Malifalensi Aamu Kabbuku Kamuswaangano Wabuumi Amulimo Wesu
APRIL 2-8
MBONO IZILI MU JWI LYA LEZA | MATAYO 26
“Kukozyanya Kuliko Alimwi Akwiindana Kuliko Akati ka Pobwe Lyakwiindilila Alimwi a Ciibalusyo”
(Matayo 26:17-20) Mubuzuba bwakusaanguna bwa Zinkwa Zitajisi Bumena, basikwiiya bakaboola kuli Jesu akumwaambila kuti: “Ino nkuli nkoyanda kuti tukubambile kutegwa ukalide nkuko Pobwe Lyakwiindilila?” 18 Wakati: “Kamuya mumunzi kuli Ndaba mukamwaambile kuti, ‘Mwiiyi waamba kuti: “Ciindi cangu cibikkidwe cilaafwaafwi; ndilacita Pobwe Lyakwiindilila abasikwiiya bangu muŋanda yako.”’” 19 Aboobo basikwiiya bakacita mbubonya mbwaakabalailila Jesu akulibambila Pobwe Lyakwiindilila. 20 Lino nikwakaba kumangolezya, wakalikkede kutebulu abasikwiiya bakwe bali 12.
nwtsty zifwanikiso azyakweebelela
Pobwe Lyakwiindilila
Eezyi nzezintu izyakali kuyandika kapati ciindi ca Pobwe Lyakwiindilila: mwanaambelele wakuyoka (kunyina cifwuwa cakabelele icakeelede kutyolwa) (1); zinkwa zitajisi bumena (2); alimwi azisyu zilula (3). (Kul. 12:5, 8; My. 9:11) Kulangilwa kuti zisyu zilula zyakali kuyeezya bana Israyeli buumi bubyaabi mbobakali kupona kabali bazike mu Egepita. Jesu wakabelesya zinkwa zitajisi bumena kwiiminina mubili wakwe uulondokede. (Mt. 26:26) Mpoonya mwaapostolo Paulo wakaamba Jesu kuti “imwanaambelele wesu wa Pobwe Lyakwiindilila.” (1Kor. 5:7) Kuzikusika mumwaanda wamyaka wakusaanguna, waini (4) awalo wakatalika kubikkwa ciindi ca Pobwe Lyakwiindilila. Jesu wakabelesya waini kwiiminina bulowa bwakwe, bwalo ibwakali kuyootilwa kuba cipaizyo.—Mt. 26:27, 28.
(Matayo 26:26) Lino nobakacili kulya, Jesu wakabweza mukamu, eelyo naakamana kulumba wakaukomauna akupa basikwiiya bakwe kati: “Amubweze mulye. Eeci ciiminina mubili wangu.”
nwtsty kaambo kagwasya mukwiiya kuzwa kulugwalo lwa Mt. 26:26
ciiminina: Nokuba kuti majwi aa Jesu mumwaambo wa Chigiriki alakonzya kusandululwa kuti “ooyu mubili wangu,” muzeezo wini uuli mukapango aaka ngwakuti “eeci ciiminina mubili wangu.” Bupanduluzi oobu bakalibuzyi baapostolo, mbwaanga aciindi eeci mubili wa Jesu uulondokede wakali kumbele lyabo antoomwe amukamu iwatakajisi bumena walo ngobakali kuyanda kulya. Aboobo mukamu tiiwakali mubili wakwe kuugama. Cilakkomanisya kubona kuti bbala lya Chigiriki ilyakasandululwa mukapango aaka ikwaamba kuti “ciiminina,” lilibelesyedwe akulugwalo lwa Mt. 12:7, alimwi muma Bbaibbele manji lisandulwidwe kuti “ciiminina.”
(Matayo 26:27, 28) Kumane wakabweza nkapu, wakalumba amane wakabapa kati: “Amunywe mulinjiyo nyoonse, 28 nkaambo eeci ciiminina ‘bulowa bwangu bwacizuminano,’ ibuyootilwa kutegwa zibi zyabantu banji zilekelelwe.
nwtsty kaambo kagwasya mukwiiya kuzwa kulugwalo lwa Mt. 26:28
bulowa bwangu bwacizuminano: Cizuminano cipya eeci icili akati ka Jehova alimwi a Banakristo bananike, cakatalika kubeleka kwiinda mucipaizyo ca Jesu. (Heb. 8:10) Aawa Jesu wakabelesya mabala ngaakabelesya Musa ciindi naakali kubeleka kali simwiimaakati alimwi akutalisya cizuminano ca Mulawo abana Israyeli a Cilundu ca Sinai. (Kul. 24:8; Heb. 9:19-21) Mbubwenya buyo mbuli bulowa bwabapoho alimwi abwampongo mbobwakapa kuti cizuminano ca Mulawo citalike kubeleka akati ka Leza acisi ca Israyeli, abwalo bulowa bwa Jesu bwakapa kuti cizuminano cipya citalike kubeleka eeco Jehova ncaakapangana aba Israyeli bakumuuya. Cizuminano eeci cakatalika kubeleka lya Pentekoste 33 C.E.—Heb. 9:14, 15.
Kuyandaula Mbono Zyakumuuya
(Matayo 26:17) Mubuzuba bwakusaanguna bwa Zinkwa Zitajisi Bumena, basikwiiya bakaboola kuli Jesu akumwaambila kuti: “Ino nkuli nkoyanda kuti tukubambile kutegwa ukalide nkuko Pobwe Lyakwiindilila?”
nwtsty kaambo kagwasya mukwiiya kuzwa kulugwalo lwa Mt. 26:17
Mubuzuba bwakusaanguna bwa Zinkwa Zitajisi Bumena: Pobwe lya Zinkwa Zitajisi Bumena lyakali kutalika mu Nisani 15, lyainda Pobwe Lyakwiindilila (Nisani 14), alimwi lyakali kutola mazuba aali ciloba. (Amubone Makani Aayungizyidwe B15.) Pele mumazuba aa Jesu, Pobwe Lyakwiindilila lyakaliswaangene kapati apobwe eeli cakuti woonse mazuba aali lusele, ikubikkilizya a Nisani 14, zimwi ziindi akali kwaambwa kuti ndi “Pobwe lya Zinkwa Zitajisi Bumena.” (Lk. 22:1) Mucibalo eeci, mabala aakuti “Mubuzuba bwakusaanguna bwa” alakonzya kwaambwa kuti “Mubuzuba kalitanaba.” Aboobo, kweelana amwaambo wa Chigiriki alimwi acilengwa caba Juda, kulalangilwa kuti basikwiiya bakabuzya Jesu mu Nisani 13. Masyikati aamu Nisani 13, basikwiiya bakatalika kulibambila Pobwe Lyakwiindilila lyalo ilyakasekelelwa, “nokwakaba kumangolezya” kumatalikilo aa Nisani 14.—Mk. 14:16, 17.
(Matayo 26:39) Kumane naakeenda aniini kuyaambele, wakavwuntama ansi akupaila kati: “Taata, ikuti naa cilakonzyeka, nkapu eeyi aizwe kulindime. Pele ikutali kweelana akuyanda kwangu pe, pele kweelana akuyanda kwako.”
nwtsty kaambo kagwasya mukwiiya kuzwa kulugwalo lwa Mt. 26:39
nkapu eeyi aizwe: Mu Bbaibbele, “nkapu” kanji-kanji ilabelesyegwa munzila yacikozyanyo ikwaamba kuyanda kwa Leza, naa cibeela ncapedwe muntu. Tacidoonekwi kuti Jesu wakalibilika kapati kujatikizya masampu aakali kunooboola kuli Leza akaambo kalufwu lwakwe ilwakujaigwa akaambo kakupegwa mulandu wakusampaula Leza akubukila mfwulumende, calo icakamupa kupaila kuti “nkapu” eeyi izwe kulinguwe.
Kubala Bbaibbele
(Matayo 26:1-19) Lino Jesu naakamanizya kwaamba zintu zyoonse eezyi, wakaambila basikwiiya bakwe kuti: 2 “Mulizyi kuti kwainda buyo mazuba obilo kuzwa sunu kuyooba Pobwe Lyakwiindilila, eelyo Mwanaamuntu uyakwaabwa kutegwa akajaigwe acisamu.” 3 Mpoonya basilutwe babapaizi abaalu babantu bakabungana mulubuwa lwamupaizi mupati iwakali kwiitwa kuti Kayafa, 4 alimwi boonse bakamvwana kuti bamujate Jesu cabucenjezu akumujaya. 5 Pele bakali kwaamba kuti: “Ikutali ciindi capobwe, kutegwa kutakabi manyongwe akati kabantu.” 6 Lino Jesu naakali ku Betaniya muŋanda ya Simoni sicinsenda, 7 imukaintu umwi wakajisi nsazi yamafwuta aanunkilila alimwi aadula, wakaboola kulinguwe akutalika kumutila mafwuta aayo amutwe naakali kulya. 8 Lino nobakabona boobu, basikwiiya bakanyema akwaamba kuti: “Ino nkaambo nzi ncaanyonyoonwa mafwuta aaya? 9 Nkaambo mafwuta aaya naasambalwa mali manji eelyo mali aayo naapegwa kubacete.” 10 Kazyi nzyobakali kwaamba, Jesu wakati kulimbabo: “Ino mumupenzyela nzi mukaintu ooyu? Wandicitila cintu cibotu. 11 Nkaambo bacete munooli limwi lyoonse, pele mebo tamunooli andime lyoonse pe. 12 Imukaintu ooyu naatila mafwuta aaya amubili wangu, wacita oobo kutegwa ndilibambile kuzikkwa. 13 Ncobeni ndimwaambila kuti, kufwumbwa makani mabotu aaya nkwaayookambaukwa munyika yoonse, ncaacita mukaintu ooyu acalo ciyakwaambwa mukwiibaluka nguwe.” 14 Mpoonya umwi wabali Kkumi Ababili, uutegwa Judasi Isikariote, wakaunka kuli basilutwe babapaizi 15 akwaamba kuti: “Ino mulandipa nzi ndamwaaba kulindinywe?” Bakamusyomezya kumupa mali aansiliva aali 30. 16 Aboobo kuzwa leelyo, wakatalika kuyandaula ciindi cibotu cakumwaaba. 17 Mubuzuba bwakusaanguna bwa Zinkwa Zitajisi Bumena, basikwiiya bakaboola kuli Jesu akumwaambila kuti: “Ino nkuli nkoyanda kuti tukubambile kutegwa ukalide nkuko Pobwe Lyakwiindilila?” 18 Wakati: “Kamuya mumunzi kuli Ndaba mukamwaambile kuti, ‘Mwiiyi waamba kuti: “Ciindi cangu cibikkidwe cilaafwaafwi; ndilacita Pobwe Lyakwiindilila abasikwiiya bangu muŋanda yako.”’” 19 Aboobo basikwiiya bakacita mbubonya mbwaakabalailila Jesu akulibambila Pobwe Lyakwiindilila.
APRIL 9-15
MBONO IZILI MU JWI LYA LEZA | MATAYO 27-28
Kamuya Mukayiisye Bantu Kuti Babe Basikwiiya—Nkaambo Nzi, Ikuli Alimwi Muunzila Nzi?
(Matayo 28:18) Jesu wakaboola akubaambila kuti: “Ndapegwa nguzu zyoonse kujulu alimwi aanyika.
‘Kamuya Mukabayiisye Bantu’
Jesu ulijisi nguzu kumbungano yakwe, alimwi ikuzwa mu 1914 walijisi nguzu ku Bwami bwa Leza bupya bwakatalisyigwa. (Ba-Kolose 1:13; Ciyubunuzyo 11:15) Mbwali mungelo mupati, ulijisi nguzu kujulu kumyaanda yatuulunzuma yabasikalumamba yabangelo. (1 Ba-Tesalonika 4:16; 1 Petro 3:22; Ciyubunuzyo 19:14-16) Wakapegwa nguzu a Wisi zyakunyonyoona “boonse beendelezi abami abasimutwe” ibakazya njiisyo zyabululami. (1 Ba-Korinto 15:24-26; Ba-Efeso 1:20-23) Inguzu zya Jesu tazyili buyo kubaumi pe. Pele alimwi “mubetesi wabaumi abafwide” alimwi Leza wamupa nguzu zyakubusya baabo bali muzyuumbwe. (Incito 10:42; Johane 5:26-28) Masimpe kulaililwa a Yooyo wakapegwa nguzu zili boobo, kweelede kubonwa kuti ncintu ciyandika kapati. Aboobo, cabulemu acakulisungula tulakuccilila kulailila kwa Kristo kwakuti ‘kamuya mukabayiisye bantu.’
(Matayo 28:19) Aboobo kamuya mukayiisye bantu bazisi zyoonse kuti babe basikwiiya, akubabbapatizya muzina lya Taata alya Mwana alya muuya uusalala,
nwtsty twaambo tugwasya mukwiiya kuzwa kulugwalo lwa Mt. 28:19
mukayiisye bantu. . . kuti babe basikwiiya: Ibbala lya Chigiriki lyakuti ma·the·teuʹo lilakonzya kusandululwa kuti “amuyiisye” kamujisi makanze aakuba abasicikolo naa basikwiiya. (Amweezyanisye mbolibelesyedwe kuli Mt. 13:52, kwalo nkolyakasandululwa kuti “naayiisyigwa.”) Ibbala lyakuti “kubbapatizya” alimwi alyakuti “kuyiisya” atondezya icijatikizyidwe mumulawo ‘wakuyiisya bantu kuti babe basikwiiya.’
bantu bazisi zyoonse: Busanduluzi bwabbala abbala bwaamba kuti “zisi zyoonse,” pele twaambo tweengelede tutondezya kuti majwi aaya aamba bantu ibazwa muzisi zyoonse, mbwaanga kabala ka Chigiriki ikasandulwidwe kuti “ba” mubbala ilyakasandululwa kuti akubabbapatizya kaamba bantu ikutali “zisi.” Mulawo ooyu wakusikila “bantu bazisi zyoonse” wakali mupya. Kautanatalika mulimo wa Jesu, Magwalo atondezya kuti Bamasi bakali kukonzya kuboola ku Israyeli akusangana bana Israyeli kubelekela Jehova. (1Bam. 8:41-43) Pele kwiinda mukubelesya mulawo ooyu, Jesu wakalailila basikwiiya bakwe kukambaukila abantu bambi kutali buyo ba Juda, ikukankaizya mulimo wa Bunakristo iweelede kucitwa nyika yoonse iwakuyiisya bantu kuti babe basikwiiya.—Mt. 10:1, 5-7; Ciy. 7:9; amubone kaambo kagwasya mukwiiya kuzwa kulugwalo lwa Mt. 24:14.
(Matayo 28:20) mukabayiisye kutobela zintu zyoonse nzyondakamulailila. Alimwi amubone! Ndilaandinywe mazuba oonse mane kusikila kumamanino aabweende bwazintu.”
nwtsty kaambo kagwasya mukwiiya kuzwa kulugwalo lwa Mt. 28:20
mukabayiisye: Ibbala lya Chigiriki ilyakasandululwa kuti “kuyiisya” libikkilizya kupa malailile, kupandulula, kusalazya twaambo alimwi akupa bumboni. (Amubone twaambo tugwasya mukwiiya kuzwa kulugwalo lwa Mt. 3:1; 4:23.) Kubayiisya kutobela zintu zyoonse nzyaakalailila Jesu wakali kunooba mulimo uuzumanana walo iwakali kunoobikkilizya akubayiisya zintu nzyaakayiisya, kubelesya njiisyo zyakwe alimwi akutobela cikozyanyo cakwe.—Joh. 13:17; Ef. 4:21; 1Pet. 2:21.
Kuyandaula Mbono Zyakumuuya
(Matayo 27:51) Mpoonya mulembo wamutempele wakayauka akati, kuzwa atala mane kusikila aansi, alimwi nyika yakazungaana, amyala yakaanduka.
nwtsty twaambo tugwasya mukwiiya kuzwa kulugwalo lwa Mt. 27:51
mulembo: Cisani eeci iceebeka kapati cakali kwaandaanya Busena Busalalisya a Busena Busalala bwamutempele. Cilengwa caba Juda citondezya kuti mulembo ooyu mulemu wakali kusika kumamita aabalilwa ku 18 mubulamfwu, mamita aabalilwa ku 9 mubwamba alimwi wakajisi ntuli iibalilwa kumasentimita aali 7. Kwiinda mukuyaula mulembo akati, Jehova tanaakatondezya buyo bukali mbwaakajisi kuli baabo ibakajaya Mwanaakwe pele alimwi cakatondezya kuti lino cilakonzyeka kunjila kujulu kwini buya.—Heb. 10:19, 20; amubone Bupanduluzi Bwamabala Aamu Bbaibbele abbala lyakuti “cisitilizyo.”
tempele: Ibbala lyakuti na·osʹ aawa lyaamba ŋanda mpati iyeebeka iijisi a Busena Busalala alimwi a Busena Busalalisya.
(Matayo 28:7) Lino kamuya cakufwambaana mukaambile basikwiiya bakwe kuti wabusyigwa kubafwu, amubone! Wamusolweda kuya ku Galilaya. Muyoomubona okuya. Amubone! Ooyu ngomulumbe wangu kulindinywe.”
nwtsty kaambo kagwasya mukwiiya kuzwa kulugwalo lwa Mt. 28:7
mukaambile basikwiiya bakwe kuti wabusyigwa: Bamakaintu aaba tabali buyo basikwiiya ibakusaanguna kwaambilwa kujatikizya kubusyigwa kwa Jesu pele alimwi mbabakasaanguna kulaililwa kuti bazyibye basikwiiya bambi. (Mt. 28:2, 5, 7) Kweelana acilengwa caba Juda icitali camu Magwalo, bumboni ibuzwa kumukaintu tiibwakali kuzuminwa munkuta yamulawo. Mukwiimpana, mungelo wa Jehova wakabalemeka bamakaintu kwiinda mukubapa mulimo ooyu uukkomanisya kapati.
Kubala Bbaibbele
(Matayo 27:38-54) Mpoonya zigwebenga zyobilo zyakabikkwa azisamu mumabali aakwe, cimwi kululyo lwakwe acimwi kulumwensyi lwakwe. 39 Lino bantu ibakali kwiinda munzila bakali kumusampaula akugunya-gunya mitwe 40 kabaamba kuti: “Yebo ookonzya kumwaya tempele akuliyakulula mumazuba otatwe, kolifwutula we! Ikuti koli mwana wa Leza, koseluka acisamu cakupenzyezya!” 41 Mbubonya buyo, abalo basilutwe babapaizi abalembi abaalu bakatalika kumufwubaazya kabati: 42 “Bamwi wakali kubafwutula; pele walo mwini takonzyi kulifwutula! Mwami wa Israyeli; amumuleke lino aseluke acisamu cakupenzyezya, aboobo tulamusyoma. 43 Usyoma muli Leza; amumuleke lino amuvwune ikuti kamuyanda, nkaambo waamba kuti, ‘Ndili Mwana wa Leza.’” 44 Mbubonya buyo, noziba zigwebenga izyakali azisamu antoomwe anguwe azyalo zyakali kumusampaula. 45 Lino kutalikila kuwoola lyacisambomwe, kwakaba mudima mucisi coonse kusikila kuwoola lyafwuka. 46 Ciindi kacilondelela kuwoola lyafwuka, Jesu wakoongolola kuti: “Eli, Eli, lama sabakitani?” Ooku nkokwaamba kuti, “Leza wangu, Leza wangu, ino wandilekelezyela nzi?” 47 Nobakamvwa boobo, bamwi babaabo ibakaimvwi waawo bakatalika kwaamba kuti: “Ooyu muntu wiita Elija.” 48 Mpoonya aawo umwi wabo wakabalika akuleta nsinsa akwiinyika muwaini uulula, eelyo wakaibikka kutete akumupa kuti anywe. 49 Pele bamwi bakati: “Komuleka! Tulabona naa Elija ulaboola kuzoomufwutula.” 50 Alimwi Jesu wakoongolola ajwi pati, mpoonya wakafwa. 51 Mpoonya mulembo wamutempele wakayauka akati, kuzwa atala mane kusikila aansi, alimwi nyika yakazungaana, amyala yakaanduka. 52 Aboobo zyuumbwe zyakajaluka alimwi mibili minji yabasalali bakafwide yakavwukkuka 53 akulibonya kubantu banji. (Eelyo bantu ibakali kuzwa kunamaumbwe musyule lyakubusyigwa kwakwe bakanjila mumunzi uusalala.) 54 Pele silutwe wabasikalumamba alimwi abaabo mbaakali limwi nibakali kulindilila Jesu nobakabona kuzungaana kwanyika azintu zyakali kucitika, bakayoowa kapati akwaamba kuti: “Ncobeni ooyu wali Mwana wa Leza.”
APRIL 16-22
MBONO IZILI MU JWI LYA LEZA | MARKO 1-2
“Walekelelwa Zibi Zyako”
(Marko 2:3-5) Eelyo bakamuletela muntu uulebukide mubili wakatembedwe abaalumi bone. 4 Pele tiibakali kukonzya kumusisya kuli Jesu akaambo kankamu yabantu, aboobo bakabbwalula ciluli aawo mpaakabede Jesu. Nobakamana kupanga cipulo muciluli, bakalengelezya macila aawo mpaakalede muntu uulebukide mubili. 5 Jesu naakabona lusyomo lwabo, wakaambila muntu ooyo uulebukide mubili kuti: “Mwanaangu, walekelelwa zibi zyako.”
“Walekelelwa Zibi Zyako”
Jesu nacili mukuyiisya muŋanda iizwide bantu, baalumi bone baleta muntu uulebukide mubili kalede amacila. Bayanda kuti Jesu amuponye mulongwe wabo. Pele, akaambo kankamu yabantu, baalilwa “kumusisya kuli Jesu.” (Marko 2:4) Amuyeeye buyo mbobatyompwa. Batanta atala aaciluli caŋanda cipapalete akupanga cipulo. Mpoonya balengelezya macila muŋanda aawo mpalede muntu uulebukide mubili.
Sena Jesu wanyema akaambo kakunyonganizyigwa ooku? Peepe! Wabotelwa kapati akaambo kalusyomo lwabo, eelyo waambila muntu ooyu uulebukide mubili kuti: “Walekelelwa zibi zyako.” (Matayo 9:2) Pele sena ncobeni Jesu ulakonzya kulekelela zibi? Balembi aba Farisi bamujanina kaambo mumakani aaya, aboobo batalika kulyaambauzya mumoyo kuti: “Ino nkaambo nzi muntu ooyu ncaambila boobu? Usampaula Leza. Nguni kunze lya Leza uukonzya kulekelela zibi?”—Marko 2:7.
Kazyi mbobayeeya, Jesu wabaambila kuti: “Ino nkaambo nzi ncomuyeeya zintu zili boobo mumyoyo yanu? Ncili cuuba-uba, kwaambila muntu uulebukide mubili kuti, ‘Walekelelwa zibi zyako,’ naa kwaamba kuti, ‘Nyamuka, bweza macila aako weende’?” (Marko 2:8, 9) Inzya, kwiinda mucipaizyo ncayakupa Jesu mukuya kwaciindi, ulakonzya kulekelela zibi zyamuntu ooyu.
(Marko 2:6-12) Lino aawo kwakali balembi bamwi ibakakkede kabalyaambauzya mumoyo kuti: 7 “Ino nkaambo nzi muntu ooyu ncaambila boobu? Usampaula Leza. Nguni kunze lya Leza uukonzya kulekelela zibi?” 8 Pele mpoonya aawo Jesu wakazyiba mumoyo wakwe kuti mbobakali kuyeeya oobo, aboobo wakababuzya kuti: “Ino nkaambo nzi ncomuyeeya zintu zili boobo mumyoyo yanu? 9 Ncili cuuba-uba, kwaambila muntu uulebukide mubili kuti, ‘Walekelelwa zibi zyako,’ naa kwaamba kuti, ‘Nyamuka, bweza macila aako weende’? 10 Pele kutegwa muzyibe kuti Mwanaamuntu ulijisi nguzu zyakulekelela bantu zibi anyika—” wakaambila muntu ooyo uulebukide mubili kuti: 11 “Ndati kulinduwe, Nyamuka, bweza macila aako, uunke kuŋanda yako.” 12 Aboobo wakanyamuka alimwi cakufwambaana wakabweza macila aakwe akuunka kabalangilila boonse. Eelyo boonse bakagambwa akulemeka Leza, kabati: “Tatunacibwene cintu cili boobu.”
nwtsty kaambo kagwasya mukwiiya kuzwa kulugwalo lwa Mk. 2:9
Ncili cuuba-uba: Tacikatazyi kumuntu ikwaamba kuti ulakonzya kulekelela zibi, mbwaanga kunyina bumboni bulibonya ibukonzya kuyandika kutegwa asinizye makani aaya. Pele kwaamba kuti, Nyamuka . . . weende kwakali kuyandika kucita maleele aakali kukonzya kutondezya bantu boonse kuti Jesu wakalijisi nguzu zyakulekelela zibi. Cibalo eeci alimwi alugwalo lwa Is. 33:24 zitondezya kuti kuciswa kuliswaangene kapati acibi ncotwakakona.
Kuyandaula Mbono Zyakumuuya
(Marko 1:11) Alimwi kujulu kwakazwa jwi ilyakaamba kuti: “Yebo uli Mwanaangu ngweyandisya, ngwekkomanina.”
nwtsty twaambo tugwasya mukwiiya kuzwa kulugwalo lwa Mk. 1:11
kujulu kwakazwa jwi: Oolu ndolugwalo lwakusaanguna akati kamagwalo otatwe aamumabbuku aa Makani Mabotu mwalo Jehova mwaambwa kuti wakaambaula cacigaminina kubantu.—Mk. 9:7; Joh. 12:28.
Yebo uli Mwanaangu: Kali cilenge camuuya, Jesu wakali Mwana wa Leza. (Joh. 3:16) Kuzwa ciindi naakazyalwa kali muntunsi, Jesu wakali “mwana wa Leza” mbuli mbwaakabede Adamu iwakalondokede. (Lk. 1:35; 3:38) Nokuba boobo, kulibonya kuti majwi aa Leza aawa taapandululi buyo kuti Jesu wakali mwana wa Leza. Kwiinda mukwaamba majwi aaya alimwi akutila muuya uusalala, tacidoonekwi kuti Leza wakatondezya kuti Jesu wakali simuzyalwaalikke kali Mwanaakwe wamuuya, walo ‘iwakazyalwa alimwi’ kajisi bulangizi bwakujokela kubuumi bwakujulu alimwi iwakananikwa amuuya kuba Mwami a Mupaizi Mupati uusalidwe a Leza.—Amweezyanisye Joh. 3:3-6; 6:51; Lk. 1:31-33; Heb. 2:17; 5:1, 4-10; 7:1-3.
ngwekkomanina: Naa “ulandibotela; ulandikkomanisya kapati.” Ibbala ndimunya eeli lilibelesyedwe akulugwalo lwa Mt. 12:18, imuli majwi aakazubululwa kuzwa kulugwalo lwa Is. 42:1 aajatikizya Mesiya wakasyomezyegwa, naa Kristo. Kutilwa kwamuuya uusalala alimwi amajwi ngaakaamba Leza kujatikizya Mwanaakwe zyakali kutondezya kuti Jesu wakali Mesiya wakasyomezyedwe.—Amubone twaambo tugwasya mukwiiya kuzwa kulugwalo lwa Mt. 3:17; 12:18.
(Marko 2:27, 28) Mpoonya wakabaambila kuti: “Sabata yakaba akaambo kamuntu ikutali kuti muntu wakaba akaambo ka Sabata. 28 Aboobo Mwanaamuntu ngo Mwami wa Sabata ayalo.”
nwtsty kaambo kagwasya mukwiiya kuzwa kulugwalo lwa Mk. 2:28
Mwami wa Sabata: Jesu ubelesya majwi aaya kulyaamba lwakwe (Mt. 12:8; Lk. 6:5), ikutondezya kuti wakali kukonzya kubelesya Sabata kubeleka mulimo ngobakamulailila Bausyi bakujulu. (Amweezyanisye Joh. 5:19; 10:37, 38.) Mubuzuba bwa Sabata, Jesu wakacita maleele aagambya kapati alo aakali kubikkilizya akuponya baciswa. (Lk. 13:10-13; Joh. 5:5-9; 9:1-14) Kweelede kuti eeci cakali kutondezya zintu nzyayoocita mubweendelezi bwakwe bwa Bwami, bwalo ibunooli mbuli sabata yakulyookezya.—Heb. 10:1.
Kubala Bbaibbele
(Marko 1:1-15) Matalikilo aamakani mabotu aamba zya Jesu Kristo, Mwana wa Leza: 2 Mbubonya mbokulembedwe kuli Isaya musinsimi kuti: “(Bona! Mebo ndatuma mutumwa wangu kumbele lyako, ooyo uuyookubambila nzila.) 3 Kulimvwisya jwi lyamuntu woongolola munkanda kati: ‘Amubambe nzila ya Jehova! Amululamike migwagwa yakwe.’” 4 Johane Mubbapatizi wakali munkanda, kakambauka lubbapatizyo lutondezya kweempwa kutegwa zibi zilekelelwe. 5 Eelyo cilawo coonse ca Judaya abantu boonse bamu Jerusalemu bakali kuunka kulinguwe, mpoonya wakali kubabbapatizya mu Mulonga wa Jordano, kabalyaambilila zibi zyabo antangalala. 6 Lino Johane wakali kusama cisani caboya bwankamela alutambo lwacipaya mucibuno, alimwi wakali kulya cikwikwi abuci. 7 Alimwi wakali kukambauka kuti: “Muntu umwi uundiinda nguzu ulaboola munsi lyangu, ooyo mebo ngonditeeleli kooka akwaangununa ntambo zyampato zyakwe. 8 Mebo ndakamubbapatizya amaanzi, pele walo uyoomubbapatizya amuuya uusalala.” 9 Kumazuba aayo, Jesu wakaboola kuzwa ku Nazareta mu Galilaya eelyo Johane wakamubbapatizya mu Mulonga wa Jordano. 10 Mbwaakaimpukila buyo mumaanzi, wakabona julu kalijaluka, amuuya uulibonya mbuli nziba kauseluka aalinguwe. 11 Alimwi kujulu kwakazwa jwi ilyakaamba kuti: “Yebo uli Mwanaangu ngweyandisya, ngwekkomanina.” 12 Mpoonya-mpoonya muuya wakamupa kuti aunke munkanda. 13 Aboobo wakakkala munkanda kwamazuba aali 40, kasunkwa a Saatani. Wakali kukkala abanyama, pele bangelo bakali kumukutaukila. 14 Lino Johane naakaangwa, Jesu wakaunka ku Galilaya kakambauka makani mabotu aa Leza 15 kati: “Ciindi cibikkidwe cazuzikizyigwa, alimwi Bwami bwa Leza bwaswena. Amweempwe alimwi amube alusyomo mumakani mabotu.”
APRIL 23-29
MBONO IZILI MU JWI LYA LEZA | MARKO 3-4
“Kuponya Mubuzuba bwa Sabata”
(Marko 3:1, 2) Alimwi wakanjila mucikombelo, oomo mwakali mwaalumi umwi wakapuutide janza. 2 Aboobo bakali kumulangisisya kutegwa babone naa wakali kunoomuponya mwaalumi ooyo mu Sabata kutegwa bamupe mulandu.
Ncinzi Cizumizyidwe Kucita mu Sabata?
Mubuzuba bumbi bwa Sabata, Jesu waunka kucikombelo, ambweni mu Galilaya. Ooko waakujana mwaalumi umwi uupuutide janza lyalulyo. (Luka 6:6) Balembi aba Farisi balimulangisyide Jesu. Nkaambo nzi? Bacitondezya cili mumyoyo yabo nobabuzya kuti: “Sena cilizumizyidwe kuponya mu Sabata?”—Matayo 12:10.
Basololi babukombi bwaba Juda basyoma kuti kuponya mu Sabata kulizumizyidwe lilikke buyo ciindi buumi nobuli muntenda. Mucikozyanyo, mu Sabata basyoma kuti nkutyola mulawo kugwasya muntu watyoka nokuba kumwaanga bbandeji ooyo wafwuyuka, izicisa zitalangilwi kujaya muntu. Cakutadooneka, takuli kuti mwaalumi ooyu uupengede balimubikkilide maano ncobeni balembi aba Farisi ncobamubuzyila Jesu. Bayanda buyo kumujanina kaambo Jesu kakumupeda mulandu.
(Marko 3:3, 4) Mpoonya wakaambila mwaalumi uupuutide janza kuti: “Nyamuka, uboole akati.” 4 Kumane wakababuzya kuti: “Ncinzi cizumizyidwe kucita mu Sabata, sena nkucita cintu cibotu naa cintu cibi, ikufwutula buumi naa kujaya?” Pele bakaumuna buyo.
Ncinzi Cizumizyidwe Kucita mu Sabata?
Nokuba boobo, Jesu uliizyi mizeezo yabo yabumpelenge. Ulizyi kuti bajisi muzeezo uutaluzi, uutali wamu Magwalo kujatikizya ncocaamba kutyola mulawo ooyo uukasya kubeleka mu Sabata. (Kulonga 20:8-10) Tacili ceenzu kulinguwe kuti bamujanina mulandu akaambo kakucita milimo mibotu. Aboobo Jesu wajana coolwe cakubasinsa kwiinda mukwaambila mwaalumi ooyo uupuutide janza kuti: “Nyamuka, uboole akati.”—Marko 3:3.
(Marko 3:5) Amane kubalanga cabukali, kauside kapati akaambo kakubija kwamyoyo yabo, wakaambila mwaalumi ooyo kuti: “Kovwungulula janza lyako.” Mpoonya wakalivwungulula, eelyo janza lyakwe lyakaba kabotu.
nwtsty kaambo kagwasya mukwiiya kuzwa kulugwalo lwa Mk. 3:5
cabukali, kauside kapati: Marko alikke nguwakalemba mbwaakalimvwa Jesu, ciindi Jesu naakabona kubija kwamyoyo yabasololi bazikombelo aciindi eeci. (Mt. 12:13; Lk. 6:10) Petro, imwaalumi walo iwakazyibidwe kuti wakali kufwambaana kulitondezya mbwalimvwa, ambweni nguwakaamba majwi aaya aatondezya bwini mbwaakalimvwa Jesu.—Amubone kavidiyo ka “Makani Aantalisyo Aabbuku lya Marko.”
Kuyandaula Mbono Zyakumuuya
(Marko 3:28, 29) Ncobeni ndimwaambila kuti bantu bayoolekelelwa zintu zyoonse, kufwumbwa naa nzibi zili buti nzyobacita amasampu aali buti ngobaamba. 29 Pele kufwumbwa uusampaula muuya uusalala takalekelelwi mane kukabe kutamani, pele ulijisi mulandu wacibi citamani.”
nwtsty twaambo tugwasya mukwiiya kuzwa kulugwalo lwa Mk. 3:29
uusampaula muuya uusalala: Kusampaula caamba kwaamba cakubeja, kuyandisisya zintu zibi naa kubelesya majwi aakusampaula kujatikizya Leza naa zintu zisetekene. Mbwaanga muuya uusalala uzwa kuli Leza, kuukazya acaali naa kukazya mboubeleka cakeelene buyo akusampaula Leza. Kweelana ambokutondezyedwe kuli Mt. 12:24, 28 alimwi a Mk. 3:22, basololi bazikombelo ba Juda bakabona mbowakali kubeleka muuya wa Leza muli Jesu ciindi naakali kucita maleele; pele bakaamba kuti nguzu eezyi zyakali kuzwa kuli Saatani Diabolosi.
mulandu wacibi citamani: Kulibonya kuti caamba cibi cakucita acaali icitakonzyi kulekelelwa; kunyina cipaizyo cikonzya kuvwumba cibi cili boobo.—Amubone kaambo kagwasya mukwiiya ikaamba kuti uusampaula muuya uusalala mukapango aaka.
(Marko 4:26-29) Aboobo wakazumanana kwaamba kuti: “Munzila eeyi Bwami bwa Leza buli mbuli muntu nasyanga mbuto mubulongo. 27 Uloona masiku akubuka bwaca, azyalo mbuto zilamena akukomena—pele tazyibi bwini mbozikomena. 28 Bulongo kubugama bulazyala micelo buce-buce, kusaanguna busonga mpoonya makunka, kumamanino kulaba nseke kumakunka. 29 Pele mbwaatubila buyo maila, ulatalika kwaacesa asikela, nkaambo ciindi cakutebula casika.”
Sena ‘Mulacimvwisya Ncaamba Magwalo’?
Ncinzi ncotukonzya kwiiya kucikozyanyo eeci? Cakusaanguna, tweelede kuzyiba kuti tatujisi nguzu zyakweendelezya kukomena kumuuya kwamuntu ngotuyiisya Bbaibbele. Kulicesya kuyakutugwasya kweeleba kumusinikizya muntu ngotuyiisya Bbaibbele kutegwa abbapatizyigwe. Tulacita cili coonse ncotukonzya ikugwasya muntu, pele cakulicesya tulamuleka muntu kuti alisalile ikuti kayanda kulyaaba naa pe. Kulyaaba kweelede kuzwa mumoyo cakuliyandila akaambo kaluyando ndwajisi muntu kuli Leza. Ikuti kulyaaba kakutazwi mumoyo alimwi kakutakulwaizyigwi aluyando, takutambuliki kuli Jehova.—Int. 51:12; 54:6; 110:3.
Cabili, kumvwisya ciiyo ncotwiiya kucikozyanyo eeci kuyakutugwasya kutatyompwa ciindi kumatalikilo notulibona kuti tutazyali micelo mumulimo wesu. Tweelede kukkazika moyo. (Jak. 5:7, 8) Nokuba kuti mbuto taizyali micelo, ikuti naa twasoleka kusikila mpotugolela kugwasya sikwiiya, tulizyi kuti kutazyala micelo ooko tacili citondezyo cakuti tatusyomeki. Jehova ulakomezya mbuto yakasimpe mumyoyo yabantu balicesya alimwi ibalibambilide kucinca. (Mt. 13:23) Aboobo, tatweelede kuyeeya kuti kuzwidilila kwesu mumulimo kuyeeme amweelwe wabantu babbapatizyigwa. Mumeso a Jehova kuzwidilila kwesu mumulimo takuyeeme ambobautambula mulumbe bantu mbotuyiisya. Muciindi caboobo, ulakkomana kapati akusolekesya kwesu cakusyomeka, tacikwe makani naa kuli bubotu bwajanika naa pe.—Amubale Luka 10:17-20; 1 Bakorinto 3:8.
Catatu, talili lyoonse notukonzya kubona kuyaambele kwamuntu ngotuyiisya. Mucikozyanyo, banabukwetene bamwi balo ibakali kuyiisyigwa amisyinali umwi, bakamusikila misyinali ooyo akumwaambila kuti bakali kuyanda kuba basikumwaya batabbapatizyidwe. Misyinali wakabaambila kuti ikutegwa beelele bakali kuyandika kuleka kufweba. Misyinali wakagambwa kapati ciindi nobakamwaambila kuti bakacileka kufweba myezi iili mbwiibede yakaindide musyule. Nkaambo nzi ncobakalekela? Bakazyiba kuti Jehova ulababona ciindi nobafweba alimwi akuti basikuupaupa aameso tabayandi pe. Aboobo, myoyo yabo yakabakulwaizya kuti bakali kuyandika kusala—kufweba amisyinali kalanga naa kulekela limwi kufweba. Akaambo kaluyando lwa Jehova ndobakatalika kuba aandulo, bakacikonzya kusala kabotu. Bakali bakomena kumuuya nokuba kuti misyinali taakwe ncaakazyi kujatikizya kucinca ikwakali kucitika.
Kubala Bbaibbele
(Marko 3:1-19a) Alimwi wakanjila mucikombelo, oomo mwakali mwaalumi umwi wakapuutide janza. 2 Aboobo bakali kumulangisisya kutegwa babone naa wakali kunoomuponya mwaalumi ooyo mu Sabata kutegwa bamupe mulandu. 3 Mpoonya wakaambila mwaalumi uupuutide janza kuti: “Nyamuka, uboole akati.” 4 Kumane wakababuzya kuti: “Ncinzi cizumizyidwe kucita mu Sabata, sena nkucita cintu cibotu naa cintu cibi, ikufwutula buumi naa kujaya?” Pele bakaumuna buyo. 5 Amane kubalanga cabukali, kauside kapati akaambo kakubija kwamyoyo yabo, wakaambila mwaalumi ooyo kuti: “Kovwungulula janza lyako.” Mpoonya wakalivwungulula, eelyo janza lyakwe lyakaba kabotu. 6 Cakutasowa ciindi ba Farisi bakazwa anze mpoonya bakalibunga-bunga abacipani cabasikutobela Heroda akutalika kupangana kuti bamujaye. 7 Pele Jesu wakaunka kulwizi antoomwe abasikwiiya bakwe, alimwi nkamu mpati yabantu bazwa ku Galilaya aku Judaya yakamutobela. 8 Alimwi akuzwa ku Jerusalemu aku Idumiya amutala lya Jordano amasena aayengelede Turo a Sidoni, nkamu mpati yabantu noyakamvwa zintu zinji nzyaakali kucita, yakaboola kulinguwe. 9 Mpoonya wakaambila basikwiiya bakwe kuti bamuletele bwato busyoonto kuti akkalile mumo kutegwa nkamu yabantu itamusyanikizyi. 10 Akaambo kakuti wakaponya bantu banji, boonse aabo ibakajisi malwazi mapati bakali kumubumba kutegwa bamujate. 11 Nobaba bantu bakanjidwe myuuya iisofweede, kufwumbwa kuti bamubona, bakali kuwa muzinga kumbele lyakwe akoongolola kuti: “Uli Mwana wa Leza.” 12 Pele ziindi zinji wakali kwiilailila cakusinizya kuti itamuzyibyi kubantu. 13 Wakatanta acilundu akwiita baabo mbaakasala, mpoonya bakaunka kulinguwe. 14 Aboobo wakapanga kabunga kabantu bali 12, aabo alimwi mbaakaita kuti baapostolo, mbaakali kunakweenda limwi alimwi mbaakali kuyootuma kukambauka 15 akubapa nguzu zyakutanda madaimona. 16 Lino mukabunga aaka nkaakapanga kabantu bali 12 kwakali Simoni, ooyo alimwi ngwaakapa zina lyakuti Petro, 17 Jakobo mwana wa Zebedayo, alimwi a Johane imunyina Jakobo (alimwi aaba wakabapa zina lyakuti Boanerge, nkokuti “Bana ba Muzumo”), 18 Andreya, Filipo, Bartolomayo, Matayo, Tomasi, Jakobo mwana wa Alifayo, Tadayo, Simoni mu Kanana, 19 alimwi a Judasi Isikariote, ooyo iwakamwaaba.
APRIL 30–MAY 6
MBONO IZILI MU JWI LYA LEZA | MARKO 5-6
“Jesu Ulijisi Nguzu Zyakubusya Bayandwa Besu Bafwide”
(Marko 5:38) Aboobo bakasika kuŋanda yamweendelezi wacikombelo, mpoonya wakabona bantu bayobeka alimwi abaabo bakali kulila akoomoka.
(Marko 5:39-41) Naakanjila muŋanda, wakababuzya kuti: “Nkaambo nzi ncomulila akuyobeka boobu? Ooyu mwana tafwide pe, pele uloona.” 40 Aboobo bakatalika kumuseka. Pele naakabatandila anze boonse, wakabweza bausyi mwana abanyina antoomwe abaabo mbaakali limwi, akunjila ooko kwakali mwana. 41 Kumane wakajata janza lyamwana akumwaambila kuti: “Talitha kumi,” calo icaamba kuti: “Musimbi, ndikwaambila kuti, buka!”
nwtsty kaambo kagwasya mukwiiya kuzwa kulugwalo lwa Mk. 5:39
tafwide pe, pele uloona: Mu Bbaibbele, lufwu kanji-kanji lukozyanisyigwa kukoona. (Int. 13:3; Joh. 11:11-14; Mil. 7:60; 1Kor. 7:39; 15:51; 1Tes. 4:13) Jesu wakalizyi kuti ulamubusya musimbi ooyo, aboobo ambweni wakaamba boobu nkaambo wakali kuyanda kutondezya kuti mbubwenya bantu mbobakonzya kusinsimunwa kuŋonzi, balakonzya kubusyigwa kulufwu. Nguzu nzyaakabelesya Jesu kubusya musimbi ooyo zyakazwa kuli Usyi, “uubusya bafwide akwaamba zintu zitanacitika mbuli kuti zilicitikide kale.”—Rom. 4:17.
(Marko 5:42) Mpoonya aawo mwana musimbi wakabuka akutalika kweenda. (Musimbi ooyu wakajisi myaka iili 12.) Eelyo babone buyo boobo, bakakkomana kapati.
Mwana Musimbi Wabuka!
Ziindi zimwi musyule, Jesu wakali kulailila baabo mbaakaponya kuti bataambilizyi ceeco ncaabacitila, aboobo eeco ncaacita alimwi kubazyali bamwana aaba. Nokuba boobo, bazyali aaba ibakkomene kapati alimwi abantu bambi baamwaya makani aaya “mucooko coonse eeco.” (Matayo 9:26) Sena nywebo inga tiimwaambila bantu bambi calukkomano ikuti muyandwa wanu umwi wabusyigwa kuzwa kubafwu? Eeci nciindi cabili mumagwalo Jesu naakabusya muntu kuzwa kubafwu.
Kuyandaula Mbono Zyakumuuya
(Marko 5:19, 20) Nokuba boobo, tanaakamuzumizya pe, pele wakamwaambila kuti: “Koya kumunzi kuli bamukwasyi wako, ukabaambile zintu zyoonse Jehova nzyaakucitila ambwaakufwida luzyalo.” 20 Muntu ooyu wakaunka akutalika kwaambilizya mu Dekapole zintu zyoonse Jesu nzyaakamucitila, eelyo bantu boonse bakagambwa.
nwtsty kaambo kagwasya mukwiiya kuzwa kulugwalo lwa Mk. 5:19
ukabaambile: Mukwiimpana amalailile ngaakali kupa lyoonse Jesu aakutaambila banamaleya zyamaleele aakwe (Mk. 1:44; 3:12; 7:36), aawa wakalailila mwaalumi ooyu kuti akaambile bamukwasyi wakwe kujatikizya cakacitika. Ambweni wakacita oobu akaambo kakuti Jesu wakaambilidwe kuzwa mucooko eeco alimwi akuti tanaakali kukonzya kuunka lwakwe kuyoobakambaukila; alimwi eeci cakali kuyoogwasya kucesya twaambo tutali kabotu itwakamwaikide akaambo kakunyonyooka kwangulube.
(Marko 6:11) Alimwi kufwumbwa kubusena nkobatakamutambuli naa kumuswiilila, mwaakuzwa ooko amukakunkumune lusuko kumaulu aanu kuti bukabe bumboni kulimbabo.”
nwtsty kaambo kagwasya mukwiiya kuzwa kulugwalo lwa Mk. 6:11
amukakunkumune lusuko kumaulu aanu: Kucita boobu cakali citondezyo cakuti basikwiiya tiibakajisi mulandu wakupegwa cisubulo icakali kuzwa kuli Leza. Majwi aakozyenye alajanika amulugwalo lwa Mt. 10:14; Lk. 9:5. Marko alimwi a Luka bakayungizya majwi aakuti kuti bukabe bumboni kulimbabo [naa “kujatikizya mbabo”]. Paulo alimwi a Barnaba bakaatobela malailile aaya ku Antiokeya yaku Pisidiya (Mil. 13:51), alimwi ciindi Paulo naakacita cintu cikozyenye mu Korinto kwiinda mukukunkumuna lusuko kucisani cakwe, wakayungizya akwaamba kuti: “Bulowa bwanu abube amitwe yanu. Mebo ndinyina mulandu.” (Mil. 18:6) Kweelede kuti kucita cintu cili boobu bakalicizyi kale basikwiiya; ba Juda ibakali kwiinda muzisi izyabantu Bamasi bakali kukunkumuna lusuko kumpato zyabo kabatananjila alimwi mucooko caba Juda lwalo ndobakali kuyeeyela kuti lulisofweede. Nokuba boobo, tacidoonekwi kuti Jesu wakajisi muzeezo wiindene ciindi naakali kupa basikwiiya bakwe malailile aaya.
Kubala Bbaibbele
(Marko 6:1-13) Mpoonya wakazwa ooko abasikwiiya bakwe akuboola kumunzi okwabo. 2 Mu Sabata, wakatalika kuyiisya mucikombelo, lino ibunji bwabaabo ibakali kumuswiilila bakagambwa akubuzya kuti: “Ino muntu ooyu wakazijana kuli zintu eezyi? Alimwi nkaambo nzi busongo oobu ncobwakapegwa kulinguwe, alimwi amilimo mipati eeyi nciicitilwa amuntu ooyu? 3 Sena ooyu tali sikubeza mapulanga, imwana wa Mariya alimwi imunyina Jakobo, Josefa, Judasi alimwi a Simoni? Alimwi sena bacizyi bakwe tatuli limwi aano?” Aboobo bakamukaka. 4 Pele Jesu wakabaambila kuti: “Musinsimi ulalemekwa koonse ccita buyo mumunzi okwabo, kuli bamukowa alimwi akuli bamuŋanda yakwe.” 5 Aboobo tanaakali kukonzya kucita mulimo mupati uuli woonse ooko, ccita buyo kubikka maanza aakwe abalwazi basyoonto akubaponya. 6 Masimpe, kubula lusyomo kwabo kwakamugambya. Eelyo wakaunka akwiinda muminzi yoonse iizingulukide, kayaabuyiisya. 7 Mpoonya wakaita bali Kkumi Ababili akutalika kubatuma bobilo-bobilo, alimwi wakabapa nguzu zyakutanda myuuya iisofweede. 8 Alimwi wakabalailila kuti kutabi cintu ncobatolelezya mulweendo lwabo ccita buyo nkoli—tiibakeelede kutolelezya cakulya, nkomo yakubikkila cakulya, naaba mali muzikwama zyabo— 9 pele bakeelede buyo kusama mpato alimwi tiibakeelede kusama zisani zyobilo. 10 Kumane wakabaambila kuti: “Kufwumbwa nkomunjila muŋanda, amukkale oomo kusikila mukazwe kubusena oobo. 11 Alimwi kufwumbwa kubusena nkobatakamutambuli naa kumuswiilila, mwaakuzwa ooko amukakunkumune lusuko kumaulu aanu kuti bukabe bumboni kulimbabo.” 12 Mpoonya bakaunka akutalika kukambauka kuti bantu beempwe, 13 alimwi bakatanda madaimona manji akunanika balwazi banji mafwuta alimwi akubaponya.