Obuno Mbobuzuba Bwalufwutuko!

“Amubone, ciindi ceelede nkukuti sunu, abwalo buzuba bwalufutuko nkukuti sunu.”—2 BA-KORINTO 6:2.

1. Ncinzi ciyandika kutegwa tube aaciimo cizumizidwe kuli Leza a Kristo?

JEHOVA ulibikkide buzuba mbwazoobeteka bantu boonse. (Incito 17:31) Ikutegwa bukabe buzuba bwalufwutuko kulindiswe, tweelede kubaa ciimo cizumizidwe anguwe alimwi a Mubetesi wakwe ngwabikkide, Jesu Kristo. (Johane 5:22) Iciimo cili boobo ciyandika kulilemeka ikweendelana a Jwi lya Leza alimwi alusyomo ilutukulwaizya kugwasya bamwi kuba basikwiiya ba Jesu beni-beni.

2. Nkaambo nzi bantu ncobazandukide kuli Leza?

² Akaambo kacibi cakakonwa, ibantu munyika balizandukide kuli Leza. (Ba-Roma 5:12; Ba-Efeso 4:17, 18) Aboobo, aabo mbotukambaukila balakonzya kufwutuka lilikke nobayanzana anguwe. Mwaapostolo Paulo wakacisalazya eci naakalembela Banakristo ku Korinto. Nkooko atulange-lange bbuku lya 2 Ba-Korinto 5:10–6:10 kutegwa tubone Paulo ncaakaamba kujatikizya lubeta, luyanzano a Leza alimwi alufwutuko.

“Tula[ba]kombelezya Bantu”

3. Mbuti Paulo mbwaakazumanana ‘kubakombelezya bantu,’ alimwi nkaambo nzi aswebo ncotweelede kucita boobo sunu?

³ Paulo wakaswaanganya lubeta akukambauka naakalemba kuti: “Nkaambo toonse buyo tuleelede kuboneka kubetekelo lya-Kristo, kuti tukatambule umwi aumwi cakuvola ceelede camilimo yesu njitucita mumibili yesu, niiba mibotu niiba mibi. Lino tulizi mbukweelede kulemeka Mwami, aboobo tulakombelezya bantu.” (2 Ba-Korinto 5:10, 11) Mwaapostolo wakazumanana ‘kubakombelezya bantu’ kwiinda mukubakambaukila makani mabotu. Ino swebo mbuti? Mbwaanga tulaafwaafwi amamanino aabweende bwazintu obu bubyaabi, tweelede kusoleka mpotugolela kukombelezya bamwi kuti batole ntaamu iziyandika kutegwa bakajane lubeteko lubotu kuli Jesu alimwi akuzuminwa kuli yooyo Nkoluzwa lufwutuko, Jehova Leza.

4, 5. (a) Nkaambo nzi ncotuteelede kulidunda kujatikizya kuzwidilila kwesu mumulimo wa Jehova? (b) Munzila nzi Paulo mwaakalisumpwida ‘muli Leza’?

⁴ Nokuba boobo, ikuti Leza waulongezya mulimo wesu, tatweelede kulidunda pe. Ku Korinto bamwi bakalisumpula kapati naa kulisumpwida mubantu bambi, aboobo kwakaba kwaanzaana mumbungano. (1 Ba-Korinto 1:10-13; 3:3, 4) Kaamba ciyanza eci, Paulo wakalemba kuti: “Tatuli mukuboola kulikankaizya kulindinywe, pe, tulamupa kaambo kakutulumbaizya, kuti muvwiizye abo balilumbaizya kumakani aaboneka kumeso buyo, aatali aamoyo. Nkaambo na tulisondokede, nkikaambo kamakani aa-Leza, nanka tulyeenzene, nkikaambo kandinywe.” (2 Ba-Korinto 5:12, 13) Basikulisumpula kwiina nobakali kulukkomanina lukamantano lwambungano abukkale bubotu munzila yakumuuya. Bakali kuyanda kulidundila zintu zilibonya ameso muciindi cakugwasya basyominyina kubaa myoyo mibotu kumeso aa Leza. Akaambo kaceeci, Paulo wakaisinsa mbungano alimwi kumbele wakazikwaamba kuti: “Oyo uulikankaizya alikankaizizye mu-Mwami.”—2 Ba-Korinto 10:17.

⁵ Sena Paulo lwakwe tanaakalidunda? Bamwi balakonzya kuyeeya boobo akaambo kamakani ngaakaamba kujatikizya bwaapostolo bwakwe. Pele wakalidundila muli “Leza.” Wakalidunda akaambo kazyeelelo zyakwe kali mwaapostolo ikutegwa bana Korinto batamusiyi Jehova. Paulo wakacita ceeci kutegwa abazyolele kuli Leza nkaambo baapostolo babeji bakali kubanyonena munzila iitaluzi. (2 Ba-Korinto 11:16-21; 12:11, 12, 19-21; 13:10) Nokuba boobo, Paulo tanaakacicita kuba ciyanza buya kuzyibya boonse zyakuzwidilila kwakwe.—Tusimpi 21:4.

Sena Luyando lwa Kristo Lulamukulwaizya?

6. Ino luyando lwa Kristo lweelede kutujatikizya buti?

⁶ Mbwaakali mwaapostolo mwini-mwini, Paulo wakayiisya bamwi zyacituuzyo cacinunuzyo ca Jesu. Cakamunjila kapati Paulo nkaambo wakalemba kuti: “Nkaambo kuyanda Kristo nkokutusinikizya, ikuti tulabeteka obo, kuti omwe wakafwida boonse, aboobo boonse bakafwa. Nkabela wakabafwida boonse kuti abo bapona bataciliponen[i] beni pele baponene oyo iwakabafwida akubuka.” (2 Ba-Korinto 5:14, 15) Elo lwakali luyando lwini-lwini kaka Jesu ndwaakatondezya mukwaaba buumi bwakwe akaambo kandiswe! Masimpe, eci ceelede kacitusinikizya lyoonse mumaumi eesu. Ikulumba Jesu akaambo kakwaaba buumi bwakwe nkwaakacita akaambo kandiswe kweelede kutukulwaizya kusungwaala kucita mulimo wakwaambilizya makani mabotu aalufwutuko ndwaakatupa Jehova kwiinda mu Mwanaakwe uuyandwa. (Johane 3:16; amweezyanisye Intembauzyo 96:2.) Sena ‘luyando Kristo ndwajisi’ luli mukumusinikizya kutola lubazu cabusungu mumulimo wakukambauka Bwami alimwi akugwasya bamwi kuba basikwiiya?—Matayo 28:19, 20.

7. Caamba nzi ‘kutaamba muntu naba omwe kuti muntu buyo’?

⁷ Kwiinda mukubelesya maumi aabo munzila iitondezya kulumba ncaakabacitila Kristo, ibananike ‘tabaciliponeni beni pe pele baponena nguwe.’ Paulo wakati, “Nkaambo kaako, kuzwa sunu tatwaambi muntu naba omwe kuti muntu buyo. Nikuba kuti twakalizi Kristo mbuli muntu nekubaboobo sunu tatucimuzi boobo pe.” (2 Ba-Korinto 5:16) Banakristo tabeelede kunoobalanga munzila yakumubili bantu bambi, ambweni ikulemeka ba Juda kwiinda Bamasi naa bavwubi kwiinda bacete. Bananike ‘tabaambi muntu naba omwe kuti muntu buyo,’ mbwaanga icilongwe cakumuuya abantunyina ncecintu cipati kulimbabo. Aabo ‘ibakazyi Kristo mbuli muntu’ tabali buyo baabo ibakamubona ncobeni Jesu naakali anyika. Nokuba kuti bamwi ibakali kulangila Mesiya cimwi ciindi bakabona Kristo munzila yabuntu, tiibakacili kuyandika kuzumanana kucita boobo. Wakaaba mubili wakwe kuba cinunuzyo alimwi wakabusigwa kali muuya uupa buumi. Abambi ibayoobusilwa kubuumi bwakujulu bakali kuyoosiya mibili yabo yanyama kakunyina kumubona Jesu Kristo mumubili wabuntu.—1 Ba-Korinto 15:45, 50; 2 Ba-Korinto 5:1-5.

8. Mbuti bantu mbobaba “muli-Kristo”?

⁸ Kacaamba bananike, Paulo wakayungizya kuti: “Aboobo kuti muntu waba muli-Kristo, waba mulenge mupya. Zintu zikulukulu zyamaninina, zyoonse zyaba zipya.” (2 Ba-Korinto 5:17) ‘Ikuba muli Kristo’ caamba kubelekelaamwi anguwe. (Johane 17:21) Ibulongwe obu bwakakonzyeka Jehova naakakwela muntu oyu ku Mwanaakwe akumunanika akumuzyala amuuya uusalala. Mbwaanga ono wakaba mwanaa Leza uuzyedwe aamuuya, wakaba “mulenge mupya” uujisi bulangizi bwakubelekelaamwi a Kristo mu Bwami bwakujulu. (Johane 3:3-8; 6:44; Ba-Galatiya 4:6, 7) Banakristo bananike bali boobo bapedwe coolwe camulimo cipati kapati.

“Amuyanzanye a-Leza”

9. Ncinzi Leza ncaacita kutegwa luyanzano anguwe lukonzyeke?

⁹ Tacilikomeneni kaka coolwe Jehova ncabapede ibankamu ‘yabalenge bapya’! Paulo waamba kuti: “Aya makani oonse azwa kuli-Leza, nguwe uutuyanzanya kwakwe mwini muli-Kristo akubika mumaanza esu milimo yaluyanzano, nkukuti milimo yakwaambila bantu Leza mbwaakalibonya muli-Kristo kuti aliyanzanisizye bantu boonse, nkabela mbwatabaelezezyi milandu yabo, alimwi mbwaabika mumaanza esu inkombe yaluyanzano.” (2 Ba-Korinto 5:18, 19) Kuzwa ciindi Adamu naakabisya, ibantu balizandukide kuli Leza. Pele Jehova caluyando wakasaanguna kujula nzila yaluyanzanisyo kwiinda mucituuzyo ca Jesu.—Ba-Roma 5:6-12.

10. Mbaani Leza mbaakapa mulimo wakuyanzanya, alimwi ncinzi ncobacita kutegwa baucite cakuzwidilila?

¹⁰ Jehova wapa mulimo wakuyanzanya kubananike, aboobo Paulo wakali kukonzya kwaamba kuti: “Lino tuli bangambela ba-Kristo nkukuti Leza ulamukumbila kumaanza esu. Tulamukombelezya muzina lya-Kristo kuti, Amuyanzanye a-Leza.” (2 Ba-Korinto 5:20) Mumazubaa nsiku, bangambela bakali kutumwa kapati iciindi calupyopyongano kuti bakabone naa inkondo inga yalesyegwa. (Luka 14:31, 32) Mbwaanga bantu basizibi balizandukide kuli Leza, watumizya bangambela bakwe bananike kuti bazyibye bantu nzyayanda mukuyanzanisya kwakwe. Mbobaiminina Kristo, ibananike balakombelezya kuti: “Amuyanzanye a-Leza.” Ikukombelezya oku nkukombelezya kwalubomba kuti bayandaule luumuno a Leza alimwi akuzumina lufwutuko ndwasyomezya kwiinda muli Kristo.

11. Kwiinda mukusyoma mucinunuzyo, mbaani kumamanino ibaba muciimo cabululami mumeso aa Leza?

¹¹ Ibantu boonse ibasyoma mucinunuzyo balakonzya kuyanzanisigwa kuli Leza. (Johane 3:36) Paulo waamba kuti: “Oyo [Jesu] iwatakazi zibi [Jehova] Leza wakamucitya kuti abe zibi nkaambo kandiswe, kuti swebo tube bululami bwa-Leza mulinguwe.” (2 Ba-Korinto 5:21) Imuntu mulondosi Jesu wakaba cituuzyo cazibi kubana ba Adamu boonse ibafwutulwa kucibi cakuzyalwaaco. Baba “bululami bwa-Leza” kwiinda muli Jesu. Obu bululami naa ciimo cabululami mumeso aa Leza, ikusaanguna citambulwaa basikulelanyina ba Kristo ibali 144,000. Mumyaka iili Cuulu ya Bulelo bwakwe, iciimo cabululami bwabantu balondokede ciyoobacitikila abalo bana baanyika ba Wisi Uuteeli, Jesu Kristo. Uyoobasumpwida kuciimo cabululami mubulondosi ikutegwa bakabe bantu basyomeka kuli Leza akutambula cipego cabuumi butamani.—Isaya 9:6; Ciyubunuzyo 14:1; 20:4-6, 11-15.

“Ciindi Ceelede”

12. Mulimo nzi uuyandika kapati uuli mukucitwaa bangambela ba Jehova abeenzinyina?

¹² Ikutegwa tukafwutuke, tweelede kutobela majwi aa Paulo aakuti: “Lino mbuli mbutuli basimulimonyina [Jehova] Leza, tulamukumbila, kuti luzyalo lwa-Leza ndumutambwide lutabi lwabuyo. Nkaambo wati, Kuciindi ceelede ndakakuswiilila, akubuzuba bwalufutuko ndakakugwasya. Lino amubone, ciindi ceelede nkukuti sunu, abwalo buzuba bwalufutuko nkukuti sunu.” (2 Ba-Korinto 6:1, 2) Bangambela bananike ba Jehova abeenzinyina “i[ba]mbelele zimwi,” kwiina nobatambula luzyalo lwa Wisi wakujulu cabuyo. (Johane 10:16) Kwiinda mukulilemeka kwabo alimwi amulimo ngobacita cabusungu ‘muciindi cino ceelede,’ bayandaula luzyalo lwa Leza alimwi bali mukuzibya bantu baanyika kuti obuno ‘mbobuzuba bwalufwutuko.’

13. Ncinzi cini caambwa kuli Isaya 49:8, alimwi mbuti mbocakazuzikizigwa ciindi cakusaanguna?

¹³ Paulo wazubulula Isaya 49:8, nkotubala kuti: “Mbuboobu mbwaamba Jehova. Kuciindi cacoolwe ndakuvwiila, amubuzuba bwalufutuko ndakugwasya. Ndakubamba, ndakupa kuti ube cizuminano cabantu, kuti ukabusye nyika akubakonya inkono zisaalidwe.” Ibusinsimi obu bwakazuzikizigwa ciindi cakusaanguna ibana Israyeli nobakaangululwa kuzwa mubuzike ku Babuloni akupilukila kumatongo aamunzi wabo.—Isaya 49:3, 9.

14. Ino bbuku lya Isaya 49:8 lyakazuzikizigwa buti kujatikizya Jesu?

¹⁴ Mukuzuzikizigwa kumbi kwabusinsimi bwa Isaya, Jehova wakapa “mulanda” wakwe Jesu kuba “mumuni wabamasi abalo, ube lufutuko lwa [Leza] koonse akusikila kumagolelo aanyika.” (Isaya 49:6, 8; amweezyanisye Isaya 42:1-4, 6, 7; Matayo 12:18-21.) “Ciindi cacoolwe,” naa “ciindi ceelede,” kulibonya kuti cakali kwaamba Jesu naakali aanyika. Wakapaila, elyo Leza ‘wakamuvwiila.’ Ciindi eco cakaba “buzuba bwalufutuko” kuli Jesu nkaambo wakazumanana kusyomeka elyo “wakaba sikubacitila lufutuko lutamani boonse abo abamumvwa.”—Ba-Hebrayo 5:7, 9; Johane 12:27, 28.

15. Nkuzwa lili bana Israyeli bakumuuya nobakatalika kusolekesya kulitondezya kuti beelela luzyalo lwa Leza, alimwi bakajisi makanze nzi?

¹⁵ Paulo ubelesya Isaya 49:8 ikwaamba Banakristo bananike, kabakombelezya kuti ‘luzyalo lwa Leza lutabi lwabuyo kuli mbabo’ kwiinda mukukakilwa kuyandaula coolwe cakwe ‘muciindi ceelede’ alimwi ‘amubuzuba bwalufwutuko’ nzyapa walo. Paulo wayungizya kuti: “Lino amubone, ciindi ceelede nkukuti sunu, abwalo buzuba bwalufutuko nkukuti sunu.” (2 Ba-Korinto 6:2) Kuzwa lya Pentekoste mu 33 C.E., ibana Israyeli bakumuuya basolekesya kutondezya kuti baleelelwa luzyalo lwa Leza ikutegwa “ciindi ceelede” cikabe “buzuba bwalufutuko” kuli mbabo.

‘Kulitondezya Kuti Tuli Basimilimo ba Leza’

16. Muuziimo nzi zyamapenzi Paulo mwaakalitondezya kuti ngusimilimo wa Leza?

¹⁶ Ibaalumi bamwi ibakali mumbungano yaku Korinto kwiina nobakali kulitondezya kuti baleelelwa luzyalo lwa Leza. Bakabejelezya Paulo mukusoleka kunyansya bwaapostolo bwakwe, nokuba kuti wakakweeleba ‘kubikka imfumpu niliba lyomwe.’ Ncobeni wakalitondezya kuti ngusimilimo mubelesi wa Leza kwiinda “mulukakatilo lupati, mumapenzi, mumakatazyo, mumapatizi, muzyuumwa, mumaange, mumapyopyongano, mumapakasyo, mukufubwa ŋonzi, mumazala.” (2 Ba-Korinto 6:3-5) Kumbele Paulo wakazikwaamba kuti, ikuti basikumukazya bakali basimilimo, walo ‘wakali kubainda boonse,’ nkaambo kakupenga kapati kumaange, kukukwibbaulwa zyuumo, intenda alimwi amukubula zintu ziyandika.—2 Ba-Korinto 11:23-27.

17. (a) Nkwiinda mukutondezya bube nzi notunga twalitondezya kuti tuli basimilimo ba Leza? (b) Ino “zyakulwisya zyabululami” ninzi?

¹⁷ Mbubwena mbuli Paulo abamwi, tulakonzya aswebo kulitondezya kuba basimilimo ba Leza. Munzila nzi? Kwiinda “mubusalazi” naa kulilemeka, alimwi akwiinda mukutobela luzibo lwini-lwini lwa Bbaibbele. Tulakonzya kulitondezya kwiinda “mukukazika moyo,” ikukakatila notutongaukwa naa kunyemezyegwa alimwi akwiinda “mubuuya” notucitila bamwi zintu zibotu. Kunze lyaboobo, tulakonzya kulitondezya kuti tuli basimilimo ba Leza kwiinda mukutobela busolozi bwamumuuya wakwe, ikutondezya ‘luyando lwini-lwini,’ ikukanana lusinizyo alimwi akusyoma kuti nguukonzya kutupa nguzu zyakuzwidilila mumulimo. Paulo awalo kayi wakalitondezya kuti wakali similimo kwiinda ‘mukubelesya zintu zyakulwisya zyabululami kumaanza oonse obile niliba lyalulyo niliba lyalumwensi.’ Munkondo zyansiku, ipanga lyakali kukkala kujanza lyalulyo, ijanza lyalumwensi lyakali lyantobo. Mukulwisya nkondo yakumuuya kuli bamayi babeji, Paulo kwiina naakabelesya zyakulwisya zyamubili uujisi cibi—luleyo, bumpelenge, bubeji. (2 Ba-Korinto 6:6, 7; 11:12-14; Tusimpi 3:32) Wakabelesya “zyakulwisya” naa inzila zyabululami, ikutegwa atole bukombi bwakasimpe kumbele. Aswebo mbotweelede kucita.

18. Ikuti katuli basimilimo ba Leza, tunoolilemeka buti?

¹⁸ Ikuti katuli basimilimo ba Leza, tuyoolilemeka mbubwena mbuli Paulo abasimilimonyina. Tuyoolilemeka katuli Banakristo notulemekwa anotusampaulwa. Imalipooti mabi aatujatikizya kwiina naayakulesya mulimo wesu wakukambauka alimwi kwiina notuyakulidunda notulumbaizyigwa. Tuyookanana kasimpe lyoonse alimwi tulakonzya kuzyibwa akaambo kamilimo yesu yabunaleza. Notuli mumapenzi mapati akaambo kakupenzyegwaa basinkondoma, tuyoosyoma muli Jehova. Alimwi lulayo tuyooluzumina cakukkomana.—2 Ba-Korinto 6:8, 9.

19. Mbuti mbocikonzyeka ‘ikuvwubya bantu banji’ munzila yakumuuya?

¹⁹ Kamanizya mubandi wakwe kujatikizya mulimo wakuyanzanya, Paulo wakalyaamba lwakwe antoomwe abasimilimonyina kuti “tuliuside, nekubaboobo tuli mukukondwa lyoonse. Tuli bacete nekubaboobo tulaletela bantu banji buvubi. Tuli basikasokomwena nekubaboobo tulivubide zintu zyoonse.” (2 Ba-Korinto 6:10) Nokuba kuti basimilimo aabo bakaleelede kuusa akaambo kazipenzyo, mumoyo bakalikkomene kapati. Bakali bacete munzila yakumubili, pele ‘bakagwasya bamwi kuvwuba’ munzila yakumuuya. Atwaambe, ‘bakajisi zintu zyoonse’ nkaambo lusyomo lwabo lwakabaletela buvwubi bwakumuuya—mane abulangizi bwakuba bana ba Leza kujulu. Alimwi bakapona buumi bubotu alimwi bwalukkomano kabali basimilimo Banakristo. (Incito 20:35) Mbubwena mbuli mbabo, aswebo tulakonzya ‘kuvwubya bantu banji’ kwiinda mukutola lubazu mumulimo wakuyanzanya bantu ono—mubuzuba buno bwalufwutuko!

Amusyome Mulufwutuko Ndwacita Jehova

20.(a) Ncinzi Paulo ncaakayandisisya kucita, alimwi nkaambo nzi ncokwatakeelede kusowa ciindi? (b) Ncinzi cicitya kuti cino ciindi ncotupona bube buzuba bwalufwutuko?

²⁰ Paulo naakalemba lugwalo lwakwe lwabili kubana Korinto afwaafwi amwaka wa 55 C.E., kwakasyeede buyo myaka ili 15 kuti bumane bweende bwazintu bwaba Juda. Mwaapostolo wakali kuyandisisya kuti bama Juda a Bamasi bayanzanisigwe kuli Leza kwiinda muli Kristo. Obo bwakali buzuba bwalufwutuko alimwi kwakasyeede buyo ciindi cisyoonto. Aswebo mbubonya tukkede kumamanino aabweende bwazintu kuzwa mu 1914. Imulimo wakukambauka Bwami uuli mukucitwa nyika yoonse mbwiizulwa ucitya kuti ciindi cino bube buzuba bwalufwutuko.

21. (a) Ndugwalo nzi lwamwaka ilwasalwa mu 1999? (b) Ncinzi ncotweelede kunoocita mubuzuba buno bwalufwutuko?

²¹ Ibantu bamisyobo yoonse bayandika kumvwa zyacipego ca Leza calufwutuko kwiinda muli Jesu Kristo. Ciindi cicisyeede ncisyoonto kapati. Paulo wakalemba kuti: “Amubone . . . buzuba bwalufutuko nkukuti sunu.” Majwi aayo aajanika ku 2 Ba-Korinto 6:2 ndolugwalo lwamwaka wa 1999 lwa Bakamboni ba Jehova. Luleelela kaka, mbwaanga tulaafwaafwi alunyonyooko ilupati kapati kwiinda loolo lwakacitikila Jerusalemu atempele lyakwe! Onoono buyo kulaba mamanino aabweende bwazintu boonse, alo aatikajatikizye muntu woonse aanyika. Sunu—ikutali juunza—nceciindi cakubweza ntaamu. Ikuti katusyoma kuti lufwutuko luzwa kuli Jehova, katumuyanda alimwi katubuyandisya buumi butamani, iluzyalo lwa Leza talukabi lwabuyo kulindiswe. Kwiinda mukuyandisisya kulemeka Jehova camoyo woonse, tuyootondezya kwiinda mumajwi ngotukanana alimwi amumicito njotucita kuti ncobeni tulisinizizye notwaamba kuti: “Amubone . . . buzuba bwalufutuko nkukuti sunu!”

Inga Mwaingula Buti?

◻ Nkaambo nzi kuyanzanisigwaa Leza ncokuyandika kapati?

◻ Ino bangambela alimwi abeenzinyina ibalimukucita mulimo wakuyanzanya mbaani?

◻ Mbuti mbotunga twalitondezya kuti tuli basimilimo ba Leza?

◻ Ino lugwalo lwamwaka wa 1999 lwa Bakamboni ba Jehova lwaamba nzi kulinduwe?

[Zifwanikiso izili apeeji 15]

Sena mulakambauka cabusungu akugwasya bamwi kuyanzanisigwa kuli Leza mbuli Paulo?

United States

France

Cote d’Ivoire

[Cifwanikiso icili apeeji 16]

Mubuzuba buno bwalufwutuko, sena muli akati kamakamu aabantu ibali mukuyanzanisigwa kuli Jehova Leza?