MU April 14, 1989, nindakali kweendelezya muswaangano wambungano mudolopo lya Maumere, aansumbu ya Flores, balupati-pati mumfwulumende bakatunjilila muŋanda motwakabede, mpoonya bakandaanga mebo abamwi botatwe mbotwakali limwi.

Balindizi bantolongo kubusena oobu bakasola kutusinikizya kuti tusalyuute ndembela. Notwakakaka, bakatudinkaula, bakatuuma zibbakela alimwi akutupa kwiimikila muzuba lipya kapati kwamazuba osanwe. Twakali kubimba akaambo kakwaandwa mpeyo masiku katulede aazibuye zyasamende ziyumu nta mututolokesi, katujisi tombe amubili, katukatede kapati, alimwi zilonda zyesu kaziciside. Sikulanganya basintolongo cakwiinduluka-induluka wakali kutwaambila kuti tutame buyo lusyomo lwesu, pele twakamuvwiila kuti, “Kusikila mane tukafwe, tatukasalyuuti ndembela pe.” Mbubonya mbuli Banakristo bamusyule lyesu banji kapati, twakalimvwa kuti twakajisi coolwe ‘cakupenga akaambo kabululami.’—1 Pet. 3:14.

MU January 19, 1999, kutamvwana ikwakali kuyaabwiindila akati kaba Mozilemu a Banakristo kwakabusya nkondo kubusena bwakali kulampa makkilomita otatwe afwaafwi ampondakali kukkala. Kwakaba lupyopyongano lupati.a

Nindakamana kutola mukwasyi wangu kubusena kwatakali lupyopyongano, ndakatumina basikumwaya bambi fooni kutegwa ndimvwe naa bakali buti. Ndakabaambila kuti bakkazike myoyo akuti batanikuunki mumasena imuli manyongwe. Kumbele, baalu bakaswaya butanga akubuyumya kumuuya alimwi akubukulwaizya kunooswaangana akukomba mutubunga tusyoonto.

Ofesi yamutabi yakatwaambila kuti tubalonzye basikumwaya boonse ibakali kukkala mumasena mwakali manyongwe, eelyo malailile aaya twakaambila mikwasyi minji yakajatikizyidwe. Mukwesu umwi iwakakaka kulonga kumbele wakajaigwa ankamu yabantu yakajisi zilwanyo. Pele boonse ibakatobela malailile aakazwide kuofesi yamutabi bakafwutuka.