Ibbaibbele Lilijisi Nguzu
1 Sintembauzyo Davida wakabuzya kuti: “O Jehova ngwani uukonzya kusekelezegwa mucilao cako? Ngwani uukonzya kukala mucilundu cako cisalala?” Ikwiinda mumajwi masyoonto aasalidwe kabotu, Davida wakaingula kuti: “Ngonguwe uuenda cakulondoka akucita bululami, uuamba lusinizyo mumoyo wakwe.” (Int. 15:1, 2) Eezyo nzyayanda kulindiswe taku nizyakacinca pe. Boonse aabo baboola kukomba mumbungano ya Bunakristo, beelede kulilemeka alimwi tabeelede kuba bacakolwa. Tabako busena akati kabantu ba Jehova aabo bayanda kuzwangana, kukalala-kalala naa bakali nibaba babaya bayanda kuvwiyana. Taciko makani kufwumbwa naa tuli basimilimo bapya naa bakaindi, tweelede kuti katusyomeka kwiinda mukubamba zyeelelo zisumpukide zitondezyedwe mu Jwi lya Leza.—Gal. 5:19-21.
2 Ibanji bapya balayanzana ambunga ya Jehova. Bana abapati bacinca kuyeeya kwabo kutegwa kweendelane akuyanda kwa Leza. Mwana musankwa umwi ku Kalomo wamyaka yakuzyalwa iili 14 wakaiya kasimpe kubeembezinyina. Ibamumukwasyi wakwe boonse bakali kumukazya. Mazuba amwi bakali kumwiima cakulya. Kusyomeka kwakwe kuzintu zyaakayiiya mu Bbaibbele kwakabakkomanisya bazyali bakwe. Tanaakali kubba mbuli bana bamwi mbobakali kucita. Akaambo kakubeleka kabotu mucilawo mobaatambula kasimpe, aboobo bamukwasyi wakwe bali fwuka bakabbapatizyigwa akuba Bakamboni ba Jehova. Aakati kabaabo bakabbapatizyigwa kumuswaangano mupati mumwaka ooyu wamana, kuli bakaapanyina bajisi myaka yakuzyalwa iili 98, bawisi alimwi abanyina.
3 Mbuli cilengwa, tweelede kumukkomanisya Leza mubuumi bwesu boonse “cabululami acabusalali bwinibwini.” (Ef. 4:24) Ikutegwa tuzumanane kuba mumbunga ya Leza iili mbuli mulundu, tulijisi mukuli ‘wakusamununa buntu bwakaindi amilimo yanjiyo, akulisamika buntu bupya bulenguludwe caluzibo mbuli cikozyano cayooyo iwakatulenga.’—Kol. 3:9, 10.
4 Ijwi lya Leza Lilapa Kuti Muntu Acince: Ibube bwa Jehova kweelana ambobuyubunudwe mu Bbaibbele, bulakonzya kukucinca kuyeeya kwesu alimwi amicito yesu munzila mbotu. (Rom. 12:2) Ijwi lyakwe lilijisi nguzu zyakucinca mizeezo alimwi akulilanga-langa mumyoyo. (Heb. 4:12) Imagwalo aakasololelwa atuyiisya kuti Jehova uyanda kuti katulilemeka kabotu, katutola lubazu mumulimo wabuleya alimwi akutaleka kuunka Kumiswaangano ya Banakristo.
5 Muziindi eezyi zikatazya, Munakristo ulakozya kunyonganizyigwa amapenzi akutalika kutyola milawo ya Leza. Ikuti naa mwaleka kuba aciiyo camukwasyi, kuunka kumiswaangano yambungano naa mumulimo wamumuunda, naba Munakristo wakali muyumu ulakonzya kujoka munsi mulusyomo ambweni buya akucita cintu cibi. Nkakaambo kaako Paulo ncaakamulembela Timoteo kuti: “Kolibonena omwini akufundisya kwako” alimwi “Koayeeya aya ngendakwaambila.”—1 Tim. 4:16; 2 Tim. 2:7.
6 Kuti katuli bapya mukuyanzana ooku naa tuli bakaindi ibajisi luzibo, tweelede kucita zintu Leza nzyayanda, akuba bantu bakkalikenyi caboola mumulimo alimwi akuzumanana kulangila ikuti katuyanda kuti tukafwutulwe. (1 Pet. 1:13-16) Kulanga-langa kujatikizya zintu Leza nzyayanda kuti tucite, cilayandika kapati.
7 Aabe makanze aanu akuunka mumuunda ciindi cino caciibalusyo. Amube amakanze aakugwasya bantu kutegwa babe alusyomo alimwi akuyungizya ciindi camumulimo wamumuunda. (Rom. 1:12) Lyoonse mizeezo yanu kaiyeeya zintu zyigwasya kwiinda mukuba aciiyo canu nobeni, ciiyo camukwasyi alimwi akujanika kumuswaangano. (Flp. 4:8) Kusoleka kwanu nkomucita kwakupona kweelana akuyanda kwakwe, takakulubi alimwi kulamukkomanisya Leza.—Kol. 3:23, 24.