“Tatukonzyi Kuleka Kwaamba”
1 Jesu Kristo ulaulanganya kapati mulimo wakukambauka. (Mt. 28:20; Mk. 13:10) Nokuba kuti lino basikukambauka batandila kutuulunzuma tuli cisambomwi mumasi aasika ku 234, tatweelede kuyeeya kuti mulimo wakukambauka lino wamana. Kusikila elyo Leza aakwaamba kuti mulimo lino wacitwa, “tatukonzyi kuleka kwaamba” zintu nzitwakaiya.—Mili. 4:20, Ci.
2 Atusyome Muuya wa Leza: Saatani uleta mapenzi manji kutegwa atutyompye. (Ciy. 12:17) Mubili wesu wanyama uutalondokede awalo ulatupenzya azipenzyo zinji. Zintu eezi zilakonzya kutupa kuti tutabikkili maanu kumulimo uuyandika kapati wakukambauka. Nokuba boobo, ikuti katujisi lusyomo muli Jehova, muuya wakwe uyootugwasya ikuzunda zisinkilizyo zili zyoonse zikonzya kutunyonganya.
3 Eelyo mbungano ya Banakristo yamumwaanda wamyaka wakusaaguna noyakali kupenzegwa, ibakwesu bakapaila kuli Leza kutegwa abagwasye kuzumanana kwaambaula jwi lyakwe cabusicamba. Jehova wakawiingula mupailo wabo, wakabapa muuya wakwe alimwi abusungu kubikkilizyaa busicamba buyandika kutegwa bazumanane kukambauka. Eeci cakabapa kuzumanana kukambauka makani mabotu cabusicamba.—Inc. 4:29, 31; 5:42.
4 Tutayoowi Mibandi Ityompya: Itwaambo twakubeja tumwaigwa abantu banji tulakonzya kutuyoosya. Nokuba boobo, amuyeeye majwi ngaakaamba Petro alimwi abaapostolo bambi cabusicamba kubabetesi bamu Nkuta Mpati aalembedwe mubbuku lya Incito 5:29-32. Mbwaakali mwiiyi wa Mulawo Gamaliyeli wakazumina kuti mulimo wa Leza taukonzyi kukasigwa. Mulimo oyu taubelekwi akaambo kanguzu zyesu. Mulimo ooyu mupati ulagwasilizigwaa Leza alimwi walo alikke nguukonzya kuumanizya!—Zek. 4:6.
5 Atumukumbile Jehova lyoonse kuti atupe muuya wakwe kutegwa utugwasye kukambauka makani mabotu cabusungu. Atwaambe bwakaamba Jeremiya kuti mulumbe wa Bwami uli mbuli mulilo uuyakisya mukati kazifuwa zyesu. (Jer. 20:9) Tatukonzyi kuumuna buyo pe!