“Ndilamubelekela Jehova Kusikila Mpondigolela”

Ba Irma, ibakkala ku Germany bajisi myaka iitandila ku 90. Kuzwa nobakali muntenda kwaziindi zyobilo alimwi akwaandulwa kwaziindi zinji, tabacicikonzyi kukambauka kuŋanda aŋanda mbuli mbobakali kucita kaindi. Lino babelesya magwalo kwaambila banamukwasyi alimwi abalongwe kujatikizya nzyobasyoma. Magwalo ngobalemba aayumya-yumya alabakkomanisya bantu cakuti kanji-kanji balatuma kubuzya naa lugwalo lutobela bayoolutambula lili. Abalo balatambula magwalo manji aakubalumba, akubalomba kuti bazumanane kunoobalembela. Ba Irma baamba kuti, “Eeci cilandikkomanisya akundikulwaizya kuzumanana kukambauka.”

Kuyungizya waawo, ba Irma balatuma magwalo kumaanda nkobalanganya bacembeede. Bakati: “Mucembele umwi wakanditumina fooni akundaambila kuti lugwalo ndondakamutumina lwakamuyumya-yumya ciindi mulumi wakwe naakafwa. Lugwalo oolu uluyobweda mu Bbaibbele alimwi kanji-kanji ulalubala kumangolezya. Aumwi mukaintu iwakafwidwa mwaalumi caino-ino, wakaamba kuti lugwalo lwangu lwamugwasya kapati kwiinda mulumbe wakaambwa amupaizi wacikombelo. Wakajisi mibuzyo minji alimwi wakalomba kuti andiswaye kuŋanda.”

Mulongwe waba Irma umwi uutali Kamboni iwakalongela kubusena bumwi wakalomba kuti kabamulembela magwalo. Bakati, “Mukaintu ooyu ulaayobwede magwalo oonse ngondakamulembela. Naakafwa, mwanaakwe musimbi wakanditumina fooni. Mpoonya wakandaambila kuti wakaabala magwalo oonse ngondakalembela banyina akundilomba kuti naa inga ndatalika kunoomulembela awalo.”

Ba Irma balabukkomanina kapati bukambausi oobu. Bakaamba kuti, “Ndilamulomba Jehova kuti azumanane kundipa nguzu zyakumubelekela. Nokuba kuti tandicicikonzyi kukambauka kuŋanda aŋanda ndilabeleka kusikila mpondigolela.”