Sena Mulakulumba Ikukkazika Moyo kwa Jehova?
1 Ikuti naa Jehova tanaakakkazika moyo kwamyaka yainda iili 10 naa 20 naa kwiindawaawo, ikuti ape ciindi cakuti abamwi bapegwe bumboni, sena muyeeya kuti nimwaakaiya kasimpe? Tweelede kumulumba kapati kaka akaambo kakuti wapa ciindi cakuti bantu banji “bajane ciindi cakweempwa.” Pele buzuba bupati bwa Jehova ‘buyoosika mbubonya mbwasika mubbi.’ (2 Pet. 3:9, 10) Aboobo ikukkazika moyo kwa Leza takweelede kubonwa munzila imbi mbuli kuti wamuka kuleta mamanino abweende oobu bwazintu.—Hab. 2:3.
2 Amubatondezye Luzyalo Bantu: Ikukkazika moyo kwa Jehova nkupati cakuti tatukonzyi kukuteelela pe. Tutalubi makanze akukkazika moyo kwakwe. (Jon. 4:1-4, 11) Jehova ulacibona ciimo cabantu ceetezya alimwi ulabatondezya lubomba. Awalo Jesu mbwalimvwa oobo. Mbwaanga wakajisi luzyalo kumakamu ngaakali kukambaukila, wakayanda kuti mulimo wakukambauka uyaambele kutegwa ibanji bapegwe coolwe cakuyoojana buumi butamani.—Mt. 9:35-38.
3 Eelyo nokucitika mapenzi alimwi antenda, sena tatweetezyegwi abantu batazyi kasimpe? Ibantu sunu bali mbuli “mbelele zitakwe mweembezi” eelyo nobasola kutelaika kaambo ncokuli manyongwe aali boobu munyika. (Mk. 6:34) Kwiinda mukusungwaala kukambauka makani mabotu, tulabaumbulizya babombe myoyo alimwi tutondezya kuti tulakulumba kukkazika moyo kwa Jehova.—Inc. 13:48.
4 Mulimo Wesu Ulayandika Kuucita Cakufwambaana: Imwakali bakabbapatizigwa bakali 323,439 alimwi ibainda ku 14,000,000 bakajanika ku Ciibalusyo. Mbanji kaka ibalangilwa kuyoofwutuka lunyonyooko lwabweende bwazintu obuno bubyaabi! Ibupati bwini bwamboiyooba “inkamu impati” tatubuzi pe. (Ciy. 7:9) Alimwi tatuzi pe naa tuyoobeleka ciindi cilamfwu buti mulimo wesu wakukambauka. Pele Jehova walo ulizi. Makani mabotu ayookambaukwa kusikila mane akasalalilwe, “elyo mamanino azoosika.”—Mt. 24:14.
5 Ciindi ciceede ncisyoonto alimwi buzuba bwa Leza bulaafwaafwi kusika. (1 Kor. 7:29a; Heb. 10:37) Cakutadooneka, “lufutuko lwesu luli afwiifwi kwiinda kuciindi ncitwakazumina.” (Rom. 13:11) Tutalubi makanze akukkazika moyo kwa Leza. Muciindi caboobo, atufwambaane kukukambauka ikutegwa bantu banji ibayanda bululami bakabone Jehova mbwayoobatondezya luzyalo lwakwe lupati.