Luyando lwa Kristo Lutupa Kuba Aluyando
1 Jesu wakatusiila cikozyanyo cibotu caluyando. Basikutobela Jesu beelede kutobela cikozyanyo cakwe caluyando cibotu kwiinda.—Lom. 8:35.
2 Bakamboni ba Jehova balizyibidwe kuti mbantu batondezya luyando mbuli lwa Kristo. Amuyeeye Bakamboni ibakalisungula kugwasya ciindi zilawo zimwi zyamucisi ca United States nozyakanyonyoonwa aguwo pati mu 2005. Ibantu bainda ku 20,000 bakalisungula kugwasya ibanyina bakali mumapenzi.
3 Mubusena bumwi, imeenda aamulwizi akapaya mane kusikila kumakkilomita aali 80 alimwi akali manji kusikila kumamita aali 10 kuya mujulu. Meenda naakayuminina, kwakajanika kuti maanda manji akanyonyooka. Bakamboni ibakalisungula kuzwa kuzisi ziindene-indene ibakali aluzyibo mumilimo iindene-indene, bakatolelezya azibelesyo ziyandika alimwi bakalilibambilide kubeleka mulimo uuli woonse. Eelo kaka eeci ncikozyanyo cibotu cakutondezya luyando mbuli Kristo!
4 Tobamwi tainatucitikilide ntenda iili boobu. Pele toonse buyo tulasikilwa mapenzi aakuciswa, lwesu tobeni naa umwi wamumukwasyi. Akaambo kaluyando, Jesu wakaafwida lubomba makamu aabantu nobakamuletela balwazi, alimwi “wakabaponya boonse bakali kuciswa kapati.”—Mt. 8:16; 14:14.
5 Tulabafwida lubomba bantu mbubwenya mbuli Jesu mbwaakali kubafwida lubomba. Amulange-lange cakacitikila ba Charlene ibakali amyaka yakuzyalwa iili 44, ibakali abulwazi bwakkansa alimwi bakaambilwa kuti balafwa kwainda buyo mazuba aali kkumi. Bacizyi bobilo bamumbungano, ba Sharon aba Nicolette, bakalisungula kubagwasya mumazuba aayo aakasyeede. Pele bakazumanana kupona kwansondo zili cisambomwe. Ba Sharon bakaamba kuti: “Cilakatazya kulwazya muntu ikuti kozyi kuti takoopona. Pele Jehova wakatuyumya. Eeci cakayumya cilongwe cesu a Leza alimwi akuyumya cilongwe akati kesu. Balumi baba Charlene bakaamba kuti: “Tandikabalubi bacizyi aaba akaambo kalubomba lwabo alimwi akugwasya nkobakacita. Iluyando lwabo oolu lwakapa kuti sunko eeli lyamamanino lituubile. Ndinoobalumba lyoonse. Ikulyaaba kwabo kwakayumya lusyomo lwangu muli Jehova alimwi cakandipa kuti kandibuyanda bunyina bwanyika yoonse.”
6 Sena inga mwalutondezya luyando lwanu lwabunyina mumbungano yanu? Aboobo, katubayanda bakwesu mbuli Kristo mbwaakabayanda “kusikila kumamanino.” Luyando luliboobu lutondezya kuti tuli basikwiiya ba Jesu bakasimpe.—Joh. 13:1, 34, 35.
1. Ino cikozyanyo ca Jesu citupa kucita nzi?
2, 3. Ino Bakamboni ba Jehova bajisi mpuwo iili buti?
4, 5. Ino ncinzi ciyakutukulwaizya kugwasya bamwi?
6. Ncinzi ncotweelede kubikkila maano?