“Ikulisamika Buntu Bupya”
1 Ibanakristo balikkomene kuziba kasimpe! Twayiya mbotweelede kupona kutegwa tutatobeli bukkale bwanyika. Akaambo kakuti bantu bamunyika “balipambukide kubuumi bwa-Leza,” “balisizidwe mumiyeeyo yabo.” (Ef. 4:18) Twayiisigwa kusiya miyeeyo yanyika akusamununa buntu bwakale akusama bupya.—Ef. 4:22-24.
2 Ibuntu bwakale bupa kuti bukkale bwamuntu kabuyabubijila limwi kusikila wasofwaala akufwa. Aboobo tulomba baabo batiteelele mulumbe wa Bwami ikusiya bukali, lunyemo, bubi, kutukila, alimwi akukanana zintu zitondwa. Aabo bayanda kukkomanisya Leza beelede kubusamunwida limwi buntu bwakale mbubonya mbuli mbobasamununa cisani cilaa tombe.—Kol. 3:8, 9.
3 Muuya Mupya Wakuyeeya: Ikusama buntu bupya cijatikizya kubaa muuya mupya wakuyeeya. (Ef. 4:23) Mbuti muntu mbwanga wabaa muuya naa ciimo cakuyeeya cipya kutegwa ayendele kulubazu lweelede? Eeci cilacitwa kwiinda mukwiiya lyoonse akusungwaalila Jwi lya Leza akuyeeyesya ncolyaamba. Acita boobo, ulatalika kuyeeya munzila mpya, ulatalika kubona zintu mbwazibona Leza a Kristo. Buumi bwamuntu bulacinca mbwalisamika ciimo ca Kristo cijatikizya luse, kulifwiinsya, kulibombya, ikukkazika moyo alimwi aluyando.—Kol. 3:10, 12-14.
4 Tulalipambula kunyika akaambo kakusama buntu bupya. Ibukkale bwesu bulatwaandaanya. Tukanana kasimpe akukanana zintu zigwasya kuyaka bamwi. Muciindi cakwiindilizya kunyema, ndutiluti, kutuka, maambani alimwi abubi boonse, tubaa ciimo cabunaleza. Tatugoleli buyo aakulekelelana. Zyoonse ezi zilacitwa cakuliyandila kuzwa mumoyo.—Ef. 4:25-32.
5 Mutabi nomubusamununa buntu bupya. Tatukonzyi kumubelekela Jehova kakunyina kusama buntu bupya. Kwiinda mulimbubo amukulwaizye bantu kuboola kukasimpe, amutembaule Jehova Mulengi wabuntu bupya bubotu.—Ef. 4:24.