Kubelesya Bbaibbele Nomwiingula

NOTUBUZYIGWA nzyotusyoma, bukkale bwesu, mbotuzibona zintu zicitika munyika, bulangizi bwesu bwakumbele, tubelesya Bbaibbele mukwiingula. Nkaambo nzi? Nkaambo ndi Jwi lya Leza. Mu Bbaibbele motujana nzyotusyoma. Tulapona kweelana abwaamba Bbaibbele. Lilatugwasya kumvwisya zintu zicitika munyika. Ibulangizi mbotujisi kumbele buyeeme azisyomezyo zyamu Bbaibbele zyakasololelwa amuuya.—2 Tim. 3:16, 17.

Tuluuzyi kabotu mukuli ngotujisi kweelana azina ndyotwiitwa andilyo. Tuli Bakamboni ba Jehova. (Is. 43:12) Aboobo tulaingula mibuzyo ikutali mubusongo bwabuntunsi, pele kwiinda muli zyeezyo nzyaamba Jehova mu Jwi lyakwe lyakasololelwa amuuya. Inzya, aumwi ulijisi mizeezo yakwe kutwaambo tumwi, pele tutobela Jwi lya Leza mutwaambo toonse nkaambo tulijisi lusyomo lwakuti ijwi lyakwe ndyamasimpe. Masimpe, Ibbaibbele lilatuzumizya ikulisalila zyakucita mutwaambo tunji. Muciindi cakusinikizya bamwi ikutobela nzyotuyeeya, tuyanda kubayiisya njiisyo zilembedwe mu Magwalo. Aboobo tupa baswiilizi coolwe cakulisalila zyakucita mbuli mbotucita. Mbuli mwaapostolo Paulo, andiswe tuyanda kuti bantu “baswiilile kwiinda mulusyomo.”—Rom. 16:26.

Jesu Kristo ulaambwa ku Ciyubunuzyo 3:14 kuti ngu “kamboni uusyomeka uusinizye.” Ino wakali kwiingula buti mibuzyo alimwi wakali kucita buti mubukkale mwaakali kujanika? Zimwi ziindi wakali kubelesya zikozyanyo izyakali kupa bantu kuyeeya. Muziindi zimwi wakali kumubuzya muntu mbwaakali kulumvwa lugwalo oolo. Bunji bwaziindi wakali kuzubulula magwalo, akwaamba munzila imbi naa kwaamba kaambo kamuyeekezya magwalo amwi. (Mt. 4:3-10; 12:1-8; Lk. 10:25-28; 17:32) Mumwaanda wamyaka wakusaanguna, imabbuku aakajisi Magwalo kanji-kanji akali kuyobodwa muzikombelo. Kunyina bumboni butondezya kuti Jesu wakalaajisi mabbuku aayo, pele wakalaazyi kabotu Magwalo alimwi ciindi aciindi wakali kwaabelesya mukuyiisya bantu. (Lk. 24:27, 44-47) Nkakaambo kaako wakaamba kuti nzyaakali kuyiisya tiizyakali zyakwe mwini. Wakaamba nzyaakamvwa kuli Wisi.—Joh. 8:26.

Makanze eesu ngakutobela cikozyanyo ca Jesu. Kunyina notwakamvwa Leza kaambaula mbuli mbwaakalimvwida Jesu. Pesi Ibbaibbele ndi Jwi lya Leza. Notulibelesya ikwiingula mibuzyo, kunyina notuyanda kuba ampuwo. Tulacita oobo ikutayanda kwaamba mizeezo yamuntunsi uutalondokede, pele tuyanda kuti Leza abe nguutwaambila makani aakasimpe.—Joh. 7:18; Rom. 3:4.

Inzya, makanze eesu taali aakuyanda buyo kubelesya Bbaibbele pele kucita oobo munzila iyoomugwasya uutuswiilila. Tuyanda kuti aswiilile twaambo toonse. Kweelana ambwazibona zintu muntu ooyo, mulakonzya kutalisya mubandi wamu Bbaibbele kwiinda mukubuzya kuti: “Sena tamuzumini kuti iciyandika kapati nkutobela nzyaamba Leza?” Ambweni mulakonzya kubuzya kuti: “Sena mulizyi kuti Ibbaibbele lilawiingula mubuzyo nguwenya ooyu?” Ikuti kamukanana amuntu uutalizumini Bbaibbele, ambweni inga mwabelesya ntalisyo iindene asyoonto ayeeyi. Mulakonzya kwaamba kuti: “Amumvwe ncobwaamba businsimi oobu bwansiku.” Antela mulakonzya kwaamba kuti: “Ibbuku njobajisi bantu boonse kuzwa kaindi lyaamba kuti . . .”

Zimwi ziindi mulakonzya kulwaamba munzila imbi lugwalo. Pele ikuti kacikonzyeka ncibotu ikubweza Bbaibbele akubala ncolyaamba. Amumutondezye lugwalo muntu ooyo mu Bbaibbele lyakwe ikuti kacikonzyeka. Ikubelesya Bbaibbele munzila eeyi iigaminide kanji-kanji kulabagwasya kapati bantu.—Heb. 4:12.

Ibaalu Banakristo bali amikuli iiyandika kubelesya Bbaibbele nobaingula mibuzyo. Cimwi cazyeelelo ziyandika kutegwa umwi abe mwaalu ncakuti, weelede “kujatisya makani aasyomeka aayeme kulwiisyo lwesu.” (Tit. 1:9) Umwi mumbungano ulakonzya kusala cintu cimwi ciyandika kapati mubuumi amana kupegwa lulayo amwaalu. Aboobo cilayandika kapati kuti lulayo oolo kaluli lwamu Magwalo. Icikozyanyo ncapa mwaalu mukubelesya magwalo cilakonzya kubakulwaizya bamwi mukuyiisya kwabo.