-
Mulongo Wamunsondo Iitalika mu January 19Mulimo Wesu—2015 | January
-
-
Mulongo Wamunsondo Iitalika mu January 19
NSONDO IITALIKA MU JANUARY 19
Lwiimbo 47 Amupailo
Ciiyo ca Bbaibbele Cambungano:
lv cibalo 9, minc. 22-26, Makani Aayungizyidwe apeeji 218-219, akabbokesi ikali apeeji 109 (30 min.)
Cikolo Camulimo Weendelezyegwa a Leza:
Kubala Bbaibbele: Babetesi 1-4 (8 min.)
Na. 1: Babetesi 3:1-11 (3 min. naa kutasika aawo)
Na. 2: Mbuti Mbomukonzya Kwiiya Kujatikizya Leza?—nwt p. 8 ¶1-4 (5 min.)
Na. 3: Ahitofeli—Mutwe: Jehova Wanyonganya Makanze Aabasikwaaba—w12 4/15 p. 9 munc. 5 (5 min.)
Muswaangano Wamulimo:
Mutwe Wamakani Wamwezi: ‘Amubelekele Mwami Cakulicesya Kapati.’—Mil. 20:19.
10 min: Sena Mulacibelesya Cibeela ca Makani Aayungizyidwe Mubbuku Lyakuti Ino Ncinzi Cini Bbaibbele Ncoliyiisya? Mubandi abaswiilizi uuyeeme amubuzyo ooyu uutobela: (1) Ino inga twacibelesya buti cibeela camakani aayungizyidwe kugwasya basikwiiya Bbaibbele kumvwisya (a) “Jesu Kristo—Mesiya Wakasyomezyegwa” alimwi a (b) “Sena Bantu Balijisi Muuya Uutafwi? Amumanizye kwiinda mukubakulwaizya boonse kucibelesya cibeela eeci.
10 min: Kubelekela Mwami Kuyandika Kuzumanana Alimwi Akubweza Ntaamu. Mubandi abaswiilizi kuzwa mu Ngazi Yamulindizi yamu January 15, 2008 mapeeji 15-16, mincali 15-16, alimwi a Ngazi Yamulindizi yamu February 15, 2008 peeji 18, muncali 9. Amubalombe baswiilizi kuti baambe nzyobaiya.
10 min: “Amuzumanane Kuyaambele Mbuli Mubelesi.” Kubuzya akwiingula.
Lwiimbo 20 Amupailo
-
-
Amuzumanane Kuyaambele Mbuli MubelesiMulimo Wesu—2015 | January
-
-
1. Ino nzikozyanyo nzi zyamumwaanda wamyaka wakusaanguna izitondezya kuti tweelede kuyaambele mbuli babelesi?
1 Banakristo beelede kuyaambele mbuli babelesi. Nkakaambo kaako Jesu wakali kubayiisya asyoonto-syoonto mulimo wakukambauka basikumutobela. (Lk. 9:1-5; 10:1-11) Alimwi nkakaambo kaako Akula a Purisila bakamutola ambali Apolo “akumupandulwida bwini mboibede nzila ya Leza.” (Mil. 18:24-26) Akaambo nkoonya aaka, Paulo wakakulwaizya mukambausi uucibwene Timoteyo kuti azumanane kulitakata kukuyiisya kutegwa kuyaambele kwakwe “kubonwe abantu boonse.” (1Tim. 4:13-15) Nokuba kuti twalikumubelekela Mwami kwaciindi cilamfwu katuli basikumwaya bamakani mabotu, tuyandika kuzumanana kuyungizya luzyibo lwesu mubukambausi.
2. Mbuti mbotukonzya kwiiya kuli bamwi?
2 Amwiiye Kuli Bamwi: Inzila imwi mbotukonzya kuyungizya luzyibo lwesu nkwiiya kuli bamwi. (Tus. 27:17) Aboobo, amubikkile maano ciindi basikumwayanyoko nobakambauka. Amulombe lugwasyo lugaminide kuzwa kubakambausi bacibwene, alimwi amuswiililisye nzyobaamba. (Tus. 1:5) Sena tamuzyi kabotu kujatikizya mbomukonzya kupanga nyendo zyakupilukila, kutalisya ziiyo zya Bbaibbele, naa kutola lubazu mumbazu zimwi zyabukambausi? Amubweze ntaamu, amumulombe mulangizi wakabunga kanu naa sikumwaya umwi uucibwene kuti amuyiisye. Alimwi kamuyeeya kuti muuya uusalala wa Jehova ulakonzya kutugwasya, aboobo amuulombe lyoonse mumupailo.—Lk. 11:13.
3. Ino tweelede kucita buti ikuti naa twapegwa muzeezo, ambweni kakunyina akulomba?
3 Ikuti naa mwapegwa muzeezo uujatikizya mbomukonzya kuyaambele, mutanyemi pe nokuba kuti kunyina nomwalomba lugwasyo. (Muk. 7:9) Mbubwenya mbuli Apolo, amulutambule lugwasyo cakulicesya alimwi akulumba. Kucita boobo citondezya busongo.—Tus. 12:15.
-