Cibalo 116
Ikugwasya Baapostolo Bakwe Kulibambila Kuunka Kwakwe
MULALILO waciibalusyo wamana pele Jesu abaapostolo bakwe bacili muŋanda yamujulu. Nokuba kuti Jesu ulaya lino-lino, ucijisi zintu zinji zyakwaamba. Wabakulwaizya ategwa: “Myoyo yanu itapengi, kamusyoma Leza.” Wayungizya ategwa: “Kamundisyoma amebo.”
Jesu wazumanana ategwa: “Muŋanda ya-Taata mwaali makalilo manji, . . . Ndiya kukumubambila busena. . . . kuti oko nkwembede anywebo mukabe nkuko. Alimwi oko nkwenja mulikuzi, ayalo nzila iiya nkuko muliizi.” Ibaapostolo teebamvwisya kuti Jesu waamba kuunka kujulu, aboobo Tomaso wabuzya ategwa: “Omwami, tatuzi nkoya, ino twiizibe buti nzila?”
Jesu waingula ategwa: “Ndime nzila, ndime bwini, ndime buumi.” Inzya, nkwiinda mukumutambula alimwi akwiiya nzila yakwe yabuumi muntu nanga wanjila muŋanda yakujulu ya Taata nkaambo mbubwena mbwaamba Jesu: “Takukwe uuza kuli-Taata, pele mulindime.”
Filipo walomba ategwa: “Omwami, tubonye Uso, kwalo nkotuyandisya.” Filipo uyanda kuti Jesu atondezye kulibonya kwini kwa Leza mbuli mbucakacitika nsiku muzilengaano kuli Musa, Eliya alimwi a Isaya. Pele masimpe baapostolo balaa cintu cibotu kwiinda zilengaano zyamusyobo ooyo, mbubwena Jesu mbwaamba ategwa: “Cakomenesya buti ciindi ncotwakali ayebo, Filipo, tonandiziba asunu na? Oyo uwandibona, wamubona awalo Taata.”
Jesu ulaciiminina kapati ciimo ca Usyi cakuti ikukkala limwi anguwe alimwi akumutobela cili mbuli kubona Usyi buya. Pele Usyi ulisumpukide kwiinda Mwana mbubwena Jesu mbwazuminizya ategwa: “Majwi ngendamwaambila nsilyaambili ndemwini.” Jesu ulapa bulemu boonse kabotu-kabotu kuli Usyi wakujulu.
Elo cabakulwaizya kaka baapostolo kumvwa Jesu lino kabaambila kuti: “Oyo uundisyoma, uyoocita milimo iili mbuli njencita, mane do akiicite mipati iinda eyi”! Awa Jesu taambi kuti basikumutobela bayoocita milimo mipati yamaleele kwiinda njaakacita. Peepe, pele waamba kuti bayoocita mulimo kwaciindi cilamfwu, mumasena manji alimwi kubantu banji.
Jesu takabafwutatili basikwiiya bakwe aakuunka. Wasyomezya ategwa: “Coonse icili buti ncomuti kakumbile muzina lyangu ndiyoocicita.” Kunze lyaboobo ulaamba: “Amebo ndiyookumbila Taata, uyoomupa Mugwasyi umbi kuti akale anywebo lyoonse. Ngonguwe Muuya wabwini.” Kumbele, Jesu kaunkide kujulu, watila muuya uusalala kuli basikwiiya bakwe, imugwasyi umbi.
Ikuunka kwa Jesu kulaafwaafwi mbubwena mbwaamba ategwa: “Kwasyaala ciindi ciniini, inyika tiicindiboni limbi.” Jesu uyooba muntu wamuuya uutakonzyi kubonwa abantunsi. Pele alimwi Jesu wasyomezya baapostolo bakwe basyomeka ategwa: “Nywebo mulandibona. Nkaambo ndi muumi, anywebo munooli baumi.” Inzya, Jesu takalibonyi buyo muciimo cabuntu aakubusigwa pele aciindi ceelede uyoobabusya kuti babe baumi kujulu anguwe kabali bantu bamuuya.
Lino Jesu waamba mulawo muuba-uba ategwa: “Oyo uujisi milao yangu, akwiibamba nguundiyanda. Awalo uundiyanda uyooyandwa Taata, amebo ndiyoomuyanda, ndiyoolitondezya kulinguwe.”
Amvwe boobu mwaapostolo Judase, walo uuitwa kuti Tadayo wanjilila kwaamba ategwa: “Omwami, nkaambo kanzi ncoyooliyubulula kulindiswe, kutali kunyika?”
Jesu waingula ategwa: “Na muntu ulandiyanda unoobamba ijwi lyangu, awalo Taata ulamuyanda . . . Oyo uutandiyandi tabambi majwi aangu.” Ikwiindana abasikumutobela bamvwida, inyika taibikkili maanu kunjiisyo zya Kristo. Aboobo taliyubununi kulimbabo.
Mumulimo wakwe waanyika, Jesu wayiisya baapostolo bakwe zintu zinji. Ino bayooziyeeya buti zyoonse kapati mbwaanga nokuba kusika aciindi awa bacaalilwa kuzimvwisya? Mucoolwe, Jesu wasyomezya ategwa: “Mugwasyi, Muuya Uusalala, Taata ngwayootuma muzina lyangu, uyoomwiisya zintu zyoonse, uyoomuyeezya zyoonse nzendakamwaambila.”
Alimwi kabaumbulizya, Jesu ulaamba: “Ndamusiila luumuno, ndamupa luumuno lwangu, . . . Myoyo yanu itapengi.” Masimpe Jesu ulainka pele wapandulula ategwa: “Kuti nomwali kundiyanda, nomwali kukondwa nkaambo nja kuli-Taata, nkaambo Taata mupati kwiinda ndime.”
Jesu wacaalilwa buyo ciindi cisyoonto cakubaa ambabo. Ulaamba: “Nsikooyoomwaambila limbi makani manjimanji, nkaambo mwami wenyika wasika, walo taakwe ncajisi kulindime.” Saatani Diabolosi walo wakakonzya kunjila Judase akumuzunda, ngomuleli wanyika. Pele kunyina bubi buli boonse muli Jesu mbwakonzya kubelesya Saatani kutegwa amulesye kubelekela Leza.
Ikubandika Cabulongwe
Nowamana mulalilo waciibalusyo, Jesu wali kukulwaizya baapostolo bakwe mumubandi uukkazika moyo. Ambweni lino ciindi cainda akaandabwe kabusiku. Aboobo Jesu ulaamba: “Amunyamuke, tuzwe kuno.” Nokuba boobo, kabatanazwa, akaambo kaluyando ndwajisi kulimbabo, Jesu wazumanana kwaambaula, wapa cikozyanyo cikulwaizya.
Watalika ategwa: “Ndime cisiko cini camusaansa, Taata ngomukamwini muunda.” Mukamwini muunda Mupati, Jehova Leza, wakasyanga musaansa oyu wacikozyanyo ciindi naakananika Jesu amuuya uusalala ciindi calubbapatizyo lwakwe mu 29 C.E. Pele Jesu wazumanana kutondezya kuti musaansa taawiiminini buyo nguwe, ulaamba: “Mitabi yoonse yangu iitazyali micelo wiitema, ayalo mitabi yoonse iizyala micelo wiikokweda kuti izyalisye micelo. . . . Mbubonya mutabi mbuutakonzya kuzyala micelo wini watanooli kucisiko, anywebo mbubonya tamukonzya, mwatakalilila mulindime. Ndime cisiko, nywebo muli mitabi.”
Aciindi ca Petekoste nokwainda mazuba aali 51, ibaapostolo alimwi abamwi baba mitabi yamusaansa ciindi muuya uusalala nowatilwa ali mbabo. Limwi bantu bali 144,000 baba mitabi yamusaansa wacikozyanyo. Antoomwe acisiko camusaansa, Jesu Kristo, aba baba musaansa wacikozyanyo uuzyala micelo ya Bwami bwa Leza.
Jesu wacipandulula icipa kuzyala micelo ulaamba: “Uukalilila mulindime, amebo mulinguwe, walo ulazyala micelo minjiminji, nkaambo mwaanzaana amebo tamukonzya kucita cintu.” Nokuba boobo, ikuti naa muntu waalilwa kuzyala mucelo, Jesu ulaamba, “wasoogwa mbuli mutabi, wayuminina. Eno bantu biitebba, akwiisowela mumulilo, nkabela yatentwa.” Pele, Jesu wasyomezya ategwa: “Mwanookalilila mulindime, aalo majwi aangu anookalilila mulindinywe, mwaakukumbila kufumbwa cintu ncomuyanda, ciyooba mpawo.”
Kunze lyaboobo, Jesu waambila baapostolo bakwe ategwa: “Taata ulalemezegwa, mwazyala micelo minjiminji, ncomunooli basikwiiya bangu.” Imucelo ngwalombozya Leza kuzwa kumitabi, nkutondezya ziimo zili mbuli zya Kristo, ikapati luyando. Kunze lyaboobo, mbwaanga Kristo wakali sikwaambilizya Bwami bwa Leza, mucelo uulombozyegwa ulabikkilizya amulimo wabo wakugwasya bantu kuba basikwiiya mbuli mbwaakacita walo.
Lino Jesu wakulwaizya ategwa: “Kamukalilila muluyando lwangu.” Pele ino baapostolo bakwe bakonzya buti kucita boobo? Ulaamba: “Mwanoobamba milao yangu, munookalilila muluyando lwangu.” Kacizumanana Jesu wapandulula ategwa: “Ngooyu mulao wangu kuti muyandane, mbubonya mbwendamuyanda. Taakwe uuli aluyando ulwiinda olu, kuti muntu atulile beenzinyina buumi bwakwe.”
Mumawoola masyoonto buyo, Jesu ulatondezya luyando olu lwiinda ikwiinda mukutulila baapostolo bakwe buumi bwakwe alimwi abaabo boonse bamusyoma. Icikozyanyo cakwe ceelede kukulwaizya basikumutobela ikubaa luyando lwakulyaaba kuli umwi aumwi. Olu luyando luyoobazibya, mbubwenya Jesu mbwaakaambide musyule ategwa: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.”
Kazibya beenzinyina, Jesu ulaamba: “Munooli beenzuma mwanoozicita nzemwaambila. Nsicimwaambi limbi kuti muli bazike, nkaambo muzike tezi ncacita simalelaakwe, anu ndamwaamba kuti muli beenzuma, nkaambo zintu zyoonse nzendakamvwa kuli-Taata, ndamuzibya nzizyo.”
Ncibotu kaka cilongwe eci—ikuba balongwe beni-beni a Jesu! Pele ikutegwa bazumanane mucilongwe eci, basikumutobela beelede “kuzyala micelo iitamani.” Ikuti bacita obo, Jesu ulaamba, “Taata uyoomupa kufumbwa ncomuyoomukumbila muzina lyangu.” (BT) Inzya, obo mbulumbu bupati bwakuzyala micelo ya Bwami! Naamana kukulwaizya baapostolo bakwe kuti ‘bayandane umwi amweenzinyina’ Jesu wapandulula kuti nyika iyoobasula. Pele wabakulwaizya kuti: “Na inyika yamusula, mulizi kuti yali kundisulide kale.” Mpoonya Jesu wayubununa ncoibasulila nyika basikumutobela ulaamba: “Nkaambo tamuli bayeeyi nyika, pele ndakamusala kuzwa kunyika, nkakaambo ako inyika nciimusulide.”
Kapandulula azimbi ncoibasulila nyika, Jesu wazumanana ategwa: “Zyoonse zintu ezi bazoomucitila nzizyo nkaambo kezina lyangu, nkaambo tabamuzi [Jehova Leza] uwakandituma.” Imilimo ya Jesu yamaleele mane ipa kuti abo bamusulide basyome mbubwena mbwaamba ategwa: “Kuti nendatakacita milimo akati kabo iitacitidwe umbi, nobatajisi cibi, pele eno batubona, batusula mebo a-Taata.” Aboobo mbubwenya Jesu mbwaamba, ilugwalo lwazuzikizigwa ilwakuti: “Bakandisula neentakwe kaambo.”
Mbubwenya mbwaakacitide musyule, Jesu alimwi wabakulwaizya kwiinda mukubasyomezya kuti ulabatumina mugwasyi, muuya uusalala walo uuli ninguzu zya Leza. “Nguuyoondilungulula. Anywebo muli bakamboni.”
Kukulwaizya Kumbi Kwakulaya
Jesu abaapostolo bakwe balibambila kuzwa muŋanda yamujulu. Wazumanana ategwa: “Ndamwaambila makani aya kuti mutalebwi.” Mpoonya wacenjezya ategwa: “Bayoomutanda muzikombelo, alimwi ciindi ciyoosika kuti oyo uuti kamujaye uyoocita anga, Ndamanina Leza mulimo.”
Kulibonya kuti baapostolo bakatazigwa kapati akucenjezya oku. Nokuba kuti Jesu wakalibaambide musyule kuti nyika iyoobasula, taakwe naakayubulude pe cakugaminina boobu kuti bayoojaigwa. Jesu wapandulula ategwa: “Nsikamwaambilide ezi zintu kusaanguna nkaambo ndakacili anywebo.” Pele ncibotu kaka kuti wabaambilila limwi makani aya katanaunka!
Jesu wazumanana ategwa: “Pele eno ndainka kulooyo uwakandituma, akati kanu takukwe uundibuzya kuti, Ino uyai?” Imangolezya, bakalibuzide kuti naa uyayi pele lino bayoowa kapati azintu nzyabaambila cakuti baalilwa kumubuzya azimbi kumakani aya. Mbubwenya Jesu mbwaamba kuti: “Nkaambo ndamwaambila zintu ezi, myoyo yanu ilizywide buusu.” Ibaapostolo bausa kutali buyo akaambo kakuti baziba kuti bayoopenga alimwi akujaigwa pele nkaambo kakuti Mwami wabo ulaunka.
Aboobo Jesu wapandulula ategwa: “Nceceelede kulindinywe kuti ndiinke, nkaambo ndatainka Mugwasyi takooyoosika kulindinywe, pele kuti ndainka ndiyoomutumina nguwe.” Mbwacili muntunsi, Jesu ukonzya buyo kuba abusena bomwe, pele aakuunka kujulu, ulakonzya kutuma mugwasyi, muuya uusalala wa Leza kuli basikumutobela ikuli koonse nkobanga kababede anyika. Aboobo ikuunka kwa Jesu kuyoogwasya.
Jesu ulaamba muuya uusalala, “uzooipa mulandu inyika aazibi, aabululami, aalubeteko.” Icibi canyika, icakwaalilwa kusyoma Mwanaa Leza ciyooyubululwa. Kunze lyaboobo, ikubazula mumulandu wabululami bwa Jesu kuyootondezegwa kwiinda mukuunka kwakwe kuli Usyi. Alimwi ikwaalilwa kwa Saatani anyika yakwe mbyaabi kuti bamulesye kusyomeka Jesu, mbumboni bulibonya bwakuti mwami wanyika eyi wabetekwa.
Jesu wazumanana ategwa: “Ndicili amakani manji aakumwaambila, pele tamwaakonzya sunu.” Aboobo Jesu wasyomezya kuti aakutila muuya uusalala zyalo zili ninguzu zya Leza, uyoobagwasya kumvwisya zintu ezi kweelana anguzu zyabo zyakuswiilila.
Ibaapostolo baalilwa kumvwisya kuti Jesu uyoofwa kwamana waawo uyoolibonya alimwi kulimbabo aakubusigwa. Aboobo babuzyanya ategwa: “Ino nkokutinzi obo mbwaatwaambila kuti, Kaba kaindi kaniini tamucindiboni limbi, alimwi kaba kaindi muyoondibona, aboobo mbwaamba kuti, Nkaambo ndiya kuli-Taata?”
Jesu waziba kuti bayanda kumubuzya aboobo wapandulula ategwa: “Ncobeni ndamwaambila nkasimpe kuti mulalila akoomoka, pele inyika iyoobotelwa. Alimwi muyoousa pele kuusa kwanu kuyoosanduka kubotelwa.” Mubuzuba mbubonya obo kumazuba Jesu ajaigwa, basololi bacikombelo banyika balakondwa pele basikwiiya balausa. Nokuba boobo ikuusa kwabo kwaba kukondwa abusigwa Jesu! Alimwi kukondwa kwabo kwaindila ciindi naabapa nguzu ku Pentekoste kuti babe bakamboni bakwe kwiinda mukutila muuya uusalala wa Leza kuli mbabo!
Kakozyanisya ciimo cabaapostolo acamwanakazi uumyongwa, Jesu ulaamba: “Mwanakazi natumbuka ulausa, nkaambo ciindi cakwe casika.” Pele Jesu ulaamba oyu mutumbu tacaayeeyi mapenzi aakwe mbwaatumbukilwa mwanaakwe aboobo ukulwaizya baapostolo ategwa: “Anywebo mulausa eno pele ndiyoomubona alimwi [ndaakubusigwa], myoyo yanu iyookondwa, akwalo kukondwa kwanu takukwe uuti kamunyange.”
Kusika aciindi awa, ibaapostolo tabana lombede muzina lya Jesu. Pele lino ulaamba: “Kufumbwa cintu ncomuyookumbila kuli-Taata muzina lyangu uyoomupa. . . . Nkaambo Taata mwini ulamuyanda, nkaambo kakuti mwandiyanda mebo, alimwi mwasyoma kuti ndakazwida kuli-Taata. Ndakazwa kuli-Taata, ndakeza ansi. Alimwi ndiisia nyika, ndilaya kuli-Taata.”
Imajwi aa Jesu abakulwaizya kapati baapostolo. Balaamba: “Aboobo twasyoma kuti wakazwa kuli-Leza.” Jesu wabuzya ategwa: “Sena mwasyoma eno? Amulange, ciindi cilasika, ncobeni ncencico cino, ncomuti mwaike umwi umwi kulizyakwe, mulandisia endike.” Nocikatazya buti kusyoma, eci cacitika mubusiku mbubonya obo!
“Ncendamwaambila zintu ezi kuti mulindime mube alumuuno.” Jesu wamanizya ategwa: “Munyika mulaba amapenzi, pele amulimbe myoyo, ndakiizunda nyika.” Jesu wakiizunda nyika kwiinda mukumanizya kucita kuyanda kwa Leza nasoleka munzila yoonse ili buti Saatani anyika yakwe ikunyonyoona kusyomeka kwa Jesu.
Imupailo Wamamanino Muŋanda ya Mujulu
Akaambo kaluyando kubaapostolo bakwe, Jesu walikubagwasya kulibambila kuunka kwakwe ikwasika afwaafwi. Lino naamana kubalailila akubakulwaizya, walungumana kujulu akulomba kuli Usyi ategwa: “Lemya Mwanaako kuti awalo akulemye. Mbubonya mbookamupa bwami kubantu boonse, kupa buumi ubutamani kulibaabo boonse mbookamupa.”
Elo alayumya-yumya kaka makani aaya ngaatalika Jesu—buumi butamani! Mbwapedwe “bwami kubantu boonse,” Jesu ulakonzya kugwasya bantu boonse bafwa kwiinda mucipaizyo cakwe cacinunuzyo. Pele upa “buumi ubutamani” kuli baabo balikke Usyi mbazumina. Kacizumanana amakani aakwe aya aabuumi butamani, Jesu wazumanana mupailo wakwe ategwa:
“Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” Inzya, lufwutuko luyeemi akuziba Leza a Mwanaakwe. Pele nzinji ziyandika kunze lyakuziba buyo.
Imuntu weelede kubaziba mubwini, ikubaa cilongwe cili kabotu ambabo. Imuntu weelede kulimvwa mbuli mbubalimvwa kujatikizya zintu akubona zintu mbuli mbubazibona. Kunze lyaboobo, imuntu weelede kusolekesya kwiiya ziimo zyabo zibotu mukweendelezya bamwi.
Mpoonya Jesu wapaila ategwa: “Ndakakulemya ansi, ndazyulizya mulimo oyo ngookandipa kuti nkuucite.” Mbwaamanizya mulimo wakwe kusika aciindi awa alimwi kasyomede kuti uyoozwidilila akumbele, walomba ategwa: “Taata, kondilemya antoomwe ayebo abulemu obo mbwendakali kujisi nkencili ayebo, inyika kiitanaanzwa.” Inzya, lino walomba kupilusilwa bulemu bwaakajisi kujulu kwiinda mukubusigwa.
Ikwaamba mulimo wakwe mupati anyika mubufwaafwi, Jesu ulaamba: “Ndakazibya zina lyako kubantu mbookandipa abali ansi. Bakali bako, nkabela wabapa ndime, abalo babamba ijwi lyako.” Jesu wakabelesya zina lya Leza, Jehova, mumulimo wakwe alimwi wakatondezya mbuli mbolyeelede kwaambwa mubuluzi pele nkocili acimbi ncaakacita kuzibya zina lya Leza kubaapostolo. Alimwi wakavwuzya luzibo lwabo akuyandisya Jehova, iciimo cakwe alimwi amakanze aakwe.
Kapa bulemu kuli Jehova kuti Ulisumpukide, Walo ngwabelekela, Jesu wazumina cakulicesya ategwa: “Majwi ngookandipa ndakaapa mbabo. Bakaatambula, bakazibisya kuti nkasimpe ndakazwa kulinduwe.”
Mpoonya kaandaanya basikumutobela abantu bambi buyo, Jesu wapaila ategwa: “Ndabakombela, nsikombeli nyika pele balo mbookandipa, nkaambo mbabako. . . . Nendacili ambabo, ndali kubabamba . . . . Ndali kubatabilila, eno taakwe omwe wabo uusweekede pele mwana uuingaila walo [“wakeelede kunyonyooka,” BT], ikwaamba Judase Iskariote. Aciindi aawa, Judase ujisi bubi amulimo wakwe mubyaabi wakwaaba Jesu. Aboobo cakutaziba, Judase uzuzikizya Magwalo.
Jesu wazumanana kupaila ategwa, “inyika yakabasula.” “Nsikumbili kuti ubagwisye munyika, pele kuti ubavune kulooyo mubi. Tabali banyika mbuli mbwentali wenyika amebo.” Basikutobela Jesu bali munyika, inyika eyi yabantu iilelwaa Saatani pele tabakwe lubazu anjiyo abubi bwanjiyo alimwi beelede kuzumanana lyoonse.
Jesu wazumanana ategwa: “Ubasalazye abwini bwako, ijwi lyako mbobwini.” Awa Jesu waamba Magwalo aaci Hebrayo kuti “[m]bwini” alo ngaakali kuzubulula lyoonse-lyoonse. Pele nzyaakayiisya basikwiiya bakwe alimwi anzyoobakazyoolemba kwiinda mumuuya mu Magwalo aa Bunakristo aa Cigiliki azyalo “[m]bwini.” Ibwini bulakonzya kusalazya muntu, kucinca buumi bwakwe akucita kuti muntu atabi wanyika.
Lino Jesu wakombela ‘kutali baaba balo, pele abaabo boonse abamusyoma nkaambo kejwi lyabo.’ Aboobo Jesu upailila baabo ibayooba basikumutobela bananike alimwi abamwi basikwiiya kumbele balo bayoobungikwa mu “caanda cambelele comwe.” Ncinzi ncabalombela boonse aba?
“Kuti boonse babe bamwi, mbuli nduwe Taata mboli mulindime, amebo mulinduwe, . . . kuti babe bamwi mbubonya mbutuli bamwi.” Jesu a Usyi tabali bamwi kumubili pele baleendelana muzintu zyoonse. Jesu ulapaila kuti basikumutobela babe bamwi kutegwa “inyika ikazibe kuti nduwe owakandituma, nduwe owakabayanda mbubonya mbookali kundiyanda amebo.”
Ikulombela baabo ibayooba basikumutobela bananikidwe, Jesu lino walomba kuli Usyi wakujulu. Walomba nzi? “Babe antoomwe amebo nkwembede, kuti babone bulemu bwangu mbookandipa, nkaambo wakali kundiyanda inyika kiitanaanzwa,” nkokwaamba kuti Adamu a Eva kabatanabaa bana. Kacicili kule-kule ciindeeco, Leza wakayanda Mwanaakwe simuzyalwa alikke walo wakazyooba Jesu Kristo.
Ikumanizya mupailo wakwe, Jesu alimwi wakankaizya ategwa: “Ndabazibya zina lyako, alimwi ndiyoolizibya kuti luyando ndookali kundiyanda andulo lukabe mulimbabo, amebo mulimbabo.” Kubaaposotolo, ikwiiya zina lya Leza kwajatikizya kuziba luyando lwa Leza. Johane 14:1–17:26; 13:27, 35, 36; 10:16; Luka 22:3, 4; Kulonga 24:10; 1 Bami 19:9-13; Isaya 6:1-5; Ba-Galatiya 6:16; Intembauzyo 35:19; 69:4; Tusimpi 8:22, 30.
▪ Ino nkuli nkwaya Jesu, alimwi mbwiinguzi nzi mbwaapegwa Tomaso kujatikizya nzila iiyankuko?
▪ Ikwiinda mumubuzyo wa Filipo, ncinzi ncayanda kuti Jesu ape?
▪ Nkaambo nzi oyo wabona Jesu ncamubonaa Usyi?
▪ Ino basikutobela Jesu bayoocita buti milimo mipati kwiinda njaakacita walo?
▪ Muunzila nzi Saatani mwaazundwa kuli Jesu?
▪ Ino ndilili Jehova naakasyanga musaansa wacikozyanyo, ndilili alimwi mbuti mbobaba cibeela camusaansa bamwi?
▪ Ino musaansa wacikozyanyo uba amitabi yongaye kumbele aamazuba?
▪ Mmucelo uli buti ngwalombozya Leza kuzwa kumitabi?
▪ Ino mbuti mbotunga twaba balongwe ba Jesu?
▪ Nkaambo nzi inyika nciibasulila basikutobela Jesu?
▪ Nkucenjezya nzi nkwaapa Jesu ikwanyonganya baapostolo?
▪ Nkaambo nzi baapostolo ncobaalililwa kubuzya Jesu kumakani ankwaya?
▪ Ncinzi cini-cini ncobaalilwa kumvwisya baapostolo?
▪ Ino Jesu watondezya buti kuti ciimo cabaapostolo ciyoocinca kuzwa kukuusa kuya kukukkomana?
▪ Ino Jesu waamba kuti baapostolo bayoocita nzi lino-lino?
▪ Ino Jesu waizunda buti nyika?
▪ Muunzila nzi Jesu mwaapegwa “bwami kubantu boonse”?
▪ Ino caamba nzi kuziba Leza a Mwanaakwe?
▪ Muunzila zili buti Jesu mwazibya zina lya Leza?
▪ Ino “bwini” ninzi, alimwi ‘bumusalazya’ buti Munakristo?
▪ Ino Leza, Mwanaakwe alimwi abakombi boonse bakasimpe mbamwi buti?
▪ Ino ndilili ‘noyakaanzwa nyika’?