Ijwi lya Leza Lyabusinsimi Liyoozuzikizigwa!
1 Bakamboni ba Jehova balikubuyandisisya lyoonse ibusinsimi bwa Bbaibbele. Aboobo twakakkomana ikuziba kuti imutwe wamuswaangano wacooko wamwaka uno wakali kuyooba wakuti “Ijwi lya Leza Lyabusinsimi.” Twakali kuyandisya ikuziba nzyaakatubambilide Jehova kuba ‘zilyo zyaaciindi ceelede.’ (Mt. 24:45) Kwiina naakatutyompya pe.
2 Itwaambo Tupati-pati Twakumuswaangano: Imakani aantalisyo mubuzuba bwakusaanguna aakuti “Amulibikkile Maanu Jwi lya Leza Lyabusinsimi,” akali kubikkilizya mubandi uukondelezya wacibalo cakusanduka. (Mt. 17:1-9) Akakankaizya kuti lino tuli kumeelelezya kwiini nkaambo tutintimene buya kuciindi cakumamanino kumwi katulangila bweende bupya ibuli afwaafwi! Inzila mpati yakubikkila maanu ku Jwi lya Leza njakulibala lyoonse. Imakani aakusiilana aamutwe wakuti “Amukukkomanine Ikubala Jwi lya Leza” akapa nzila zigwasya nzyotunga twabelesya ikutegwa kubala Bbaibbele cibe cintu cilaa mpindu alimwi cikondelezya.
3 Mubuzuba bwabili kumazuba twakapegwa twaambo ncotweelede kusyoma kuti tukkede kumazuba aakumamanino. Sena mulatuyeeya twaambo toonse otu? Imafwumofwumo mubuzuba bwatatu ibusinsimi bwa Habakuku twakabuteelelesya notwakaziba kuti ciindi cino cilakozyanya aciindi ncaakali kupona walo alimwi akuti izintu zikankaminisya zilaafwi kuboola, iciindi Jehova aakunyonyoona bantu babi akufwutula baluleme. Sena mwakaciteelelesya cisobano camu Bbaibbele cijatikizya Jakobo a Esau? Tweelede kuyandaula zilongezyo zya Jehova cabusungu, ikulikasya muuya wakutabikkila maanu.
4 Ibbuku Lipya Ilikondelezya: Twakakkomana kaka ikutambula bbuku lipya lyamutwe wakuti Amububikkile Maanu Businsimi bwa Daniele! Takudoonekwi pe kuti muli mukulibala kale bbuku eli likondelezya. Imwaambi iwakaambilizya kumwaigwa kwalyo wakati: “Ibusinsimi boonse buli mubbuku lya Daniele bwakazuzikizigwa kale, kusyeede buyo busyoonto.” Sena kaambo ako takatutondezyi mbucamana ciindi?
5 Eyi pulogilamu yamuswaangano yaluyumya kapati lusyomo lwesu lwakuti izisyomezyo zya Leza izitanazuzikizigwa ziyoozuzikizigwa. Twakulwaizigwa kuzumanana kwaambilizya businsimi bwajwi lya Leza kuli bamwi!