Amuzumanane Kuyaambele Mbuli Mubelesi
1. Ino nzikozyanyo nzi zyamumwaanda wamyaka wakusaanguna izitondezya kuti tweelede kuyaambele mbuli babelesi?
1 Banakristo beelede kuyaambele mbuli babelesi. Nkakaambo kaako Jesu wakali kubayiisya asyoonto-syoonto mulimo wakukambauka basikumutobela. (Lk. 9:1-5; 10:1-11) Alimwi nkakaambo kaako Akula a Purisila bakamutola ambali Apolo “akumupandulwida bwini mboibede nzila ya Leza.” (Mil. 18:24-26) Akaambo nkoonya aaka, Paulo wakakulwaizya mukambausi uucibwene Timoteyo kuti azumanane kulitakata kukuyiisya kutegwa kuyaambele kwakwe “kubonwe abantu boonse.” (1Tim. 4:13-15) Nokuba kuti twalikumubelekela Mwami kwaciindi cilamfwu katuli basikumwaya bamakani mabotu, tuyandika kuzumanana kuyungizya luzyibo lwesu mubukambausi.
2. Mbuti mbotukonzya kwiiya kuli bamwi?
2 Amwiiye Kuli Bamwi: Inzila imwi mbotukonzya kuyungizya luzyibo lwesu nkwiiya kuli bamwi. (Tus. 27:17) Aboobo, amubikkile maano ciindi basikumwayanyoko nobakambauka. Amulombe lugwasyo lugaminide kuzwa kubakambausi bacibwene, alimwi amuswiililisye nzyobaamba. (Tus. 1:5) Sena tamuzyi kabotu kujatikizya mbomukonzya kupanga nyendo zyakupilukila, kutalisya ziiyo zya Bbaibbele, naa kutola lubazu mumbazu zimwi zyabukambausi? Amubweze ntaamu, amumulombe mulangizi wakabunga kanu naa sikumwaya umwi uucibwene kuti amuyiisye. Alimwi kamuyeeya kuti muuya uusalala wa Jehova ulakonzya kutugwasya, aboobo amuulombe lyoonse mumupailo.—Lk. 11:13.
3. Ino tweelede kucita buti ikuti naa twapegwa muzeezo, ambweni kakunyina akulomba?
3 Ikuti naa mwapegwa muzeezo uujatikizya mbomukonzya kuyaambele, mutanyemi pe nokuba kuti kunyina nomwalomba lugwasyo. (Muk. 7:9) Mbubwenya mbuli Apolo, amulutambule lugwasyo cakulicesya alimwi akulumba. Kucita boobo citondezya busongo.—Tus. 12:15.
4. Ino nkaambo nzi kapati nkaakaamba Jesu keelede kutupa kuyaambele mbuli bakambausi?
4 Kuyaambele Kulamulemeka Leza: Kwiinda mukubelesya cikozyanyo, Jesu wakakulwaizya basikumutobela kuyaambele mbuli babelesi. Walo wakalikozyanisya kumusaansa mpoonya basikumutobela bananike kumitabi. Wakaamba kuti Taata ulaukwezyaula mutabi uuli woonse uuzyala micelo “ikutegwa usalale akuzyalisya micelo.” (Joh. 15:2) Mbubwenya mbuli mukamwini muunda wamisaansa mbwayanda kuti mitabi yamisaansa izyalisye, Jehova uyanda kuti tuzumanane kukomena mukuzyala “micelo yamilomo yesu.” (Heb. 13:15) Ino mbubotu nzi mbotukonzya kujana kuti twayaambele mbuli bakambausi? Jesu wakatupa bwiinguzi naakati: “Taata ulalemekwa muliceeci, ikuti muzumanane kuzyala micelo minji.”—Joh. 15:8.