KUPONA BUUMI BWA BUNAKRISTO

Cibeela Cipya ca Muswaangano

Kutalikila mumwezi wa January 2018, muswaangano unoobikkilizya cibeela catwaambo tugwasya mukwiiya alimwi acibeela cazifwanikiso azyakweebelela kuzwa mu Bbaibbele lya Busanduluzi Bwanyika Mpya (nwtsty) lyakwiiya ilili a Intaneti, nokuba kuti Bbaibbele eeli lyakwiiya taliko mumwaambo wanu. Cakutadooneka, cibeela eeci ciyoomugwasya kulibambila kabotu muswaangano ooyu. Kuyungizya waawo, ciyoomugwasya kuswena afwaafwi a Taateesu siluyando, Jehova!

TWAAMBO TUGWASYA MUKWIIYA

Cibeela eeci citondezya zilengwa, masena alimwi amwaambo mutupango tunji twamu Bbaibbele.

Matayo 12:20

Katambo kalambe kasuka busi: Lambe kakali kantu kasyoonto ikakali kubelesyegwa muŋanda, ikakali kubikkwa mafwuta aamaolifa. Katambo kakali kukwela mafwuta kutegwa kakayaka. Mabala aa Chigiriki aakasandululwa kuti “katambo kalambe kasuka busi” alakonzya kwaamba katambo kasuka busi akaambo kakuti inga kucili kalilo pele kayaabuzima. Businsimi bulembedwe kulugwalo lwa Isaya 42:3 bwakaambilalimwi kujatikizya lweetelelo lwa Jesu; takabalekelezyi bantu balicesya alimwi abaabo batyompedwe ibajisi bulangizi nobuceya.

Matayo 26:13

Ncobeni: Ibbala lyamu Chigiriki lyakuti, a·menʹ, lyakazwa kubbala lya Chihebrayo, ilyaamba kuti “akube boobo” naa “masimpe.” Jesu kanji-kanji wakali kulibelesya bbala eeli kumatalikilo aakaambo, cisyomezyo naa businsimi, kutegwa akankaizye alimwi akusinizya twaambo twamasimpe. Jesu mbwaakali kulibelesya bbala lyakuti “ncobeni” naa ameni, kunyina kumbi mu Bbaibbele nkolibelesyedwe munzila eeyo nomuba mumabbuku aamba zyabukombi ccita buyo mumabbuku aa Makani Mabotu. Ciindi bbala lyakuti (a·menʹ a·menʹ) nolyakali kwiindulukwa kwaambwa kweelana ambokulembedwe mubbuku lya Makani Mabotu lya Johane, ibbala ndyaakabelesya Jesu lyakasandululwa kuti ‘ncobeni ndimwaambila masimpe kuti.’—Joh. 1:51.

ZIFWANIKISO AZYAKWEEBELELA

Zifwoto, zyakuzekaula alimwi amavidiyo aatajisi majwi azifwanikiso zyatudooli izitondezya makani manji aalembedwe mu Bbaibbele.

Betefage, Cilundu ca Maolifa alimwi a Jerusalemu

Kavidiyo aaka katondezya nzila iitozya ku Jerusalemu kuzwa kujwe, nkokuti kuzwa kumunzi mazuba aano uutegwa et-Tur—walo uuyeeyelwa kuti ngo Betefage waambwa mu Bbaibbele—walo uuli atala aa Cilundu ca Maolifa. Betaniya ili kujwe kwa Betefage kunselelo kwa Cilundu ca Maolifa. Ciindi nobakali mu Jerusalemu, Jesu abasikwiiya bakwe kanji-kanji bakali koona ku Betaniya, kwalo ikwiitwa kuti el-ʽAzariyeh naa (El ʽEizariya) mazuba aano, eeli ndibbala lyaci Arabic ilyaamba “Busena bwa Lazaro.” Cakutadooneka Jesu wakali kusikila kuŋanda nkwaakali kukkala Marta, Mariya a Lazaro. (Mt. 21:17; Mk. 11:11; Lk. 21:37; Joh. 11:1) Ciindi naakali kuzwa kuŋanda yabo kuunka ku Jerusalemu, kulibonya kuti Jesu wakali kubelesya nzila iikozyenye ayeeyo iitondezyedwe mukavidiyo. Mu Nisani 9, 33 C.E., ciindi Jesu naakatantide ambongolo kali aa Cilundu ca Maolifa kuya ku Jerusalemu, kweelede kuti wakabelesya nzila njomunya eeyi kuzwa ku Betefage.

Nzila iizwa ku Betaniya kuya ku Betefage
Betefage
Cilundu ca Maolifa
Kkuti lya Kidroni
Cilundu ca Tempele

Mupikili Kucifwuwa Cakukasindi

Eeci ncifwoto cakasindi kamuntu ikayasidwe mupikili mulamfwu uulampa masentimita aali 11.5. Cifwuwa cakasindi keni kakusaanguna cakajanwa mu 1968, ciindi nobakali kusya zintu zyakaindi Jerusalemu nkoili kunyika, alimwi zintu eezyi zyakali kucitika mumazuba aabana Roma. Cifwuwa cakasindi eeci icakavwukkulwa kaindi cipa bumboni bwakuti mipikili yakali kubelesyegwa kugagaila muntu kucisamu. Kuboneka kuti mupikili ooyu ulikozyenye amipikili njobakabelesya basikalumamba bana Roma kugagaila Jesu Kristo acisamu. Cifwuwa cakasindi eeci cakajanwa mubbokesi lyabbwe, mwalo imwakali kubikkwa mafwuwa aamuntu uufwide ciindi mubili nowamana kubola. Eeci citondezya kuti muntu iwakali kujaigwa acisamu wakali kukonzya kuzikkwa.—Mt. 27:35.