Kulumwensyi: Zintu ziyandika kubusena kwacitika ntenda zyakatumwa kuzwa ku Switzerland kuya kubakwesu ku Germany mu 1946; Kululyo: Kubambulula Ŋanda ya Bwami ku Japan naakapaya maanzi mu 2011
CIBEELA 6
Kugwasyilizya Bwami—Kuyaka Masena Aakukombela Akupa Lugwasyo
CIINDI nomwanjila mu Ŋanda ya Bwami mwayeeya kuti andiza mwasweeka. Lyoonse mulabukkomanina busena oobu. Alimwi buya andiza muciyeeyede ciindi nomwakali kugwasyilizya kuyaka busena oobu myaka yainda. Pele lino, munzila imwi mwakkomana nkaambo Ŋanda ya Bwami yacincwa akuba busena bwakutambwida lugwasyo ciindi nokwacitika ntenda. Mvwula yaguwo iyakaliko caino-ino yakanyonyoona zintu zinji mubusena momukkala, cakufwambaana Kkomiti Yamutabi yakabikka bubambe kutegwa aabo ibajatikizyigwa batambule cakulya, zyakusama, maanzi aali kabotu, alimwi alugwasyo buyo lumbi. Zintu izyakasangwa zibikkidwe kabotu. Bakwesu abacizyi balanjila akubweza nzyobayandika, bunji bwabo balalila akaambo kakukkomana.
Jesu wakaamba kuti citondezyo cipati cabantu bakwe lunakuli luyando ndobajisi kuli umwi amweenzinyina. (Joh. 13:34, 35) Mucibeela eeci, tulalanga-langa luyando lwa Bunakristo mbolutondezyegwa mububambe bwakuyaka alimwi alugwasyo lupegwa a Bakamboni ba Jehova. Luyando luli boobu ncitondezyo cakuti tupona aansi aabweendelezi bwa Bwami bwa Jesu.