Mbotunga Twaindila Kukondwa Kwiinda Mukujanika Kumiswaangano
1 Imiswaangano ilayandika kapati kumakani aaciimo cesu cakumuuya. Ilukkomano ndotujana mulinjiyo luliswaangene kapati azintu nzyotucita katutanaunka kumiswaangano, notuli nkuko alimwi anoyamana. Ino ncinzi cikonzya kutugwasya swebo antoomwe abantu bambi kuti tuzumanane kukondwa kapati akaambo kakujanika kumiswaangano?
2 Katutanaunka Kumiswaangano: Ikulibambila kuliswaangene kapati alukkomano ndotujana kumiswaangano. Ikuti naa twalibambila kabotu, tulakonzya kubikkila maanu kapati akutola lubazu. Kunze lyaboobo, kufwumbwa cibeela camuswaangano ncotupegwa tweelede kulibambila kabotu katukanzide kwaamba makani esu munzila iiluzi ikweelana amalailile alimwi katuyeeyede baswiilizi besu. Tweelede kwaaindulula-indulula kabotu-kabotu makani. Notutola lubazu mumiswaangano iikondelezya alimwi iikulwaizya yalo iitugwasya toonse, ikuyaambele nkotucita kulalibonya alimwi tulaindila kukondwa.—1 Tim. 4:15, 16.
3 Kumiswaangano: Ikwiingula kumiswaangano kulakonzya kutugwasya kwiikkomanina miswaangano. Izibeela zyamiswaangano iziyandika kwiingula kwabaswiilizi zyeelede kubonwa kuti ncibeela cipedwe umwi aumwi mumbungano. Ikanjikanji ibwiinguzi bugaminina ibutazinguluki bulaampindu kapati. Ikuluula cakukosaula-kosaula izintu zyakatucitikila kulakonzya kukulwaizya kapati elyo tweelede kuyeeya kunoobikkilizya zyakuluula zili boobu kufwumbwa kuti pulogilamu kaizumizya kucita boobo. (Tus. 15:23; Inc. 15:3) Notubandika makani kumiswaangano tweelede kwaambaula cabusungu alimwi calusyomo, ikubandika munzila iikkomanisya alimwi iigwasya.
4 Yamana Miswaangano: Ikubandika caluzyalo abantu bamwi akwaanzyanya cabulongwe alimwi akubandika twaambo tuli mbotubede itupati-pati itwalangwa-langwa kumwiswaangano kuyootugwasya toonse. Iluyando lwabunyina lulayungizigwa notutondezya lukkomano akaambo kakubona bana basyoonto abantu bapati alimwi abapya kabatola lubazu. Muciindi cakutongauka bamwi ibatajaniki kumiswaangano, tweelede kubatondezya lukkomano ndotujana akaambo kakujanika kumiswaangano, aboobo inga twabakulwaizya kujanika abalo.—Heb. 10:24, 25.
5 Tutaliimyi cipego eci ciyandika kapati icakukulwaizyanya. (Rom. 1:11, 12) Ikwiinda mukusolekesya kutola lubazu cabusongo, tulakonzya kuzumanana kukondwa toonse akaambo kakujanika kumiswaangano ya Bunakristo.