Lugwalo Kuzwa Ku Kabunga Keendelezya
Nomuyandwa Bakambonima ba Jehova:
Mwaapostolo Paulo wakali kubayanda akubalumba basyominyina lyoonse. Ku Banakristo baku Roma, wakalemba kuti: “Ndalumba Leza wangu kuli-Jesu Kristo nkaambo kandinywe nyoonse, nkaambo kakuti lusyomo lwanu lulaambwa munyika yoonse.” (Rom. 1:8) Masimpe, mucisi coonse ca Roma, Banakristo aabo bamumwaanda wamyaka wakusaanguna bakalizyibidwe akaambo kalusyomo lwabo luyumu abusungu mbobakajisi mumulimo wakukambauka. (1 Tes. 1:8) Nkakaambo kaako Paulo ncaakali kubayandila kapati banyina.
Mbweena mbuli Paulo, tulamulumba Jehova notuyeeya ndinywe. Tulamuyanda kapati nyoonse. Alimwi a Jehova ulamuyanda. Nobamwi mulakazyigwa kapati pele tamuleki kukambauka. Elo busicamba amuuya wakutayoowa ngomutondezya upa Jehova kukkomana!—Tus. 27:11.
Nomubala akukkala ansi kuyeeya “Milimo (Iikkomanisya) Njobacita Bakamboni ba Jehova Mazuba Aano” ilembedwe mu Yearbook alimwi iyumya lusyomo, muya kubona kuti Mwami Jesu Kristo “uya buzunda akuzunda” alimwi cilwanyo cili coonse cikonzya kubelesyegwa kulwanya basikumutobela Kristo, tacikazwidilili.—Ciy. 6:2; Is. 54:17.
Ku Banakristo baku Filipi, Paulo wakalemba kuti: “Ndalumba Leza wangu . . . nkaambo kalugwasyanyo lwanu lwakugwasya Makani Mabotu.” (Flp. 1:3-5) To Bakabunga Keendelezya tulimvwa mbweena kujatikizya ndinywe. Mumwaka wamulimo wamu 2007, basikumwaya bali 6,691,790 bakabeleka mawoola aasika ku 1,431,761,554 mumulimo wakukambauka makani mabotu mumasi aali 236 munyika yoonse. Elo kaka mulasoleka canguzu mukumwaya makani mabotu! Amuyeeye buyo myaanda yabantu bagwasyigwa akaambo kakusoleka kwesu, kwalo kupa kuti Jehova atembaulwe!
Ciindi cimwi, Paulo wakatondezya kuti wakali kubafwida lubomba banyina. Mboobu mbwaakabalembela baku Tesalonika: “Mbotuyeeya cakutaleka . . . akukakatila kwabulangizi mbumulangila Mwami wesu Jesu Kristo kumeso aa-Leza Taateesu.” (1 Tes. 1:2, 3) Kuli mapenzi manji mubuumi. Tulasikilwa mapenzi, pesi tweelede kuliyumya. Ino mapenzi nzi ngomujisi? Sena mulityompedwe akaambo kabulwazi bumwi bumupa kuti mutaciti zyinji mumulimo wa Jehova? Sena mwakafwidwa ngomwakakwetene limwi? (Tus. 30:15, 16) Sena mwaalilwa kujana muntu wakukwatana limwi uumuyanda Jehova mbubonya mbomumuyanda alimwi nokuba kuti kuli penzi eeli, cakusyomeka mulatobela lulayo lwamu Magwalo lwaamba kukwata naa kukwatwa buyo kumuna Kristo? (1 Kor. 7:39) Sena mulasoleka canguzu kukomezya bana banu nokuba kuti mujisi penzi lyamali? Kufwumbwa naa bukkale bwanu buli buti, ikuti mwabikka ziyandika zya Bwami kumpela, mulakonzya kusyoma kuti Jehova ‘takonzyi kuluba milimo yanu aluyando ndomwakatondezya akaambo kazyina lyakwe.’ Nobakwesu abacizyi, ‘mutalengaani mukucita kabotu.’—Heb. 6:10; Gal. 6:9.
Ino ncinzi ciya kumugwasya kuliyumya? Mbweena mbuli bana Tesalonika, tulakonzya kugwasyigwa abulangizi “[bwaku]langila Mwami wesu Jesu Kristo.” Paulo wakajisi kaambo kabotu, naakakozyanisya bulangizi “[bwa]lufutuko” kungowani iikonzya kukwabilila Munakristo kumizeezo iilubide.—1 Tes. 5:8.
Masimpe, kwiinda mukuliyumya, mupa bwiinguzi kumasampu aa Saatani mumakani mapati abweendelezi bwakoonse-koonse. Saatani waamba kuti babelesi ba Leza balaliyanda alimwi akuti nokuba kuti balilisungude kubelekela Leza kwaciindi cili mbocibede, balakonzya kucileka kukomba ikuti basikilwa mapenzi naa ikuti babona kuti mamanino aanyika amuka kusika. Mulaacoolwe cakutondezya kuti Diabolosi mubeji. Buzuba abumwi bupa kuti mube afwaafwi kupegwa zilongezyo nzyomwali kulangila.
Mbweena mbuli Paulo mbwaakabalumbaizya banyina akaambo kalusyomo lwabo luyumu, kutola lubazu mumulimo wakukambauka alimwi akuliyumya kwabo, tulamulumba alimwi tulamuyanda kapati. Amuzumanane amulimo ngomucita!
Tulangila kuti mwaka uboola kuya kuba zilongezyo zyinji kuzwa kuli Leza. Kamupona kabotu.
Tobanyoko,
Ba Kabunga Keendelezya ka Bakamboni ba Jehova