Lugwalo Kuzwa Ku Kabunga Keendelezya
Nomuyandwa Bakwesu a Bacizyi:
“AKUBE anywe luzyalo aluumuno kuzwa kwa-Leza Taateesu aku-Mwami Jesu Kristo.” (1 Kor. 1:3) Tulacilombozya kapati kaka ciindi izilenge zyoonse iziyoya noziyoomulemeka mbwayelede Jehova! (Int. 150:6) Mbotulindila buzuba oobo bupati, tulazumanana kwaambilizya makani mabotu aa Bwami bwa Leza alimwi akugwasya bantu kuba basikwiiya.
Imulimo wabukambausi cino ciindi nguubikkilwa maano kapati akati kamilimo ya Jehova anyika. (Mk. 13:10) Akaambo kakuti tulizyi kabotu Jehova mbwaubikkila maano mulimo ooyu, tulapaila kutegwa atugwasye kuubeleka mulimo ooyu, mbwaanga tulizyi kuti muntu amuntu ulijisi coolwe cakugwasyigwa abubambe bwacinunuzyo. (Ciy. 14:6, 7, 14, 15) Masimpe tulajana buyumuyumu, pele tulalumba kapati kuti ‘tulipedwe nguzu izizwa kujulu’ zipa kuti tuucite mulimo ooyu.—Lk. 24:49.
Elo kaka cilakkomanisya ikuti twalanga mulimo wakacitwa mumwaka wamulimo wamana alimwi akuyeeya ceeco Jehova ncaacita kwiinda mubabelesi bakwe basyomeka! Akaambo kakuyumizyigwa amuuya uusalala, bantu ba Leza balutondezya luyando luli mbuli lwa Kristo, bakuzunda kusulaikana munyika yoonse. Iluyando luli boobu lwakalibonya kumiswaangano yesu mipati. Ikutalikila mu June kusikila mu December 2003, basimiswaangano kuzwa muzisi ziinda kumwaanda bakaunka kumiswaangano yamasi iili 32 yakacitwa mumanyika a Afulika, Asia, Australia, Europe, North America alimwi a South America. Bamisyinali, babelesi bamumasi alimwi abamukwasyi wa Beteli bazwa muzisi zimbi bakabuzyigwa-buzyigwa kumiswaangano yacooko alimwi ayamasi.
Kumiswaangano eeyi mipati twakatambula mabbuku obile, ilya ‘Atubone Nyika Mbotu’ alimwi alya Amwiiye ku Mwiiyi Mupati. Ikuyungizya waawo, kwakaambilizyigwa kuti ibbuku lya Cikolo Camulimo Wabupaniya yakalembululwa lyakali kuyootalisyigwa kubelesyegwa ikusaanguna kumamanino aamwaka wamulimo wa 2004. Buce-buce, ibapainiya babeleka mulimo ooyu kwaciindi cilamfwu ibakajanika kale kucikolo eeci bayooyiya alimwi mumakkilasi aabapainiya bapya.
Kugwasyigwa a Leza alimwi abwaabi bwabantu zyapa kuti kuyakwe Maanda aa Bwami manji aambi, ikapati mumanyika imuli bucete. Akaambo kakuti bantu bavwula nyika yoonse ibayanda cakulya cakumuuya, imilimo yakukomezya mitabi ili mukucitwa mumanyika manji. Ibroshuwa ya Amutangale Abuumi Butamani A-Nyika! lino nkoili mumilaka iili 299, mumakkopi oonse aakasimbwa aali tuulunzuma tuli 139; ibbuku lya Luzibo Lutola Kubuumi Butamani lyawiindilila mweelwe watuulunzuma tuli 93 twamakkopi mumilaka iili 161; alimwi ituulunzuma twiinda ku 200 twamakkopi aabroshuwa ya Ncinzi Leza Ncayanda Kulindiswe? twakasimbwa mumilaka iili 267.
Camaanza obile, twabatambula ibali 258,845 ibakatondezya kulyaaba kwabo kwiinda mukubbapatizyigwa mumeenda mumwaka wamulimo wamana! Nokuba kuti ikusumpula Bwami bwa Leza kwapa kuti mube baabo mbakanzide Saatani, eeci alimwi camupa kuti mube bantu balibedelede mbapa zilongezyo alimwi akukwabilila kwakumuuya Jehova mbomulunduka mumuzundano ngomujisi. (Heb. 12:1, 2; Ciy. 12:17) Ee, amusinizye kuti “Oyo uu[m]ubamba takooguna.”—Int. 121:3.
Ilugwalo lwamwaka wa 2004 lwakuti, “Amulangile . . . Amulibambe,” ndwaaciindi ceelede kapati. (Mt. 24:42, 44) Banakristo mu Jwi lya Leza bapandululwa kuti mbeenzu mubweende oobu bwazintu ibuya kumamanino. (1 Pet. 2:11; 4:7) Aboobo tweelede kubikkila maano kuzintu zyakumuuya, ikuzumanana kuubya-ubya buumi bwesu alimwi akulingula myoyo yesu cabunkutwe. “Simwaaba mupati” uyanda kutuluma, ikutupa kuba cibeela cabweende bwakwe oobu bubyaabi.—Ciy. 12:9.
Ikutegwa tuzumanane kuba bantu bapakamene, kulayandika kapati kubala Bbaibbele abuzuba. Kuyootugwasya kuzuzikizya kaambo kakuti “kwaamba kwanu akube Ii, ii” kujatikizya kulyaaba kwesu alimwi akuti “kusyoma kwesu nkotwakali kujisi kumatalikilo katujatisya mane do kumagolelo.” (Jak. 5:12; Heb. 3:14) Ikubala Bbaibbele abuzuba inga kwatugwasya kuyeeya mpobasika bantu munyika mukuleya zyeelelo zya Leza zitacinci. (Malk. 3:6; 2 Tim. 3:1, 13) Iluzibo lwamu Bbaibbele inga lwatugwasya ikuzitantamuka zintu “zyamankwangwaalizya” alimwi akuzumanana kusyomeka kuli Jehova.—2 Pet. 1:16; 3:11.
Nobazyali, mbomuya bukomezya bana banu mulwiiyo amumilazyo ya Jehova, sena mulabagwasya kulibikkila mbaakani zyakumuuya akuti ‘kabalangila’? (Ef. 6:4) Sena mulabayiisya kuti babone bukkale bwabo bwakumbele mbuli mbwaakabubona Jesu, imuntu musongo kwiinda boonse bakapona anyika? Jesu naakayanda naakaba mubezi, sikwaanza zintu naa musilisi uucibwene kumutwe kwiinda boonse bakapona, pele muciindi caboobo, wakacita mulimo waciindi coonse. Icikozyanyo cakwe acimukulwaizye kugwasya bana banu ikubikka ziyandika zya Bwami mubusena bwakusaanguna mubuumi bwabo.
Ibaciinga camuzike musyomesi, ibaimininwa a Kabunga Keendelezya balalumba camoyo oonse kuba “inkamu impati” akaambo kakutugwasya kuzuzikizya mukuli ngotupedwe ‘wakukambauka Makani Mabotu aaya aa Bwami munyika yoonse kacili citondezyo.’ (Ciy. 7:9; Mt. 24:14, 45) Inywe nomuyandika Jehova umusyomezya kuti ulaiyeeya “milimo yanu akuyanda nkomwatondezya nkaambo kezina lyakwe, mbomwakabelekela basalala, asunu mucibabelekela.” (Heb. 6:10) Mbomubala zyakuluula izikkomanisya akubona butebuzi bwamilimo yanu mu Yearbook ya 2004, amuzyibe kuti mwakacita mulimo mupati mukupa bumboni oobu bwanyika yoonse.
Amuzumanane kulangila zili kumbele cabusicamba mbomuya buzumanana ‘kulanga bulumbu buyoopegwa,’ cakutalekela muntu uulya maila naa daimona kumupa kwiindwa mbubo. (Heb. 11:26; Kol. 2:18) Ee, amusyome muli Jehova, kamusinizyide kuti uyoobagwasya boonse ibamuyanda ikujana buumi bwini-bwini.—Joh. 6:48-54.
Amusinizyigwe kuti cilatukkomanisya kubeleka antoomwe andinywe ikutegwa Jehova alumbaizyigwe akulemekwa.
Tobanyoko,
Kabunga Keendelezya ka Bakamboni ba Jehova