Malifalensi Aamu Kabbuku Kamuswaangano Wabuumi Amulimo Wesu
MAY 2-8
MBONO IZILI MU JWI LYA LEZA | 1 SAMUELE 27-29
“Davida Mbwaakalibambila Kulwana Nkondo”
Atusumpule Zina lya Jehova Toonse
Kuzwa ku Nobi, Davida wakatija kuya kumbo mucilawo caba Filisti kulampa makkilomita aatandila ku 40 mpoona wakaakuyubila ku Mwami Akisi mumunzi wa Goliati wa Gati. Ambweni aciindi eeco Davida wakali kuyeeya kuti Saulo kunyina naakali kukonzya kusika ku Gati. Pele tiilyakalampa, babelesi bamwami wa Gati bakamuziba Davida. Ciindi Davida naakamvwa ntwi-ntwi yakuti bamuziba, “[wakayoowa] loko kubusyu bwa-Akisi mwami wa-Gati.”—1 Samuele 21:10-12.
Mpoona ba Filisti bakamujata Davida. Ambweni eeci nceciindi Davida naakalemba ntembauzyo ikukumbila Jehova ategwa: “Bika misozi yangu munsazi yako.” (Intembauzyo 56:8 alimwi akatwe) Kwiinda mukucita boobo, wakali kusyoma kuti Jehova kunyina naakali kunga wamuluba mumapenzi aakwe pele wakali kuyoomulanganya akumukwabilila. Kunze lyaboobo, Davida wakayandaula nzila yakucenga mwami waba Filisti. Wakalicengeezya kusondoka. Elyo Mwami Akisi naakamubona, wakabakalalila babelesi bakwe akaambo kakumuletela muntu ‘uusondokede.’ Cilisalede kuti Jehova wakalongezya nzila njaakabelesya Davida. Davida wakatandwa mumunzi, aboobo wakafwutuka alimwi, nokuba kuti wakatiijaigwe.—1 Samuele 21:13-15.
Nobakubusi—Mbuti Mbomukonzya Kupa Kuti Bamwi Kabamusyoma?
Atulange-lange buyumuyumu abumwi mbwaakajana Davida. Ciindi naakananikwa kuba Mwami, Davida wakeelede kulindila kwamyaka minji katanatalika kweendelezya kali Mwami wa Juda. (1Sam. 16:13; 2Sam. 2:3, 4) Muciindi eeco, ncinzi cakamugwasya kulindila cakukkazika moyo? Muciindi cakutyompwa, Davida wakabikkila maano kuzintu nzyaakali kukonzya kucita. Mucikozyanyo, ciindi naakali simutuntuli mucilawo caba Filisiti, Davida wakabelesya ciindi eeci kulwana basinkondonyina abana Israyeli. Kwiinda mukucita boobo, wakakwabilila minyinza yacilawo ca Juda.—1 Sam. 27:1-12.
it-2 245 ¶6
Kubeja
Masimpe kuti ikubeja kuli koonse takuzumizyidwe mu Bbaibbele, pele eeci tacaambi kuti tweelede kuyubununa makani aamasimpe kubantu ibateelede kwaamvwa. Jesu Kristo wakaamba kuti: “Mutapi babwa zintu zisalala, nokuba kufwusila ngulube ngale zyanu, kutegwa zitazilyatauli mpoonya zimupilukile akumukwamauna.” (Mt. 7:6) Nkakaambo kaako aziindi zimwi Jesu tanaakali kwaamba makani oonse naa kupa bwiinguzi bugaminide bwamibuzyo imwi kutegwa atanjili muntenda. (Mt. 15:1-6; 21:23-27; Joh. 7:3-10) Ncimwi buyo ancaakacita Abrahamu, Izaka, Rahabu, alimwi a Elisha. Aciindi cimwi, bantu aaba tiibakaamba makani oonse kubantu batakali bakombi ba Jehova.—Matl. 12:10-19; caandaano 20; 26:1-10; Jos. 2:1-6; Jak. 2:25; 2Bam. 6:11-23.
Mbono Zyakumuuya
Sena Bafwide Balakonzya Kubagwasya Bapona?
Kamuyeeya buyo. Ibbaibbele lyaamba kuti muntu afwa “ulabweeda kubulongo” akuti “makanze aakwe oonse alamana.” (Intembauzyo 146:4) Saulo a Samuele bakalizyi kuti Leza tayandi kuti kabalomba lugwasyo kubaŋanga. Masimpe ngakuti, Saulo kumatalikilo nguwakali kumpela kugusya basimizimo boonse!—Levitiko 19:31.
Amukalange-lange kaambo aaka. Ikuti naa Samuele uusyomeka wakali kupona mumuuya, sena naakatyola mulawo wa Leza kwiinda mukubelekela antoomwe amuŋanga kutegwa babonane a Saulo? Jehova wakalikakide kwaambaula a Saulo. Sena Leza Singuzuzyoonse wakali kukonzya kusungilizyigwa amuŋanga kuti aambaule a Saulo kwiinda mukubelesya Samuele wakafwa? Peepe. Masimpe ngakuti, ooyo “Samuele” iwakalibonya tanaakali musinsimi wa Leza uusyomeka. Muciindi caboobo lyakali daimona naa ceelo—icakali kulicengeezya kuti ngu Samuele wakafwa.
MAY 9-15
MBONO IZILI MU JWI LYA LEZA | 1 SAMUELE 30-31
“Amuliyumye Kwiinda Munguzu zya Jehova Leza Wanu”
Amumuyoowe Jehova—Amukkomane!
Kuyoowa Leza kwa Davida kwakamugwasya kapati kunze buyo lyakutacita cibi. Kwakamuyumya kucita cabusicamba alimwi camaano naakali mumapenzi. Kwamwaka omwe amyezi yone Davida abantu bakwe bakamuyuba Saulo ku Zikilaga mucisi caba Filisti. (1 Samuele 27:5-7) Aciindi cimwi baalumi nobakazwide amunzi, impi yabafumpi bana Amaleki yakauumpa munzi akubwezelezya bamakaintu, bana amatanga oonse. Nobakapiluka akubona cakacitikide, Davida abantu bakwe bakalila. Kuusa ooko kwakaleta bukali alimwi bantu ba Davida bakati mufwuse mabwe. Nokuba kuti wakapenzyegwa mumoyo, Davida tanaakatyompwa pe. (Tusimpi 24:10) Kuyoowa Leza kwakamukulwaizya kusyoma muli Jehova alimwi “wakaliyumya munguzu zya-Jehova.” Kwiinda mulugwasyo lwa Leza, Davida abantu bakwe bakabeenzya bana Amaleki akuboozya zintu zyoonse.—1 Samuele 30:1-20.
Jehova Ulatukwabilila Kutegwa Tukafwutuke
Davida wakajana mapenzi manji mubuumi bwakwe. (1 Sam. 30:3-6) Majwi aakwe aakasololelwa amuuya atondezya kuti Jehova wakalizyi mbwaakali kulimvwa. (Amubale Intembauzyo 34:18; 56:8.) Leza ulizyi mbotulimvwa andiswe. ‘Nituwizukide’ naa ‘kuzingwa mumoyo’ ulaswena afwaafwi kulindiswe. Eeci cilakonzya kutuumbulizya mbubwenya mbuli Davida iwakaimba kuti: “Ndabotelwa akukondwa muluse lwako, nkaambo ulibwene mapenzi aangu, ulizi kupenga kwamoyo wangu.” (Int. 31:7) Pele nzinji Jehova nzyacita kwiinda buyo kuzyiba mapenzi eesu. Ulatuyumya-yumya kwiinda mukutukulwaizya akutuumbulizya. Nzila imwi njabelesya nkwiinda mumiswaangano ya Bunakristo.
Mbono Zyakumuuya
Twaambo Tupati-Pati Kuzwa Mubbuku lya Samuele lya Kusaanguna
30:23, 24. Ikusala ooku ikuyeeme a Myeelwe 31:27, kutondezya kuti Jehova ulababikkila maano aabo ibabeleka milimo yakugwasyilizya mumbungano. Aboobo kufwumbwa milimo njotubeleka “ibe yamoyo woonse, ibe mbuli milimo iicitilwa Mwami, itabi yakubelekela bantu buyo pe.”—Bakolose 3:23.
MAY 16-22
MBONO IZILI MU JWI LYA LEZA | 2 SAMUELE 1-3
“Ino Twiiya Nzi Kulwiimbo Lwiitwa Kuti ‘Buta’?”
Amubalemeke Ibapedwe Nguzu Zyakumweendelezya
Sena Davida wakatyompwa eelyo naakali kupenzyegwa? Davida wakalilila Jehova ulaamba: “Nkaambo . . . bantu bakali balavwima buumi bwangu.” (Intembauzyo 54:3) Wakalilila Jehova camoyo woonse ulaamba: “Undivune kulibasinkondoma, O Leza wangu . . . Basinguzu babungana kuti bandilwisye. Tuuli mulandu wangu, naa cibi cangu, O Jehova. Balazuzaana kundibambila mebo nentakwe kaambo. Buka, undigwasye, ubone.” (Intembauzyo 59:1-4) Sena kuli nomwakalimvwide boobo cakuti nokuba kuti kunyina nomwakamubisizya muntu umwi uujisi bweendelezi pele walo wakazumanana kumupenzya? Davida tanaakaleka kumulemeka Saulo. Saulo naakafwa, muciindi cakusotauka kuzyana akaambo kakukondwa, Davida wakaimba lwiimbo lwamalila cabuumba ulaamba: “Saulo a-Jonatani bakali bayandwi, bakali babotu mubuumi bwabo . . . Bakali aluno kwiinda insika, bakali anguzu kwiinda balavu. Nubasimbi ba-Israyeli, amulile Saulo.” (2 Samuele 1:23, 24) Taciliboteli kaka cikozyanyo cakupa bulemu bwini-bwini kumunanike wa Jehova, nokuba kuti Davida wakabisizyigwaa Saulo!
Ikwaabwa Ncitondezyo Cilibilisya Camazuba Aamamanino
Bbaibbele lilaamba bantu ibambi ibakali kusyomeka. Atulange-lange buyo bobilo akati kabo, alimwi tulabona ncotukonzya kwiiya kuli mbabo, tulatalika amwaalumi iwakali kusyomeka kuli Davida. Jonatani, mwana mupati wa Mwami Saulo, kuboneka kuti ngookeelede kukona bwami mu Israyeli—nikwatali kuti Jehova wakasala Davida kuba mwami uutobela wa Israyeli. Jonatani wakakulemeka kusala kwa Leza. Kunyina naakamumvwida munyono Davida akumubona kuti ngusinkondonyina. Muciindi caboobo, “moyo wa-Jonatani wakaswaana amoyo wa-Davida,” akumusyomezya kuti unoosyomeka kulinguwe. Kumane buya Jonatani wakapa Davida zyakusama zyakwe, panga lyakwe, buta bwakwe alutambo lwakwe kumutondezya bulemu bweelede mwami. (1 Sam. 18:1-4) Jonatani wakacita ncaakali kukonzya kucita ‘kuyumyayumya Davida,’ kusikila akubikka buumi bwakwe muntenda kwiiminina Davida kumbele lya Saulo. Jonatani wakaambila Davida kuti: “Uyooba mwami wa-Israyeli, nkabela mebo nzooba wabili kulinduwe.” (1 Sam. 20:30-34; 23:16, 17) Nkakaambo kaako naakafwa Jonatani, Davida wakatondezya buumba bwakwe alimwi aluyando lwakwe kuli Jonatani mulwiimbo lwakuusa.—2 Sam. 1:17, 26.
Mbono Zyakumuuya
it-1 369 ¶2
Mukwesu
Ibbala lyakuti “mukwesu” lilabelesyegwa alimwi kuli baabo ibajisi mbaakani amakanze aakozyenye. Mucikozyanyo, Mwami Hiramu waku Turo wakaita Mwami Solomoni kuti mukwesu kutali akaambo kakuti bakeelene nguzu zyabweendelezi, pele ambweni akaambo kakuti wakali kumuletela masamu alimwi azintu zimwi buyo zyatempele. (1Bam. 9:13; 5:1-12) “Amubone! Eelo kaka ncibotu alimwi cilakondelezya kuti babunyina kabakkede antoomwe calukamantano!” Kwiinda mukulemba majwi aaya, Davida wakali kupandulula kuti tabuli bunyina bwakumubili bulikke bupa kuti kube luumuno alukamantano akati kabanabokwabo. (Int. 133:1) Aboobo, tabuli bunyina bwakumubili bwakapa kuti Davida aite Jonatani kuti mukwesu, pele nduyando ndwaakajisi kulinguwe. (2Sam. 1:26) Balongwe ibajisi bube alimwi abukkale bukozyene, nokuba kuti tabuli kabotu, balaitwa kuti mbanabunyina.—Tus. 18:9.
MAY 23-29
MBONO IZILI MU JWI LYA LEZA | 2 SAMUELE 4-6
“Amuyoowe Kucita Zintu Zitamukkomanisyi Jehova”
Twaambo Tupati-Pati Kuzwa Mubbuku lya Samuele Lyabili
6:1-7. Nokuba kuti Davida wakajisi makanze mabotu, ikusoleka kwakwe kuti alonzye Bbokesi kwiinda mukubelesya ŋola kwakali kutyola mulawo wa Leza, aboobo cakapa kuti atazwidilili. (Kulonga 25:13, 14; Myeelwe 4:15, 19; 7:7-9) Alimwi Uza ncaakacita kusoleka kujata Bbokesi citondezya kuti makanze mabotu taacinci zintu Leza nzyayanda.
Jehova Lyoonse Ucita Ciluleme
Amuyeeye kuti Uza wakaluuzi kabotu Mulawo. Ibbokesi lyakali kwiiminina kubako kwa Jehova. Mulawo wakalaambide kuti tilyakeelede kujatwa amuntu utazuminizyidwe alimwi wakacenjezyela limwi kuti batyola mulawo beelede kusubulwa kwiinda mukujaigwa. (Myeelwe 4:18-20; 7:89) Aboobo, kulonzyegwa kwabbokesi tiwakali mulimo wakeelede kuubya-ubya. Uza cilibonya kuti wakali mu Levi (nokuba kuti tanaakali mupaizi), aboobo weelede kuti wakaluuzi kabotu Mulawo. Kunze lyaboobo, mumyaka yamusyule, Ibbokesi lyakalitoledwe kuŋanda yabausyi kutegwa libambwe kabotu. (1 Samuele 6:20–7:1) Lyakakkala okuya kwamyaka iili 70, kusikila Davida naakasala kulilonzya. Kuzwa kubwana, Uza weelede kuti wakaliizyi milawo iijatikizya Ibbokesi.
Jehova Lyoonse Ucita Ciluleme
Mbuli mbokwaambwa kale, Jehova ulabona zili mumyoyo. Mbwaanga Ijwi lyakwe lyaamba kuti Uza “wakajata bbokesi” Jehova weelede kuti wakabona makanze akuliyanda aatayubununwa cakugaminina mucibalo. Sena Uza wakali muntu uulisumpula, wakali kuyandisya kutyola milawo? (Tusimpi 11:2) Sena kweenda a Bbokesi mubuleya ndyobakayobode bamukwasyi wakwe kwakamupa kuti atalike kulisumpula? (Tusimpi 8:13) Sena Uza tanaakajisi lusyomo, cakuti wakali kuyeeya kuti janza lya Jehova lyakali lifwaafwi kubambilila bbokesi lisetekene lyakali kwiiminina kubako kwakwe? Kufwumbwa mbocakalibede, tulakonzya kusyoma kuti Jehova wakacita ciluleme. Weelede kuti wakabona cintu cimwi mumoyo wa Uza cakamupa kuti amubeteke mpoonya-mpoonya.—Tusimpi 21:2.
Mbono Zyakumuuya
Lyoonse Kamubikka Mikuli Yenu Mumaanzaa Jehova
Davida mbwaakali ngomwami kuli mbwaakajatikizigwa mumulandu oyu. Ncaakacita awa cilatondezya kuti nobaba baabo balaacilongwe cibotu a Jehova balakonzya muziindi-zimwi ikwaatambula bubyaabi masunko. Icakusaanguna Davida wakanyema. Amane wakayoowa. (2 Samuele 6:8, 9) Icilongwe cakwe calusyomo muli Jehova cakasunkwa loko. Mpaawa lino wakabaanga wakakilwa kubikka mukuli wakwe mumaanza a Jehova, naatakatobela malailile akwe. Sena eco cilakonzya kuba akulindiswe zimwi ziindi? Sena kuli notutamikizya Jehova mapenzi asika akaambo kakutaaluka malailile aakwe?—Tusimpi 19:3.
AMUSUNGWAALE MUMULIMO WAMUMUUNDA
“Amucenjele”—Bwasika Buzuba Bwalubeta!
Mbotuya bucenjela, ino ncinzi ncotukonzya kulangila? Ibbuku lya Ciyubunuzyo lilazindandamika zintu ziyoocitika mukuzuzikizyigwa kwamakanze aa Leza. Ikubweza ntaamo kuli ceeco ncolyaamba kulayandika kapati ikuti naa katuyanda kuti katulibambide. Ibusinsimi bulazipandulula cakusalazya zintu iziyoocitika kubuzuba “bwa-Mwami,” ibwakatalika Kristo naakabikkwa acuuno kujulu mu 1914. (Ciyubunuzyo 1:10) Ibbuku lya Ciyubunuzyo litugwasya kubikkila maano kumungelo wakapegwa ‘makani mabotu aakukambauka.’ Uloongolola ajwi pati kuti: “Amuyoowe Leza akumupa bulemu, nkaambo casika ciindi calubeteko lwakwe.” (Ciyubunuzyo 14:6, 7) “Ciindi” calubeta nciindi cifwaafwi kapati; cilabikkilizya akwaambilizya alimwi akucita lubeta lupanduludwe mubusinsimi oobo. Tupona muciindi eeco.
Lino, iciindi eeco calubeta kacitanamana, tukulwaizyigwa kuti: “Amuyoowe Leza akumupa bulemu.” Ino eeci cijatikizya nzi? Ikumuyoowa Leza kweelede kutupa kuti tutantamuke bubi. (Tusimpi 8:13) Ikuti naa tulamulemeka Leza, tuyoomuswiilila cakumaniina. Tatukajati bubi cakunga twaleka kubala Jwi lyakwe, Ibbaibbele. Tatukaluubyi-ubyi lulayo lujatikizya kujanika kumiswaangano ya Bunakristo. (Ba-Hebrayo 10:24, 25) Tuyoocibikkila maano coolwe cesu cakukambauka makani mabotu aa Bwami bwa Mesiya alimwi tuyoocita oobo cabusungu. Tuyoosyoma Jehova ziindi zyoonse alimwi camoyo woonse. (Intembauzyo 62:8) Ikuzyiba kuti Jehova Mwami Wakoonse-koonse, tulamulemeka kwiinda mukulibombya kulinguwe mbwaanga ngomuleli mubuumi bwesu. Sena mumuyoowa masimpe Leza akumupa bulemu munzila eezi zyoonse?
MAY 30–JUNE 5
MBONO IZILI MU JWI LYA LEZA | 2 SAMUELE 7-8
“Jehova Wakapanga Cizuminano a Davida”
“Nkabela Cuuno Cabwami Bwakwe Njoociimikizya Akutamani”
Jehova wakkomana akulisungula kwa Davida. Akaambo kakulyaaba kwa Davida amakani aali mubusinsimi, Leza waambila Davida kuti muntu uumwi wamumukwasyi wakwe uya kulela kukabe kutamani. Natani nguwatumwa kuya kwaambila Davida cisyomezyo ca Leza cakuti: “Nkabela iŋanda yako abwami bwako zilaima nji kukabe kutamani, acalo cuuno cako cilaimikwa kabotu mazuba oonse.” (Kapango 16) Ino nguni ooyu wakaambwa kuti nguuyakulya zyina—walo iwakali kuya kulela kukabe kutamani?—Intembauzyo 89:20, 29, 34-36.
“Nkabela Cuuno Cabwami Bwakwe Njoociimikizya Akutamani”
Jesu waku Nazareta wakali waluzubo lwa Davida. Naakali kwaambilizya kuzyalwa kwa Jesu, mungelo wakaamba kuti: “Jehova Leza uzoomupa cuuno cabwami cawisi Davida, uyooendelezya ŋanda ya-Jakobo mane kukabe kutamani, ubwami bwakwe tabukooyoomana.” (Luka 1:32, 33) Aboobo, cizuminano ca Davida cakazuzikizyigwa muli Jesu Kristo. Tanaakasalwa buya abantu kuti alele, pele Leza kwiinda mucisyomezyo cakwe nguwakapa kuti ayelele kulela kukabe kutamani. Tutalubi kuti zisyomezyo zya Leza lyoonse zilacitika.—Isaya 55:10, 11.
Amube Aalusyomo Luyumu mu Bwami
Amubone Jehova ncaakasyomezya Mwami Davida wa Israyeli yansiku kwiinda mu cizuminano ca Davida. (Amubale 2 Samuele 7:12, 16.) Jehova wakatangana cizuminano eeci a Davida ciindi Davida naakali kulela mu Jerusalemu, wakamusyomezya kuti Mesiya wakali kuyakuba waluzubo lwakwe. (Lk.1:30-33) Kwiinda mucizuminano eeci, Jehova wakatondezya cacigaminina kuti simulyazina wa Davida, ‘nguuyakweelela’ kukkala acuuno ca Bwami bwa Mesiya. (Ezk. 21:25-27) Kwiinda muli Jesu, bwami bwa Davida buyakukkalilila “mane kukabe kutamani.” Masimpe, lunyungu lwa Davida ‘luyakuba lwalyoonse, cuuno cakwe ciyookalilila mbuli izuba.’ (Int. 89:34-37) Inzya, bweendelezi bwa Mesiya tabukanyongani naaceya, alimwi nzyobuyakucita ziyakukkalilila mane kukabe kutamani!
Mbono Zyakumuuya
it-2 206 ¶2
Mazuba Aamamanino
Businsimi bwa Balamu. Cakali ciindi bana Israyeli nobakali kuyanda kunjila Munyika Yakasyomezyedwe, musinsimi Balamu naakaambila Balaki, Mwami wabana Moabu kuti: “Boola ndikwaambile ncobayoocita bantu aaba [Israyeli] kubantu bako kumbele aamazuba. . . . Muli Jakobo muyoozwa nyenyeezi, alimwi mu Israyeli muyoozwa nkoli yabwami. Alimwi uyoopwayaula nkumo ya Moabu, akupwayaula zipapa zyamitwe yabana balupyopyongano.” (My. 24:14-17) Kumatalikilo aakuzuzikizyigwa kwabusinsimi oobu, “nyenyeezi” yakazyi kwiiminina Mwami Davida, iwakali kuyoozunda bana Moabu. (2Sam. 8:2) Aboobo cakutadooneka, kuzuzikizyigwa kwabusinsimi oobu bugaminide, ‘mazuba aakumbele,’ nkokuti mazuba aamamanino akatalika ciindi Davida naakaba mwami. Mbwaanga Davida wakali kwiiminina Jesu Mwami wabu Mesiya, businsimi oobu alimwi bulakonzya kwaamba ciindi Jesu nayoozunda basinkondonyina.—Is. 9:7; Int. 2:8, 9.
JUNE 6-12
MBONO IZILI MU JWI LYA LEZA | 2 SAMUELE 9-10
“Davida Wakatondezya Luyando Lutamani”
w06 6/15 14 ¶6
Inzya, Mulakonzya Kujana Lukkomano
Davida wakalemba kuti: “Ulikkomene ooyo uumubikkila maano muntu uupengede; Jehova uyoomuvwuna mubuzuba bwamapenzi. Jehova uyoomulinda akumubamba kuti kapona. Munyika uyakwaambwa kuti ulikkomene.” (Intembauzyo 41:1, 2) Luyando Davida ndwaakatondezya kuli Mefiboseti, mwana mulema wamulongwe wakwe Jonatani, ncitondezyo cibotu cambotweelede kubeendelezya bantu bapengede.—2 Samuele 9:1-13.
Twaambo Tupati-Pati Kuzwa Mubbuku lya Samuele Lyabili
9:1, 6, 7. Davida wakabamba cisyomezyo cakwe. Aswebo tweelede kukanza kuzuzikizya ncotwasyomezya.
Bakaliyumya Kubumvwa Mumubili
Nokwakainda myaka iili mbwiibede, Mwami Davida akaambo kaluyando lwakwe, wakatondezya luzyalo kuli Mefiboseti. Davida wakapilusya zintu zyoonse izyakali zya Saulo akuzipa nguwe, mpoonya wakabikka Ziba kuti abe nguwe uunoolanganya nyika yakwe. Alimwi Davida wakaambila Mefiboseti kuti: “Uyoolya insima kulindime mazuba oonse.” (2 Samuele 9:6-10) Kakunyinaa kudooneka, luzyalo lwa Davida lwakamuumbulizya kapati Mefiboseti akumugwasya kucesya penzi lyakwe lyakulemana. Elo nkubota ciiyo eeci basa! Andiswe mbubwenya tweelede kutondezya luzyalo kulibaabo ibali mukupenzyegwa abumvwa mumubili.
Mbono Zyakumuuya
it-1 266
Malezu
Akati kabantu banji bakaindi Bakujwe, kubikkilizya abana Israyeli, malezu akali citondezyo cabulemu kubaalumi. Mulawo wa Leza kubana Israyeli wakali kukasya kugela “masusu aali mumabali aamitwe,” naa cilezu mocili mumabali. (Lev. 19:27; 21:5) Eeci tiicakali kudoonekwa akaambo kakuti cakali cilengwa buya akati kabantu batakali kukomba Leza.
JUNE 13-19
MBONO IZILI MU JWI LYA LEZA | 2 SAMUELE 11-12
“Mutalekeli Kulombozya Kubyaabi Kumweendelezya”
Mulakonzya Kuzwa Mutukole twa Saatani!
Bulyato bwakapa Mwami Davida kuluba zintu nzyaakamupede Jehova, nkokuti lubono, mpuwo alimwi akucikonzya kuzunda basinkondonyina banji. Cakulumba Davida wakabona kuti zipego zya Leza zyakali ‘zinji kapati cakuti tiicakali kukonzyeka kuzibandauka zyoonse!’ (Int. 40:5) Pele aciindi cimwi, Davida wakaziluba zintu nzyaakamupede Jehova. Wakacileka kukkutila; wakacili kuyanda zimbi zinji. Nokuba kuti Davida wakajisi bamakaintu banji, wakalekela kulombozya kubyaabi kujatikizya mukamuntu kukomena mumoyo wakwe. Mukaintu ooyo wakali Bati-seba, mulumaakwe wakali Uriya muna Heti. Cabulyato Davida wakoonana a Bati-seba, mpoonya Bati-seba wakamita. Ncaakacita Davida cakabija kapati, pele wakacita cibyaabi kwiinda waawo. Davida wakabikka bubambe bwakuti Uriya ajaigwe! (2Sam. 11:2-15) Ncinzi ncaakali kuyeeya Davida? Sena wakali kuyeeya kuti Jehova takonzyi kubona? Muntu ooyu iwakali mubelesi wa Jehova uusyomeka wakazundwa abulyato, aboobo eeci cakamuletela mapenzi manji kapati. Pele cikkomanisya ncakuti, mukuya kwaciindi Davida wakakuzumina kulubizya kwakwe aboobo wakeempwa. Eelo kaka wakalumba kapati kuti Jehova wakatalika kumukkomanina alimwi!—2 Sam. 12:7-13.
Atulibombye Kuli Jehova Cakuliyandila
Jehova wakabikka Davida kuba silutwe wamukwasyi wakwe alimwi awamusyobo woonse wa Israyeli. Naakali mwami, Davida wakalijisi nguzu zinji zyabweendelezi. Zimwi ziindi, nguzu zyakwe zyabweendelezi wakali kuzibelesya munzila iitali kabotu alimwi wakacita zibi zipati. (2Sam. 11:14, 15) Pele wakatondezya kulibombya kuli Jehova kwiinda mukutambula lulayo. Wakapaila kuli Jehova camoyo woonse alimwi wakasola kusikila mpagolela kutobela lulayo lwa Jehova. (Int. 51:1-4) Kuyungizya waawo, wakalicesya kwiinda mukutambula lulayo lubotu, ikutali buyo kuzwa kuli bamaalumi, pele alimwi akuli bamakaintu. (1Sam. 19:11, 12; 25:32, 33) Davida wakaiya kuzwa kukulubizya kwakwe alimwi wakabikkila maano kapati kubelekela Jehova.
Amulekele Milawo Anjiisyo Zya Leza Kuyiisya Manjezyeezya Aanu
Cikkomanisya ncakuti, tatuyandiki kupenga buya akaambo kakutyola milawo ya Leza kutegwa twiiye ziiyo ziyandika kapati. Tulakonzya kwiiya kukulubizya kwabamwi ikulembedwe mu Jwi lya Leza. Lugwalo lwa Tusimpi 1:5 lwaamba kuti: “Muntu musongo ulaswiilila akutambula malailile manji.” Masimpe, tulatambula malailile aagwasya kapati kuzwa kuli Leza, mbuli ciindi notubala akuzinzibala kuyeeya zibalo zyamu Bbaibbele izyakacitika ncobeni. Mucikozyanyo, amuyeeye kujatikizya mbocakamucisa Mwami Davida ciindi naatakamvwida mulawo wa Jehova akucita bwaamu a Bati-seba. (2Sam. 12:7-14) Ciindi notubala akuzinzibala kuyeeya kujatikizya cibalo eeci, ambweni inga twalibuzya kuti: ‘Mbuti Davida mbwaakali kukonzya kweeleba bukkale oobu bucisizya moyo? Ikuti ndalijana musunko lili boobu, sena inga ndacikonzya kulikaka? Sena inga ndatija mbubwenya mbwaakacita Josefa, naa sena inga ndazundwa asunko mbuli Davida?’ (Matl. 39:11-15) Kwiinda mukuzinzibala kuyeeya zicitika akaambo kacibi, tuyoocikonzya ‘kusulaika bubi.’
Mbono Zyakumuuya
it-1 590 ¶1
Davida
Pele Jehova wakali kulanga, alimwi wakaciyubununa cibi cakacitwa. Ikuti naakazumizya babetesi bantunsi ibakali kweendelezyegwa a Mulawo wa Musa kulanganya mulandu wa Davida alimwi a Bati-seba, cakutadooneka boonse bobilo nobakajaigwa kubikkilizya amwana wakali mwida. (Dt. 5:18; 22:22) Pele, Jehova lwakwe nguwakaulanganya mulandu alimwi wakamufwida luse Davida akaambo kacizuminano ca Bwami (2Sam. 7:11-16), akaambo kakuti Davida lwakwe wakalitondezyede luse (1Sam. 24:4-7; amweezyanisye a Jak. 2:13) alimwi akaambo kakweempwa Leza nkwaakabona kubasizibi aaba. (Int. 51:1-4) Nokuba boobo, bakasubulwa. Kwiinda mumusinsimi Natani, Jehova wakaamba kuti: “Ndilakuletela mapenzi kuzwa muŋanda yako omwini.”—2Sam. 12:1-12.
JUNE 20-26
MBONO IZILI MU JWI LYA LEZA | 2 SAMUELE 13-14
“Kuliyanda kwa Amunoni Kwakasololela Kumapenzi”
it-1 32
Abisalomu
Kujaigwa kwa Amunoni. Kubota ciwa kwamucizyi wa Abisalomu, Tamara kwakapa kuti mwanookwabo Amunoni atalike kumunyomenena. Kalicengeezya kuciswa, Amunoni wakalomba kuti Tamara aboole kuŋanda yakwe kuzoomubambila cakulya, mpoonya wakamujata akoona anguwe. Kumane Amunoni wakamusula kapati Tamara cakuti lusulo ndwaakaba andulo lwakali lupati kwiinda luyando ndwaakajisi kulinguwe, alimwi wakamutanda muŋanda. Kazapaula jansi lyakwe lijisi madeekko, ilyakali kumutondezya kuti mwana wamwami nakalindu, alimwi akulilambika mulota kumutwe, Tamara wakaswaangana a Abisalomu. Cakufwambaana wakazyiba cacitika akwaamba kuti ngu Amunoni, nkaambo wakalizyi kuti mwanookwabo ooyu nguwakali kulombozya zintu zili boobu. Aboobo Abisalomu wakaambila mucizyi wakwe kuti aumune buyo, akumutola kuŋanda yakwe kuti kakkala nkuko.—2Sam. 13:1-20.
Kamulilesya
Bbaibbele lilaamba zikozyanyo zitucenjezya izyabantu ibatakalilesya kujatikizya makani aakoonana. Alimwi lilatondezya zintu zibyaabi izipa kuusa eezyo zikonzya kucitika akaambo kakutalyeendelezya. Kufwumbwa uuli mubukkale bukozyenye abwa Kim inga wacita kabotu kuzinzibala kuyeeya icakacitikila mulombwana uutakwe maano iwaambidwe ku Tusimpi caandaano 7. Alimwi amuyeeye nzila njaakabweza Amunoni alimwi azintu zibyaabi zyakamucitikila akaambo kakutalilemeka kwakwe. (2Sam. 13:1, 2, 10-15, 28-32) Bazyali balakonzya kubagwasya bana babo ikulilesya alimwi akuba abusongo mumakani aakusyabana kwiinda mukwaabandika makani aaya ciindi cakukomba mumukwasyi ikubelesya zibalo zyamu Bbaibbele izyaambwa kale.
it-1 33 ¶1
Abisalomu
Kwakainda myaka yobilo. Ciindi cakugela mbelele cakasika, iciindi camapobwe, aboobo Abisalomu wakabamba pobwe ku Baala-hazore, ibusena bwakali kulampa makkilomita aali 22 Jerusalemu nkoili kunyika, akutamba mwami abana bakwe boonse. Pele mwami wakakaka, aboobo Abisalomu wakakombelezya kuti mwami azumizye Amunoni kuti baunke anguwe. (Tus. 10:18) Nobakali kupobwe, Amunoni ‘naakakondwa kapati akaambo kawaini,’ Abisalomu wakalailila babelesi bakwe kuti bamujaye. Bana bamwami bambi bakapiluka ku Jerusalemu, pele Abisalomu wakatijila kuli bakaapanyina mubwami bwa Gesuri, Lwizi lwa Galilaya nkoluli kujwe. (2Sam. 13:23-38) “Panga” ndyaakasinsima musinsimi Natani lyakanjila lino “muŋanda” ya Davida alimwi lyakali kuyookkalilila oomo mane akafwe.—2Sam. 12:10.
Mbono Zyakumuuya
g04 12/22 8-9
Kubota Ikuyandika Kapati
Mukwiimpana, amulange-lange kujatikizya Abisalomu, umwi wabana ba Davida. Wakazyikuba muntu uutali kabotu nokuba kuti wakali mubotu ciwa. Kujatikizya nguwe, Bbaibbele lyaamba kuti: “Lino mu Israyeli yoonse, taakwe mwaalumi wakali kulumbaizyigwa akaambo kakubota kwakwe mbuli Abisalomu. Tanaakajisi kampenda kuzwa kuzituta kusikila kumutwe.” (2 Samuele 14:25) Nokuba boobo, kuyandisya bweendelezi kwakapa kuti Abisalomu azangile bausyi akubaatula acuuno cabwami. Kunze lyaboobo, wakoonana abamwanakasuwa babausyi. Akaambo kaceeci, Abisalomu wakasubulwa a Leza alimwi wakafwa lufwu lubyaabi.—2 Samuele 15:10-14; 16:13-22; 17:14; 18:9, 15.
Sena inga mwaba mulongwe wa Abisalomu? Naaceya. Masimpe ngakuti, tanaakali kukwelelezya pe. Nokuba kuti wakali mubotu ciwa, tanaakali kusyomeka, wakali sicinguni alimwi cakamusololela kulufwu. Kulubazu lumwi, Bbaibbele lilijisi zikozyanyo zinji zyabantu bakali basongo alimwi bakwelelezya, pele talyaambi kujatikizya mbobakali kulibonya ciwa. Cakutadooneka, icakali kuyandika kapati nkubota kwamukati.
JUNE 27–JULY 3
MBONO IZILI MU JWI LYA LEZA | 2 SAMUELE 15-17
“Abisalomu Wakazanga Akaambo Kakulisumpula”
it-1 860
Basikuzuza kumbele lyankalaki
Kumasena aaku Asia, cakali cilengwa buya kuba abaalumi ibakali kuzuza kuba kumbele aankalaki yamwami kutegwa babambe nzila akwaambilizya kuboola kwamwami alimwi akumugwasyilizya. (1Sam. 8:11) Ikwiiya cilengwa eeci cakupa bulemu kumwami alimwi akulipangila zina nobakazanga, Abisalomu alimwi a Adonija bakabikka baalumi bali 50 ibakali kuzuza kumbele lyankalaki zyabo.—2Sam. 15:1; 1Bam. 1:5.
Amubelekele Leza Walwaanguluko
Ibbaibbele lilijisi zikozyanyo zinji zyabantu ibakayunga bamwi. Cikozyanyo comwe cili boobo nca Abisalomu mwana musankwa wa Mwami Davida. Abisalomu wakali mwaalumi uuboneka kabotu kapati. Nikuba boobo, mukuyakwaciindi mbuli Saatani, wakalekela bulyato kunjila mumoyo wakwe, nkaambo wakatalika kulombozya cuuno cabwami cabausyi calo catakali kumweelela. Cabucenjezu, mukusola kubweza bwami, Abisalomu wakatondezya kuti ulababikkila maano kapati bantu kumwi cabusongo kaamba kuti nkuta yamwami tiiyakali kubabikkila maano. Inzya, mbubwenya mbwaakacita Diabolosi mumuunda wa Edeni, Abisalomu wakalibikka kuba sikugwasya, kulubazu lumwi wakali kubejelezya bausyi.—2 Sam. 15:1-5.
it-1 1083-1084
Hebroni
Nokwakainda myaka iili mbwiibede, mwana wa Davida Abisalomu wakapiluka ku Hebroni alimwi okuya wakasola kwaatula bausyi acuuno cabwami. (2Sam. 15:7-10) Kweelede kuti Abisalomu wakasaanguna kuba amakanze aakuba mwami ku Hebroni akaambo kakuti aciindi cimwi Hebroni wakali munzi mupati wa Juda, akuti nkwaakazyalilwa. Mukuya kwaciindi, muzyukulu wa Davida, Mwami Rehoboamu, wakauyakulula munzi wa Hebroni. (2Mak. 11:5-10) Cisi ca Juda nocakanyonyoonwa abana Babuloni alimwi anobakapiluka ba Juda kuzwa mubuzike, bamwi bazike bakatalika kukkala mu Hebroni (Kiriyati-ariba).—My. 11:25.
Mbono Zyakumuuya
Sena Mulijisi Makani Aamasimpe?
Andiswe kutugama, tulakonzya kucitilwa cakutalulama akaambo kamakani aatajisi bumboni bukkwene aambwa kujatikizya ndiswe. Atubone cikozyanyo ca Mwami Davida alimwi Mefiboseti. Davida wakatondezya bwaabi alimwi aluse kuli Mefiboseti kwiinda mukumupilusizya nyika yoonse yasyaanyinakulu Saulo. (2Sam. 9:6, 7) Pele mukuya kwaciindi, Davida wakatambula makani aakubeja kujatikizya Mefiboseti. Kakunyina akwaalanga-langa makani aayo, Davida wakayeeya kunyanga Mefiboseti zintu zyakwe zyoonse. (2Sam. 16:1-4) Ciindi Davida naakabandika a Mefiboseti, wakakubona kulubizya kwakwe alimwi wakakululamika kwiinda mukumujolela zintu zyakwe Mefiboseti. (2Sam. 19:24-29) Pele kutalulama ooko nokwatakacitika ikuti Davida naakalindila kutegwa azyibe twaambo toonse itwakajatikizyidwe muciindi cakufwambaana kubweza ntaamu katanamvwisya makani aamasimpe.
AMUSUNGWAALE MUMULIMO WAMUMUUNDA
Amwiiye Kusyomeka Nkwaakatondezya Itai
MILIMO yako mipati, ilagambya, Mwami Leza Singuzuzyoonse. Ziyanza zyako nzyalusinizyo, zililuleme. Nduwe Mwami waciindi coonse. Nguni uutakuyoowi, Mwami, akulemeka izina lyako? Nkaambo nduwe olike [uusyomeka, NW].” Lwiimbo oolu, ilwakaimbwa kujulu abaabo “ibakazundide cinyama acikozyano caco,” lulatugwasya kubona kusyomeka kwa Leza. (Ciy. 15:2-4) Jehova uyanda kuti bakombi bakwe kabamwiiya mukutondezya bube bubotu oobu.
Pele Saatani Diabolosi, ulasoleka kapati kuti aandaanye babelesi ba Leza ibali anyika, kuluyando lwa Leza ngobakomba. Nokuba boobo, ibunji bwabo bazumanana kusyomeka kuli Leza, nomuba mubukkale bukatazya kapati. Elo kaka tulalumba kapati kuzyiba kuti Jehova ulakukkomanina kulyaaba kuli boobu! Masimpe, tusyomezyegwa kuti: “Jehova ulayandisya bululami, tasii [bantu bakwe basyomeka, NW].” (Int. 37:28) Kutegwa atugwasye kuzumanana kusyomeka, wakabikkilizya mu Jwi lyakwe imakani aajatikizya zyintu nzyobakacita bantu bakwe basyomeka. Amwi akati kamakani aaya ngayaayo aamba kujatikizya Itai muna Giti.
‘Mweenzu Alimwi Muzangalisi’
Itai uyeeyelwa kuti wakali kuzwa mumunzi uudumide wabana Filisti iwa Gati, mwalo sintanze Goliati alimwi abasinkondonyina Israyeli bambi ibayoosya mobakazyalilwa. Ciindi cakusaanguna kumumvwa mu Bbaibbele ooyu sikalumamba uucibwene Itai, cakali ciindi Abisalomu naakazangila Mwami Davida. Itai alimwi abaalumi bana Filisti ibali 600 balo ibakamutobela bakali bazangalisi ibakayubide kufwaafwi a Jerusalemu.
Bukkale bwa Itai abasikumutobela bweelede kuti bwakayeezya Davida mazuba ngaakali muzangalisi ciindi walo alimwi abasikalumamba bana Israyeli ibali 600 nobakaunka kucilawo camu Filisti akunjila mucisi ca Akisi mwami wa Gati. (1 Sam. 27:2, 3) Ino ncinzi ncaakali kuyoocita Itai abaalumi bakwe ciindi Davida naakatija mwanaakwe Abisalomu iwakamuzangila? Sena wakali kuyooba kulubazu lwa Abisalomu, naa ilwa Davida abantu bakwe ambweni naa tanaakali kuyooba kulubazu luli loonse?
Amuyeeye buyo Davida katija kuzwa ku Jerusalemu akwiima abusena butegwa “Ŋanda Iili Kule.” Ilangilwa kuti eeyi neŋanda iili kumamanino kwa Jerusalemu kulubazu lwa Cilundu ca Elaioni kabatanazabuka Kkuti lya Kedroni. (2 Sam. 15:17) Abusena aawa, Davida ulingula basikalumamba bakwe ciindi nobainda. Tabali buyo bana Israyeli basyomeka ibali anguwe pe, pele alimwi kuli bana Kereti abana Peleti boonse. Kuyungizya aali baaba, kuli abana Giti boonse—Itai abasikalumamba bakwe ibali 600.—2 Sam. 15:18.
Keetezyedwe kapati, Davida wakaambila Itai kuti: “Nkaambonzi ayebo noli aswe? Kobweeda kuyookala amwami, nkaambo uli mweenzu mutande. Kobweeda kulinduwe. Wakasika jilo buyo. Sa sunu ndakonzya kukucita kuti twiinke ayebo ciindi ecino ncindi mukweendeenda kufumbwa nkunja? Kobweeda akubweedezya abalo bananyokwe. Luzyalo alusinizyo lube ayebo.”—2 Sam. 15:19, 20.
Itai waamba kujatikizya kusyomeka kwakwe. Wiingula kuti: “Ncobeni Jehova mbwali muumi, amwami simalelaangu mbali muumi, kufumbwa nkwaabede mwami simalelaangu, nimuba mulufu nimuba mubuumi, nkukonya oko nkunjooba ndemulanda wako ambebo.” (2 Sam. 15:21) Majwi aaya ayelede kuti akayeezya Davida majwi aali mbuli yaaya ngobakaamba bakaapanyina ba Rute. (Rut. 1:16, 17) Majwi ngaakaamba Itai naakamunjila mumoyo, Davida wakamwaambila kuti: “Mbubo, koya kunembo” lya Kkuti lya Kedroni. “Lino Itai mu-Giti wakainda kunembo abantu bakwe boonse abanikenike mbaakali abo.”—2 Sam. 15:22.
‘Kutegwa Tuyiisyigwe’
Lugwalo lwa Ba-Roma 15:4 lwaamba kuti: “Makani aali boobo aakalembwa kalekale, nkukwiiya kwesu nkwaakalembelwa.” Aboobo inga twabuzya kuti: Ino nziiyo nzi nzyotwiiya kucikozyanyo ca Itai? Amulange-lange icakapa kuti asyomeke kuli Davida. Nokuba kuti wakali mweenzu alimwi muzangalisi uuzwa kucisi ca Filisti, Itai wakazyiba kuti Jehova ngo Leza mwini-mwini alimwi a Davida kuti mmunanike wa Jehova. Itai tanaakabikkila maanu kukutamvwana kwakaliko akati kabana Israyeli abana Filisti. Tanaakabikkila maanu kukaambo kakuti Davida ngonguwe iwakajaya sikalumamba mupati wabana Filisti Goliati alimwi abantu banji bamucisi cokwabo. (1 Sam. 18:6, 7) Itai wakabona Davida kuba muntu iwakali kuyanda Jehova alimwi wakabona abube bubotu mbwaakajisi Davida. Mpoonya Davida awalo wakamulemeka kapati Itai. Nkakaambo kaako Davida ncaakabikka “cipanzi catatu mumaanza aa-Itai” ciindi nobakalwana abasikalumamba ba Abisalomu.—2 Sam. 18:2.
Andiswe tweelede kubona bube bubotu mubantu, kutali kubasula akaambo kazilengwa, mubala naa musyobo. Cilongwe icakatalika akati ka Davida a Itai citondezya kuti ikuzyiba alimwi akuyanda Jehova kulakonzya kutugwasya kuzunda cilengwa cakusula bantu akaambo kazilengwa, mubala naa musyobo wabo.
Notuzinzibala kuyeeya cikozyanyo ca Itai, tulakonzya kulibuzya kuti: ‘Sena andime ndilasyomeka kuli Davida Mupati Kristo Jesu? Sena ndilakutondezya kusyomeka ooku kwiinda mukutola lubazu cabusungu mumulimo wakukambauka Bwami akugwasya bantu kuba basikwiiya?’ (Mt. 24:14; 28:19, 20) ‘Ino ndilisungwide kusika aali mukuliyumya kutegwa nditondezye kusyomeka kwangu?’
Basilutwe bamikwasyi abalo balakonzya kugwasyigwa kwiinda mukuzinzibala kuyeeya cikozyanyo ca Itai. Kusyomeka kwakwe kuli Davida alimwi akusala kwakwe kuti abe amwami uunanikidwe wa Leza kwakabajatikizya baalumi ba Itai. Mbubwenya buyo, kusala nkobacita basilutwe bamikwasyi mukutola ambele bukombi bwakasimpe kulaijatikizya mikwasyi yabo alimwi kulakonzya kuleta buyumuyumu kwaciindi cili mbocibede. Nokuba boobo, tusyomezyegwa kuti: “Kuli yooyo uusyomeka, [Jehova] ulasyomeka.”—Int. 18:25, NW.
Noyakamana inkondo akati ka Davida a Abisalomu, Magwalo taambi cili coonse kujatikizya Itai. Nokuba kuti makani aakwe aali mu Jwi lya Leza mmasyoonto buyo, atugwasya kumuzyiba kabotu akaambo kazyintu nzyaakacita aciindi eeci cikatazya mubuumi bwa Davida. Kaambo kakuti Itai ulaambwa mu Bbaibbele kapa bumboni bwakuti Jehova ulababona bantu ibasyomeka kulinguwe alimwi ulabapa bulumbu.—Heb. 6:10.