobano zyamukwasyi?
20 Jehova ngu “Leza [uukondwa NW].” (1 Timoteo 1:11) Aboobo kukomba Jehova ceelede kuba cintu cikkomanisya kutali cintu cimwi citakkomanisyi mubuumi. (Amukozyanisye a Deuteronomo 16:15) Bana mbantu basotooka-sotooka alimwi bajisi nguzu izikonzya kusungululwa kwiinda mukusobana alimwi akulikondelezya. Izisobano zibotu tazikkomanisyi buyo pe. Ninzila igwasya mwana kwiiya akukomena. Silutwe waŋanda nguuyelede kusanina mukwasyi kubikkilizya akuyandaula zisobano. Nokuba boobo takuyandiki kwiindilizya pe.
21. Nzintu nzi zijanwa muzisobano sunu izyeelede kucenjelela?
21 “[Mu]mazuba aakumamanino” aya aakatazya, inyika izwide bantu “bayandisya misalo yaansi kwiinda Leza” mbweena mbuli mbokwakasinsimwa mu Bbaibbele. (2 Timoteo 3:1-5) Kubantu banji kusobana ncecintu cipati mubuumi bwabo. Kuli zisobano zinji cakuti zilakonzya kwaatya zintu zipati. Kunze lyaboobo muzisobano zinji muli bwaamu, kulwana, kubelesya misamu iikola aimbi micito mibi kapati. (Tusimpi 3:31) Ino ncinzi cikonzya kucitwa kukwabilila bana kuzisobano ezi zinga zyabanyonyoona?
22. Mbuti bazyali mbobanga bayiisya bana kusala kabotu kumakani aazisobano?
22 Bazyali beelede kubikka milawo. Pele kunze lyaboobo beelede kuyiisya bana babo mbobakonzya kubona zisobano zibi alimwi akutaindilizya. Lwiiyo olu lutola ciindi alimwi mmulimo mupati. Amuyeeye cikozyanyo cimwi. Umwi wisi bana bobile basankwa wakabona kuti mwana mupati kanjikanji wakali kuswiilila kucibeela cimwi cipya casikapepele. Aboobo bumwi buzuba naakali kudilaya mootokala wakwe kuya kuncito, wisi wakatyuna kucibeela eco casikapepele. Cimwi ciindi wakali kunga waima akulemba majwi aanyimbo zimwi. Kwiinde ciindi wakakkala aansi abana bakwe akubandika ambabo zintu nzyaakamvwa. Wakabuzya mbuli mbobakali kuyeeya, mboobu mbwaakatalika, “Muyeeya buti?” wakaswiilila cakukkazika moyo nobakali kwiingula. Ucimanaa kubandika ambabo kabelesya Bbaibbele, bana aba basankwa bakazumina kuti taakwe nobayakuswiilila kucibeela eco.
23. Mbuti bazyali mbobanga bakwabilila bana babo kumuuya mubi?
23 Bazyali Banakristo basongo balayanda kuziba nyimbo, zintu zyeebelwa a TV, mavidiyo teepu, mabbuku aazisobano, zisobano zyamavidiyo, alimwi azipekupeku nzyobayanda bana babo. Balayanda kubona zifwanikiso izilaatala, majwi, alimwi aziyumwido, alimwi balabala makani aalembululwa mumapepa, akulanga tubeela-beela twakazubululwa. Banji balagambwa kubona “zisobano” iziletelwa bana sunu. Aabo bayanda kukwabilila bana kuzintu ezi zitasalali balakkala amukwasyi wabo akubandika bubi bwazintu ezi kwiinda mukubelesya Bbaibbele alimwi amabbuku aabandika makani aamu Bbaibbele mbuli Questions Young People Ask—Answers That Work alimwi azibalo zyamumamagazini aa Ngazi Yamulindizi a Galamukani!c Ciindi bazyali nobabikka milawo ini-ini akubona kuti lyoonse yatobelwa munzila ilaamaanu, balazwidilila kanjikanji.—Matayo 5:37; Ba-Filipi 4:5.
24, 25. Nzisobano nzi zibotu mikwasyi njoikonzya kubaa zyalo antoomwe?
24 Aino, kukasya zisobano zinyonyoona taili nkondo ilikke pe. Ibubi bwatazundwa abubotu, bana balajokela munzila italuzi. Mikwasyi minji ya Banakristo ilayeeya ziindi zinji zitabaliki noyakali kusobana antoomwe—bulilu bwamumasenaa kusobanina, kweendeenda, kuyabukkala muzilabba, kusobana zisobano, kuunka kukuswaya basazinyoko naa beenzinyoko. Bamwi bajana kuti kwiide kubala cakupozya antoomwe nomuba muciindi caku lyookezya cilakondelezya kapati. Bamwi bamvwa kabotu kwaana twaano tukondelezya naa tusesya. Bamwi bayiya milimo antoomwe iibakkomanisya kapati, atwaambe mbuli kubeza aimbi milimo, akulizya ziimbyo, kuzekaula, naa kwiiya zintu Leza nzyaakalenga. Bana baiya kuyanda zisobano ezi balakwabililwa kuzisobano zinji zitasalali, alimwi balaiya kuti kusobana tacaambi buyo kwiide kukkala akukondelezegwa. Kutola lubazu cilakkomanisya kwiinda kwiide kweebela.
25 Kubaa kapobwe abeenzinyoko acalo ncintu cikondelezya. Kufwumbwa kuti tupobwe oto tweendelezegwa kabotu, kakutakwe nkamu mpati alimwi katutatoli ciindi cilamfwu, tatukoobakkomanisya buyo bana banu. Tupobwe otu tulakonzya kuyumya luyando mumbungano.—Amukozyanisye a Luka 14:13, 14; Juda 12.
MUKWASYI WANU ULAKONZYA KUZUNDA NYIKA
26. Kumakani aakukwabilila mukwasyi kumuuya utali kabotu, nciimo nzi ciyandika kapati?
26 Cakutadooneka, kutegwa mukwabilile mukwasyi wanu kuzintu zyanyika izinyonyoona, kuyandika kubeleka canguzu. Pele kuli cintu cimwi cipati kapati cinga capa kuti muzwidilile. Eco cintu nduyando! Kuti kakuli luyando lupati akati kabanamukwasyi, ŋanda yanu ulaba munzi walukwabililo alimwi luyando lulakulwaizya kubandika ikukonzya kukwabilila kumuuya wanyika mubi uuyambukila. Kunze kwaboobo ikubaa musyobo umbi waluyando kulayandika kapati—iluyando lwa Jehova. Kuti naa luyando lwamusyobo oyu nkoluli mumukwasyi, bana balalangilwa kukomena aakusula nouba muzeezo wakutakkomanisya Leza kwiinda mukutobela muuya wanyika. Alimwi bazyali bayanda Jehova amoyo wabo woonse balayandaula nzila yakwiiya ciimo cakwe caluyando, cakulanga zintu munzila yeelede. (Ba-Efeso 5:1; Jakobo 3:17) Kuti naa bazyali bacita obo, bana babo tabakooba akaambo kakulanga kukomba Jehova mbuli mulongo buyo wazintu nzyobatazumizigwi kucita naa kubulanga mbuli kuti mbukkale butakkomanisyi, mbobeelede kutija kufwumbwa kwakonzeka. Pele balabona kuti kukomba Leza mbukkale bukkomanisya kapati, bukkale bulikke bujisi mpindu muntu mbwakonzya kujana.
27. Mbuti mukwasyi mbounga wazunda nyika?
27 Mikwasyi iicaala kiikamantene mukubeleka milimo ya Leza munzila yeelede alimwi iikkomanisya, alimwi iisola canguzu amoyo woonse ‘kutaba akabala akampenda’ kuzwa kuzintu zyanyika zisofwaazya, ilamukkomanisya Jehova. (2 Petro 3:14; Tusimpi 27:11) Mikwasyi iiliboobo itobela Jesu Kristo wakakaka kuti asofwaazigwe anzila zyoonse zyakasolwa kumusofwaazya anyika ya Saatani. Kumamanino aabuumi bwakwe bwabuntunsi, Jesu wakali kukonzya kwaamba kuti: “Ndakiizunda nyika.” (Johane 16:33) Mukwasyi wanu awalo auzunde nyika kutegwa mukatangale abuumi butamani!
a Kuti kamuyanda makani aajatikizya lwiiyo lwaambele, amubale broshuwa yakuti Bakamboni Ba Jehova Kumakani Aalwiiyo, iyakamwaigwa aba Watch Tower Bible and Tract Society of Pennsylvania, mapeeji 4-7.
b Ibbala lya Cihebrayo lyaamba “kuseka” lilakonzya kupandulula “kusobana,” “kusesya,” “kusekelela,” naa “kulikkomanisya.”
c Aamwaigwa aba Watchtower Bible and Tract Society of New York, Inc.