Malifalensi Aamu Kabbuku Kamuswaangano Wabuumi Amulimo Wesu
© 2023 Watch Tower Bible and Tract Society of Pennsylvania
MARCH 4-10
MBONO IZILI MU JWI LYA LEZA | INTEMBAUZYO 16-17
“Jehova, Ikasensa Kangu Kabubotu”
Nobakubusi, Mulakonzya Kuba Abuumi Bukkomanisya
AMUJANE BALONGWE BENI-BENI
11 Amubale Intembauzyo 16:3. Davida wakaliizyi nzila yakujana balongwe beni-beni mubuumi. Cakamupa “kukkomana kapati” kuyanzana abaabo ibakali kumuyanda Jehova. Bakapandululwa kuti “basalali,” nkokuti bakali kulilemeka kabotu, bakali balulami. Aumbi sintembauzyo wakalimvwa mbubwenya oobo kujatikizya balongwe mbaakasala. Wakalemba kuti: “Ndimweenzinyina wabaabo boonse ibakuyoowa awabaabo batobela milazyo yako.” (Int. 119:63) Kweelana ambotwakabona mucibalo cainda, andinywe mulakonzya kujana balongwe banji babotu akati kabaabo ibamuyoowa Jehova alimwi akumumvwida. Alimwi buya eeci cibikkilizya abaabo ibajisi ziimo ziindene-indene.
“Amweebele Bubotu bwa Jehova”
Davida wakaimba kuti: “Jehova ncecaabilo cangu calukono ankomeki yangu; nduwe oobamba zyabuumi bwangu zyoonse. Zyeelesyo zyandeelekela kabotu.” (Int. 16:5, 6) Davida wakalumba akaambo ‘kacaabilo’ cakwe, nkokuti kuba acilongwe a Jehova alimwi acoolwe cakumubelekela. Mbubwenya mbuli Davida, andiswe tulajana buyumu-yumu, pele tulijisi zilongezyo zinji zyakumuuya. Aboobo, atuzumanane kubukkomanina bukombi bwakasimpe alimwi akuzumanana ‘kulanga cakubotelwa’ tempele lyakumuuya lya Jehova.
Kamuyeeya Jehova Lyoonse
2 Toonse tulakonzya kwiiya zinji kuzintu zyakacitikila bantu balembedwe mu Bbaibbele bazizilwe kapati mbuli Abrahamu, Sara, Musa, Rute, Davida, Esita, mwaapostolo Paulo alimwi abamwi. Nokuba boobo, azyalo zibalo zijatikizya bantu batakadumide zilakonzya kutugwasya. Ikuzinzibala kuyeeya zibalo zyamu Bbaibbele kulakonzya kutugwasya kucita zintu kweelana amajwi aasintembauzyo aakuti: “Ndibikide Jehova kubusyu bwangu lyoonse, uli kululyo lwangu kuti entazunganizigwa.” (Int. 16:8) Ino majwi aaya aamba nzi?
3 Ipanga bunji bwaziindi sikalumamba wakali kulijatila kujanza lyalulyo, icakali kupa kuti katakwabilidwe kulubazu oolu antobo yakali kujanza lyalumwensyi. Pele wakali kukwabililwa ikuti mweenzinyina kalwanina munsi-munsi kululyo kwakwe. Ikuti katuyeeya Jehova lyoonse akucita kuyanda kwakwe, uyootukwabilila. Aboobo atubone kulanga-langa zibalo zyamu Bbaibbele mbokunga kwayumya lusyomo lwesu ikutegwa ‘katuyeeya Jehova lyoonse.
Mbono Zyakumuuya
Jehova Ulamuyanda Kapati
Amubale Zekariya 2:8. Akaambo kakuti ulatuyanda, Jehova ulamvwisya mbotulimvwa alimwi uliyandide kutukwabilila. Ulausa ciindi notuli mumapenzi. Aboobo tulakonzya kuba masimpe kuti uyootwiingula ikuti twapaila kuti: “Kondibamba mbuli imboni yaliso.” (Int. 17:8) Liso ncibeela camubili ciyandika kapati. Aboobo ciindi Jehova natweezyanisya amboni yaliso lyakwe, cili mbuli kuti utwaambila kuti, ‘Kufwumbwa uumulwana nobantu bangu, ulwana cintu ciyandisi kulindime.’
MARCH 11-17
MBONO IZILI MU JWI LYA LEZA | INTEMBAUZYO 18
“Jehova . . . Ngonguwe Uundivwuna”
Sena Mulaumvwisya Mwaambo Wamaambilambali Uuli mu Bbaibbele?
Bbaibbele alimwi likozyanisya Jehova kuzintu zitaponi. Waambwa kuti ‘Nindomba ya Israyeli,’ “mwala,” alimwi “mampangala.” (2 Samuele 23:3; Intembauzyo 18:2; Deuteronomo 32:4) Ino ukozyenye buti azintu eezyi? Mbubwenya ndomba mbolitazungaani, awalo Jehova Leza tazungaani aboobo tatudooneki kuti ulakonzya kutukwabilila.
Bbuku lya Intembauzyo lijisi zikozyanyo zinji izipandulula bube bwiindene-indene bwa Jehova. Mucikozyanyo, Intembauzyo 84:11 yaamba Jehova kuti “ndizuba alimwi nintobo” akaambo kakuti ngo Kasensa kamumuni, buumi, nguzu, alimwi alukwabililo. Kulubazu lumwi, Intembauzyo 121:5 yaamba kuti “Jehova ncecimvwule cako kujanza lyako lyalulyo.” Mbubonya cimvwule mbocikonzya kumukwabilila kuzuba, Jehova ulakonzya kubakwabilila kumapenzi aabo bamubelekela, kubavwumba acimvwule “cajanza” lyakwe naa “camababa” aakwe.—Isaya 51:16; Intembauzyo 17:8; 36:7.
Jehova Mbwatugwasya Kuliyumya Kumwi Katukkomene
5 Mazuba aano tulakonzya kuumbulizyigwa amajwi aaya aakuti: “Masimpe uyookufwida luzyalo mbwayakulimvwida buyo jwi lyako lyakulila kuti ugwasyigwe.” (Is. 30:19) Isaya utusyomezya kuti Jehova uyootuswiilila twaakumulilila, mpoonya uyoofwambaana kwiingula mipailo yesu. Isaya ulayungizya kuti: “Mbwayakulimvwida buyo uyookuvwiila.” Aaya majwi aakulwaizya atuyeezya kuti Taateesu ulilibambilide, inzya uliyandide kapati kubagwasya aabo bamwiita. Kuzyiba makani aaya kulatugwasya kuliyumya kumwi katukkomene.
Amucikkomanine Coolwe Cakupaila
TULIJISI coolwe cilibedelede cakupaila ku Mulengi wajulu alimwi anyika. Amuyeeye buyo kaambo aaka: Tulakonzya kupaila kuli Jehova kuzwa ansi aamoyo kufwumbwa ciindi alimwi mumwaambo uuli woonse, kakunyina kumulomba buya. Tulakonzya kupaila notucisidwe mucibbadela naa notuli muntolongo, katujisi lusyomo lwakuti Taateesu siluyando ulatuswiilila. Eelo kaka tulalumba kucoolwe cakupaila.
Mbotukonzya Kuliyumya Ciindi Notulibilikide
2. Amuzinzibale kuyeeya. Kuti mweezyeezya izyakamucitikila musyule, sena mulaayeeya masunko ngomwakacikonzya kuliyumya kwiinda mukugwasyigwa a Jehova? Ciindi notuyeeya Jehova mbwaakatugwasya swebo alimwi ababelesi bakwe bakaindi, tulaba aluumuno alimwi tulamusyoma cakumaninina. (Int. 18:17-19) Mwaalu wazina lya Joshua wakaamba kuti, “Ndijisi mulongo wamipailo yakaingulwa. Eeci cilandigwasya kuyeeya ciindi nindakalomba Jehova cintu cigaminide, mpoonya wakandipa.” Inzya, ciindi notuzinzibala kuyeeya zintu nzyaakatucitila kale Jehova, tulaba anguzu zyakuzumanana kuliyumya kupenzi lyakulibilika.
Mbono Zyakumuuya
it-1 432 ¶2
Kerubi
Bakerubi aaba bakali kujanika kumbele lya Jehova: “Ndiyoolitondezya kulinduwe akwaambaula anduwe atala aacivwunisyo. Kuzwa akati kabakerubi ibali atala aabbokesi lya Bumboni.” (Kul. 25:22; My. 7:89) Aboobo, Jehova wakali kwaambwa kuti “ukkede atala [naa, akati] aabakerubi.” (1Sam. 4:4; 2Sam. 6:2; 2Bam. 19:15; 1Mak. 13:6; Int. 80:1; 99:1; Is. 37:16) Bakerubi bakali “cikozyanyo cankalaki” ya Jehova yalo njaakali kweenzya (1Mak. 28:18), alimwi mababa aabo akali kubakwabilila akupa kuti kabafwambaana kuuluka. Aboobo Davida, mulwiimbo lwakweema wakapandulula Jehova mbwaakabalika kuti amuvwune, mbuli muntu “wakatanta kerubi akuboola kauluka . . . atala aamababa aacilenge camuuya.”—2Sam. 22:11; Int. 18:10.
MARCH 18-24
BONO IZILI MU JWI LYA LEZA | INTEMBAUZYO 19-21
“Majulu Aambilizya Bulemu bwa Leza”
Boonse Abaambilizye Bulemu bwa Jehova
DAVIDA imwana musankwa wa Jese, wakakomena kali mweembezi mucooko ca Betelehemu. Weelede kuti ciindi aciindi wakali kulanga kujulu kwalo kutalikomeneni ikubangalala kakuumwine masiku kumwi keembela butanga bwabawisi mumasena aakweembelela mbelele aali kule. Cakutadooneka, wakaziyeeya zintu zibotu eezyo ciindi naakasololelwa amuuya uusalala, eelyo wakalemba akwiimba majwi mabotu aali ku Intembauzyo 19 aakuti: “Kujulu kulaamba bulemu bwa-Jehova, mweenya uukwazeme ulatondezya milimo yamaanza aakwe. Nekubaboobo mulazyo wazyo ulasika muluwa loonse, amajwi aazyo alasika kumagolelo aanyika.”—Intembauzyo 19:1, 4.
2 Kakunyina mwaambo, kakunyina mabala alimwi kakunyina ijwi, ijulu likankamanisya ndyaakalenga Jehova, lilaambilizya bulemu bwakwe buzuba abuzuba alimwi amasiku oonse. Bubumbo tabuleki pe kwaambilizya bulemu bwa Leza, alimwi bupa umwi kubona mbwali musyoonto nazinzibala kuyeeya bumboni oobu bupegwa cakaumuumu ‘munyika yoonse’ kutegwa boonse bali mumo babone. Pele, bumboni bupegwa cakaumuumu abubumbo tabuzulide pe. Bantu basyomeka bakulwaizyigwa kusangana mukupa bumboni mukwaambaula. Sintembauzyo uutaambidwe zina wakaambila bakombi basyomeka majwi aaya aakasololelwa amuuya aakuti: “Amupe Jehova bulemu anguzu. Amupe Jehova bulemu bweelede izina lyakwe.” (Intembauzyo 96:7, 8) Ibalongwe beni-beni ba Jehova balakkomana kapati kutobela kukulwaizya ooko. Pele, ino ncinzi cijatikizyidwe mukupa Leza bulemu?
Ibubumbo Bwaambilizya Bulemu bwa Leza!
8 Davida alimwi ulapandulula cilenge acimbi ca Jehova cikankamanisya: “Mulinzizyo [mujulu] mwabikide cilao cazuba. Lyalo lili mbuli sibwiinga uuzwa muŋanda yakwe. Lilakondwa mbuli singuzu uusiyana. Mazwido aalyo njempela yajulu, amusinzo walyo ulasika kumabbililo aalyo. Taakwe cisisidwe kukupya kwalyo.”—Intembauzyo 19:4-6.
9 Lyakozyanisyigwa anyenyeezi zimwi, izuba lili akati-kati kukomena. Nokuba boobo, ninyenyeezi iikankamanisya iiboneka kukomena kapati kwiinda nyenyeezi zimwi ziizinguluka. Ibbuku limwi lyaamba kuti izuba ndipati cakuti nyika ilakonzya kunjila kwaziindi zibalilwa ku 330,000. Izuba ndelipati kapati akati kazibeela zyoonse zili mububumbo. Inguzu zikwela zizwa kuzuba zipa kuti nyika kaizinguluka zuba amusinzo uulampa makkilomita aasika kutuulunzuma tuli 150 kakunyina kuunka kulamfwu azuba naa kuswenena munsi-munsi. Nkabeela buyo kasyoonto kanguzu zyazuba ikasika anyika yesu ino, pele kabeela nkeena aka kapa kuti bantu bacikonzye kupona.
10 Sitembauzyo waamba zyazuba kubelesya mwaambo wacikozyanyo, ulyaamba kube ‘mmwaalumi singuzu’ uubalika imasikati kuzwa kumagolelo aanyika kusikila kumagolelo amwi amana masiku ulalyookezya ‘mucilao cakwe.’ Ciindi nyenyeezi mpati eeyo niibbila, noilangilwa aanyika iboneka kube injila ‘mucilao cayo’ mbuli kuti yaunka kukulyookezya. Imafwumo-fwumo lilapasula kalimweka “mbuli sibwiinga uuzwa muŋanda yakwe.” Kali mweembezi, Davida wakalizi mbukwakali kutontola masiku. (Matalikilo 31:40) Wakayeeya izuba mbulyakali kumukasaazya kubikkilizya abusena mpaakabede. Cakutadooneka, kunyina nolyakali kukatala “amusinzo” walyo kuzwa kujwe kuya kumbo, pele lili mbuli ‘mwaalumi singuzu’ uulibambide kupilukila mulweendo lwakwe.
g95 11/8 7 ¶3
Sikupanga Zintu Ngobatabikkili Maano Bantu Mazuba Aano
Kulumba akaambo kazintu zili mububumbo kulakonzya kutugwasya kumuzyiba Mulengi wesu, walo wakalenga zintu zituzungulukide. Aciindi cimwi Jesu wakaambila basikwiiya bakwe kulangisisya maluba-luba aamusyokwe aaku Galilaya. Wakaamba kuti: “Amwiiye kumaluba-luba aamusyokwe mbwaakomena; taabeleki nokuba kusuma; pele ndimwaambila kuti naba Solomoni mubulemu bwakwe boonse kunyina naakasamide mbuli limwi lyayaaya.” (Matayo 6:28, 29) Kubota kwamaluba-luba aaya alibonya kuti anyina mulimo kutuyeezya kuti Leza ulabikkila maano kuzintu nzyobayandika bantu.
Mbono Zyakumuuya
Makanze aa Jehova Ayakuzuzikizyigwa!
Mbubwenya mbotubona mububumbo, caluyando Jehova wakabikka milawo muzilenge zyoonse. Wakabikka milawo yeendelezya bubumbo alimwi amilawo yakulilemeka kutegwa zyoonse kazibeleka munzila yeendelana. (Int. 19:7-9) Aboobo, zintu zyoonse mububumbo zilijisi cibeela alimwi amulimo kweelana amakanze aa Leza. Jehova ulabikka milawo kuzilenge zyakwe kutegwa kazibelekela antoomwe. Aboobo, nguzu zikwelela ansi zipa kuti mulengalenga kauswaangene anyika, zileendelezya mayuwe alwaanje, alimwi zipa kuti kakuli buumi anyika. Zilenge zyoonse kubikkilizya abantu, zileenda akubeleka kwiinda mukweendelezyegwa amilawo eeyi. Cilalibonya kuti mbobubede bubumbo butondezya kuti Leza ulijisi makanze kujatikizya nyika alimwi abantu. Mumulimo wamumuunda tulakonzya kugwasya bantu kuzyiba Mulengi wabubumbo oobu bugambya.—Ciy. 4:11.
AMUSUNGWAALE MUMULIMO WAMUMUUNDA
ijwfq 45
Nkaambo Nzi Bakamboni ba Jehova Ncobacita Mulalilo wa Mwami Munzila Iindene Azikombelo Zimbi?
Tulaatobela kapati malailile aamu Bbaibbele ciindi notucita “Mulalilo wa Mwami,” naa Ciibalusyo calufwu lwa Jesu. (1 Bakorinto 11:20) Mukwiimpana, bunji bwazintu zisyomwa alimwi akucitwa muzikombelo zimbi kujatikizya Mulalilo wa Mwami tazizwi mu Bbaibbele.
Makanze
Makanze aakucita Mulalilo wa Mwami ngakuyeeya Jesu, kutondezya kulumba kukulyaaba nkwaakacita akaambo kandiswe. (Matayo 20:28; 1 Bakorinto 11:24) Bubambe oobu talili pobwe pe, naa cilengwa cabukombi calo cicitwa kutegwa muntu alekelelwe zibi. Ibbaibbele liyiisya kuti zibi zyesu zilakonzya kulekelelwa, kutalika kwiinda muzilengwa zyabukombi, pele kwiinda mulusyomo muli Jesu.—Baroma 3:25; 1 Johane 2:1, 2.
iindi zyongaye?
Jesu wakalailila basikwiiya bakwe kucita Mulalilo wa Mwami, pele tanaakaamba cacigaminina kuti ziindi zyongaye. (Luka 22:19) Bamwi bayeeya kuti inga kabacita oobo mwezi amwezi, nsondo ansondo, buzuba abuzuba, ziindi zinji mubuzuba, naa kufwumbwa buyo ciindi muntu ncayeeya kuti cili kabotu kucita boobo. Nokuba boobo, kuli twaambo tumwi tweelede kulangwa-langwa.
Jesu wakatalisya Mulalilo wa Mwami mubuzuba mbobakali kucita Pobwe Lyakwiindilila ba Juda, alimwi wakafwa mubuzuba mbubwenya oobo. (Matayo 26:1, 2) Eeci tiicakalicitikila buyo. Magwalo akozyanisya kulyaaba kwa Jesu kucituuzyo camwanaambelele wa Pobwe Lyakwiindilila. (1 Bakorinto 5:7, 8) Pobwe Lyakwiindilila lyakali kucitwa ciindi comwe amwaka. (Kulonga 12:1-6; Levitiko 23:5) Mbubwenya buyo, Banakristo bamumwaanda wakusaanguna bakali kucita Ciibalusyo calufwu lwa Jesu ciindi comwe buyo amwaka, aboobo, abalo Bakamboni ba Jehova balacitobela cilengwa eeci cizwa mu Bbaibbele.
Buzuba aciindi
Mbwaakacicita Ciibalusyo cakusaanguna Jesu citugwasya kuzyiba naa tweelede kucicita ziindi zyongaye, buzuba notweelede kucicita alimwi aciindi. Wakacita Ciibalusyo nolyakabbila zuba mu Nisani 14, 33 C.E., kweelana akkalenda yamu Bbaibbele. (Matayo 26:18-20, 26) Tulazumanana kucita Ciibalusyo mubuzuba oobu mwaka amwaka, kutobela cilengwa ca Banakristo bamumwaanda wakusaanguna.
Nokuba kuti Nisani 14, 33 C.E. yakali muli Bwasanu, buzuba oobo bulakonzya kuwida mubuzuba bumbi bwansondo mwaka amwaka. Tulabuzyiba buzuba oobo bwa Nisani 14 mpobuwida mwaka amwaka kwiinda mukubelesya nzila njoonya njobakalikubelesya muciindi ca Jesu, muciindi cakubelesya nzila iibelesyegwa mu Kkalenda yamazuba aano yaba Juda.
Cinkwa awaini
Kupobwe lipya eeli, Jesu wakabelesya cinkwa citakwe bumena alimwi awaini uusalala izyakasyaala ku Pobwe Lyakwiindilila. (Matayo 26:26-28) Kutobela cikozyanyo cakwe, tubelesya cinkwa citajisi bumena naa citabikkidwe budodoodo buli boonse alimwi awaini uusalala uutavweledwe.
Zikombelo zimwi zibelesya cinkwa cijisi bumena, pele mu Bbaibbele kanji-kanji bumena bwiiminina cibi akusofwaala. (Luka 12:1; 1Bakorinto 5:6-8; Bagalatiya 5:7-9) Aboobo, cilikke cinkwa citajisi bumena abudodoodo buli boonse ncecikonzya kweelela kwiiminina mubili wa Kristo uutakwe cibi. (1Petro 2:22) Acimbi cilengwa citali camu Bbaibbele ncakubelesya minsaansa kupanga waini. Zikombelo zimwi zilacita oobo akaambo katwaambo tutali twamumagwalo twakukasya bantu kunywa bukoko.—1Timoteyo 5:23.
Zitondezyo, kutali mubili wini abulowa
Cinkwa citajisi bumena awaini uusalala izibelesyegwa lya Ciibalusyo nzitondezyo zyamubili wa Kristo abulowa. Tazicincwi camaleele naa kusanganizyigwa amubili wini wa Kristo naa bulowa, kweelana ambobayeeya bamwi. Amulange-lange ncaamba Magwalo kujatikizya makani aaya.
Ikuti Jesu wakalailila basikwiiya bakwe kunywa bulowa bwakwe, nkokuti wakali kubaambila kutyola mulawo wa Leza uujatikizya kulya bulowa. (Matalikilo 9:4; Milimo 15:28, 29) Kunyina nocakacitika eeco, nkaambo Jesu takonzyi kwaambila bamwi kutyola mulawo wa Leza uujatikizya mbobusetekene bulowa.—Johane 8:28, 29.
Ikuti baapostolo bakali kunywa bulowa bwa Jesu bwini, nkokuti Jesu naatakaamba kuti bulowa bwakwe “bweelede kutilwa ansi,” icitondezya kuti cipaizyo cakali kuyooboola kumbele.—Matayo 26:28.
Cipaizyo ca Jesu cakacitika “ciindi comwe buyo.” (Bahebrayo 9:25, 26) Nokuba boobo, ikuti cinkwa awaini zyakacincwa kuba mubili wini wa Jesu alimwi abulowa ciindi ca Mulalilo wa Mwami, nkokuti aabo ibalya nobali kupa cipaizyo eeco cakwinduluka-induluka.
Jesu wakaamba kuti: “Kamucita oobu lyoonse kutegwa kamundiyeeya,” kutali “kundituula.”—1Bakorinto 11:24.
Aabo basyoma kuti cinkwa awaini zilacinca kuba mubili wini wa Jesu alimwi abulowa, njiisyo yabo iyeeme amajwi aamwi aamutupango twamu Bbaibbele. Mucikozyanyo, muma Bbaibbele manji, Jesu waamba boobu kujatikizya waini: ‘Oobu mbulowa bwangu.’ (Matayo 26:28) Nokuba boobo, majwi aa Jesu alimwi alakonzya kusandululwa kuti: “Eeci ciiminina bulowa bwangu.” Mbubwenya mbwaakali kucita ziindi zinji, Jesu aawa wakali kuyiisya kwiinda mukubelesya maambilambali.—Matayo 13:34, 35.
baani balya?
Ciindi Bakamboni ba Jehova nobacita Mulalilo wa Mwami, mbasyoonto buyo ibalya cinkwa alimwi akunywa waini. Nkaambo nzi ncocili boobo?
Bulowa mbwaakatila Jesu bwakatalisya “cizuminano cipya” calo cakanjila mubusena bwacizuminano icakali akati ka Jehova alimwi acisi cakaindi cabana Israyeli. (Bahebrayo 8:10-13) Aabo ibali mucizuminano eeco cipya mbabalya zitondezyo lya Ciibalusyo. Cizuminano eeco tacibikkilizyi Banakristo boonse, pele buyo “baabo bakaitwa” munzila iilibedelede a Leza. (Bahebrayo 9:15; Luka 22:20) Aaba mbabayoolela kujulu antoomwe a Kristo, alimwi Bbaibbele lyaamba kuti aabo bajisi coolwe eeci bali buyo 144,000.—Luka 22:28-30; Ciyubunuzyo 5:9, 10; 14:1, 3.
Mukwiimpana ‘akatanga kaniini’ kabaabo ibayoolela a Kristo, bunji bwesu tujisi bulangizi bwakuba cibeela ‘cankamu mpati’ iiyootambula buumi butamani anyika. (Luka 12:32; Ciyubunuzyo 7:9, 10) Aboobo swebo notujisi bulangizi bwakuyoopona anyika tatunywi naa kulya zitondezyo lya Ciibalusyo, pele tulabasangana mukutondezya kulumba kukulyaaba nkwaakacita Jesu akaambo kandiswe.—1 Johane 2:2.
MARCH 25-31
MBONO IZILI MU JWI LYA LEZA | INTEMBAUZYO 22
Makani Aamwi Aajatikizya Lufwu lwa Jesu Akasinsimwa
Bakamujana Mesiya
16 Mesiya uyakulimvwa kulekelezyegwa. (Amubale Intembauzyo 22:1.) Kweelana abusinsimi, “muwoola lyafwuka [kacitandila 3 koloko yakumazuba], Jesu wakoongolola kuti: ‘Eli, Eli, lama sabakitani?’ Eeci casandululwa caamba kuti: ‘Leza wangu, Leza wangu, ino wandilekelezyela nzi?’” (Mk. 15:34) Jesu kunyina naakaleka kubasyoma Bausyi bakujulu. Leza tanaakamukwabilila Jesu Kristo kuli basinkondonyina kutegwa lusyomo lwakwe lusunkwe cakumaninina. Akaambo kakulila kweelana ambwaakacita, Jesu wakazuzikizya lugwalo lwa Intembauzyo 22:1.
Bakamujana Mesiya
13 Davida wakasinsima kuti Mesiya uyakufwubaazyigwa. (Amubale Intembauzyo 22:7, 8.) Jesu wakafwubaazyigwa naakali aacisamu cakupenzyezya, Matayo wakaamba kuti: “Bantu ibakali kwiinda munzila bakatalika kumusampaula akugunya-gunya mitwe kumwi kabati: ‘Yebo ookonzya kumwaya tempele akwiiyakulula mumazuba otatwe, kolifwutula we! Ikuti koli mwana wa Leza, koseluka acisamu cakupenzyezya!’” Mbubwenya buyo, basilutwe babapaizi, balembi abapati, bakamufwubaazya kabati: “Bamwi wakali kubafwutula; walo mwini takonzyi kulifwutula! Mwami wa Isilayeli; amumuleke lino aseluke acisamu cakupenzyezya, aboobo tulamusyoma. Usyoma muli Leza; amumuleke lino amuvwune ikuti kamuyanda, nkaambo waamba kuti, ‘Ndili Mwana wa Leza.’” (Mt. 27:39-43) Pele nozyimucitikila zyoonse eezyi, Jesu wakazumanana kusyomeka. Eelo kaka eeci ncikonzyanyo cibotu kulindiswe!
Bakamujana Mesiya
14 Cisolo cakawaalwa kucisani ca Mesiya. Sintembauzyo wakalemba kuti: “Balaabilana zyakusama zyangu, acibaki cangu balaciwaalila cisolo.” (Int. 22:18) Oobo mbocakacitika, nkaambo “[basikalumamba bana Roma] nobakamugagaila acisamu [Jesu], bakaabana zisani zyakwe zyaatala kwiinda mukuuma cisolo.”—Mt. 27:35; amubale Johane 19:23, 24.
Mbono Zyakumuuya
Sena Muli ‘Cikozyanyo Cibotu Mukwaambaula’?
12 Toonse tulakonzya kupa kuti miswaangano yambungano kaikkomanisya ikuti twaimbila antoomwe alimwi akupa bwiinguzi bwakalibambilwa kabotu. (Int. 22:22) Bamwi cilabayumina kwiimba naa kupa bwiinguzi mubuleya. Sena andinywe cilamukatazya? Ikuti kacili boobo, mulakkomana kuzyiba icakagwasya bamwi kuzunda penzi eeli.
AMUSUNGWAALE MUMULIMO WAMUMUUNDA
Amusinizye Kuti Nzyomusyoma Nkasimpe
14 Businsimi bwamu Bbaibbele ncibeela ciyandika kapati ca Jwi lya Leza icitugwasya kuyumya lusyomo muli Jehova. Ino mbusinsimi nzi ibwakayumya lusyomo lwanu? Ambweni mulakonzya kwaamba businsimi ibujatikizya “mazuba aamamanino.” (2Tim. 3:1-5; Mt. 24:3, 7) Pele ino mbusinsimi nzi bumwi ibwakazuzikizyigwa kale ibukonzya kuyumya lusyomo lwanu? Mucikozyanyo, sena inga mwapandulula mbobwakazuzikizyigwa kaindi alimwi ambobuli mukuzuzikizyigwa businsimi ibulembedwe kulugwalo Daniele caandaano 2 naa Daniele caandaano 11? Ikuti kamujisi lusyomo iluyeeme kapati aa Bbaibbele, lusyomo luli boobo talukazungaani pe. Amubone cikozyanyo cabakwesu ibakapenzyegwa kapati ku Germany ciindi ca Nkondo Yanyika Yoonse Yabili. Nokuba kuti tiibakabumvwisya cakumaninina businsimi bwamu Bbaibbele ibujatikizya mazuba aakumamanino, bakalijisi lusyomo luyumu mu Jwi lya Leza.
15 Mubulelo bwa Nazi Germany, bakwesu alimwi abacizyi banji kapati bakatolwa muzilabba zyakupenzyezya. Hitler alimwi a Silutwe wa SS Heinrich Himmler tiibakali kubayanda naaceya Bakamboni ba Jehova. Kweelana ambwaakaamba mucizyi umwi, Himmler wakaambila kakamu kabacizyi ibakali mucilabba cakupenzyezya kuti: “Jehova wanu weendelezya kujulu, pele aano anyika ndiswe tweendelezya! Tulabona naa mbaani ibayakoongola, nywebo naa swebo!” Ino ncinzi cakabagwasya bantu ba Jehova kuzumanana kusyomeka?
16 Basikwiiya Bbaibbele aaba bakalizyi kuti Bwami bwa Leza bwakatalika kulela mu 1914. Kunyina nocakabagambya ciindi nobakali kupenzyegwa citaambiki. Nokuba boobo, bantu ba Jehova bakalizyi kuti kunyina mfwulumende yabantu iyakali kukonzya kukasya makanze aa Leza kuti azuzikizyigwe. Hitler kunyina naakali kukonzya kunyonyoona bukombi bwakasimpe naa kubikka mfwulumende iilaanguzu kapati kwiinda Bwami bwa Leza. Bakwesu alimwi abacizyi bakalisinizyide kuti olo cibe buti, bulelo bwa Hitler bwakali kuyoomana.
17 Lusyomo ndobakajisi bakwesu alimwi abacizyi aaba lwakali lwamasimpe. Tiilyakalampa, bulelo bwa Nazi bwakamana, mpoonya Heinrich Himmler iwakaambide kuti “aano anyika ndiswe tweendelezya” wakatija. Ciindi naakali kuyaabutija, wakaswaanganya Mukwesu Lübke iwakali mwaange walo ngwaakazyi kuti ngu Kamboni wa Jehova. Katyompedwe kapati, Himmler wakabuzya Mukwesu Lübke kuti: “Yebo Sikwiiya Bbaibbele, ino ncinzi cicitika?” Mukwesu Lübke wakamupandulwida Himmler kuti Bakamboni ba Jehova bakalizyi kuzwa kaindi kuti bulelo bwa Nazi buyoomana alimwi akuti Bakamboni ba Jehova bayakwaanguluka. Himmler, walo iwakali kwaamba zintu zibyaabi kujatikizya Bakamboni ba Jehova, wakabula acakwaamba. Tiilyakalampa, Himmler wakalisina. Ino twiiya nzi? Kubala Bbaibbele, kubikkilizya abusinsimi buli mulindilyo, kulakonzya kuyumya lusyomo lwesu muli Leza alimwi akutupa busicamba muziindi zyamasunko.—2Pet. 1:19-21.
APRIL 1-7
MBONO IZILI MU JWI LYA LEZA | INTEMBAUZYO 23-25
“Jehova Mweembezi Wangu”
“Aabo Bayandaula Jehova Tabakabuli Cintu Cibotu Niciba Comwe”
5 Ncinzi Davida ncaakali kupandulula naakaamba kuti babelesi ba Jehova “tabakabuli cintu cibotu niciba comwe”? Ciindi Davida naakalemba Intembauzyo 23, wakabelesya majwi aakozyenye ayaaya. Aboobo ntembauzyo eeyo ilakonzya kutugwasya kumvwisya ncaakali kupandulula. (Amubale Intembauzyo 23:1-6.) Davida wakatalika ntembauzyo eeyo amajwi aakuti: “Jehova Mweembezi wangu. Kunyina ncondiyoobula pe.” Mpoonya mutupango tutobela, Davida wakaamba zintu ziyandika kapati, mbuli zilongezyo zinji zyakumuuya nzyaakajana kwiinda mukuzumina Jehova kuba Mweembezi wakwe. Jehova wakali kumusololela “munzila zyabululami” alimwi cakusyomeka wakamugwasyilizya kapati Davida muziindi zibotu azyamapenzi. Davida wakazumina kuti buumi bwakwe “mumacelelo aamweemvwe” aa Jehova bwakali kuyooba amapenzi. Zimwi ziindi, wakali kutyompwa mbuli kuti weenda “mukkuti lisiya mbi,” alimwi wakali kuyooba abasinkondonyina. Pele mbwaanga Jehova wakali mweembezi wakwe, Davida ‘kunyina cintu cibi ncaakali kuyooyoowa.’
6 Aboobo aawa twabujana bwiinguzi kumubuzyo wesu wakuti: Munzila nzi Davida ‘mwaatakabula cintu cibotu niciba comwe’? Munzila yakumuuya, wakalijisi zyoonse nzyaakali kuyandika. Lukkomano lwakwe tiilwakayeeme azintu zyakumubili. Davida wakakkutila azintu Jehova nzyaakamupede. Zintu izyakali kuyandika kapati kulinguwe nzilongezyo alimwi alukwabililo lwa Leza.
Inguzu Zyakukwabilila—“Leza Maccijilo Eesu”
Kuli acimbi ncapa Jehova citukwabilila: cakulya cakumuuya cipegwa aciindi ceelede. Ikutegwa atugwasye kujana nguzu kuzwa mu Jwi lyakwe, Jehova wapa mukuli ku “muzike musyomesi uucenjede” kuti abambe akumwaya cakulya cakumuuya. Eeco ciinga camuzike musyomesi cibelesya mabbuku aasimbidwe, kubikkilizyaa mamagazini aa Ngazi Yamulindizi a Awake!, alimwi amiswaangano yambungano, yabbazu ayacooko ikutegwa citupe ‘zilyo kuciindi ceelede’—eezyo nzyotuyandika alimwi aaciindi notuziyanda. (Matayo 24:45) Sena kuli ncomwakamvwa lyamuswaangano wa Bunakristo—mukwiingula kwaumwi, mumakani nomuba mumupailo—icakamupa nguzu alimwi akukulwaizyigwa nzyomwakali kuyandika? Sena kuli nomwakakulwaizigwa acibalo cimwi cigaminide icakamwaigwa mumagazini yesu imwi? Kamuyeeya kuti, Jehova wapa zintu eezi zyoonse ikutegwa tukwabililwe munzila yakumuuya.
Mbono Zyakumuuya
11 2/15 24 ¶1-3
Mweelede Kuyanda Bululami Amoyo Wanu Woonse
KWIINDA mu Jwi lyakwe alimwi amuuya wakwe uusalala, Jehova ulasololela bantu bakwe “munzila zyabululami.” (Int. 23:3) Pele akaambo kakutalondoka, zimwi ziindi tulaleya kuzwa munzila eeyi. Kutegwa tutalike alimwi kucita ciluzi, tweelede kusolekesya. Ino ncinzi ciyootugwasya kuzwidilila? Mbubwenya mbuli Jesu, tweelede kuyanda kucita ciluzi.—Amubale Intembauzyo 45:7.
2 Ino “nzila zyabululami” ninzi? Nzila eezyi ziiminina bukkale bwesu mubuumi kweelana azyeelelo zya Jehova zyabululami. Mu Chihebrayo amu Chigiliki, “bululami” caamba kupona kweelana anjiisyo zyakulilemeka. Akaambo kakuti Jehova “[n]cikalilo cabululami,” bakombi bakwe balanga kuli nguwe kuti nguweelede kubatondezya nzila yabululami njobeelede kutobela.—Jer. 50:7.
3 Tulakonzya kumukkomanisya Leza lilikke notupona kweelana azyeelelo zyakwe ziluleme. (Dt. 32:4) Tulakonzya kucita oobo kwiinda mukwiiya kujatikizya Jehova Leza mu Jwi lyakwe, Ibbaibbele. Ikuti twazumanana kwiiya kujatikizya nguwe, tuyoozumanana kuswena kulinguwe mazuba oonse, alimwi tuyooyandisya bululami bwakwe. (Jak. 4:8) Alimwi tweelede kuzumina busolozi bwa Jwi lya Leza ilyakasololelwa amuuya ciindi notuyandika kusala zyakucita mubuumi bwesu.
APRIL 8-14
MBONO IZILI MU JWI LYA LEZA | INTEMBAUZYO 26-28
Ncaakacita Davida Kutegwa Azumanane Kusyomeka Kuli Jehova
Amweende Cakululama
8 Davida wakapaila kuti: “Undilingule, O Jehova, ubone mbombede: Undisunke kumiyeeyo akumoyo.” (Intembauzyo 26:2) Ibbala lya Chihebrayo lisanduludwe kuti “miyeeyo” mukapango aaka liiminina mizeezo njajisi muntu ooyo alimwi ambwalimvwa. Imoyo wacikozyanyo caamba muntu mbwabede, nkokuti makanze, mbwalimvwa alimwi abusongo mbwajisi. Davida naakalomba Jehova kuti amulingule, wakalomba kuti miyeeyo njajisi alimwi ambwalimvwa azilange-lange kabotu.
9 Davida wakalomba kuti miyeeyo yakwe alimwi amoyo zilingulwe. Ino mbuti Jehova mbwalingula muntu mukati? Davida wakaimba kuti: “Ndalumba Jehova uundilaya; Akati kamasiku moyo wangu ulandiiyisya.” (Intembauzyo 16:7) Ino eeci caamba nzi? Caamba kuti lulayo lwa Leza lwakamunjila mumubili Davida akukkalilila mukati, aboobo zyakali kululamika miyeeyo yakwe alimwi ambwalimvwa. Eeci cilakonzya kucitika akulindiswe ikuti naa katutondezya kulumba lulayo ndotutambula kuzwa mu Jwi lya Leza, kubaiminizi bakwe alimwi akumbunga yakwe kuti lukkalilile mulindiswe. Ikupaila lyoonse kuli Jehova ikuti atusunke munzila iili boobu kuyootugwasya kweenda cakululama.
Amweende Cakululama
12 Kaamba kaambo akambi kakapa kuti ayume mubululami, Davida wakaamba kuti: “Nsinakede abantu [bataambi zyakasimpe], nsinakweenda abasikuupaupa ameso. Ndisulide imbungano yabasizibi, nsikali antoomwe ababi.” (Intembauzyo 26:4, 5) Davida tanaakali kuyanda kukkala abantu babyaabi. Tanaakali kuyanda kuyanzana abantu batali kabotu.
13 Ino mbuti kujatikizya ndiswe? Sena tulakaka kuyanzana abantu bataambi zyamasimpe kwiinda mumapulogilamu aacipekupeku, mumavidiyo, mumabbasikopo aajisi zifwanikiso zyeendeenda, aa intaneti naa munzila zimwi? Sena tulabatantamuka basikuupaupa ameso? Ibamwi kucikolo naa kumilimo balakonzya kubamba cilongwe andiswe ikutegwa batweene. Sena masimpe tulayanda kubamba cilongwe abaabo ibateendi mukasimpe ka Leza? Nokuba kuti balakonzya kwaamba kuti balisinizyide, basiluleyo abalo balakonzya kuupaupa ameso kabajisi makanze aakutulesya kubelekela Jehova. Ino mbuti ikuti naa ibamwi mumbungano ya Banakristo kabapona buumi bwakuupaupa ameso? Abalo balasisa mbobabede ncobeni. Jayson lino uuli mukutausi, wakalijisi balongwe ibali boobu kacili mukubusi. Wakaamba boobu kujatikizya mbabo: “Umwi wabo wakandaambila kuti: ‘Kunyina makani azintu nzyotucita lino, nkaambo bweende bupya bwaakuboola tunoofwide kale. Tatukazyibi kuti twaindwa cintu cili coonse.’ Ikwaambaula boobu kwakandicenjezya. Tandiyandi kuti kandinoofwide bweende bupya bwaakusika.” Cabusongo Jayson wakacileka kuyanzana abantu bali boobu. Mwaapostolo Paulo wakacenjezya kuti: “Mutalyeeni. Mweenda abamineme, anywebo mulaminama.” (1 Ba-Korinto 15:33) Elo cilayandika kaka ikutantamuka kuyanzana abantu babi!
Amweende Cakululama
17 Itente lyakubunganina kubikkilizya acipaililo cazipaizyo bwakali busena mbwakali kukombelwa Jehova mu Israyeli. Katondezya mbwaakali kubuyanda busena oobo, Davida wakapaila kuti: “O Jehova, ndayandisya mokede muŋanda yako, abusena bukede bulemu bwako.”—Intembauzyo 26:8.
18 Sena tulayandisya kuswaangana abusena mpotuyiila kujatikizya Jehova? Ŋanda ya Bwami aimwi kubikkilizya amapulogilamu aalulayo lwakumuuya aacitwa lyoonse ilabeleka kabuli busena bwabukombi bwakasimpe mubusena moibede. Kunze lyaboobo, tulijisi miswaangano yacooko iicitwa amwaka, miswaangano yabbazu alimwi ayaalubazu. “Milumbe” ya Jehova ilabandikwa kumiswaangano iili boobo. Ikuti naa ‘tulaiyandisya,’ tunoolibambide kujanika kumiswaangano alimwi tunoobikkila maano notuli nkuko. (Intembauzyo 119:167) Elo kaka cilakatalusya ikuba abasyomima ibayanda kuti katupona kabotu alimwi ibatugwasya kuzumanana kweenda cakululama!—Ba-Hebrayo 10:24, 25.
Mbono Zyakumuuya
Jehova Ulavwuna Muntu Uupengede
15 Sintembauzyo Davida wakaimba kuti: “Taata abama nebandisia, Jehova ulandibamba.” (Intembauzyo 27:10) Cilaumbulizya kaka kuziba kuti luyando lwa Jehova lulainda ali loolo lwamuzyali! Nokuba kuti ikukakwa, kutundululwa, naa kusoogwa amuzyali kupa moyo kucisa, eezyo tazipi kuti Jehova atamubikkili maano. (Ba-Roma 8:38, 39) Kamuyeeya kuti Leza nguukwela baabo mbayanda. (Johane 3:16; 6:44) Kunyina makani ambobamucita bantu, Bauso bakujulu balamuyanda!
AMUSUNGWAALE MUMULIMO WAMUMUUNDA
lmd makani aayungizyidwe A kaambo 3
Makani Aamu Bbaibbele Ngotukkomanina Kuyiisya
2. Nyika tiikasofwaazyigwi alimwi iyooba paradaiso.—Is. 35:1, 2; Ciy. 11:18.
APRIL 15-21
MBONO IZILI MU JWI LYA LEZA | INTEMBAUZYO 29-31
Kululamikwa, Ncitondezyo Caluyando lwa Leza
it-1 802 ¶3
Busyu
‘Kusisa busyu’ kulakonzya kwaamba zinji kweelana abukkale. Kusisa busyu kwa Jehova Leza bunji bwaziindi kwaamba kuti waleka kumukkomanina muntu uumwi naa wazilesya nguzu zyakwe kubeleka mumuntu ooyo. Eeci cilakonzya kuba akaambo kakutamvwida kwamuntu naa bantu bajatikizyidwe, mbuli cisi cabana Israyeli. (Job. 34:29; Int. 30:5-8; Is. 54:8; 59:2) Zimwi ziindi kulakonzya kwaamba kuti Jehova tayiinguli mipailo, kusikila aciindi cakwe ceelede. (Int. 13:1-3) Mumupailo wakwe Davida wakalomba Leza kuti, ‘Kosisa busyu bwako kuzibi zyangu,’ kulomba Leza kuti amulekelele naa kuti azibikke aambali zibi zyakwe.—Int. 51:9; amweezyanisye Int. 10:11.
Amulekele Jehova Kuti Amutontozye
Amulutambule lulayo. Ciindi Jehova naakatuma musinsimi Natani kuyooyubununa cibi ca Davida, Davida kunyina naakatalika kwaamba twaambo twakulitamizya naa kusola kuubya-ubya cibi ncaakacita. Cakutawaya-waya wakazumina kuti tanaakabisizya buyo mulumi wa Bati-seba, pele kwiinda zyoonse, wakabisizya Jehova. Davida wakalutambula lulayo luzwa kuli Jehova, aboobo Jehova wakamulekelela. (2Sam. 12:10-14) Kuti twacita cibi cipati, tweelede kubaambila aabo Jehova mbasalide kuti kabatusololela. (Jak. 5:14, 15) Alimwi tweelede kweeleba cilengwa cakwaamba twaambo twakulitamizya. Ikuti twafwambaana kulutambula alimwi akulubelesya lulayo luli loonse ndotwapegwa, tuyoofwambaana kuba aluumuno alimwi alukkomano.
Ino Kweempwa Kwini-kwini Ninzi?
18 Kutegwa atondezye kuti weempwa ncobeni, muntu uugusyidwe weelede kujanika kumiswaangano lyoonse, kupaila alimwi akubala Bbaibbele abuzuba. Alimwi weelede kubeleka canguzu kutantamuka zintu izyakamupa kucita cibi. Kuti wabeleka canguzu kubambulula cilongwe cakwe a Jehova, inga waba alusyomo lwakuti Jehova ulamulekelela cakumaninina alimwi akuti baalu balamupilusya mumbungano. Nokuba boobo, ciindi baalu nobasola kuzyiba naa muntu weempwa ncobeni, balizyi kuti bukkale bumwi abumwi buliindene. Aboobo cakubikkila maano balabulanga-langa bukkale bumwi abumwi.
Mbono Zyakumuuya
wp23 No. 1 p. 6 ¶3
Mupailo “Kamuwaala Makatazyo Aanu Oonse Kulinguwe”
Kubandika a Jehova mumupailo kuyumya lusyomo lwesu lwakuti ulatubikkila maano. Tulakonzya kulimvwa mbuli sintembauzyo wakapaila kuti: “Wakubona kupenga kwangu; waazyiba mapenzi aangu mapati.” (Intembauzyo 31:7) Kuzyiba buyo kuti Jehova ulakubona kupenga kwesu, cilatugwasya kuliyumya ciindi notujana mapenzi. Pele ulacita zinji kunze buyo lyakubona mapenzi eesu. Kwiinda muntu uuli woonse, ulaamvwisya mapenzi ngotujisi alimwi ulatugwasya kujana luumbulizyo akutukulwaizya kuzwa mu Bbaibbele.
APRIL 22-28
MBONO IZILI MU JWI LYA LEZA | INTEMBAUZYO 32-33
Nkaambo Nzi Ncomweelede Kulyaambilila Cibi Cipati?
Mutatyompwi Pe
Ncinzi ncotweelede kucita ikuti twacita cibi cipati? Amulombe lugwasyo kakutanainda ciindi. Kusisa makani kuyakupa kuti penzi likomene. Amuyeeye kuti Davida wakaamba kuti ciindi naakasisa zibi zyakwe, ‘mubili wakwe wakali kuyaabumana, wakali kutongela buzuba boonse.’ (Int. 32:3) Inzya, kusisa cibi kuyakupa buyo kuti tukatale mumizeezo akumuuya, pele “oyo uulyaambawida akuleka ulafwidwa luzyalo.”—Tus. 28:13.
Leza ‘Uufwambaana Kujatila’
8 Davida iwakeempedwe wakati: “Ndakalyaambawida cibi cangu kulinduwe, teendakasisa bubi bwangu; . . . Nkabela wakandilekelela mulandu wazibi zyangu.” (Intembauzyo 32:5) Ibbala lyakuti “wakandilekelela” lisanduludwe kubbala lya Cihebrayo lyalo ilyaamba “kugwisya” naa “kusowa.” Aawa lyabelesyegwa kwaamba kugwisya “mulandu, cibi naa nsotoko.” Aboobo cini ncaakacita Jehova ncakuti wakagwisya zibi zya Davida akuzisowa. Cakutadooneka, eeci cakaubya-ubya kulibilika kwa Davida akaambo kamulandu ngwaakajisi. (Intembauzyo 32:3) Aswebo tulakonzya kumusyoma cakumaninina Leza ooyo uusowa zibi zyabaabo ibamulomba kuti abalekelele kwiinda mulusyomo ndobajisi mucituuzyo ca Jesu cacinunuzyo.—Matayo 20:28.
Kulimvwa Kuba Amulandu—“Kondisalazya Kucibi Cangu”
Mpindu mpati njaakajana Davida njakuti wakatalika kukkomana alimwi. Wakalemba kuti: “Ulikkomene ooyo wajatilwa mulandu wakwe, uulaacibi icalekelelwa.” (Intembauzyo 32:1, bupanduluzi buyungizyidwe) Alimwi wakapaila kuti: “O Jehova,kojalula milomo yangu, kutegwa mulomo wangu ukonzye kwaambilizya ntembauzyo zyako.” (Intembauzyo 51:15) Ciindi naakalimvwa kwaanguluka kumulandu wakwe akumulumba Leza akaambo kakuti wakamulekelela, Davida wakakulwaizyigwa kwaambila bamwi kujatikizya Jehova.
Jehova uyanda kuti andinywe mulimvwe kwaanguluka akaambo kakuba amanjezyeezya aasalala. Alimwi uyanda kuti mukonzye kwaambila bamwi kujatikizya nguwe amakanze aakwe, kakunyina kulimvwa kuba amulandu, pele kakutuba kumoyo alimwi kamukondedwe kapati. (Intembauzyo 65:1-4) Amuyeeye kuti umutamba kuti “zibi zyanu zimwaigwe, ikutegwa ziindi zyakukatalukwa zimusikile kuzwa kuli Jehova lwakwe.”—Milimo 3:19.
Mbono Zyakumuuya
Twaambo Tupati-Pati Kuzwa Mubbuku Litaanzi lya Intembauzyo 33:6;—Ino “muya” wamukanwa lya Jehova ninzi?
Ooyu muuya ninguzu nzyabelesya Leza, naa muuya uusalala, ooyo ngwaakabelesya mukulenga ijulu nditubona. (Matalikilo 1:1, 2) Waambwa kuti mmuuya wamukanwa mwakwe akaambo kakuti, mbubwenya mbuli muuya wafwulidwa, ulakonzya kuzwa akuzuzikizya zintu zili kulamfwu.
APRIL 29–MAY 5
MBONO IZILI MU JWI LYA LEZA | INTEMBAUZYO 34-35
“Amumutembaule Jehova Ciindi Coonse”
Atusumpule Zina lya Jehova Toonse
11 “Nootembaula Jehova kuziindi zyoonse, intembauzyo zyakwe zilaba mukanwa lyangu lyoonse.” (Intembauzyo 34:1) Kali muzangalisi, Davida weelede kuti wakali kulibilika kujatikizya ziyandika zyakumubili, pele kweelana amajwi aaya, kunyina naakazumizya zintu ziyandika abuzuba kunyonganya makanze aakwe aakutembaula Jehova. Eeci ncikozyanyo cibotu kulindiswe ciindi notusikilwa mapenzi. Kufwumbwa naa tuli kucikolo, kumulimo, katuli a Banakristoma, naa mumulimo ngotucita kubuleya, ncotweelede kubikkila maano kapati nkutembaula Jehova. Amuyeeye buyo twaambo tutalivwulili itweelede kutupa kucita boobo. Mucikozyanyo, zintu zigambya nzyaakalenga Jehova nzyotukonzya kuziba alimwi akukkomanina tazimani pe. Alimwi amuyeeye buyo ncaazuzikizya kwiinda mumbunga yakwe yaanyika. Nokuba kuti tabalondokede, Jehova wabelesya bantu basyomeka mazuba aano munzila iigambya. Sena milimo eeyi ya Leza kuli noinga yeelanyisigwa anzyobacita bantu balemekwa kapati munyika? Cakutadooneka, mulakonzya kwaamba bwakaamba Davida iwakalemba kuti: “Akati kabaambwa kuti mbaaleza, taakwe ulaamilimo iinga yeelana ayako.”—Intembauzyo 86:8,
Atusumpule Zina lya Jehova Toonse
13 “Muuya wangu ulalikankaizizya Jehova. Babombede baswiilile akukondwa.” (Intembauzyo 34:2) Aawa Davida tanaakali kulikankaizya kujatikizya nzyaakazuzikizya walo kumugama. Mucikozyanyo, kunyina naakalikankaizya kujatikizya mbwaakacenga mwami wa Gati. Wakalizi kuti Jehova nguwakamukwabilila naakali mu Gati alimwi akuti wakatija kwiinda mukugwasyigwa anguwe. (Tusimpi 21:1) Aboobo, Davida kunyina naakalisumpula pele wakalumba Jehova. Kwiinda mukucita boobo, babombe moyo bakaba acilongwe a Jehova. Mbubwenya buyo, Jesu wakali kutembaula zina lya Jehova alimwi eeci cakapa kuti bantu balicesya alimwi ibazumina kuyiisyigwa babe acilongwe a Leza. Mazuba aano, babombe moyo bamasi oonse balaboola kumbungano njasololela Jesu ya Banakristo bananike nyika yoonse mboizulwa. (Ba-Kolose 1:18) Bantu aaba babombe moyo balakulwaizigwa nobamvwa zina lya Leza kalitembaulwa ababelesi bakwe balicesya alimwi anobaswiilila mulumbe wamu Bbaibbele akuumvwisya kwiinda mukugwasyigwa amuuya uusalala wa Leza.—Johane 6:44; Incito 16:14.
Atusumpule Zina Lya Jehova Toonse
15 “Ndakayandaula Jehova, nkabela wakandivwiila, wa[ka]ndivuna kukuyoowa kwangu koonse.” (Intembauzyo 34:4) Davida kunyina naakaluba cakamucitikila aciindi eeci. Aboobo, wakazumanana ategwa: “Oyu uupengede wakakwiila, lino Jehova wakaswiilila, wa[ka]muvuna mumapenzi aakwe oonse.” (Intembauzyo 34:6) Notuyanzana abasyomima, tulijisi coolwe cakwaamba zyakuluula ziyaka kujatikizya mbwaakatugwasya Jehova kutegwa tuliyumye mubukkale bukatazya. Kucita boobo kulayumya lusyomo lwa basyomima, mbubonya zyakuluula zya Davida mbozyakayumya lusyomo lwa basikumugwasilizya. Kujatikizya Davida, beenzinyina ‘bakalanga kuli Jehova eelyo masyu aabo akamweka, taakwe nobakafwa insoni.’ (Intembauzyo 34:5) Nokuba kuti bakali kutija Mwami Saulo, tiibakausa pe. Bakali kusyoma kuti Leza wakali a Davida alimwi bakalikkomene. Mbubonya buyo, ibapya alimwi a Banakristo ibabelekela Jehova kwamyaka minji balangila Jehova kuti abagwasye. Mbwaanga balo kubagama bakagwasyigwa anguwe, ilukkomano lwabo lutondezya kuti balikanzide kuzumanana kusyomeka.
Mbono Zyakumuuya
Twaambo Tupati-Pati Kuzwa Mubbuku Litaanzi lya Intembauzyo
35:19—Ncinzi caambwa mukulomba kwa Davida kwakuti bamusulide batamufwunyini liso? Ikufwunya liso kwakali kuyootondezya kuti basinkondonyina Davida bakalikkomene akuzwidilila kwamakanze aabo aalunya kujatikizya nguwe. Davida wakalomba kuti eeci citacitiki.