Bantu Boonse Bayoofwutuka
1. Ino bukkale bwesu a Leza bwiimvwi aali?
1 Luzyalo lwa Leza lwajalula nzila yalufwutuko. Nduyando lwa Jehova kuti “bantu boonse bafutulwe akuboola kuluzibo lwakuziba lusinizyo.” (1 Tim. 2:3, 4) Bukkale bwesu a Leza tabwiimvwi amubala wesu, mbotupona, luzibo naa mbotuboneka, pele mukutondezya lusyomo mucinunuzyo ca Jesu. (Joh. 3:16, 36) Mbotuli babelesinyina ba Leza, tweelede kucileka kusalulula kuli koonse nkotujisi, kwalo kunga kwapa kuti tutazumini bantu aabo Jehova mbalibambilide kutambula.
2, 3. Ino ncinzi cikonzya kutugwasya kutabeteka bantu kweelana ambobaboneka?
2 Mutani Kubeteki: Jehova ulanga bantu mbobabede mukati, kakunyina lunya naa kusalulula. (1 Sam. 16:7) Alimwi ulabona mbobaya kuba kumbele. Aboobo, aabo bayanda kumubotezya ubabona kuba bantu bayandika kapati. (Hag. 2:7) Sena bantu tubabona mbwababona Leza?
3 Bamwi bantu mbotuyaanya mumulimo inga batugambya mbobaboneka. Inga kabasamide buteelede naa kusama kutatondezyi bulemu, kabajisi malezu aatanyoledwe naa kabajisi nweenwe ampemo naa amulomo. Bamwi ambweni banyina kwakukkala. Ibamwi inga kabanyina luse andiswe. Muciindi cakubona bantu bali boobu kuti tabalangilwi kuba bakombi ba Jehova, tweelede kubona zintu munzila mbotu, “nkaambo aswebo kaindi twakali bafuba-fuba, bataswiilili, basweekede.” (Taita. 3:3, Ci) Kuyeeya kaambo aaka, tunooli bantu balibambilide kukambauka kumuntu uuli woonse, nebaba baabo bakonzya kulibonya kuba bantu batali kabotu.
4, 5. Ncinzi ncotwiiya muzikozyanyo zya Jesu alimwi a Paulo?
4 Zikozyanyo Zyamu Mwaanda Wamyaka Wakusaanguna: Jesu Kristo wakabikkila maano kugwasya baabo ibamwi mbobakali kubona kuti tabalangilwi kuba bakombi ba Jehova. (Lk. 8:26-39) Nokuba kuti tanaakali kuzumizya micito mibyaabi, wakalizi kuti bantu inga balijana mubukkale butali kabotu. (Lk. 7:37, 38, 44-48) Aboobo, wakali kubamvwisya, “wakabafwida luzyalo, nkaambo bakabaanga nimbelele zitakwe mweembezi.” (Mk. 6:34) Sena inga twacitobela cikozyanyo cakwe kusika mpotukonzya?
5 Imwaapostolo Paulo wakafuswa mabwe, wakaumwa alimwi akwaangwa. (Inc. 14:19; 16:22, 23) Sena wakakalala akaambo kakumupenzya nkobakacita alimwi akuyeeya kuti wakali kusowa buyo ciindi cakwe kubantu bamumasi amwi alimwi amisyobo iindene-indene? Peepe. Wakalizi kuti babombe myoyo bakali kuyoojanika akati kamisyobo iindene-indene alimwi wakalilibambide kubayandaula. Sena mbotubabona aabo bajanika mucilawo motubelekela ibaambaula misyobo iindene-indene alimwi bajisi bukkale busiyene-siyene?
6. Ino ncinzi cikonzya kucitika akaambo kambotubabona ibapya kumiswaangano yambungano?
6 Kutambula Bamwi Mazuba Aano: Bantu ba Leza balikkomene kuti bakatambulwa kabotu mumbungano abakwesu alimwi abacizi aabo batakali kulanga ciimo camuntu. Imwaalumi wakajisi malezu aatanyoledwe alimwi amasusu malamfu aasika aluwezo, wakasamide zisani zilaatombe, wakasika ku Ŋanda ya Bwami kucisi ca Germany. Wakajisi mpuwo mbyaabi. Nekuba boobo, wakatambulwa kabotu kumuswaangano. Wakabotelwa cakuti imvwiki yakatobela wakajokela alimwi. Mukaindi kasyoonto, wakatalika kulibamba kabotu-kabotu wakaleka kufweba alimwi wakalembya lukwatano awakali syamwali wakwe kumfwulumende. Kakutanainda ciindi cilamfwu, abalo bana babo bamaanga basimbi bakatalika kubelekela Jehova antoomwe kabali mukwasyi.
7. Mbuti mbotukonzya kwiiya Leza wesu uutasalululi?
7 Mukutobela Leza wesu uutasalululi, atuzumanane kutamba bantu kutegwa boonse bagwasyigwe aluzyalo lwa Leza.
[Majwi aakwelelezya sikubala aali apeeji 3]
“Leza talangi ciimo camuntu, pele mumasi oonse uumuyoowa akucita bululami ulatambulwa kulinguwe.”—Inc. 10:34, 35.