Cibalo 83

Ikusamausigwa amu Farisi

JESU ucili muŋanda yamu Farisi oyu walupati-pati alimwi wazwaa kuponya muntu simulungu. Naalangilila beenzunyina nkobalisalila masena aalemenede kupobwe, wayiisya ciiyo kujatikizya kulicesya.

Aawo Jesu wapandulula ategwa: “Anooli watambwa muntu kuya kupobwe lyakukwata, utakali acuuno cabulemu, nkaambo ambweni watambwa aumwi uukwiinda bulemu, elyo simeenzaanu aboola kulinduwe akwaambila kuti, Muswene oyo muntu abusena awa, ndilyonya yebo watalika kuzwa abuusu kuyookala acuuno icili munsi.”

Aboobo Jesu walailila ategwa: “Kwalo kuti watambwa, koya ukale kucuuno icili munsi omwini, kuti uwakutamba asika akakwaambile kuti, Mweenzuma, nyamuka uboole kumbele, ndoti jane bulemu kumbele lyabaabo boonse mbokede abo akulya.” Kamanizya Jesu ulaamba: “Nkaambo umwi umwi uulisumpula uyoofwiinsigwa, ayooyo uulifwiinsya uyoosumpulwa.”

Mpoonya Jesu waambila mu Farisi wakamutamba akupandulula mbwayelede kucita cisusulo naa cilalilo icinga caleta coolwe cini-cini kuli Leza. “Kuti wacita cisusulo na cilalilo, uta[t]ambi beenzinyoko, nebaba banabakwanu, nebaba basazinyoko, nebaba mboomuyakide abo bavubi, nkaambo ambweni abalo balakutamba, ujane kubweedwa. Pele kuti wacita pobwe, kotamba abacete, ezilema, abatyokede, aboofu, nozooba acoolwe nkaambo tabakwe cakukubweedezezya.”

Ikupa cakulya cili boobu kuli baabo bapengede kuyooleta coolwe kuli yooyo uupa nkaambo mbubwena Jesu mbwaapanduluda simeenzaakwe, “Uyoobwedezezegwa kukubuka kwabaluleme.” Ibupanduluzi bwa Jesu bwacilyo eci icileta coolwe bwayeezya mweenzunyina cakulya camusyobo umbi. Oyu mweenzu ulaamba: “Uli acoolwe uuti kalye mikamu mu-Bwami bwa-Leza.” Pele tabali boonse ibabuyanda munzila yeelede bulangizi obo bukkomanisya mbubwena Jesu mbwayaambele kutondezya kwiinda mucikozyanyo.

“Umwi muntu wakacita pobwe ipati, wakatamba banjibanji, nkabela wakatuma muzike wakwe . . . kuyooambila abakatambidwe kuti, Kamuboola nkaambo zyoonse zililulamikidwe kale. Nkabela boonse abo bakatalika kulikazizya (kulitamizya) ejwi lyomwe. Mutaanzi wakamwaambila kuti, Ndakaula muunda, ndileelede kuyooubona, ndakukumbila ukandikazizizye kabotu. Umwi wakati, Ndakaula basune abali kumi, lino ndaya kuyoobasola, ndakukumbila ukandikazizizye kabotu. Umwi wakati, Ndakakwata musimbi ncentakonzya kuboola.”

Elo nkutamauka kaka ooku! Ede imuunda naa zivwubwa kanjikanji zilangilwa limwi kazitanaulwa aboobo takuyandiki kapati pe kuti zilangwe alimwi. Mbubwena buyo, ikukwata kwamuntu takweelede kumulesya kuzumina kutambwa kuyandika boobu. Aboobo naamvwa kutamauka kuli boobu, mwami wanyema kapati akulailila muzike wakwe kuti:

“Kofwamba uinke mumigwagwa amutuzila twamumunzi, ukabalete okuno abacete, ezilema, aboofu, abatyokede. Limwi muzike wakaamba kuti, Omwami, kwacitwa mbuli kulailila kwako, nokubaboobo mpobucili busena. Nkabela mwami wakaambila muzike kuti, Koya kumigwagwa akumikusi ukabagubizye banjile, kuti ŋanda yangu izyule. . . . Kubaalumi abo abakatambidwe taakwe aomwe uuti kasole cilalilo cangu.”

Nciimo cili buti icipandululwa mucikozyanyo? “Mwami” wapa cakulya wiiminina Jehova Leza; “muzike” uuyabutamba, Jesu Kristo; alimwi “pobwe ipati” izyoolwe zyakuba mumulongo wamu Bwami bwakujulu.

Aabo bataanzi kukutambwa oku kwakuba mumulongo wamu Bwami bakali basololi babukombi bwaci Juda bamumazubaa Jesu. Nokuba boobo bakakukaka kutambwa oku. Aboobo ikutalika kapati lya Pentekoste wamu 33 C.E., ikutambwa kwabili kwakacitwa kubantu basulaikidwe abalicesya bamucisi caba Juda. Pele tabali banji bakazumina kuzuzya masena aamu Bwami bwa Leza bwakujulu aali 144,000. Aboobo mu 36 C.E., myaka yotatwe acisela yakainda, ikutambwa kwatatu alimwi kwamamanino kwakacitwa kuli Bamasi batapaludwe aboobo kuyobolola kwabantu bali boobu kwazumanana kusikila sunu. Luka 14:1-24.

▪ Nciiyo nzi cijatikizya kulicesya ncaayiisya Jesu?

▪ Ino simeenzu ukonzya buti kubamba cilalilo cileta coolwe kuli Leza, alimwi nkaambo nzi ncociyoomuletela kukondwa?

▪ Nkaambo nzi kulilekelela kwabaabo bakatambwa ncokuli buyo kutamauka?

▪ Ncinzi ciimininwaa cikozyanyo ca Jesu ca “pobwe ipati”?

Cibalo 84

Mukuli Wakuba Sikwiiya

NAAZWA muŋanda yamu Farisi walupati-pati, walo uulibonya kuti ngumwi Wabasinkuta Mpati yaba Juda, Jesu wazumanana kugama ku Jerusalemu. Makamu-makamu aabantu bamutobela. Pele ino babwene nzi? Ncinzi cini-cini ncocaamba ikuba sikumutobela wini-wini?

Mbobayaabweenda, Jesu waceba kumakamu-makamu ambweni akubagambya naati: “Anooli muntu uuza kulindime, uutasuli wisi, abanyina, amukaintu wakwe, abana bakwe, abanabakwabo, abacizi bakwe, ii, abwalo buumi bwakwe mwini, takonzya kuba sikwiiya wangu.”

Ino Jesu waamba nzi? Awa Jesu taambi kuti basikwiiya bakwe beelede kubasula ncobeni basazinyina. Pele beelede kubasula mukuti kabatabayandi kapati mbuli mbobayanda nguwe. Syaanene wa Jesu wansiku Jakobo wakaambwa kuti wakali ‘musulide’ Leya akuyanda Rakele icakalikwaambilizya kuti Leya taakali kuyandwa kapati mbuli mwanookwabo Rakele.

Amubone kuti Jesu wakaamba kuti sikwiiya weelede kubusula “abwalo buumi bwakwe.” Alimwi awa Jesu waamba kuti sikwiiya mwini-mwini weelede Kumuyanda kwiinda mbwayanda buumi bwakwe. Aboobo Jesu ukankaizya kuti kuba sikwiiya wakwe mmukuli uutali wakusobanina. Tacili cintu cakucita kakutakwe kulanga-langa kabotu-kabotu.

Ibuyumuyumu akupenzyegwa zilajatikizigwa mukuba sikwiiya wa Jesu mbubwena mbwayaambele kutondezya kuti: “Kufumbwa muntu uutabwezi [cisamu NW] cakwe mwini akundicilila, takonzya kuba sikwiiya wangu.” Aboobo sikwiiya mwini-mwini weelede kuti kalisungude kupenga penzi lyakusampaulwa Jesu ndyaakayumuna nokuba kubikkilizya kuti kacikonzyeka ikufwa mumaanzaa basinkondo ba Leza calo Jesu ncayoocita lino-lino.

Aboobo ikuba sikwiiya wa Kristo, mmakani amwi makamu-makamu aabantu aamutobela ngaayelede kulanga-langa kabotu-kabotu. Jesu wakankaizya kaambo aka kwiinda mucikozyanyo. Ulaamba: “Ino nguuli akati kanu, uuyanda kuyaka ŋanda ndamfu, uutasaanguni kukala sansi, abale mali ngati yasye ŋanda, abone na ulijisi aakwiizyulizya? Kuti antela amane kuyaka ntalisyo, akakilwa kwiimana, boonse abiibona banoomuseka, banooamba kuti, Oyu muntu wakatalika kuyaka, pele taakwe naakakonzya kwiimanizya.”

Aboobo Jesu utondezya makamu bamutobela kuti kabatanaba basikwiiya bakwe beelede kulisalila kuti balakonzya kuzizuzikizya ezyo zijatikizidwe mbubwena mbuli muntu uuyanda kuyaka ŋanda ndamfwu mbwabona kuti katanatalika kuyaka ulijisi zyoonse zyakubelesya kutegwa akiimanizye. Kaamba cikozyanyo cimbi, Jesu wazumanana ategwa:

“Nguuli mwami uuya kuyoolwanya mwami umwi, uutasaanguni kukala sansi akuyeeya na uli enguzu abasilumamba abali mwaanda wemyaanda, kulwanya oyo uumusikila uujisi abali myaanda yobile yemyaanda? Kwataba boobo, umwi kacili kulekule, ulatuma abayoomuzibya kuti walibonzya kulinguwe.”

Mpoonya Jesu wakankaizya kaambo kacikozyanyo cakwe kaamba kuti: “Mbubonya obo, umwi umwi kulindinywe uutaleki zyoonse nzyajisi, takonzya kuba sikwiiya wangu.” Ncencico eco makamu-makamu aabantu bamutobela, inzya, antoomwe abaabo boonse bayiya zya Kristo ncobeelede kuti kabalisungude kucita eco. Beelede kuti kabalibambilide kwaaba zyoonse nzyobajisi—ilubono lwabo loonse kubikkilizya abuumi—ikuti kabayanda kuba basikwiiya bakwe. Sena mulilibambilide kucita boobu?

Jesu wazumanana ategwa: “Munyo mubotu.” Mu Mulumbe wakwe waa Cilundu wakaamba kuti basikwiiya bakwe “[m]munyo wanyika” nkokwaamba kuti bagwasya bantu kuti bakkale kwaciindi cilamfwu mbubwena mbuli munyo wini mbuucita kuti nyama ikkale kwaciindi cilamfwu. Jesu wamanizya ategwa: “Pele awalo munyo kuti wasampuka, ino ulalunzigwa buti? Tuuelede mumuunda nekuba kuyobwedwa mbolela. Pele ulasoogwa buyo. Uujisi matwi aakuswiilizya, aswiilile.”

Aboobo Jesu utondezya kuti nobaba baabo bali basikwiiya bakwe kwaciindi cilamfwu tabeelede kulengaana mumakanze aabo aakuzumanana. Ikuti bacita boobo, balabula mulimo, banooli basikutukilwa anyika eyi alimwi tabanooelede pe kuli Leza, mane bayooleta sampu kuli Leza. Aboobo mbubwena mbuli munyo wasampuka, balasoogwa anze, inzya, balanyonyoonwa. Luka 14:25-35; Matalikilo 29:30-33; Matayo 5:13.

▪ Ino caamba nzi ‘kusulaika’ basazinyoko alimwi akulisula?

▪ Nzikozyanyo nzi zyobile Jesu nzyaapa, alimwi zyaamba nzi?

▪ Muli kaambo kali buti mumajwi aa Jesu aamamanino aajatikizya munyo?