CIIYO 2

Kukanana Cakulikwaya

2 Bakorinto 2:17

NCOMWEELEDE KUCITA: Amukanane mbuli mbomukanana lyoonse, kutegwa baswiilizi banu babone kuti mulazisyoma nzyomwaamba akuti mulababikkila maano, alimwi akuti nzyomwaamba zizwa ansi aamoyo.

MBOMUKONZYA KUCITA OOBO:

Amupaile kutegwa mulibambile kabotu akubikkila maano. Amupaile kutegwa mucikonzye kubikkila maano kapati kumulumbe wanu, pele kutali kubuyoofwu bwanu. Amubikkile maano kutwaambo tupati-pati ntomuyanda kwaamba. Amwaambe twaambo mumajwi aanu; mutanoobali buyo mabala kweelana ambwaalembedwe.

Ikuti naa kuli mpomuyanda kuyoobala mu Bbaibbele naa mubbuku limbi buyo, amuciinduluke kabotu-kabotu cibeela eeco kutegwa mukabale munzila iimvwika. Ikuti naa kuli bantu baambidwe, majwi ngobakaamba amwaabale munzila yeelede, pele mutaciindizyi.
Amukanane kuzwa ansi aamoyo. Amuyeeye kaambo baswiilizi banu ncobayandika kuumvwa mulumbe ngomujisi. Amubabikkile maano. Aboobo mbomwiimikila, mbomutambaika alimwi ambomuboneka kubusyu ziyootondezya kuti mulazisyoma nzyomwaamba alimwi akuti mulilikwaide.

Kukanana mbuli mbomukanana lyoonse takweelede kumupa kutondezya kubula bulemu. Amuzumanane kutondezya bulemu kumulumbe wanu kwiinda mukubelesya mwaambo uulimvwisya alimwi akwaamba munzila yeelede.
Amubalange baswiilizi banu. Amuzumanane kubalanga baswiilizi banu ikuti kaceelela kucita oobo. Ikuti kamupa makani, amumulange muntu umwi aumwi, ikutali buyo nkamu yabantu yoonse pe.