Cibalo 21

Mucikombelo Cakumunzi Okwabo Jesu

KAKUNYINAA kudooneka iciindi Jesu naapiluka mumunzi ookwabo mu Nazareta, munzi oonse wanyanyaala. Katanaunka kuti akabbapatizigwe kuli Johane kwiinda-inda buyo amwaka omwe musyule, Jesu wakazibidwe kuti mmubezi. Pele lino ulizibidwe koonse-koonse kuti ngusikucita maleele. Basimunzi baliyandide kumubona kacita imwi milimo mibotu akati kabo.

Ikulangila kwabo kwaindila ciindi Jesu naaunka kucikombelo camumunzi ookwabo mbuli cilengwa cakwe. Mukati kamiswaangano waimikila kuti abale elyo wapegwa bbuku lyamusinsimi Isaya. Wajana mpokulembedwe makani kujatikizya Oyo uunanikidwe amuuya wa Jehova, alo aali kucaandaano ca 61 mu Bbaibbele lyesu sunu.

Naamana kubala kujatikizya Yooyu mbwayookambauka kwaangununwa kubaange, kubononona kwaboofu alimwi akujatikizya mwaka uusalidwe wa Jehova, Jesu wapilusya bbuku kumugwasilizi mpoonya wakkala. Bantu boonse bamulangisisya. Mpoonya waambaula ambweni kwaciindi cilamfwu kapandulula ategwa: “Sunu kwazuzigwa lugwalo olu mumatwi aanu.”

Ibantu bagambwa “kumajwi aaluzyalo” elyo balyaambauzya ategwa: “Oyu tali mwana a-Josefa na?” Pele akaambo kakuti ulizi kuti bayanda kumubona kacita maleele, Jesu wazumanana akwaamba kuti: “Ncobeni muyoondyaambila aka kasimpe kakuti, Omusilisi, kolisilika. Zyoonse nzotwakamvwa izyakacitwa ku-Kapernauma, zicite amomuno mucisi cakwanu.” Ibakali basimukobonyina Jesu bayeeya kuti ikuponya kweelede kutalikila kumunzi ikutegwa bantu bakwe bagwasigwe kusaanguna. Aboobo bayeeya kuti Jesu taabalanganya pe.

Kazi mbobayeeya, Jesu waamba makani aamwi aakacitika munsi. Ulaamba, kwakali bamukabafwu banji mucisi ca Israyeli mumamazuba aa Eliya, pele Eliya taakwe naakatumwa kuli umwi wambabo pe. Pele wakatumwa kuli mukamufwu uutali muna Israyeli waku Sidoniya kwalo nkwaakaakucita maleele aapa buumi. Alimwi mumazubaa Elisha, kwakali basicinsenda banji, pele Elisha wakasalazya buyo Naamani waku Suriya.

Akaambo kakunyema kapati kumakani aaya aamusyule aayubulula kuliyanda kwabo alimwi akubula lusyomo, boonse ibali mucikombelo banyamuka akukwelaanya Jesu anze aamunzi. Oko bamutola atala acilundu awo mpouyakidwe munzi wa Nazareta, basoleka kumusowela mujeleele. Pele Jesu wasupuka akutija. Luka 4:16-30; 1 Bami 17:8-16; 2 Bami 5:8-14.

▪ Nkaambo nzi munzi woonse wa Nazareta ncowanyanyaala?

▪ Ino bantu bauyeeyela buti mulumbe wa Jesu, pele ncinzi cabanyemya?

▪ Ncinzi bantu ncobasoleka kumucita Jesu?

Cibalo 22

Baitwa Basikwiiya Bone

NAAINDA makani aakukanza kumujaya Jesu kumunzi ookwabo wa Nazareta, walongela kumunzi wa Kapernauma munsi-munsi a Lwizi lwa Galilaya. Eci cazuzikizya bumbi businsimi bwa Isaya. Mbuboobo bwakasinsima kuti bantu baku Galilaya bakkala munsi alwizi bayoobona mumuni mupati.

Mbwayabuzumanana Jesu mumulimo wakwe wakumunikila kwiinda mukukambauka Bwami mubusena obu, wajana basikwiiya bakwe bone. Aaba bakali kweendaa nguwe musyule pele bakajokela kumulimo wabo wakuzela nswi ciindi nobakapiluka a Jesu kuzwa ku Judaya. Lino Jesu wabayandaula mbwaanga lino nciindi cakubaa bagwasyi bakkalikide balyoonse balo mbakonzya kuyiisya kutegwa bakazumanane mumulimo aakuunka.

Nkabela Jesu kayenda kumbali lyalwizi wabona Simoni Petro abeenzinyina kabasanzya nsabwe zyabo, waunka kulimbabo. Wanjila mubwato bwa Petro wamukumbila kuti abutantamune buzwe kunkomwe bweende kaniini. Nobeenda asyoonto, Jesu wakkala mubwato akutalika kuyiisya makamu aabantu aakali mumbali-mbali aalwizi.

Mpoonya Jesu ulaamba kuli Petro: “Katuya akati kaziba kuti mukawaale tunyandi twanu kutegwa mujaye nswi zinji.” (BT)

Petro waingula kuti: “Omwami twali kuzuba nswi masiku oonse, tatujene cintu, nokubaboobo kujwi lyako ndiyoonika nsabwe.”

Nobacita obo, bajaya nswi zinji, mane nsabwe zyabo zyatalika kuzapuka. Cakufwambaana boobola bazubinyina ibali mubwato bumwi bulaafwaafwi kuti bazoobagwasye. Mukaindi mato oonse obile azula answi zinji cakuti atalika kubbila. Azikubone boobu Petro, wavwundama kumatende aa Jesu akwaamba kuti: “Kozwa kulindime nkaambo ndi mwaalumi mucitazibi, Omwami.”

Jesu waingula ategwa: “Utayoowi, kuzwa sunu unoozuba bantu.”

Jesu wamwiita awalo Andreya munyina Petro. Wabakulwaizya ategwa: “Amunditobele, nkamucite basikuzuba bantu.” Basikuzubanyina ba Jakobo a Johane ibana ba Zebedayo batambwa abalo mbubonya elyo abalo bamutobela cakutalengaana. Aboobo aba bone bausiya mulimo wabo wakuzuba nswi akuba basikutobela Jesu bone bakkalikide balyoonse. Luka 5:1-11; Matayo 4:13-22; Marko 1:16-20; Isaya 9:1, 2.

▪ Nkaambo nzi Jesu ncaita basikwiiya bakwe kuti bamutobele, alimwi mbaani aba?

▪ Mmaleele nzi aamuyoosya Petro?

▪ Nkuzuba kwamusyobo nzi Jesu nkwatamba basikwiiya bakwe kuti bacite?