Mulyango Wajalulwa Wakuti Muyake Ŋanda ya Bwami
1 Kaindi kwiinda muli Isaya, Jehova wakakanana kumbunga yakwe iili mbuli mwanakazi mumajwi aabusinsimi ulaamba: “Komezya kuntu nkuukede. . . . Utayoowi kulampya intambo zyako akuyumya inkankamino zyako.” (Is. 54:2) Icakacitika mukuzuzikizya kwaambilizya oko cilalibonya kapati sunu mukukomena kwambunga kuli mukucitika lino. Kuciyandika busena bumbi.
2 Awalo Hagai musinsimi wa Jehova wakasinsima kuti, “zintu ziyandisi zyazisi zyoonse ziboole.” (Hag. 2:7) Imasimpe ngakuti twabona mbuli Leza mbwaayiisya kasimpe kubunji bwabantu balo ibaba bakombi ba Jehova. Cilakkomanisya kaka ikutambula malipooti aamyaanda yazyuulu zyabantu bakabbapatizigwa nyika yoonse mumwaka wamulimo wamu 1999! Omuno mu Zambia molikke, ibakwesu abacizi ibainda ku 7,600 bakayungizyigwa kubutanga bwa Jehova. Ikucita kuti tubagwasilizye aba bapya, tweelede ‘kuyeeyesya makani atusikila’ akusyomezya kuti tuyootola lubazu mumulimo wa Leza kusikila mpotukozya.—Hag. 1:5.
3 Icibeela ciyandika kapati mukugwasilizya mulimo wa Leza oyu nkubaa maanda aakukombela aayelede motukonzya kubaa lwiiyo lwateokrasi. Akaambo kamakamu aabasikutembaula Jehova bapya batusangana, kuyandika zyuulu zya Maanda aa Bwami mapya alimwi mapati nyika yoonse mbwiizulwa. Ibakabunga Keendelezya balombozya kuti kuyakwe Maanda aa Bwami manji mbuli mbokukonzyeka.
4 Izintu Nzyotuyandika Ncobeni. Kwaciindi cino mu Zambia tuyandika myaanda ya Maanda aa Bwami aali kabotu alimwi aabidwe kukukombela Leza wakasimpe. Amwaka kunooyandika Maanda aa Bwami ali 35 naa 40 ikutegwa boonse bali mukuboola bajane mwakuswaanganina. Ino ncinzi ncotubona ikuti twasanganya myaanda-myaanda yambungano zibelesya zidumba, maanda akubbadelela buya alimwi amayake atali kabotu kweelanaa mbwaayandika? Tubona kuti kuyandika kuyaka masena aakukombela akuyiila imabotu alimwi manji cakufwambaana. Amulibuzye kuti: Ikuti naa tiicacitwa cakufwambaana, ino swebo toonse kubikkilizya abapya tuyoogwasigwa buti amalailile aapegwa notuswaangana mubunji mumbugano?
5 Naakamana kulangwa-langwa makani aaya abasikwiiminina Kabunga Keendelezya ibakatumidwe mu Zambia, kwakajanika makani aaya aatobela. Mumyaka ili yosanwe iitobela, icisi ca Zambia ceelede kuyaka naa kumaninzya kuyaka Maanda aa Bwami mapya. Imbaakani yabikkwa kale yakuti Imaanda aa Bwami aali 180 ayelede kuyakwa amwaka, kuti kakuli kuyanda kwa Jehova mumyaka eyi yosanwe iboola. Ino eeci inga cazuzikizigwa buti?
6 Cakutadooneka ibukkale bwamu Zambia kumakani aakujana mali tabuzumizyi bunji bwambungano kuti zyuubweze mukuli woonse wakuyaka Maanda aa Bwami aazyo aali kabotu. Ibunji bwambungano tazikozyi pe ikuula zibelesyo ziyandika zyoonse zyakuyasya Ŋanda ya Bwami yabo alimwi akwiimanizya muciindi cisyoonto. Akaambo kaceeci bamwi bali kuyaka kwamyaka minji, bamwi isika ku 20 pele tabanamanizya pe. Imbungano zimwi musyule tiizyakali kukonzya kwaabbadela mali aacikwelete ku Sosaiti.
7 Mbubwena mbuli mbukwakaambilizigwa ku Miswaangano Yacooko ya “Ijwi lya Leza Lyabusinsimi,” Ibakabunga Keendelezya bazumizya bubambe bwakupa mali aakuyasya kumbungano ziyanda Ŋanda Yabwami. Ibubambe buli mukucitwa bwakujana mali akubelesya munzila zyaandeene-andeene kubikilizya akuyaka Maanda aa Bwami. Aboobo kwiinda mukuzibamba kabotu zintu zya Mwami, imajwi amwaapostolo Paulo ngaakalembela bana Korinto alakonzya kubelesegwa sunu muzisi zyoonse. Paulo wakati, “Takweensi kwaamba kuti bamwi balalemununwa anukuti nywebo mulalemenwa, pe. Ngemakani aakweelanya buyo. Kuciindi ecino lwiindano lwanu lulazulila kubula kwabo, kuti . . . kube lweelano.” (2 Kor. 8:13,14) Inzya, imali aakuyasya Maanda esu aa Bwami alajanwa kwiinda mukusanga kucitwaa bakwesu muzisi zimbi ibakulwaizigwaa luyando.
8 Ino mbubambe nzi bupya buliko? Mali aacikwelete ayoopegwa kweelana amulimo uuyandika kucitwa. Aya mali aazikwelete anooyoobbadelelwa bucebuce mbuli mboikonzya mbungano. Eeci ciyoopa kuti noziba mbungano zitalisiki kusule naa zicete zikacikonzye kuyaka nokwayandika. Zimwi mbungano ziyoofwaambana kwaabbadela mali kwiinda zimwi. Ikulomba kwambungano imwi aimwi kuyakulangwa-langwa kweelana ambungano eyo.
9 Pele tweelede kubikkila maanu kuzintu zicitika munyika yoonse. Mbwaanga kuli Maanda aa Bwami manji aayandika kuyakwa, tweelede kucita lubazu lwesu mbuli mbotukonzya. (1) Tweelede kubelesya muzeezo wabuyake ngutwakapegwa aba Sosaiti tucesye mali aabbadelwa. (2) Imaanda aa Bwami ali mumasena muli bantu banji ayelede kubelesyegwa ambungano zyotatwe naa zyone. (3) Imbungano zyeelede kusoleka kwaabbadela mali cakufwambaana mbuli mbozikonzya. Kwiinda mukucita boobo, Imaanda aa Bwami manji alakonzya kuyakwa kwiinda mumali aayo aabbadelwa. Aboobo imasena mabotu aakukombela aambungano zyesu alakonzya kujanika.
10 Nzinzyi ziyandika alimwi ino mbungano yanu inga yagwasya buti? Masena oonse muli Maanda aa Bwami ayandika kuti kaazumizidwe amulawo. Eeci ncecintu catukatazya kapati. Iŋanda ya Bwami tayeelede kuyakilwa abusena bwatakapegwa kumbungano mumulawo. Mucikozyanyo, ikuti naa Mwami wamupa nyika, mweelede kamujisi lugwalo kuzwa ku Mwami lutondezya kuti inyika eyo waipa mbungano yanu. Ikuti naa kwacitwa oobo, nkokuti nyika yaba yanu mumulawo. Icikozyanyo cimbi: Ikuti naa mbungano yanu yapegwa nyika aba Kkansulo Yankomuzwa (Local Council), mweelede kuyaambele akubona kuti mwapegwa Lugwalo Lumuzumizya kuzwa Kucibeela Cilanganya Nyika (Ministry of Lands). Ikutobela mulawo, mweelede kubelesya zina lya “Zambia Association of Jehovah’s Witnesses Registered Trustees,” icibeela camumulawo cizizilwe icibelesyegwa mu Zambia kujatikizya makani aakubaa nyika. Mwasika waawo inga mwalembela Kucibeela Cilanganya Nyika kutegwa mupegwe Pepa Lyabumukamwini litegwa Title Deed. Mwamanizya zyoonse ezi nkokuti inyika lino yaba yanu. IMBUNGANO ZYOONSE zyeelede kubona kuti ibusena mbozibelesya zyilipedwe mumulawo.
11 Ikuti naa mbungano yanu yakapegwa kale nyika mumulawo, nkokuti mulakonzya kupegwa imali alimwi abantu bakumugwasilizya kumulimo wakuyaka Ŋanda yanu ya Bwami. Ikutegwa mujane malailile aambi, mwakulwaizigwa kuti mubalembele iba Society’s Kingdom Hall Construction Desk. Muyoolombwa kuti mukatobele Pulogilamu ya Sosaiti Yakuyaka Maandaa Bwami (Society’s Kingdom Hall Construction Program) alimwi amalailile aambokusalazigwa Ŋanda yanu ya Bwami mukati alimwi aanze. Alimwi mweeledekuzumina kuti mwezi amwezi munootuma mali woonse ngomwakasyomezya mbuli mbomukonzya. Ibaalu bakulwaizigwa kuti bacicite eeci cakufwambaana, aboobo andinywe mulakonzya kutola lubazu mu pulogilamu eyi mpya.
12 Tubunga Twabasikuyaka. Ibakabunga Keendelezya bazumizya kuti kube Tubunga Twabasikuyaka Maandaa Bwami (Kingdom Hall Construction Groups). Ootu tubunga tunoojisi babelesi bamuzisi zimbi, bamucisi mumwena alimwi ababelesi basikulisugula, ibasalidweaa Kkomitii Yamutabi. Kabunga komwe-komwe kanoojisi mulangizi alimwi asikumugwasilizya. Ootu tubunga tunoogwasilizya mbungano mumayake aabo. Tunooyendelezya mulimo akubelekela antoomwe ambungano kusikila limwi Ŋanda ya Bwami yamana alimwi yeelela kwaabwa. Kabunga kamwi kamusyobo ooyu kali kubeleka munzila eyo kuzwa ku Beteli. Akamwi kapya kali mukutalisigwa ku Copperbelt. Mwaka uubola tubunga tuli boobu tuyotalisigwa mu Zyooko zyaku Luapula aku Eastern alimwi aku Northern. Ootu tubunga twabasikuyaka tunoobelekela atoomwe ama Kkomitii obile aaliko kale aa Regional Building Committee naa tunoobelekela mumasena amwi mucisi ooko iba Regional Building Committee mobatakozyi kusika. Oomo muli boobo bayoosyoma baabo basikulisugula; bunji bwabaabo bayooba babaya ibakkala mumasena ali munsi aa Ŋanda ya Bwami iiyakwa.
13 Basikuyaka Balisungula banoobeleka buyo kwaciindi cisyoonto kuzwa kunsondo zyobile kusikila kumyezi yotatwe, banoobelekela antoomwe ambunga iili kubusena kuyakwa Ŋanda ya Bwami iitali yabo. Kanjikanji maanda aakoona alimwi acakulya ziyakubambwa aba Sosaiti kwiinda mu Mbungano iili mukuyaka. Bunji bwabaabo ibagwasilizya mupulogilamu eeyi bayootambwa kuti kababeleka mbuli Basikuyaka Balisungwide. Sena inga mwalisungula kugwasya mumulimo oyu uuyandika wakuyaka Maandaa Bwami? Ikuti naa mulilisungwide, twamukulwaizya kuti mulembe foomu ya “Application for Kingdom Hall construction volunteer program.” Aaya mafoomu ayootuminwa kumbungano zyoonse onoono.
14 Babelesi Maandaa Bwami. Abo bakabeleka kabali basikuyaka balisungwide kwamyezi yobile naa kwiindaawo baleelela kulembela kuti babe babelesi bayaka Maandaa Bwami. Ifoomu eyo iyootumwa ku Sosaiti kwiinda mu Kkomitii Yamulimo Yambungano. Kuli zintu ziyoopegwa kuli baabo babelesi ibayoosalwa kuti babe mumulimo waalubazu waciindi coonse oyu mupya, kubikkilizya alugwasyo mbuli lupegwa bamukwasyi wa Beteli. Aakoona alimwi acakulya ziyoobambwa aba Sosaiti.
15 Notulanga mulimo wamuunda wanyika yoonse mbwiizulwa, cilatukkomanisya kubona kuvwula kuli mukucitika mumbunga ya Jehova yaanyika. Cilakkomanisya kubona kuti kuyandika Maanda aa Bwami manji. Ibakwesu abacizi banji mbasungu kapati mukugwasilizya mbunga ya Jehova kwiinda mukulisungula kujana ciindi cakugwasilizya alimwi amukugwasilizya azintu nzyobajisi mukuyaka Maandaa Bwami.
16 Ibubambe boonse oobu bwakuyaka Maandaa Bwami bulazuzikizigwa kwiinda mumuuya wa Bunakristo wabwaabi alimwi akulyaaba. Uliindene kapati kaka amuuya uutondezegwa munyika sunu wakwiile kubweza kakunyina kwaabila pe! Cilakkomanisya kaka ikubona bantu ba Leza kabazumanana kutondezya luyando akati kabo, iluyando lutanyonganizigwi akaambo kamubala naa busena umwi mwakkede. (Mt. 24:12) Kwiinda mukwiiya Taateesu wakujulu alimwi akwiinda mukukulwaizigwa aluyando lwakwe, atugwasilizye cakulisungula munzila yoonse iikonzyeka kupulogilamu eyi yakuyaka Maanda aa Bwami. Ikuti twacita oobo, Jehova uyootulongezya alimwi akutukkomanina. (Malk. 3:10) Tulakkomana akutembaula Jehova notubona Maanda aa Bwami kaayakwa nyika yoonse mboizulwa kubikilizya amucisi cesu cino ca Zambia.—Hag. 1:7-8.