Lufwutuko Luzwa Kuli Jehova

“Leza watubeda Leza wabuvuni.”—INTEMBAUZYO 68:20.

1, 2. (a) Nkaambo nzi ncotunga twaamba kuti kuli Jehova Nkokuzwa lufwutuko? (b) Mbuti mbomunga mwapandulula Tusimpi 21:31?

JEHOVA Mufwutuli wabantu ibamuyanda. (Isaya 43:11) Mwami wamu Israyeli uulaampuwo kapati Davida eci wakalicizyi kabotu kwiinda muzintu nzyaakalibonena, elyo camoyo woonse wakaimba kuti: “Lufutuko lulazwa kuli-Jehova.” (Intembauzyo 3:8) Musinsimi Jona wakaabelesya majwi aya ngoona mumupailo walusinizyo kali mwida lyanswi mpati.—Jona 2:9.

² Mwanaa Davida, Solomoni awalo wakalizyi kuti kuli Jehova Nkokuzwa lufwutuko, nkaambo wakati: “Ibbiza lilabambilwa buzuba bwankondo, pele Jehova nguupa lufutuko.” (Tusimpi 21:31) Ku Middle East yakaindi, ibasune bakali kukwela jamba, imbongolo zyakali kuyumuna mikuli, bantu bakali kutanta mamyuulu [bana bazyalwa kubbiza ambongolo] alimwi imabbiza akali kubelesyegwa munkondo. Pele, ibana Israyeli kabatanasika ku Nyika Yakasyomezyegwa, Leza wakapa mulawo wakuti mwami wabo wakumbele “teelede kulivuzizya imbizi.” (Deuteronomo 17:16) Imbizi zyamunkondo kwiina nozyakacili kuyandika pe nkaambo Jehova wakali kuyoobafwutula bantu bakwe.

3. Mibuzyo nzi njotweelede kubikkila maanu kapati?

³ Mwami Wakujulu Aanyika Jehova ngu “Leza wabuvuni.” (Intembauzyo 68:20) Elo kalakulwaizya kaka kaambo aka! Pele ino ‘mbuvwuni’ nzi Jehova mbwaacita? Alimwi ino mbaani mbaafwutula?

Jehova Ulabafwutula Baluleme

4. Tuzyi buti kuti Jehova ulabafwutula bantu banaleza?

⁴ Boonse ibapona cakululama kabali babelesi ba Leza balyaabide balakonzya kuumbulizyigwa amajwi aamwaapostolo Petro aakuti: “Jehova ulizi kuvuna bamukomba kumasukusyo, akuyobola bataluleme mulukomo mane kusikila kubuzuba bwalubeta.” Ikusinizya kaambo aka, Petro wakati Leza “takailekede nyika yakalekale, pele wakamubamba Nowa, mukambausi wabululami, abamwi bali musanu mubabili, naakapazya maanzi kulibasikasampusampu boonse baansi.”—2 Petro 2:5, 9.

5. Muuziimo nzi Nowa mwaakabeleka kali “mukambausi wabululami”?

⁵ Amweezeezye kuti muli muciimo cakuciindi ca Nowa. Imadaimona aalisandwide kuba muciimo cabuntu mpaali anyika. Ibana babangelo aaba bazangide bali mukupenzya bantu calunya, alimwi ‘nyika ilizwide luuni.’ (Matalikilo 6:1-12) Nokuba boobo, Nowa tanaayungwa kuleka mulimo wa Jehova. Pele, “m[m]ukambausi wabululami.” Walo abamukwasyi wakwe bayaka bwaato bupati alimwi tabadooneki abuniini kuti bubi bulamanisigwa kabacipona. Lusyomo lwa Nowa lwaisinganya nyika eyo. (Ba-Hebrayo 11:7) Ibukkale bwamazubaano bulakozyanya aboobo bwakuciindi ca Nowa, ibutondezya kuti mazubaano ngakumamanino kwabweende bwazintu obu bubyaabi. (Matayo 24:37-39; 2 Timoteo 3:1-5) Aboobo, mbubwena mbuli Nowa, sena mulasyomeka kamuli bakambausi babululami ibabelekela antoomwe abantu ba Leza nomucilindila lufwutuko luzwa kuli Jehova?

6. Mbuti lugwalo lwa 2 Petro 2:7, 8 mbolutondezya kuti Jehova ulabafwutula baluleme?

⁶ Petro wapa abumbi bumboni bwakuti Jehova ufwutula baluleme. Mwaapostolo waamba kuti: “[Leza] wakamuvuna Lota uululeme, uwakali kukataazigwa akweenda kwabasizibi muzisusi zyabo zibi. Nkaambo oyo muntu uululeme, naakali kukala akati kabo, mazuba oonse wakali kupenga mumoyo wakwe uululeme nkaambo kamilimo yabo mibi njaakali kubona akuswiilila.” (2 Petro 2:7, 8; Matalikilo 19:1-29) Bwaamu bwaba mbobukkale butobelwaa tuulunzuma twabantu mumazubaano aakumamanino. Mbubwena mbuli Loti, sena ‘mulakataazyigwa akweenda kwamuzisusi zibi’ kwabantu banji sunu? Ikuti kakuli boobo alimwi naa mweenda mubululami, mulakonzya kuba akati kabaabo Jehova mbayoofwutula ibweende bwazintu obu bubyaabi bwaakulobesyegwa.

Jehova Ulabafwutula Bantu Bakwe Kubantu Babadyaaminina

7. Mbuti zintu Jehova nzyakacitila bana Israyeli mu Egepita mbozitondezya kuti bantu bakwe ulabafwutula kukudyaamininwa?

⁷ Kufwumbwa kuti bweende bwazintu obu bwakaindi kabuciliko, babelesi ba Jehova banoopenzyegwa akudyaamininwaa basinkondonyina. Pele balakonzya kusyoma kuti Jehova uyoobafwutula, nkaambo kayi wakabafwutula ibantu bakwe ibakadyaaminidwe musyule. Atwaambe kuti, muli bana Israyeli bali mukudyaamininwaa bana Egepita kuciindi ca Musa. (Kulonga 1:1-14; 6:8) Leza wauma bana Egepita azipenzyo zitobelana. (Kulonga 8:5–10:29) Ipenzi pati lyakkumi nolyakajaya bana bakusaanguna kuzyalwa babana Egepita, Farao wazumizya bana Israyeli kupola pele kakutanainda ciindi wabunganya basikalumamba bakwe akubatobela cakufwambaana. Pele kalitanatanta, walo abantu bakwe banyonyoonwa mu Lwizi Lusalala. (Kulonga 14:23-28) Mwaimba a Musa antoomwe abana Israyeli boonse mulwiimbo olu: “Jehova ngusilumamba, Jehova ndizina lyakwe. Inkalaki zya-Farao ampi yakwe, zyoonse waziwaala mulwizi; abasilutwe bakwe basalidwe bainkila mumaanzi aamu-Lwizi Lusalala. Impwampwa yabamena, babbila mumaanzi malamfu mbuli ibbwe.” (Kulonga 15:3-5) Ilunyonyooko lukozyenye aloolu luyoobacitikila boonse ibadyaaminina bantu ba Leza mumazubaano aakumamanino.

8, 9. Mubbuku lya Babetesi, amupe cikozyanyo icitondezya kuti Jehova ulabafwutula bantu bakwe kuli basikubadyaaminina.

⁸ Kwamyaka iili mbwiibede kuzwa ciindi bana Israyeli nobakanjila mu Nyika Yakasyomezyegwa, babetesi bakali kubona kwaamba kuti kuli bululami akati kabo. Zimwi ziindi bantu bakali kupenzyegwa kwiinda mukudyaamininwaa bamuzwakule, pele Leza wakabelesya babetesi basyomeka ikubafwutula. Nokuba kuti aswebo tulakonzya ‘katutongela akaambo kabaabo bali mukutupenzya akutufwabya,’ Jehova uyootufwutula mbotuli babelesi bakwe basyomeka. (Babetesi 2:16-18; 3:9, 15) Atwaambe kuti, ibbuku lyamu Bbaibbele lya Babetesi lilatupa cisyomezyo kujatikizya ceeci alimwi acalufwutuko lupati Leza ndwayoocita kwiinda mu Mubetesi wakwe ngwabikkide, Jesu Kristo.

⁹ Atupilukile kumazuba aa Mubetesi Baraki. Akaambo kabukombi bwakubeja alimwi akutakkomaninwaa Leza, ibana Israyeli badyaamininwa calunya kwamyaka iili 20 mubweendelezi bwa Mwami waku Kanana Jabini. Sisera ngosilutwe wankamu yabasikalumamba mpati yaba Kanana. Pele ‘kunyina intobo niliba isumo likonzya kubonwa akati kabantu bali zyuulu zili makumi one bamu-Israyeli,’ nokuba kuti musyobo woonse ulakonzya kuti ujisi bantu basika kutuulunzuma tone. (Babetesi 5:6-8) Cakweempwa bana Israyeli balilila Jehova. Kwiinda mumalailile aa Leza ngaamba kwiinda mumusinsimi mwanakazi Debora, Baraki wabungika baalumi bali 10,000 ku Cilundu ca Tabori, mpoona Jehova wabungika basinkondo mumumpata munsi aacilundu cilamfwu ca Tabori. Kazizaabuvwuuma mumumpata woonse akumulonga uuyuminide wa Kisoni, kwaboola mpi zya Sisera ankalaki zyankondo zili 900. Pele imvwula mpati yaupazya mulonga wa Kisoni. Baraki abaalumi bakwe mbobaselemukila Cilundu ca Tabori kabatalibonyi nkaambo kaguwo lyamvwula, balibonena penzi pati lyaanzwaa bukali bwa Jehova. Baalumi ba Baraki batalika kuyasa omwe-omwe wabana Kanana balo ono ibayoowa akutalika kutija, pele kwiina naba omwe iwaloboka. Takuliyoosezyi kaka kucenjezya oku kuli basikutudyaaminina ibayeeya kuti inga balwana Leza!—Babetesi 4:3-16; 5:19-22.

10. Nkaambo nzi ncotweelede kusyoma kuti Leza uyoobafwutula babelesi bakwe basunu kuli basikubadyaaminina boonse?

¹⁰ Jehova uyoobafwutula babelesi bakwe basunu kuli basinkondonyina babo boonse ibabadyaaminina mbubwena mbuli mbwaakafwutula bana Israyeli bayoowa Leza muziindi zyamapenzi. (Isaya 43:3; Jeremiya 14:8) Leza wakamufwutula Davida “kumaanza aabasinkondonyina boonse.” (2 Samuele 22:1-3) Aboobo nokuba kuti tuladyaamininwa naa kupenzyegwa mbotuli bantu ba Jehova, atube basicamba nkaambo Mwami wakwe wabu Mesiya uyootulubula kukudyaamininwa oku. Inzya, “buumi bwabacete ulabufutula. Ulanununa buumi bwabo kulupenzyo.” (Intembauzyo 72:13, 14) Oolo lufwutuko lulaafwaafwi cini-cini.

Leza Ulabafwutula Aabo Bamusyoma

11. Ncikozyanyo nzi cakusyoma muli Jehova mwana Davida ncaakapa?

¹¹ Ikutegwa tukalibonene lufwutuko ndwapa Jehova, tweelede kumusyoma cabusicamba. Davida wakatondezya lusyomo lwakwe muli Leza naakaunka kuyooswaanganaa mubbabbani Goliati. Amuyeeye bbumbwabuuka damfwu lina Filisti elyo kaliimvwi kumbele lyamwana Davida, walo mpoona iwaamba kuti: “Webo ulaboola kulindime apanga asumo amuumba, pele mebo ndeza kulinduwe muzina lya-Jehova wamakamu makamu, Leza wabasinkondo ba-Israyeli ngosampaula. Mubuzuba obuno Jehova ulakwaaba mumaanza aangu, elyo nzookujaya akukukosweda mutwe, ayalo mitunta yamakamu aabasinkondo baba-Filisti sunu ndiipa bayuni bakujulu abanyama baansi, kuti bantu boonse baansi bazoozibe kuti Israyeli uli a-Leza. Abalo aba bantu boonse babungene ano bazoozibe kuti ipanga asumo tazyeensi nzyavunya Jehova pe, nkaambo inkondo njiya-Jehova.” Ndilyonya Goliati wakafwa, elyo ba Filisti bazundwa citaambiki. Cakutadooneka, Jehova wakabafwutula bantu bakwe.—1 Samuele 17:45-54.

12. Nkaambo nzi ncocinga cagwasya kunooyeeya sintanze wa Davida wazina lya Eleazara?

¹² Notuswaanganaa basikupenzya, inga twayandika ‘kuba basicamba’ akusyoma muli Leza cakusinizya. (Isaya 46:8-13; Tusimpi 3:5, 6) Amubone cakacitika aabusena bwiitwa kuti Pasidamimu. Bana Israyeli bayoowa kusikila mpi yaba Filisti. Pele walo Eleazara, umwi wabaalumi basintanze botatwe ba Davida kwiina nokwamumana nguzu kuyoowa pe. Waimikila mumuunda wabbaale kali alikke buyo akubajaya ba Filisti apanga. Aboobo “Jehova [wakabafutula ba Israyeli] alufutuko lupati.” (1 Bami 11:12-14; 2 Samuele 23:9, 10) Kwiina muntu uunga watuyeeyela kuzunda mpi yabasikalumamba katuli tolikke buyo. Nokuba boobo, zimwi ziindi tulakonzya katuli tolikke kumane twapenzyegwa abasinkondoma. Sena tuyoosyoma muli Jehova sibuvwuni boonse cakusinizya? Sena tuyooyandaula lugwasyo lwakwe kutegwa tulikasye kwaaba basyomima kuli basikupenzya?

Jehova Ulabafwutula Basyomeka

13. Nkaambo nzi ncocakali kukatazya kuzumanana kusyomeka kuli Leza mubwami bwamisyobo iili kkumi bwa Israyeli?

¹³ Kutegwa tukafwutuke mulufwutuko luzwa kuli Jehova, tweelede kuzumanana kusyomeka kulinguwe ziyume zitete. Bantu ba Leza bansiku bakali aamasunko aasiyene-siyene. Amuyeeye nzyomwakali kunooyaana nomwakali kupona kuciindi cabweendelezi bwabwami bwaba Israyeli bwamisyobo iili kkumi. Ibukali bwa Roboamu bwakakulwaizya misyobo iili kkumi kuleka kumugwasilizya akutalisya bwami bwakunyika bwa Israyeli. (2 Makani 10:16, 17; 11:13, 14) Akati kabami banji babwami obu, iwakainda kubota ngu Jehu, pele naba nguwe ‘tanaakabikka moyo woonse kukweenda mumulawo wa-Jehova pe.’ (2 Bami 10:30, 31) Nokuba boobo, ibwami bwamisyobo iili kkumi bwakacijisi bantu bakali kusyomeka. (1 Bami 19:18) Bakasyoma muli Leza, alimwi awalo wakabagwasilizya. Nokuba kuti lusyomo lwanu lulasunkwa, sena mucizumanana kusyomeka kuli Jehova?

14. Ndufwutuko nzi Jehova ndwaakacita mumazubaa Mwami Hezekiya, alimwi ncinzi cakasololela kukuzundwa kwa Juda kubana Babuloni?

¹⁴ Ikutatobela Mulawo wa Leza ikwakavwula kwakasololela kumapenzi mapati mubwami bwa Israyeli. Ibana Asuri nobakabuzunda mu 740 B.C.E., ibantu ibakazwa kumisyobo iili kkumi bakatijila kubwami bwamisyobo yobile bwaci Juda, kwalo nkobakali kukonzya kukomba Jehova mutempele lyakwe. Ibami bone akati kabali 19 bamu Juda ibakazwa muzyalani lya Davida—Asa, Josafati, Hezekiya alimwi a Josiya—bakali zikozyanyo zibotu kapati kumakani aakukomba Leza. Mumazubaa sikusyomeka Hezekiya, iba Asuri bakaboola kulwana bana Juda ampi yabasikalumamba basinguzu. Mukwiingula kulomba kwa Hezekiya, Leza wakabelesya mungelo omwe buyo kujaya ba Asuri ibali 185,000 mubusiku bomwe buyo, munzila eyi wakabafwutula basikumukomba! (Isaya 37:36-38) Kumbele, ikukakilwa bantu nkobakakakilwa kutobela Mulawo alimwi akucenjezya kwabasinsimi ba Leza kwakasololela kukuzundwa kwa Juda kubana Babuloni alimwi akukunyonyoonwa kwamunzi wabo mupati, Jerusalemu atempele mu 607 B.C.E.

15. Nkaambo nzi bama Juda baange mubuzike ibakali mu Babuloni ncobakali kuyandika kuliyumya, alimwi mbuti Jehova mukuya kwamazuba mbwaakacitya lufwutuko?

¹⁵ Bama Juda baange mubuzike bakali kuyandika kukakatila kutegwa bazumanane kusyomeka kuli Leza ciindi nobakali mubuzike ku Babuloni kwamyaka yamapenzi iili 70. (Intembauzyo 137:1-6) Sikusyomeka umwi uuzyibidwe mmusinsimi Daniele. (Daniele 1:1-7; 9:1-3) Amuyeeye lukkomano lwini-lwini ndwaakabaandulo ciindi mulawo wakaambilizya Mwami Koresi waku Persia nowakabeleka mu 537 B.C.E., iwakuzumizya ba Juda kupilukila ku Juda kuyooyakulula tempele! (Ezara 1:1-4) Daniele abamwi bakaliyumya kwamyaka minji, pele kumamanino bakalibonena kuzundwa kwa Babuloni alimwi alufwutuko lwabantu ba Jehova. Eci ceelede kutugwasya kutondezya lukakatilo notucilindila lunyonyooko lwa “Babuloni mupati,” ibwami bwanyika bwabukombi bwakubeja.—Ciyubunuzyo 18:1-5.

Jehova Ulabafwutula Bantu Bakwe Lyoonse

16. Ndufwutuko nzi Leza ndwaakacita mumazubaa Mwami Mwanakazi Esita?

¹⁶ Lyoonse Jehova ulabafwutula bantu bakwe nobasyomeka kuzina lyakwe. (1 Samuele 12:22; Isaya 43:10-12) Amuyeeye mazubaa Mwami mwanakazi Esita—mumwaanda wamyaka wasanu B.C.E. Mwami Ahasuera (Xerxes Mutaanzi) wasumpula Hamani kuba mupati wabasilutwe. Akaambo kakuti wanyemezyegwaa Moodekai mu Juda iwakaka kumukotamina, Hamani wakanza kumujaya antoomwe abama Juda boonse mu Bwami bwa Persia. Wabaamba kuti mbaasikusotoka mulawo, wapa amali aacisinkamulomo, elyo wazumizigwa kubelesya nweenwe yamwami kutegwa adinte makani aalailila kunyonyoonwa kwabo. Esita cabusicamba wayubunwida mwami kuti ngwamuzyalane lyaba Juda alimwi waubikkaa ntangalala muzeezo wabujayi wa Hamani. Ndilyonya Hamani walengelela nguwe kafwide aacisamu ncicona ncaakabambilide Moodekai kuti akajailwe mpawo. Moodekai waba ngomupati wabasilutwe, wapegwa nguzu zyakuzumizya ba Juda kulikwabilila. Babaa luzundo lupati kuli basinkondonyina. (Esita 3:1–9:19) Aya makani ayelede kuyumya lusyomo lwesu kuti Jehova uyoocita milimo yalufwutuko kubabelesi bakwe ibasyomeka sunu.

17. Ino kuswiilila kwakabeleka kapati buti mulufwutuko lwa Banakristo ba Juda bamumwaanda wamyaka wakusaanguna ibakali kukkala mu Judaya?

¹⁷ Akambi kaambo Leza ncabafwutwida bantu bakwe nkuti balamuswiilila walo alimwi a Mwanaakwe. Amulibikke muciimo cabasikwiiya ba Jesu ba Juda bamumwaanda wamyaka wakusaanguna. Wakabaambila kuti: “[Mwaaku]bona kuti Jerusalemu wazinganwa mukati kempi, amukazibe kuti kusaalwa kwawo kuli afwaafwi. Ndilyonya abo abali mu-Judaya abacijile mumalundu.” (Luka 21:20-22) Myaka iili mbwiibede yainda, mwatalika akutelaika naa majwi aaya ayoozuzikizigwa. Mpoonya kwacitika buzangi bwaba Juda mu 66 C.E. Impi yabasikalumamba iisololelwaa Cestius Gallus yazingana Jerusalemu akuswena kumalambo aatempele. Mpoonya kakunyina akaambo, iba Roma baile kuleka. Ino Banakristo ba Juda balacita nzi? Mubbuku lyakwe litegwa Ecclesiastical History (Bbuku Lyatatu, mutwe Wasanu, 3), Eusebius waamba kuti bakatija kuzwa mu Jerusalemu amu Judaya. Bakafwutuka nkaambo bakaswiilila kucenjezya kwa Jesu kwabusinsimi. Sena andinywe mulilibambilide kutobela busololi bwamu Magwalo ibupegwa kwiinda ‘mumubanzi musyomesi’ uubikkidwe kweendelezya “lubono lwa [Jesu]” loonse?—Luka 12:42-44.

Kufwutuka Akujana Buumi Butamani

18, 19. (a) Ndufwutuko nzi ilufwu lwa Jesu ndolwakacitya kuti lukonzyeke, alimwi kuli bani? (b) Ncinzi ncaakakanzide kucita mwaapostolo Paulo?

¹⁸ Ikutobela kucenjezya kwa Jesu kwakafwutula Banakristo ba Juda mu Judaya. Pele lufwu lwa Jesu lucitya kuti ikufwutuka akujana buumi butamani kukonzyeke “[ku]bantu boonse.” (1 Timoteo 4:10) Ikuyandika kwacinunuzyo kubantu kwakatalika Adamu naakabisya akusweekelwa buumi lwakwe alimwi akusambala bantu boonse mubuzike bwakucibi alufwu. (Ba-Roma 5:12-19) Izituuzyo zyabanyama izyakali kupegwa mu Mulawo wa Musa zyakali kuzivwumbilila buyo asyoonto zibi. (Ba-Hebrayo 10:1-4) Mbwaanga Jesu kwiina naakajisi usyi muntunsi alimwi muuya wa Leza uusalala ‘wakamuvwunikila’ Mariya kuzwa ciindi naakamita kusikila ciindi Jesu naakazyalwa, Jesu wakazyalwa kanyina cikono cacibi naa kutalondoka. (Luka 1:35; Johane 1:29; 1 Petro 1:18, 19) Jesu naakafwa kali muntu uulondokede uusyomeka, wakaaba buumi bwakwe bulondokede kuti anunune akwaangulula bantu. (Ba-Hebrayo 2:14, 15) Aboobo Kristo ‘wakalisanga mwini kuti anunune bantu boonse.’ (1 Timoteo 2:5, 6) Tabali boonse ibatondezya kuti balaciyanda cipego eci calufwutuko, pele Leza ulazumizya kwaamba kuti impindu yaco ibelesegwe kuli baabo ibacizumina mulusyomo.

¹⁹ Kwiinda mukupa muulo wacinunuzyo cacituuzyo cakwe kuli Leza kujulu, Kristo wakabanununa bana ba Adamu. (Ba-Hebrayo 9:24) Aboobo Jesu wabaa Nabwiinga, nkokuti basikumutobela bananike ibali 144,000 ibabusilwa kubuumi bwakujulu. (Ba-Efeso 5:25-27; Ciyubunuzyo 14:3, 4; 21:9) Alimwi uba ‘Wisaabo Uuteeli’ aabo ibazumina cituuzyo cakwe akutambula buumi butamani anyika. (Isaya 9:6, 7; 1 Johane 2:1, 2) Tabuliboteli kaka bubambe obu! Ikulumba kwa Paulo nkwaalumba bubambe obu kulalibonya mulugwalo lwakwe lwabili lwakasololelwaa muuya ndwaakalembela Banakristo ku Korinto, mbubwena cibalo citobela mbociyootondezya. Atwaambe kuti, Paulo wakalikanzide kapati ikutazumizya cintu cili coonse kumukasya kugwasya bantu kujana lugwasyo lwacipego cibotu ncapa Jehova calufwutuko abuumi butamani.

Inga Mwaingula Buti?

◻ Mbumboni nzi buliko bwamu Magwalo ibutondezya kuti Leza ulabafwutula bantu bakwe baluleme?

◻ Tuzyi buti kuti Jehova ulabafwutula aabo ibamusyoma alimwi ibazumanana kusyomeka?

◻ Mbubambe nzi Leza mbwaacita bwalufwutuko busololela kubuumi butamani?

[Cifwanikiso icili apeeji 8]

Davida wakasyoma muli Jehova, “Leza wabuvuni.” Sena mbomusyoma?

[Cifwanikiso icili apeeji 10]

Lyoonse Jehova ulabafwutula bantu bakwe, mbubwena mbwakacita kuciindi ca Mwami mwanakazi Esita

Obuno Mbobuzuba Bwalufwutuko!

“Amubone, ciindi ceelede nkukuti sunu, abwalo buzuba bwalufutuko nkukuti sunu.”—2 BA-KORINTO 6:2.

1. Ncinzi ciyandika kutegwa tube aaciimo cizumizidwe kuli Leza a Kristo?

JEHOVA ulibikkide buzuba mbwazoobeteka bantu boonse. (Incito 17:31) Ikutegwa bukabe buzuba bwalufwutuko kulindiswe, tweelede kubaa ciimo cizumizidwe anguwe alimwi a Mubetesi wakwe ngwabikkide, Jesu Kristo. (Johane 5:22) Iciimo cili boobo ciyandika kulilemeka ikweendelana a Jwi lya Leza alimwi alusyomo ilutukulwaizya kugwasya bamwi kuba basikwiiya ba Jesu beni-beni.

2. Nkaambo nzi bantu ncobazandukide kuli Leza?

² Akaambo kacibi cakakonwa, ibantu munyika balizandukide kuli Leza. (Ba-Roma 5:12; Ba-Efeso 4:17, 18) Aboobo, aabo mbotukambaukila balakonzya kufwutuka lilikke nobayanzana anguwe. Mwaapostolo Paulo wakacisalazya eci naakalembela Banakristo ku Korinto. Nkooko atulange-lange bbuku lya 2 Ba-Korinto 5:10–6:10 kutegwa tubone Paulo ncaakaamba kujatikizya lubeta, luyanzano a Leza alimwi alufwutuko.

“Tula[ba]kombelezya Bantu”

3. Mbuti Paulo mbwaakazumanana ‘kubakombelezya bantu,’ alimwi nkaambo nzi aswebo ncotweelede kucita boobo sunu?

³ Paulo wakaswaanganya lubeta akukambauka naakalemba kuti: “Nkaambo toonse buyo tuleelede kuboneka kubetekelo lya-Kristo,