Makani Aanjila Mumoyo

KUNZE lyakupa bumboni kubantu, mweelede kusoleka canguzu kukanana makani aabanjila mumoyo. Mu Bbaibbele, moyo lyoonse ulabelesyegwa kwiimpanya mbwaboneka muntu anze. Moyo wacikozyanyo wiiminina mbwabede muntu mukati—mbwalimvwa, zyoonse nzyayeeya, ncayeeyela boobo akuyeeya kuli boobo ncokupa kuti acite nzyacita. Mmuumoyo ooyu wacikozyanyo mbuto zyakasimpe mozyisyangwa. (Mt. 13:19) Alimwi mmuumoyo kuswiilila Leza mokweelede kutalikila.—Tus. 3:1; Rom. 6:17.

Ikutegwa kuyiisya kwanu kakunjila mumoyo, amubikkile maano ambaakani eezyi: (1) Amuzyibe nzyajisi kale mumoyo uumuswiilila. (2) Amumuyumye-yumye kuba abube bubotu, mbuli luyando akuyoowa Leza. (3) Amumukulwaizye uumuswiilila ikulanga-langa makanze aakwe kutegwa Jehova amukkomanine.

Kubelesya Bupampu. Kuli twaambo tunji ibantu ncobatanazumina kasimpe. Nomweendelezya ciiyo ca Bbaibbele, inga mwayanda kugwasya sikwiiya kuleka ciyanza cakulangana ziimo akupa twaambo mukululamika makani aataluzi ngasyoma sikwiiya naa ikwiile kupa bumboni. Amulibuzye kuti: ‘Sena muntu ooyu ulizyi kuti mbwali muntunsi kuli nzyayandika kumuuya? Ino nzinji buti nzyasyoma? Ino nzinzi nzyatasyomi? Nkaambo nzi kamupa kuyeeya boobo? Sena uyandika lugwasyo kucita kuti acileke kulombozya zintu zikonzya kumupa kuti atatambuli mikuli iiboola akaambo kakuzyiba kasimpe?’

Tacili cuuba-uba kanji-kanji ikuzyiba bantu cibapa kusyoma zintu nzyobasyoma. “Makanze aamumoyo wamuntu ali mbuli maanzi malamfu” mbotwaamba Tusimpi 20:5, “pele muntu [mupampu ngonguyo waateka].” Bupampu nkucikonzya kumvwisya zintu eezyo zitalimvwisyi mbomwazyibonena buyo. Eeci ciyanda kulangisya kapati akubikkila ncobeni maano.

Talili lyoonse nokukananwa amulomo. Makani amwi alakonzya kupa sikwiiya kucinca kubusyu naa ijwi lyakwe. Ikuti kamuli bazyali, cakutadooneka mulizyi kuti kucinca mbwalilemeka mwana wanu kulakonzya kutondezya kuti watalika kutobela ciyanza cimwi. Mutazyisoweli ambali zitondezyo eezyi. Zitondezya zili mumoyo wamuntu.

Mibuzyo yalibambilwa kabotu ilakonzya kumugwasya kuzyiba zili mumoyo wamuntu. Mulakonzya kubuzya kuti: “Ino mulimvwa buti ku . . . ?” “Ncinzi camupa ku . . . ?” “Mbuti mbomunga mwacita ikuti . . . ?” Pele amubone kuti tamubabuzyi mibuzyo minjaanji akubapa kulimvwa mbuli kuti mubasinsa buya. Mulakonzya kutalika mibuzyo yanu kabotu-kabotu amajwi aakuti, “Sena inga ndamubuzya . . . ?” Ikuzyiba zili mumoyo mmukuli uuyandika kubikkila maano walo uutayandiki kubinda. Ziindi zinji lusyomo lulatalika asyoonto-syoonto katanalisungula muntu ikwaamba nzyajisi mumoyo. Noliba leelyo, mweelede kubikkila maano kucita kuti muntu atayeeyi kuti mwatalika kubuzya makani aatamujatikizyi.—1 Pet. 4:15.

Mbomwiingula naa kucita kuli zyeezyo nzyomumvwa kuyandika bupampu. Mutalubi kuti makanze ngomujisi ngakuzyiba bantu kucita kuti mubone naa makani nzi aamu Bbaibbele aakonzya kubakonda. Mutabi acilengwa cakululamika makani aataluzi ngobasyoma. Muciindi cakucita boobo, amubikkile maano kuzyiba icibapa kwaamba boobo. Mpoonya muyoozyiba mbomweelede kwiingula; angomwiiya limwi abona kuti mulamubikkila maano, awalo uyoozibikkila maano nzyomwaamba.—Tus. 16:23.

Munzila imwi, mulakonzya kumuyumya aumwi noliba leelyo nomukananina nkamu. Ikuti kamulangana abantu ciindi aciindi, kubikkila maano mbobaboneka akubuzya mibuzyo iipa kuyeeya, cakutadooneka muyoozyiba mbobalimvwa bamuswiilila kumakani ngomwaamba. Ikuti kamubazyi kabotu bamuswiilila, amubikkile maano kubukkale bwabo. Amubikkile maano mbobalimvwa bantu mumbungano nomubandika ambabo makani aamu Jwi lya Leza.—Gal. 6:18.

Kukulwaizya Miyeeyo Mibotu. Mwazyiba zintu muntu nzyasyoma anzyatasyomi alimwi akaambo, muyoocikonzya kutalikila mpawo mubandi. Kuzwa naakabusyigwa, Jesu wakaamba makani aakabanjila mumoyo basikwiiya bakwe kwiinda ‘mukubapanduluda Magwalo’ kweelana azintu zyakazwa akucitika. (Lk. 24:32) Andinywe mweelede kuzyeendelanya zyakamucitikila muntu, nzyalombozya anzyabona mu Jwi lya Leza. Sikwiiya uyookulwaizyigwa munzila mbotu aakubona kuti: “Aka NKAKASIMPE!”

Nomukankaizya bubotu bwa Jehova, luyando lwakwe, luzyalo lwakwe akululama kwanzila zyakwe, mulabagwasya aabo mbomuyiisya ikuba aluyando kuli Leza. Nomukkazyika moyo kutondezya bamuswiilila bube bubotu Leza mbwabona mumuntu aumwi, mulabakulwaizya kuba akaambo kakubeda alusyomo lwakuti kuba acilongwe anguwe cilakonzyeka. Eeci cilakonzya kucitwa kwiinda mukulanga-langa magwalo mbuli Intembauzyo 139:1-3, Luka 21:1-4, a Johane 6:44 alimwi akugwasya bamuswiilila kumvwisya Jehova mbwabayanda babelesi bakwe basyomeka. (Rom. 8:38, 39) Amupandulule kuti Jehova tabikkili maano kuzibi zyesu, pele ulabikkila maano kubukkale bwesu boonse, busungu mbotujisi mubukombi busalala, ambotuliyanda zina lyakwe. (2 Mak. 19:2, 3; Heb. 6:10) Ulizyi nokaba kantu kali buti kujatikizya mbotubede umwi aumwi wesu. Alimwi munzila iigambya, uyoobabusya “boonse abali muzyuumbwe.” (Joh. 5:28, 29; Lk. 12:6, 7) Mbwaanga bantu bakapangwa mucinkozya ca Leza, imubandi wabube bwakwe uyoomukulwaizya muntu kubikkila maano.—Matl. 1:27.

Alimwi moyo ulakonzya kukulwaizyigwa muntu natalika kubona bantu mbuli mbwababona Jehova. Aboobo, ikuti Leza kamubikkila maano aumwi wesu, nkokuti ulababikkila maano mbubwenya abamwi kunyina makani abukkale bwabo, nkobazwa nuuba mubala. (Inc. 10:34, 35) Muntu wakamvwisya kaambo aaka, unooli akaambo mumoyo wakwe kayandika kapati kamu Magwalo kamupa kutaba alusulo akulangana ziimo. Eeci ciyoomugwasya kukkala abamwi muluumuno nazumanana kucita kuyanda kwa Leza.

Kuyoowa Leza mbube bumwi mbomweelede kugwasya bamwi kuba ambubo. (Int. 111:10; Ciy. 14:6, 7) Ikuyoowa Leza ooku kulakonzya kumukulwaizya muntu ikucita cimwi cintu ncatakonzyi kucita munguzu zyakwe mwini. Kwiinda mukubandika milimo ya Jehova iiyoosya aluzyalo lwakwe lugambya, mulakonzya kugwasya bamwi kuba abukandu bwakumubisizya.—Int. 66:5; Jer. 32:40.

Amubone kuti baswiilizi balizyi kuti kulilemeka kwabo kulayandika kapati kuli Jehova. Uli ambwalimvwa alimwi kweelana ambotucita kumalailile aakwe, ulakonzya kuusa naa kukondwa. (Int. 78:40-42) Amubatondezye bantu ikulilemeka kwabo mbokukonzya kugwasya mukwiingula mubuzyo Saatani ngwaakabuzya Leza.—Tus. 27:11.

Amubagwasye bamuswiilila kubona kuti kutobela zyeelelo zya Leza kulabagwasya. (Is. 48:17) Nzila imwi eeci mocikonzya kucitwa nkwiinda mukwaamba zimucitikila muntu kumubili amumizeezo ikuti wakaka busongo bwa Leza nokuba kwakaindi buyo kaniini. Amupandulule cibi mbocitwaandaanya a Leza, mbocipa kuti bamwi bataiyi kasimpe kulindiswe alimwi ambocibapa kubula lwaanguluko ndobajisi. (1 Tes. 4:6) Amubagwasye bamuswiilila kuzibikkila maano kapati zilongezyo nzyobajisi akaambo kakutobela milawo ya Leza. Amubakulwaizye kulumba kuti ikweenda munzila ziluleme zya Jehova kulatukwabilila kumapenzi manji. Mbwaabeda buyo alusyomo muntu mububotu bwanzila zya Leza, unakusesemwa anzila iili yoonse iiteendelani anzyizyo. (Int. 119:104) Kulibombya takukamubedi mukuli, pele uyookubona kuti nenzila mwatondezya kulyaaba kwakwe kuli Jehova.

Kugwasya Bamwi Kulilingula. Ikutegwa bazumanane kuyaambele kumuuya, bantu bayandika kuzitobela eezyo zili mumyoyo yabo. Amupandulule Bbaibbele mbolikonzya kubagwasya kucita boobu.

Amubagwasye bamuswiilila ikubona kuti Bbaibbele talili buyo bbuku lyamilawo, lulayo naa makani aansiku abusinsimi. Pele alimwi lilayubununa kuyeeya kwa Leza. Ku Jakobo 1:22-25, Jwi lya Leza lilakozyanisyigwa acimbonimboni. Kweelana ambotuzyibona nzyolyaamba anzila Jehova mbwazuzikizya makanze aakwe, mulumbe wamu Bbaibbele ulatondezya zili mumoyo wesu. Aboobo, lilatondezya Leza walo “uulingula myoyo,” mbwatubona. (Tus. 17:3) Amubakulwaizye bamuswiilila kukayeeya aaka kaambo. Amubakulwaizye kuyeeyesya Leza ncaatuyobweda mumakani aalembedwe mu Bbaibbele alimwi akucinca nkobeelede kucita mubuumi bwabo ikutegwa abakkomanine kwiinda. Amubagwasye kubona kuti kubala Bbaibbele nenzila motunga twazyiba Jehova mbwakubona “kuyeeya akuyanda kwamoyo” ikutegwa beendelana a Leza mukucinca kuli koonse kuyandika.—Heb. 4:12; Rom. 15:4.

Basikwiiya Bbaibbele bamwi inga balayanda kutobela nzyobaiya; pele balayoowa nzyobanga babayeeyela bantu bamwi. Balakonzya kabalwana zisusi zyanyama. Ambweni balakonzya kujana twaambo twakulilekelela mukubelekela Leza kumwi kabacitobela micito yanyika. Amubatondezye bubi bwakuba amyoyo yobilo. (1 Bam. 18:21) Amubakulwaizye kupaila kuli Leza kuti alingule akusalazya myoyo yabo.—Int. 26:2; 139:23, 24.

Amubapandulude kuti Jehova ulikubwene kusoleka nkobasoleka akuti Bbaibbele lilapandulula cili mukucitika. (Rom. 7:22, 23) Amubagwasye kuba bantu bapakamene ikutegwa kuyeeya kwamoyo uutalondokede kutabi nkokubeendelezya.—Tus. 3:5, 6; 28:26; Jer. 17:9, 10.

Amumukulwaizye aumwi kulanga-langa makanze ngajisi muzintu nzyacita. Amumuyiisye kulibuzya kuti: ‘Nkaambo nzi ncondiyanda kucita ceeci? Sena ciyoopa Jehova kubona kuti ncobeni ndilamulumba kuzintu zyoonse nzyandicitila?’ Amusoleke kuyumya lusyomo lwakuti icilongwe cili kabotu a Jehova ncecintu ciinda kubota muntu uuli woonse ncakonzya kuba ancico.

Amubagwasye bamuswiilila kumvwisya mbociyandika kubelekela Jehova ‘amoyo wabo woonse.’ (Lk. 10:27) Eeci caamba mbobalimvwa, nzyobalombozya, makanze aabo, zyoonse zyeelede kweendelana akuyanda kwa Jehova. Aboobo amubayiisye bamuswiilila ikutali kulingula buyo nzyobacita pele ambobalimvwa kujatikizya zyeelelo zya Leza alimwi amakanze ngobajisi mukumubelekela. (Int. 37:4) Mbobaya buzyiba mbomwiiya limwi mbazu mobayandika kubelekela, amubakulwaizye kupaila kuli Jehova kuti: “Mbe simoyo omwe kukulemeka izina lyako.”—Int. 86:11.

Ikuti sikwiiya waba acilongwe a Jehova, uyoomuswiilila Leza akaambo kalusyomo ikutali akaambo kakukulwaizya kwanu. Mpoonya, alikke uyootalika ‘kusunkulula kuti azibisye zintu zibotezya Mwami.’ (Ef. 5:10; Flp. 2:12) Kuswiilila ooku kuzwa mumoyo kulamukkomanisya Jehova.—Tus. 23:15.

Kamuzyiba kwaamba kuti Jehova nguulingula myoyo akutamba bantu kuba acilongwe anguwe. (Tus. 21:2; Joh. 6:44) Mulimo wesu ngwakugwasyilizya buyo. (1 Kor. 3:9) Cili ‘mbuli kuti Leza ulakombelezya kwiinda mulindiswe.’ (2 Kor. 5:20; Inc. 16:14) Jehova tasinikizyi muntu kutambula kasimpe, pele notubelesya Magwalo tulakonzya kupa kuti batuswiilila babone kuti nzyobamvwa mbobwiinguzi kumibuzyo yabo—naa mipailo yabo. Kamukayeeya kaambo aaka lyoonse mwajana coolwe cakuyiisya bamwi. Amumulombe camoyo woonse Jehova amupe busolozi alugwasyo lwakwe.—1 Mak. 29:18, 19; Ef. 1:16-18.