Ipulogilamu Mpya Yamuswaangano Wabbazu

Tulizi kuti tweelede kumuyanda alimwi akukomba buyo Jehova Leza alikke. Nokuba boobo, ibantu basola kutoongelezya ikutegwa cilongwe ncotujisi anguwe cimane. (Joh. 17:14) Ikutegwa tuyumye luyando lwesu kuli Jehova alimwi akubaa nguzu mukukazya ziyanza zyanyika zyalo zitubikka muntenda munzila yakumuuya, ipulogilamu mpya yamuswaangano wabbazu wamumwaka wamulimo wa 2001 iyoobaa mutwe wakuti “Amuyande Leza—Ikutali Zintu Zyamunyika.”—1 Joh. 2:15-17.

Iluyando ndotujisi kuli Jehova lutukulwaizya kuti twaambile bamwi kujatikizya nguwe. Nokuba boobo, imulimo wamumuunda tuuli muuba-uba pe kubantu ba Leza banji. Mumakani aamutwe wakuti “Luyando Ndotujisi kuli Leza Lulatukulwaizya Mumulimo Wesu” muyooyiya ibanji mbobakacikonzya ikumanizya nsoni alimwi akuzunda zisinkilizyo zimbi ikutegwa batole lubazu mumulimo ooyu.

Ino mbuti kuyaansi kwazyeelelo zyabukkale munyika mbokutujatikizya? Izilengwa kaindi izyakali kubonwa kuti nzibi sunu zibonwa kuti zili buyo kabotu. Makani aakuti “Ibayandisya Jehova Balabusulaika Bubi” alimwi amakani aakusiilana aakuti “Izintu Zyamunyika—Ino Tuzilanga Buti?” ayooyumya makanzeesu aakukazya miyeeyo mibi.

Ipulogilamu iyoobikkilizyaa Cikolo Camulimo wa Teokrasi alimwi a Muswaangano Wamulimo wacitondezyo antoomwe akufwiinsya ciiyo ca Ngazi Yamulindizi mucibalo camvwiki eeyo. Makani aabuleya aakuti “Luyando Alimwi a Lusyomo Mbozikonzya Kuzunda Nyika,” ayootukulwaizya ikwiiya Jesu mukukazya koongelezyegwa azintu zyamunyika. (Joh. 16:33) Amubone kuti mwabatamba mbomwiiya limwi Bbaibbele kutegwa abalo bakajanike. Kufwumbwa uuyanda kuyoobbapatizigwa weelede kwaambila mulangizi weendelezya ciindi kaciciliko kutegwa alibambile zintu ziyandika.

Kumuswaangano oyu wabbazu tuyoobikkila maanu akuzyiba kwini nkotweelede kubikka luyando lwesu ikutegwa tukkomane azilongezyo zibotu nzyapa Jehova. Mutakaindwi cibeela cili coonse!