TUBBOKESI TWAKUYIISYA 19B
Maanzi Aakunka Aniini-niini Waba Mulonga Mupati!
Ezekieli wakabona kalonga kakakunka aniini-niini kuzwa mutempele lya Jehova mpoonya munzila yamaleele wakaba mulonga mulamfwu wakabweza cibeela cilampa makkilomita obilo! Mumabali aamulonga, wakabona zisamu ziboneka kabotu zizyala micelo iiligwa amatuvwu aakusilisya. Ino zyoonse eezyi zyakali kwaamba nzi?
Mulonga Uuleta Zilongezyo
KAINDI: Baange mbobakajokela buyo kumunzi wabo, zilongezyo zyakakunka kulimbabo ciindi nobakali kubukulusya bukombi busalala atempele
MAZUBA AANO: Mu 1919 bukombi busalala bwakabukulusyigwa, kujalula nzila yakukunka kwazilongezyo zyakumuuya kubabelesi ba Leza basyomeka
KUMBELE: Yaakwiinda Amagedoni, Jehova uyootulongezya munzila zinji, mbuli kutugwasya kutegwa tulondoke alimwi akutuyiisya kasimpe kapya
Maanzi Aapa Buumi
KAINDI: Jehova wakabalongezya kapati bantu bakwe bamvwida, nociba ciindi nobakali kuyaabuvwula, wakapa kuti bazwidilile kumuuya
MAZUBA AANO: Muparadaiso yakumuuya, mweelwe wabantu uuyaabukomena wagwasyigwa akukunka kwazilongezyo zya Jehova ikuyaabuyungizyika alimwi baba abuumi munzila yakumuuya
KUMBELE: Aabo ibayoofwutuka lya Amagedoni bayoosangana abantu banji ibayoobusyigwa, alimwi zilongezyo zya Jehova zinooli zinji cakuti bayookkwana boonse
Zisamu Zizyala Micelo Iiligwa Amatuvwu Aakusilisya
KAINDI: Munzila yakumuuya, Jehova wakabasanina bantu bakwe basyomeka munyika yabo yakabukulusyigwa; alimwi wakabaponya kukuciswa kwakumuuya nkobakali kuciswa kwaciindi cilamfwu
MAZUBA AANO: Cakulya cakumuuya cinji kapati cili mukugwasya bantu kupona kumuuya alimwi akumanizya nzala mazuba aano
KUMBELE: Kristo abalelinyina bali 144,000 bayoogwasya bantu boonse basyomeka kulondoka alimwi akuba abuumi bubotu lyoonse!