Asia a Middle East

Mawoola Aali Mwaanda Aamyaka Iili Mwaanda

Mucisi cimwi camu Asia, mukaintu umwi uudumide wamumafilimu alimwi uujisi mulimo wakutondezya bantu zisani kwiinda mukuzisama wakazumina kwiiya Bbaibbele. Cakutasowa ciindi, wakatalika kuzicita nzyaakali kwiiya alimwi wakanyonyoona mabbuku aakwe aamizimo azikozyanyo zyacikombelo caba Bbuda.

Mukaintu umwi ngobakali kumvwana limwi wakamukombelezya ulaamba: “Inga waleka kwiiya Bbaibbele kwamyaka yotatwe buyo kutegwa ubikkile maano kumulimo wako. Mpoonya ulakonzya kutalika alimwi kwiiya.”

Mukaintu ooyo wakavwiila kuti: “Ndalindila kwamyaka iili 24 kutegwa ndimujane Jehova. Ino inga ndalekela nzi kwiiya kujatikizya nguwe kwamyaka aimbi yotatwe?”

Imvwiki njimunya njaakali kuyanda kulilembya mu Cikolo Camulimo Weendelezyegwa a Leza, ikkampani iipanga mafilimu yakabandika anguwe. Kkampani eeyi yakamwaambila kuti inga basainana kkontulakiti iivwolwa mali manji kwamyaka yone kufwumbwa kuti wazumina kusobana cibeela cili coonse ncayoopegwa. Wakakaka. Mu May 2014, wakeelela kuba sikumwaya uutanabbapatizyigwa, alimwi mwezi wa August nowakaswena afwaafwi, wakasala kuti akambauke mawoola aali mwaanda mumwezi ooyo. Naakabuzyigwa kaambo ncaakacitila boobo, wakati, “Ndiyanda kusekelela myaka iili mwaanda yabulelo bwa Jesu kwiinda mukukambauka woola lyomwe mwaka umwi aumwi naali kulela!” Wakaizuzikizya mbaakani yakwe. Wakabbapatizyigwa mu January 2015, alimwi lino ulabeleka kali mupainiya wakugwasyilizya.

Kububelesya Kabotu Busiku Muntolongo

Mucisi ca Sri Lanka, bacizyi bone bakaunka abbaasi kuyakukambauka mucilawo citabelekelwi ambungano iili yoonse imukkala ba Bbuda banji. Buzuba bwabili nobakali mubukambausi, mu monk waba Bbuda alimwi anamutekenya uubweza bantu bakabaimika cabukali bacizyi. Muciindi cisyoonto buyo, nkamu yabantu ibanyemede basika ku 30 bakabazinguluka. Bamapulisa bakasika, bakabweza bacizyi akubatola kupolisi, baakubanjizya mucitolokesi busiku boonse, nokuba kuti tiibakabapa mulandu uuli woonse. Bakabikkwa mucitolokesi comwe azigwebenga alimwi bakabafwubaazya akubatukila, nokuba boobo ikubanjizya muntolongo kwakajalula zyoolwe zyakupa bumboni. Mucizyi umwi wakaamba kuti: “Ndakabikkwa muntolongo yomwe azigwebenga izijaya bantu, pele ndakacikonzya kubaambila kasimpe. Bakagambwa kuti ndakali muntolongo alimwi bakajisi mibuzyo minji kujatikizya nzyondisyoma. Umwi muntu mane buya wakandibuzya kuti, ‘Nkaambo nzi ncokkomene?’”

Nkuta Mpati yacisi ca Sri Lanka yakazumina kulomba kwesu kujatikizya zyeelelo nzyajisi muntu nkotwakatongooka bamapulisa akaambo kakubikka bantu muntolongo kakunyina mulandu ngobacita. Makani aaya taanabandikwa pe.

Kugwasya Mukaintu Uutabukilwi Bulo

Michiko, imucizyi mupainiya ku Japan, wakali kweendelezya ciiyo mumwaambo wakutambaika kumucembele umwi iwakali mucibbadela. Mucizyi wakabuzya babelesi mucibbadela naa kwakali balwazi bambi mbaakali kukonzya kubandika ambabo. Mpoonya ba Michiko bakajana ba Kazumi, balo ibakali kumvwa pele tiibakali kucikonzya kwaambaula. Ba Kazumi tiibakali kubukilwa bulo akaambo kantenda yamumugwagwa yakabacitikila nobakalaamyaka yakuzyalwa iili 23, alimwi tiibakali kukonzya kumena cakulya nokuba kunywa meenda. Bakalaamibuzyo minji alimwi cakutawayawaya bakazumina kutalika kwiiya Bbaibbele.

Ba Michiko bakali kubuzya mibuzyo, mpoonya ba Kazumi bakali kubelesya maanza kutondeka aali bwiinguzi mumincali naa kulemba bwiinguzi. Ba Kazumi nobakaula fooni, ba Michiko bakali kubandika lugwalo lwabuzuba ambabo lyoonse mafwumofwumo. Nokuba kuti nguzu zyaba Kazumi zyakali kuyaabuceya, bakazumanana kukomena kumuuya kusikila mpobakalyaambilila kuti bayanda kuba umwi wa Bakamboni ba Jehova. Nobakamana kwiiya kwamyaka iili 13, kabajisi myaka yakuzyalwa iili 61, ba Kazumi bakaba sikumwaya uutabbapatizyidwe.

Akaambo kakuti ba Kazumi mbaasibukilwi bulo, mbungano yakabikka bubambe bwakuti kabaiswiilila miswaangano yoonse yambungano alimwi amiswaangano mipati. Lyamiswaangano yambungano, bacizyi baindene-indene mumbungano balabala bwiinguzi bwaba Kazumi.

Ba Kazumi balamulembela magwalo aakulwaizya sikwiiya Bbaibbele umwi aumwi uujanika kumiswaangano kweelana anzyayandika. Balabakambaukila babelesi bamucibbadela alimwi abaabo ibaboola kubabona. Ba Kazumi inga babaambila kuti, “Ikuti naa mwaiya Bbaibbele, munookkomene.”

Mu Monk Wacikombelo Caba Bbuda Waiya Kasimpe

Mucisi cimwi caku Asia nkoili Kumusanza lwaajwe, mucizyi umwi wakaunka kuyoobonana amusilisi wameso kucibbadela, ooko nkwaakayaanya mu monk. (Ba monk mbaalumi ibapona buumi bwakulizandula kweelana anjiisyo zyabukombi bwabo). Wakamubuzya kuti, “Sena inga mwayanda kuba abuumi bulondokede bwakutaciswa alimwi akukkala kukabe kutamani mubusena bubotu?” Bakaba amubandi mubotu, mpoonya mucizyi wakamupa broshuwa yakuti Amumuswiilile Leza. Mu monk ooyu wakapa mucizyi namba yafooni yakwe, kumane mucizyi wakaipa mukwesu mumbungano. Tiikwakainda ciindi cilamfwu, mukwesu ooyo wakabandika amu monk ooyu akumutamba kumakani aalubazu. Mu monk wakaikkomanina kapati miswaangano, kwaambisya ikwiimba nyimbo zya Bwami, alimwi cakamukonda kapati kuti boonse bakamutambula amaanza obilo.

Ciindi mu monk naakabuzya kuti naa Bakamboni balijisi mayunivesiti naa zikolo mobayiisyila basololi bazikombelo, mukwesu wakapandulula kuti tusololela ziiyo zya Bbaibbele kumuntu umwi aumwi alimwi wakamwaambila kuti inga batalika kwiiya anguwe. Kuzyikusika mvwiki yakatobela, mu monk ooyu wakalimanizyide kubala cibalo 1 cabbuku lyakuti Ino Ncinzi Cini Bbaibbele Ncoliyiisya? Wakazumanana kwiiya, wakatalika kujanika kumiswaangano, alimwi akuvwiila lya Ciiyo ca Ngazi Yamulindizi.

Mu monk naakajanika kumuswaangano wabbazu, mwiiminizi wamutabi wakamutamba kuti akaswaye ku Bbeteli. Mvwiki yakatobela, mu monk ooyu wakeenda musinzo uutola mawoola aali kkumi kutegwa akasike ku Bbeteli, ooko nkwaakatambulwa amaanza obilo. Kumamanino aamwezi wa February 2015, wakaleka kuba mu monk alimwi wazumanana kukukkomanina kwiiya Bbaibbele akutola lubazu mumiswaangano ya Bunakristo.

Wakalisweekede, Pele Wakajanwa Alimwi

Caino-ino aawa, kwakatumwa bapainiya kucooko cili kunyika lwaajwe mucisi ca India, ooko makani mabotu nkwaatali kukambaukwa kwamyaka minji. Bapainiya aaba banabukwetene bakajana bantu banji ibajisi luyandisisyo alimwi bakali kuyanda kujana busena bwakuswaanganina ibweelede. Nobakali kuunka kuciiyo ca Bbaibbele, bakabona ŋanda iyakali kuyakwa alimwi bakayeeya kuti babuzye kujatikizya mayake aayo. Nobakeenda kusika alamfwu-lamfwu, bakayeeya kuti bajokele. Kunze aaŋanda eeyi, bakajana mucembele umwi ngobakaambila kuti Mbaakamboni ba Jehova. Wakabalanga cakukkomana. Wakaamba kuti, “Andime ndili umwi wa Bakamboni ba Jehova,” mpoonya wakabaambila kuti banjile muŋanda. Wakabatondezya mabbuku ngaakajisi aakuma  1970 akuma 1980. Wakaliyiide abapainiya myaka iili 30 musyule alimwi wakali kuunka kumiswaangano zimwi ziindi nokuba kuti mulumaakwe wakali kumukazya. Wakalisinizyide kuti wakakajana kasimpe, pele kumbele tanaakacili kuyanzana ambunga ciindi bapainiya mbaakali kwiiya limwi nobakazwa kubusena oobo. Bana bakwe boonse bakatalika kunjila zikombelo ziindene-indene, pele walo wakakaka kuunka kucikombelo cili coonse cimbi.

Caino-ino aawa, bana bakwe bakatalika kumusungilizya kuti alilembye mu Cikombelo ca Katolika kutegwa aakufwa akazikkwe abasicikombelo ca Katolika. Bumwi buzuba musyoonto wakwe mukaintu wakaamba kuti ulamutola kucikombelo ca Katolika kuti akalilembye, pele nobakali munzila, bakajana kuti kuli myoota minji cakunga bakabula aakwiinda, aboobo bakaile kujoka kuŋanda. Mwanookwabo ooyu wakaamba kuti bayakuunka alimwi buzuba butobela, pele wakazyoociswa. Mbobuzuba mbubonya oobo masyikati bapainiya aaba nobakamujana mucembele ooyu uujisi luyandisisyo! Lino mucembele ooyu wiiya Bbaibbele alimwi, ulajanika kumiswaangano, alimwi ukulwaizya bana bakwe abazyukulu kuti baiye Bbaibbele abalo.